ვისაც სავარჯიშოდ არ სცალია

ვინ მოთვლის, რამდენჯერ დაგვიჩივლია, დროს ვერ ვპოულობ, ფიტნესკლუბის აბონემენტს ჩემი ისედაც შეთხელებული ჯიბე ვერ სწვდება, თორემ სიზარმაცეს ჩემთან რა ესაქმებაო. მართალია, გულზე ხელი რომ დავიდოთ, სინდისი იმწამსვე გვიკარნახებს, რამდენ სისულელეზე ვხარჯავთ დროსაც და ფინანსურ სახსრებსაც, მაგრამ, ესეც რომ არ იყოს, მხოლოდ და მხოლოდ სურვილი და ცოტაოდენი ფანტაზიაა საჭირო და შეგვიძლია, მთელი სამყარო – უფასო ფიტნესკლუბად, სერიალის ან საყვარელი თოქშოუს ყურება კი ვარჯიშად ვაქციოთ. აი რამდენიმე იდეა:

ხელგაშლილობა სავარძელში
აძლიერებს მხრის ორთავა კუნთებს
დაშვებულ ორივე ხელში სიმძიმე (ჰანტელები, ნაბეღლავის ან კოკა-კოლას ბოთლები, დახვეული სქელტანიანი ჟურნალები) დაიკავეთ, ისე, რომ ხელისგულები წინ იყოს მიმართული. ხელები იდაყვში მოხარეთ, ტვირთი ნელა ასწიეთ და ასევე ნელა დაუშვით, ოღონდ ისე, რომ იდაყვები გვერდებს არ მოაცილოთ. 
გაიმეორეთ 15-20-ჯერ ან რამდენჯერაც მოგესურვებათ.

ბალეტი ბუფეტში
აძლიერებს ბარძაყის გარეთა და დუნდულა კუნთებს
მხრებში გაიმართეთ, თავი ასწიეთ და მარცხენა ხელით დახლს, მაგიდას ან ფანჯრის რაფას დაეყრდენით. დაძაბეთ მუცლის პრესის კუნთები და მარჯვენა ფეხი ისე განზიდეთ, რომ მუხლში არ მოხაროთ, ხოლო ტერფი ზემოთ გქონდეთ მიმართული.
გაიმეორეთ 12-15-ჯერ, შემდეგ კი მეორე მხარეს შეტრიალდით და მარცხენა ფეხითაც იგივე გააკეთეთ.


როდენის სტილში
ამაგრებს მუცლის კუნთებს
სკამზე ჯდომისას წელში გაიმართეთ, ხელები თავს უკან ერთმანეთს გადაჭდეთ და იდაყვები გაშალეთ. დაჭიმეთ მუცლის პრესი და მუხლი საპირისპირო იდაყვისკენ მოზიდეთ.
გაიმეორეთ 10-15-ჯერ ხან ერთ, ხან მეორე მხარეს.


აქეთ გორასა წიხლსა ვკრავ...
აძლიერებს ბარძაყის ოთხთავა კუნთებს
სკამზე ჯდომისას მუცლის კუნთები შეკუმშეთ, მუხლში გამართული ფეხი წინ, ტერფი ზემოთ გაჭიმეთ.
ოდნავ ასწიეთ ბარძაყი სკამიდან და დაუშვით
გაიმეორეთ 10-15-ჯერ ჯერ ერთი, შემდეგ მეორე ფეხით.

დავლური რიგში
დაეყრდენით საყიდლების ურიკას (სკამს, მაგიდას). ცალი ტერფის ზურგი მეორე ფეხის უკანა მხარეს, კოჭთან მიიდეთ.
აიწიეთ და დაეშვით ფეხის წვერზე, თან მუცლისა და დუნდულა კუნთები დაჭიმეთ.
 გაიმეორეთ 10-15-ჯერ, შემდეგ ფეხი შეცვალეთ და ამდენჯერვე გაიმეორეთ.