ვარჯიშები ბავშვებისთვის

გააზიარე:

12-15 წელი

ჩვენი ჟურნალი ამ ნომერში ასრულებს ბავშვებისთვის რეკომენდებული ვარჯიშების გამოქვეყნებას. კიდევ ერთხელ გავიმეორებთ: ვარჯიშის დასაწყებად შეუფერებელი ასაკი არ არსებობს. შვილთან ერთად ვარჯიში კი მასთან სიახლოვის, მეგობრული
ურთიერთობის ჩამოყალიბებასა და განმტკიცებაში დაგეხმარებათ, რაც მოზარდთა მშობლებისთვის განსაკუთრებით მნიშვნელოვანია. დახვეწილი გარეგნობა და სპორტული იმიჯი ორივემ შეგიძლიათ სასიამოვნო ბონუსებად მიიჩნიოთ.
ამერიკის დაავადებათა კონტროლის ეროვნული ცენტრის მონაცემებით, ბავშვი ფიზიკურად დღეში ერთი საათი მაინც უნდა დაიტვირთოს. სამწუხაროდ, სტატისტიკა მოწმობს, რომ ბევრი ამ მინიმუმსაც ვერ ასრულებს. ასეთ პირობებში ის 10-15 წუთიც კი, ჩვენ მიერ შემოთავაზებულ ვარჯიშთა კომპლექსს რომ სჭირდება, უმოძრაობის თავიდან აცილების ეფექტურ საშუალებად შეიძლება იქცეს.
მაია ხვიჩია
“ავერსის კლინიკის” ფიზიოთერაპიისა და რეაბილიტაციის სამსახური
– კომპლექსი ამჯერადაც ყველა ჯგუფის კუნთთა ჰარმონიულად განმავითარებელი და ტანდეგობის გასაუმჯობესებელი ვარჯიშებით დავტვირთეთ. ამ ასაკშიც აქტუალურია სკოლიოზის პრევენცია და მისი პროგრესირების შეჩერება. მით უმეტეს, რომ სქესობრივი მომწიფების პერიოდში ძვლოვანი სისტემა ძალზე ინტენსიურად იზრდება. იმავე დროს, იზრდება სასკოლო დატვირთვაც და ბავშვს მერხსა თუ საწერ მაგიდასთან უფრო მეტხანს ჯდომა უხდება.
კომპლექსი, რომელსაც ჩვენ გთავაზობთ, არსებითად, ნიმუშია. შეგიძლიათ, არასასურველ, უინტერესო ვარჯიშებზე უარი თქვათ, სანაცვლოდ კი მასში წინა ნომრებში დაბეჭდილი ის ვარჯიშები ჩართოთ, რომლებიც თქვენ და თქვენს შვილს მოგწონთ. ნურც სიმძიმეებით ვარჯიშს მოერიდებით – არა მარტო ვაჟებში, გოგონებშიც. ასეთი ვარჯიშები ზრდის კუნთოვან მასას, გამოკვეთს მათ რელიეფს და, გავრცელებული მოსაზრების საწინააღმდეგოდ, სულაც არ არის ბავშვებისთვის უკუნაჩვენები, ოღონდ წონა უნდა იყოს სწორად შერჩეული (მაქსიმუმი 1 კგ-ია), ბავშვი მას თავისუფლად ერეოდეს და დაძაბვა მხოლოდ ბოლო ორ მოძრაობაზე უხდებოდეს. არსებობს ერთადერთი შეზღუდვა: ხერხემალი მეტისმეტად რომ არ დაიტვირთოს, ასეთი ვარჯიშები მხოლოდ მწოლიარე მდგომარეობაში სრულდება.
ალბათ შეამჩნევდით, რომ ჩვენი ჟურნალი მშობლებს დაბეჯითებით ურჩევს შვილებთან ერთად ვარჯიშს. გარდა ფიზიკური დატვირთვისა, ეს დროის ერთად გატარებისა და ურთიერთობის საშუალებაც არის, მშობლების ჯანმრთელობა კი მხოლოდ მოიგებს.
1. საწყისი მდგომარეობა: ფეხები დადგით მხრების სიგანეზე, წინ დაიხარეთ და ხელებით იატაკს დაეყრდენით.
სიმძიმის ცენტრი წინ გადაიტანეთ და ფეხის წვერებზე აიწიეთ. გაიმეორეთ 10- ჯერ.
2. საწყისი მდგომარეობა: ფეხები დადგით მხრების სიგანეზე, წელში გაიმართეთ, გამართული ხელები მაღლა ასწიეთ.
მარცხენა ხელი მოხარეთ და მარჯვენა იდაყვზე მოიკიდეთ. აიწიეთ ფეხის წვერებზე და იმავდროულად მთელი ტანით მარცხნივ გადაიხარეთ. დაუბრუნდით საწყის მდგომარეობას. გაიმეორეთ 10-ჯერ.
3. საწყისი მდგომარეობა: ფეხები დადგით მხრების სიგანეზე, წელში გაიმართეთ, გამართული ხელები ზურგს უკან ერთმანეთს ჩასჭიდეთ.
გასწიეთ ხელები უკან. უკანასკნელ წერტილში რამდენიმე წამით შეყოვნდით. დაუბრუნდით საწყის მდგომარეობას. გაიმეორეთ 10-ჯერ.
4. საწყისი მდგომარეობა: დაჯექით ხალიჩაზე. გამართული მარჯვენა ფეხი წინ გაიწოდეთ, მარცხენა კი ისე მოკეცეთ, რომ წვივი ბარძაყის გასწვრივ იდოს, ხოლო ტერფი – თეძოსთან. ორივე ტერფი მთელი ვარჯიშის განმავლობაში დაჭიმული გქონდეთ.
მარცხენა ხელი ასწიეთ, მარჯვენა კი დაუშვით და ორივე ისე მოხარეთ იდაყვში, რომ ზურგს უკან ერთმანეთს ჩასჭიდოთ. ჩაისუნთქეთ. დაიხარეთ გაშლილი ფეხისკენ და ამოისუნთქეთ. გაიმეორეთ 5-8-ჯერ. შემდეგ მარცხენა ფეხი გაშალეთ, მარჯვენა კი მოკეცეთ, ხელებიც შეცვალეთ. ვარჯიში ამ პოზიციაშიც 5-8-ჯერ გაიმეორეთ.
5. საწყისი მდგომარეობა: დაწექით ზურგზე, ფეხები გამართეთ და მაღლა ასწიეთ, ხელები ტანის გასწვრივ დაიწყვეთ, თავი და მხრები იატაკს არ მოაშოროთ.
თვლაზე “ერთი” გამართული მარჯვენა ფეხი დაუშვით (სასურველია, შეეხოს იატაკს), “ორი” – დაუბრუნდით საწყის მდგომარეობას, “სამი” – დაუშვით მარცხენა ფეხი, “ოთხი” – დაუბრუნდით საწყის მდგომარეობას.
ფეხსა და სხეულს შორის მთელი ვარჯიშის განმავლობაში მართი კუთხე უნდა შენარჩუნდეს. გაიმეორეთ 10-ჯერ..
6. საწყისი მდგომარეობა: იგივე.
ორივე ფეხი ერთდროულად გადაშალეთ აქეთ-იქით. დაუბრუნდით საწყის მდგომარეობას. გაიმეორეთ 10-ჯერ.
7. საწყისი მდგომარეობა: დაწექით მუცელზე, ფეხები გამართეთ, ცერები დაჭიმეთ. მარჯვენა ხელი წინ გაიწოდეთ, მარცხენა კი გაჭიმეთ სხეულის გასწვრივ.
ასწიეთ მაღლა მარჯვენა ხელი და მარცხენა ფეხი, გაიმეორეთ 5-8-ჯერ, შემდეგ ხელები შეცვალეთ და იგივე მარცხენა ხელითა და მარჯვენა ფეხით გაიმეორეთ.