ვარჯიში მომავალი დედებისთვის

ფიტნესი საყოველთაოა და გამონაკლისები, რა თქმა უნდა, არც მომავალი დედები არიან, ამიტომ ნუ ჩათვლით, რომ ეს მშვენიერი პერიოდი მხარ-თეძოზე წამოწოლილებმა უნდა გალიოთ. როდის როგორ და სიფრთხილის რა ზომების დაცვით უნდა ივარჯიშოთ, ამ ყველაფერს თქვენთან ერთად ახლავე გავარკვევთ.
9 თვე საკმაოდ დიდი დროა, სამკურნალო ფიზკულტურისადმი მიდგომაც სხვადასხვა თვეში განსხვავებულია. ამჯერად I ტრიმესტრისთვის განკუთვნილ ვარჯიშებს შემოგთავაზებთ:
მაია ხვიჩია
“ავერსის კლინიკის” ფიზიოთერაპიისა და რეაბილიტაციის სამსახურის მეთოდისტი
ორსულობისას იცვლება ქალის ორგანიზმის რეაქცია ფიზიკურ დატვირთვაზე, ამიტომ ვარჯიშების შერჩევისას მრავალი ფაქტორია გასათვალისწინებელი – ორსულობის ვადა, ქალის ასაკი, ფიზიკური მომზადება, ჯანმრთელობის მდგომარეობა. ასე რომ, საუკეთესო ვარიანტია, მეთოდისტმა თქვენივე გინეკოლოგის რეკომენდაციით შეგიდგინოთ ფიზიკური დატვირთვის გეგმა და თვალყურიც ადევნოს, რამდენად ზუსტად ასრულებთ ვარჯიშებს.
სამკურნალო ფიზკულტურის ერთადერთი მიზანი ორსულობისა და მშობიარობის ნორმალური მიმდინარეობისა და ნაყოფის სრულყოფილი განვითარებისთვის ხელის შეწყობაა, ამიტომ კომპლექსში შედის სუნთქვის, მუცლის პრესის, მენჯის ფუძის კუნთების ტონუსისა და ელასტიკურობის მოსამატებელი ვარჯიშები. ეს გააადვილებს მშობიარობას, შეამცირებს ნახევების გაჩენის ალბათობას, ხელს შეუშლის შიგნითა სასქესო ორგანოების გამოვარდნას და მშობიარობის შემდეგ მუცლის წინა კედლის მოშვებას. ყურადღება უნდა მიექცეს ზურგის კუნთებსაც, რომელთაც სხეულის მასის მომატებისა და სიმძიმის ცენტრის ცვლილების გამო გაძლიერებული დატვირთვის გაძლება უწევთ. 
არ შეიძლება ხტომა, მკვეთრი ბრუნვა, ძალისმიერი ვარჯიშების შესრულება, ისეთი ვარჯიშების შესრულება, რომლებიც მოითხოვს ხელების სწრაფად აწევას, სხეულის აჭიმვას ან სუნთქვის შეკავებას. ვარჯიშის დროს სუნთქვა და პულსი არ უნდა გახშირდეს, ანდა მხოლოდ უმნიშვნელოდ უნდა მოიმატოს.
პირველი ტრიმესტრი ყველაზე არასტაბილური პერიოდია, ამიტომ ვარჯიშები ყველაზე მეტად დამზოგველი უნდა იყოს. სწორედ ამ პრინციპს ეყრდნობა ეს კომპლექსიც. საუკეთესო შემთხვევაში სჯობს, ვარჯიში დაორსულებამდე რამდენიმე ხნით ადრე დაიწყოთ.
1. დაწექით ზურგზე. იდაყვებში გამართული ხელი თავს ზემოთ გადაიტანეთ. ღრმად ჩაისუნთქეთ ცხვირით. ნელა დაუშვით ხელები და ასევე ნელა პირით ამოისუნთქეთ. გაიმეორეთ 10-ჯერ.
2. დადექით წელში გამართული, ფეხები მხრების სიგანეზე გაშალეთ, დოინჯი შემოირტყით. შემდეგ ცალი ხელი გამართეთ, სხეულის გასწვრივ დაუშვით, ხელის გადაიხარეთ და ხელი ფეხის გასწვრივ ჩააცურეთ. გაიმეორეთ 10-10-ჯერ ორივე მხარეს.
3. დაეყრდენით სკამის საზურგეს. ასწიეთ წინ მარჯვენა ხელ-ფეხი, ისე, რომ ხელმა – მართი, ფეხმა კი 700-იანი კუთხე შექმნას. გაიმეორეთ 10-ჯერ. შემდეგ იგივე გააკეთეთ მარცხენა ხელ-ფეხით
4. საწყისი მდგომარეობა – იგივე. მარჯვენა ხელ-ფეხი გაშალეთ განზე (ხელი – მხრის დონემდე, ფეხი – სადამდეც შეძლებთ). გაიმეორეთ 10-ჯერ. შემდეგ იგივე გააკეთეთ მარცხენა ხელ-ფეხით.
5. საწყისი მდგომარეობა – იგივე. მარჯვენა ხელი მაღლა ასწიეთ, ფეხი კი უკან გასწიეთ. გაიმეორეთ 10-ჯერ. შემდეგ იგივე გააკეთეთ მარცხენა ხელ-ფეხით.
6. ფეხები მხრებზე ფართოდ გაშალეთ. დოინჯი შემოირტყით. ჩაბუქნეთ მარჯვენა ფეხით, მარცხენა კი გამართეთ. გაიმეორეთ 10-ჯერ ხან ერთ, ხან მეორე მხარეს.
7. დაჯექით იატაკზე. ზურგი გამართეთ, ფეხები ფართოდ გაშალეთ. დაიხარეთ წინ და შეეცადეთ, ორივე ხელით ჯერ ერთ, შემდეგ კი მეორე ფეხს შეეხოთ. გაიმეორეთ 10-ჯერ.
8. დაწექით ზურგზე. ხელები თავქვეშ ამოიდეთ. ფეხები მაღლა ასწიეთ და მუხლებში  მოხარეთ, ისე, რომ წვივებმა ბარძაყების მიმართ 900-იანი კუთხე შეადგინოს.
9. საწყისი მდგომარეობა – იგივე. ასწიეთ მარჯვენა ფეხი და ჰაერში შემოხაზეთ წრე ჯერ საათის ისრის, შემდეგ საპირისპირო მიმართულებით. გაიმეორეთ 10-ჯერ . გააკეთეთ იგივე მეორე ფეხით.
“ავერსის კლინიკის” ფიზიოთერაპიისა და რეაბილიტაციის სამსახური. ტელ: 506506 (5568)         

გინეკოლოგის კომენტარი
ლელა თანდაშვილი
“ავერსის კლინიკა”
ფიზიკური აქტივობა აუცილებელია როგორც ორსულობამდე, ისე ორსულობის პერიოდშიც, თუ, რა თქმა უნდა, ორსულობა ფიზიოლოგიურად მიმდინარეობს. ვარჯიში არა მარტო გვეხმარება კუნთების ტონუსში მოყვანაში, არამედ გუნება-განწყობილებასაც უმჯობესებს. მშობიარობა მძიმე ფიზიკური დატვირთვაა და ვარჯიში ამ გამოცდისთვის მომზადებაში ძალიან კარგად დაგვეხმარება, თანაც ქალი მშობიარობის შემდეგ უფრო ადვილად დაიბრუნებს უწინდელ ფორმებს.
არ არის რეკომენდებული სირბილი, ხტომა, სიმძიმის აწევა, აერობიკა. მსუბუქი ვარჯიში, ცურვა, შეიპინგი, სიარული კი, პირიქით, სასურველია.
რა თქმა უნდა, ზოგიერთ შემთხვევაში ფიზიკური დატვირთვა აკრძალულია. I ტრიმესტრში ამ უკუჩვენებებიდან უმთავრესი ორსულობის მოშლის საშიშროებაა. მაგალითად, საშვილოსნოს ჰიპერტონუსი ან საშოდან სისხლიანი გამონადენი. ასევე არ შეიძლება I ტრიმესტრში ვარჯიშის დაწყება, თუ მანამდე ფიზიკურად არასოდეს გიაქტიურიათ, ხოლო თუ ორსულობამდე სპორტის ამა თუ იმ  სახეობით იყავით დაკავებული, I ტრიმესტრში მისი შეწყვეტა საჭირო არ არის.
შეიძლება თუ არა თქვენთვის ვარჯიში, მხოლოდ პირად გინეკოლოგს შეუძლია გითხრათ, ამიტომ კონკრეტული რეკომენდაციებისთვის მას მიმართეთ.