3 ვარჯიში სწორი ზურგისთვის

დიდხანს მოხრილი ჯდომა, რაც საოფისე საქმიანობის ყველაზე უსიამოვნო მხარეა, ეგრეთ წოდებული მრგვალი ზურგის ჩამოყალიბებას იწვევს. ამ პრობლემას კარგად იცნობენ დიასახლისებიც, რადგან საოჯახო საქმეების მოგვარება უმეტესად მხრებში მოხრას მოითხოვს.

როცა სხეული გამუდმებით არასწორ პოზიციაშია, ვითარდება კუნთების დისბალანსი – მკერდის კუნთები ძლიერდება, კისრისა იჭიმება, ხოლო ზურგისა სუსტდება. ამას თან ახლავს ტკივილი და დისკომფორტი, ხოლო დროთა განმავლობაში შესაძლოა ხერხემლის გამრუდებაშიც გადაიზარდოს.

თუ მრგვალი ზურგის მიზეზი მხოლოდ არასწორ პოზიციაში დიდხანს ყოფნაა, მდგომარეობის გამოსწორება მკერდისა და ზურგის კუნთებს შორის ბალანსის აღდგენით შეიძლება, ხოლო თუ მიზეზი რომელიმე დაავადებაა, მაგალითად, ოსტეოპოროზი ან მაანკილოზებელი სპონდილიტი, აუცილებელია შესაბამისი თერაპია.

კუნთების დისბალანსის დროს სწორი პოზიციის შენარჩუნება ძალიან ძნელი და დამღლელია, ამიტომ ზურგის კუნთების განსავითარებლად იოგას სამ პოზას გასწავლით. მათი რეგულარული შესრულებით მრგვალი ზურგის ჩამოყალიბებას თავიდან აიცილებთ.

1. კობრა (Bhujangasana)

ხალიჩაზე პირქვე დაწექით და ნიკაპით იატაკს დაეყრდენით. ხელისგულები სხეულის პარალელურად დაიწყვეთ მხრების ქვეშ. ჩაისუნთქეთ და ნელ-ნელა, თანმიმდევრობით აზიდეთ თავი, მკერდი და მუცელი. გაჩერდით ამ პოზაში, რამდენჯერმე ჩაისუნთქ-ამოისუნთქეთ და ისევ ნელ-ნელა დაეშვით იატაკზე. ჯერ მუცელი დადეთ, შემდეგ – მკერდი და ბოლოს – ნიკაპი. ხელები სხეულის გასწვრივ გაშალეთ, შუბლი იატაკზე დაადეთ და რამდენიმე წამს ასე გაჩერდით.

2. ძროხა  (Bitilasana)

ეს პოზა წელავს კუნთებს, რომლებიც დაძაბულია არასწორ პოზიციაში დიდხანს ყოფნის გამო. დადექით ოთხზე. ჩაისუნთქეთ, წელი და ზურგი მაქსიმალურად ჩაზნიქეთ და მაღლა აიხედეთ. შემდეგ ამოისუნთქეთ, ზურგი ამოზნიქეთ და თავი დახარეთ. ეს მოძრაობები ერთმანეთის მონაცვლეობით გაიმეორეთ 5-10-ჯერ.

3. ხიდი (Setu Bandhasana)

ეს პოზა შესანიშნავია ზურგის, დუნდულა კუნთებისა და ფეხის კუნთების გასაძლიერებლად. დაწექით ზურგზე და მუხლები 90 გრადუსით მოხარეთ. ამოსუნთქვისას თეძოები და ხერხემალი ნელ-ნელა აზიდეთ, მხრებითა და თავით კი იატაკს დაეყრდენით. ამ პოზაში გაჩერდით რამდენიმე წამი, ჩაისუნთქ-ამოისუნთქეთ და ისევ ნელა დაეშვით იატაკზე.

ნუ დანებდებით, თუ ვარჯიში პირველივე ჯერზე არ გამოგივიდათ. რამდენიმე მცდელობის შემდეგ მიზანს აუცილებლად მიაღწევთ.