ვარჯიში მომავალი დედებისთვის

დაპირებისამებრ, განვაგრძობთ ვარჯიშების ბეჭდვას მომავალი დედებისათვის. ამჯერად მესამე ტრიმესტრისთვის განკუთვნილ კომპლექსსშემოგთავაზებთ.
მაია ხვიჩია
“ავერსის კლინიკის” ფიზიოთერაპიისა და რეაბილიტაციის სამსახურის მეთოდისტი
– ორსულთა სამკურნალო ვარჯიშების კომპლექსის შედგენისას იმდენი ფაქტორია გასათვალისწინებელი, რომ ჟურნალის ფურცლებიდან ამის გადმოცემა შეუძლებელია, ამიტომ, როგორც არაერთხელ აღვნიშნეთ, საუკეთესო ვარიანტია, მეთოდისტმა თქვენივე გინეკოლოგის რეკომენდაციით შეგიდგინოთ ფიზიკური დატვირთვის ინდივიდუალური გეგმა და თვალყური ადევნოს, რამდენად ზუსტად ასრულებთ მას.
სუნთქვის, მუცლის პრესის, მენჯის ფუძის კუნთების ტონუსისა და ელასტიკურობის მოსამატებელი ვარჯიშები, რა თქმა უნდა, მესამე ტრიმესტრშიც აქტუალურია. ეს მშობიარობის პროცესს გააადვილებს, შეამცირებს ნახევების გაჩენის ალბათობას, ხელს შეუშლის შიგნითა სასქესო ორგანოების გამოვარდნას და მშობიარობის შემდეგ მუცლის წინა კედლის მოშვებას. რაც უფრო მეტად ვუახლოვდებით სავარაუდო მშობიარობის 

თარიღს, მით უფრო ნაკლებად ვიმეორებთ ფიზიკურ ვარჯიშებს, სუნთქვითს კი, პირიქით, მეტ დროს ვუთმობთ. ყურადღება მიაქციეთ, როგორ რეაგირებს ნაყოფი ფიზიკურ ვარჯიშზე: თუ მოძრაობა მკვეთრად შეამცირა, ესე იგი ვარჯიშის ინტენსივობა თავადაც შესამცირებებლი გაქვთ.
ბუნებრივია, კვლავ არ შეიძლება ხტომა, მკვეთრი ბრუნვა, ძალისმიერი ვარჯიშები, ვარჯიშები, რომლებიც მოითხოვს ხელების სწრაფად აწევას, სხეულის აჭიმვას, სუნთქვის შეკავებას. ვარჯიშის დროს სუნთქვა და პულსი არ უნდა გახშირდეს, უკიდურეს შემთხვევაში, უმნიშვნელოდ უნდა მოიმატოს.

შეგახსენებთ: განურჩევლად იმისა, ორსულობის რომელ პერიოდში გადაწყვეტთ ვარჯიშის დაწყებას, გინეკოლოგთან კონსულტაცია აუცილებლად გაიარეთ.
1. დაჯექით სკამის კიდეზე. დოინჯი შემოირტყით და წელში გაიმართეთ. ფეხები იატაკზე მყარად დადგით. ღრმად ჩაისუნთქეთ ცხვირით, იდაყვები მაქსიმალურად უკან გასწიეთ და პირით ნელა ამოისუნთქეთ. გაიმეორეთ 5-6-ჯერ.
2. საწყისი მდგომარეობა – იგივე. ღრმად ჩაისუნთქეთ ცხვირით, მარჯვნივ დაიხარეთ და პირით ნელა ამოისუნთქეთ. დაუბრუნდით საწყის მდგომარეობას და იგივე მოძრაობა შეასრულეთ მეორე მხარეს. გაიმეორეთ 5-6-ჯერ.
3. დადექით ოთხზე. იატაკს იდაყვებითა და წვივებით დაეყრდენით. მუხლში გამართული ფეხი უკან და მაღლა გასწიეთ. გაიმეორეთ 5-6-ჯერ ხან ერთი, ხან მეორე ფეხით.
4. საწყისი მდგომარეობა: დაწექით ზურგზე, ხელები თავქვეშ ამოიდეთ, ფეხები მუხლებში მოხარეთ და იატაკზე დადგით. ისე, რომ ტერფები იატაკს არ ააცილოთ, ორივე მუხლი გადასწიეთ ჯერ ერთ, მერე მეორე მხარეს. გაიმეორეთ 5-6-ჯერ.
5. დადექით ოთხზე. იატაკს იდაყვებითა და წვივებით დაეყრდენით. ხერხემალი მორკალეთ. მიიღეთ კატის პოზა. გაიმეორეთ 5-6-ჯერ.
6. დაჯექით სავარჯიშო ბურთზე. წელში გაიმართეთ, ხელებით დოინჯი შემოირტყით. შეინარჩუნეთ წონასწორობა და იბუქნავეთ ორი წუთის განმავლობაში.
“ავერსის კლინიკის” ფიზიოთერაპიისა და რეაბილიტაციის სამსახურის ტელეფონია: 506 506 (5568)
ვარჯიშები შეასრულა ლიზა გიგოლაშვილმა