დავიბრუნოთ ფორმა

ყველა ვერ ახერხებს, ზაფხულს ისეთ ფორმაში შეხვდეს, რომ საზაფხულო ჩაცმულობა მოიხდინოს. დატვირთული რეჟიმის გამო ბევრს უჭირს, ფიტნესისა თუ ცურვისთვის რეგულარულად გამონახოს დრო. საბედნიეროდ, არსებობს ვარჯიშთა კომპლექსი, რომლის შესრულება შინაც შეიძლება. მთავარია, მოინდომოთ. დღეში ნახევარი საათი საკმარისია იმისთვის, რომ პლაჟზე გასეირნებისა არ შეგრცხვეთ.

ვარჯიშებს “ავერსის კლინიკის” რეაბილიტაციის სამსახურის მეთოდისტი მაია ხვიჩია გაგაცნობთ:

– კავკასიელ ქალებს ევროპელებზე განიერი თეძოები და მსხვილი ფეხები აქვთ, თუმცა ბოლო დროს თხელი კიდურებიც მომრავლდა.

წელსქვემოთა ზონის ფორმაში მოსაყვანად საჭიროა ფეხებისა და დუნდულა კუნთების გავარჯიშება.

ქვემოთ ვარჯიშების მაქსიმალური რაოდენობაა მითითებული. შეგიძლიათ, მცირედით დაიწყოთ და თანდათან მოუმატოთ.

პირველი ოთხი ვარჯიში ბარძაყის უკანა კუნთებისა და დუნდულა კუნთებისთვისაა განკუთვნილი. სრულდება 20-20-ჯერ თითოეული ფეხით. ცალი ფეხით 20-ჯერ შესრულების შემდეგ იგივე გააკეთეთ მეორით. გაიმეორეთ ორივე ფეხით 3-3-ჯერ და მომდევნო ვარჯიშზე გადადით.

ფეხი შეუსვენებლად, შეძლებისდაგვარად სწრაფად ამოძრავეთ და ეცადეთ, არ შეახოთ იატაკს.

1.

დაწექით გვერდზე. შეგიძლიათ, თავით ხელს დაეყრდნოთ. ფეხები გამართეთ, ცერები გაჭიმეთ. ცალი ფეხი ისე გასწიეთ წინ, რომ მეორის მიმართ 40-გრადუსიანი კუთხე შექმნას. ამ პოზიციიდან ზემოთა ფეხი ასწიეთ,  სადამდეც შეძლებთ, და დაუშვით.

2.

დადექით ოთხზე. ცალი ფეხი გაჭიმეთ, ასწიეთ, სადამდეც შეძლებთ და დაუშვით.

3.

ოთხზე მდგარმა, ცალი ფეხი გაჭიმეთ და 45-გრადუსით გასწიეთ განზე. იქამდე ასწიეთ, რომ ტანს გაუსწორდეს და დაუშვით.

4.

ისევ ოთხზე მდგარმა, ცალი მუხლის ქვეშ ერთკილოგრამიანი ჰანტელი ამოიდეთ (ამრიგად, ფეხი მაქსიმალურადაა მოხრილი და ჰანტელი ბარძაყსა და წვივს შორისაა მოქცეული). ფეხი ჩაიტანეთ ქვემოთ, ასწიეთ ისე, რომ ბარძაყი ტანს გაუსწორდეს, ისევ ქვემოთ ჩაიტანეთ, ისევ ასწიეთ და ასე ბოლომდე.

5

დაწექით მუცელზე. ფეხები შეატყუპეთ და გამართეთ. ცერები გაჭიმეთ. ასწიეთ და შეეცადეთ, ამ დროს დუნდულა კუნთებიც დაჭიმოთ. დაითვალეთ 10-მდე და დაუშვით. შეასრულეთ ეს მოძრაობა 20-ჯერ. შეისვენეთ და კიდევ ორჯერ გაიმეორეთ.

6.

მუცელზე დაწოლილმა, ცალი ფეხი ისე მოხარეთ, რომ ტერფი არ დაჭიმოთ, პირიქით, იატაკისკენ გქონდეთ დახრილი. ფეხი ასწიეთ და ბოლომდე დაუშვით. გაიმეორეთ 15-ჯერ თითოეული ფეხით. ეს ვარჯიში, დუნდულა და ბარძაყის კუნთებთან ერთად, წვივის წინა და უკანა კუნთებსაც ჭიმავს.

7.

დაჯექით, ორივე ხელში ჰანტელები დაიჭირეთ და იდაყვში მოხარეთ. მჯდომარე გაცოცდით 2-3 მეტრზე წინ და უკან. რომელ ფეხსაც გადააადგილებთ, იმავე მიმართულებით სინქრონულად გასწიეთ შესაბამისი ხელიც. გაიმეორეთ 15-ჯერ. ეს ვარჯიში ამუშავებს ხელისა და დუნდულა კუნთებს.

8.

დადექით მუხლებზე, წელში გაიმართეთ და დოინჯი შემოირტყით. გადაჯექით ჯერ ერთ მხარეს ისე, რომ ტერფები ადგილს არ მოაცილოთ, მერე ოდნავ წამოიწიეთ და მეორე მხარეს გადაჯექით. გაიმეორეთ 10-ჯერ.

9.

დადექით ფეხზე, გაიმართეთ, ცალი ფეხი მუხლში მოხარეთ და ისე ასწიეთ ზურგს უკან, რომ ტერფი სხეულთან რაც შეიძლება ახლოს მიიტანოთ. მეორე ფეხით ჩაჯექით, სადამდეც მოახერხებთ. გაიმეორეთ 15-15-ჯერ ორივე ფეხით.

წარმატებას გისურვებთ!