მოძრაობა და კვლავ მოძრაობა, თუნდაც ოფისშიi

ფაქტია, რომ ჯანსაღი ცხოვრების კულტურა ჯერ კიდევ არ გაგვაჩნია. დასაქმებულთა უმეტესობას მჯდომარე სამსახური აქვს. ფიგურის ფორმის ცვლილება, მოდუნებული სხეული და ჭარბი წონაც რომ არად ჩავაგდოთ, ასეთი ცხოვრება მკვეთრად ზრდის მრავალი დაავადების, უპირველესად კი გულ-სისხლძარღვთა დაავადებების რისკს.
შესაძლოა, მრავალ თქვენგანს გააზრებულიც ჰქონდეს მჯდომარე ცხოვრების საფრთხე, მაგრამ, ჩემი არ იყოს, სამსახურისა და საოჯახო საზრუნავის მიღმა დრო თითქმის არ რჩებოდეს ფიზიკური აქტივობისთვის.
პრობლემამ სერიოზულად დამაფიქრა, ახლობლის რჩევაც გავითვალისწინე და ვფიქრობ, ერთგვარი გამოსავალი ვიპოვე – ვარჯიშის 10-15-წუთიანი პროგრამა, რომელსაც ოფისშიც იოლად შეასრულებთ, განურჩევლად იმისა, შარვალი გაცვიათ თუ კაბა.
ვგონებ, ღირს, ეს დრო ჯანმრთელობისთვის გაიმეტოთ, ვარჯიშის შემდეგ კი უფრო ხალისიანად და ენერგიულად განაგრძოთ საქმე. მერწმუნეთ, ამით თქვენც მოიგებთ და თქვენი სამუშაოც.
რა თქმა უნდა, ჯობს, ვარჯიშები პროფესიონალმა გვასწავლოს, ამიტომ, ტრადიციისამებრ, “ავერსის კლინიკის” ფიზიოთერაპიისა და რეაბილიტაციის სამსახურის მეთოდისტს მაია ხვიჩიას მივმართეთ.

– მაია, უმთავრესად რას უჩივიან ოფისში მომუშავე ადამიანები?

– მათ, ვისაც სამუშაოს სპეციფიკის გამო უმეტესად ჯდომა უწევს, ხშირად აწუხებთ თავის ტკივილი, კისრის დაჭიმულობა და დაძაბულობა, ბეჭების წვა, ქვედა კიდურების შეშუპება, დაღლილობის შეგრძნება. ეს სიმპტომები უფრო მკვეთრია, როცა ადამიანს კისრის ოსტეოქონდროზიც აქვს.
საზოგადოდ, ერთსა და იმავე პოზაში დიდხანს ყოფნა ამწვავებს ძვალსახსროვანი სისტემის დაავადებებს – ოსტეოქონდროზს, სკოლიოზს და სხვა, გარდა ამისა, ანელებს სისხლის მიმოქცევასა და ნივთიერებათა ცვლას, რაც მრავალ დარღვევას უდებს სათავეს.
ეს ყველაფერი შეიძლება თავიდან ავიცილოთ, თუ დღეში 10-15 წუთს მაინც ვივარჯიშებთ, უმჯობესია, ორჯერ, თუ არადა ერთხელ მაინც. კარგი იქნება, თუ კოლეგებსაც აიყოლიებთ – ერთად ვარჯიში უფრო სახალისოა. სხვათა შორის, წინათ დაწესებულებებში სავალდებულოდ იყო მიჩნეული სამკურნალო ფიზკულტურა, რაც მართლა უწყობდა ხელს კარგი განწყობისა და ჯანმრთელობის შენარჩუნებას.

თავისა და კისრის კუნთებისათვის

ეს ვარჯიშები შეგიძლია შეასრულოთ როგორც ფეხზე მდგომმა, ისე მჯდომარემაც. თუ ვესტიბულარული აპარატი სუსტი გაქვთ და მკვეთრ მოძაობებს ვერ იტანთ, შეგიძლიათ თვალდახუჭულმა ივარჯიშოთ. გაითვალისწინეთ, რომ თავ-კისრის ვარჯიშის დროს არ შეიძლება მკვეთრი მოძრაობების შესრულება. ორივე ვარჯიში შეასრულეთ 5-5 ჯერ:

• ხელები გაიწოდეთ წინ და ასწიეთ დახლოებით 45 გრადუსით (ეს აუმჯობესებს სისხლის მიმოქცევას სხეულის ზედა ნაწილში, ჭიმავს ზურგს, მართავს ხერხემალს). თავი გაასწორეთ,
  ნელა მიაბრუნეთ მარჯვნივ, გაჩერდით, დაუბრუნდით საწყის მდგომარეობას, ისევ გაჩერდით და იგივე მოძრაობა შეასრულეთ მეორე მხარეს. 

• ხელისგულები ზურგს უკან შეაერთეთ, როგორც სურათზეა. თავი გაასწორეთ, ნელა დახარეთ მარჯვნივ, თითქოს მხარზე ყურის დადებას ცდილობთ, გაჩერდით და ასევე ნელა დაუბრუნდით საწყის მდგომარეობას. იგივე მოძრაობა შეასრულეთ მარცხენა მხარესაც. ეს ვარჯიში ძალიან კარგად ჭიმავს კისრის კუნთებს.

ამ ვარჯიშებს შეგიძლიათ დაამატოთ თავის ტრიალი, წინ დახრა, უკან გადახრა, მაგრამ გაითვალისწინეთ, რომ თავის ნებისმიერი მოძრაობა სრულდება ნელა, ხოლო გვერდზე, წინ თუ უკან დახრის შემდეგ თავი ჯერ უნდა გაასწოროთ, გააჩეროთ და მერეღა გადახაროთ საწინააღმდეგო მხარეს.
ვარჯიშის თითოეული ელემენტი სრულდება სამ თვლაზე.