კალციუმის ქლორ.10% 5მლ#10(დარნ

სამკურნალო საშუალების სამედიცინო გამოყენების
ინსტრუქცია

კალციუმის ქლორიდი-დარნიცა

შემადგენლობა:
აქტიური ნივთიერება: ცალციუმ ცჰლორიდე;
ხსნარის 1 მლ შეიცავს კალციუმის ქლორიდის ჰექსაჰიდრატს 100 მგ;
დამხმარე ნივთიერებები: განზავებული ქლორწყალბადმჟავა, საინექციო წყალი.

სამკურნალო ფორმა. საინექციო ხსნარი.
ძირითადი ფიზიკო-ქიმიური თვისებები: გამჭვირვალე უფერო ხსნარი.

ფარმაკოთერაპიული ჯგუფი. სისხლის ჩამნაცვლებლები და საპერფუზიო ხსნარები. ელექტროლიტების ხსნარები. კოდი ათქ B05X A07.

ფარმაკოლოგიური თვისებები.
ფარმაკოდინამიკა
სამკურნალო საშუალება კალციუმის ქლორიდი-დარნიცა აღმოფხვრის კალციუმის იონების დეფიციტს. კალციუმის იონები მონაწილეობენ ნერვული იმპულსების გადაცემაში, გლუვი და ჩონჩხის კუნთების შეკუმშვაში, მიოკარდის ფუნქციონირებაში, სისხლის შედედებაში; აუცილებელია ძვლის ქსოვილის ფორმირებისთვის, სხვა სისტემების და ორგანოების ფუნქციონირებისთვის. კალციუმის იონების კონცენტრაცია სისხლში მცირდება ბევრი პათოლოგიური პროცესის შედეგად, გამოხატული ჰიპოკალციემია ხელს უწყობს ტეტანიის განვითარებას. ჰიპოკალციემიის აღმოფხვრის გარდა, კალციუმის ქლორიდი ამცირებს სისხლძარღვების შეღწევადობას, აჩერებს სისხლდენას.
კალციუმის ქლორიდის ვენაში შეყვანა იწვევს სიმპატიკური ნერვული სისტემის აღგზნებას, რაც იწვევს ნორადრენალინის გამოყოფის გაძლიერებას.
ფარმაკოკინეტიკა
სისხლში კალციუმი არის ნაერთებში და იონიზირებულ მდგომარეობაში. ფიზიოლოგიური აქტივობა აქვს იონიზირებულ კალციუმს. დეპონირდება ძვლის ქსოვილში. გამოიყოფა თირკმელებით (20%) და ნაწლავებით (80%). გორგლოვანი ფილტრაციის გზით გამოყოფილი კალციუმის 95% რეაბსორბირდება.

კლინიკური მახასიათებლები
ჩვენება
ჰიპოკალციემიის შემთხვევები, რომლებიც საჭიროებენ კალციუმის იონების კონცენტრაციის სწრაფ მატებას სისხლის შრატში (ტეტანია პარაფარისებრი ჯირკვლის ფუნქციური უკმარისობის დროს, ტეტანია D ვიტამინის უკმარისობის დროს, ჰიპოკალციემია ჩანაცვლებითი სისხლის გადასხმის და ციტრატული სისხლის გადასხმის დროს, ალკალოზი).
კომპლექსური თერაპიის შემადგენლობაში ტყვიის მწვავე კოლიკის დროს.
მაგნიუმით ინტოქსიკაციის შემთხვევა, რომელიც ვითარდება მაგნიუმით ჭარბი დოზის შემთხვევაში.
ჰიპერკალიემია, რომელიც ეკგ-ზე დარეგისტრირებულია გულის ფუნქცის დარღვევით.

უკუჩვენება
მომატებული მგრძნობელობა სამკურნალო საშუალების კომპონენტების მიმართ, ჰიპერკალციემია, გამოხატული ჰიპერკალციურია, ნეფროუროლითიაზი (კალციუმის), თირკმელების მძიმე უკმარისობა, სარკოიდოზი, ჰიპერკოაგულაცია, თრომბების წარმოქმნის მიდრეკილება.
გამოხატული ათეროსკლეროზი არტერიული ოკლუზიის გამოვლინებებით. პარკუჭების ფიბრილაცია. ასისტოლია და ელექტრომექანიკური დისოციაცია. ფუტკარას პრეპარატების მიღება. ცეფტრიაქსონთან ერთდროული გამოყენება.

ურთიერთზემოქმედება სხვა სამკურნალო საშუალებებთან და ურთიერთზემოქმედების სხვა სახეები
მიმდინარე დროისთვის არ არის დამტკიცებული სამეცნიერო მონაცემები სისხლძარღვშიდა პრეციპიტატების განვითარებასთან დაკავშირებით (ახალშობილების გარდა) ცეფტრიაქსონის და კალციშემცველი სამკურნალო საშუალებების ერთდროული გამოყენების დროს. თუმცა, არ უნდა მოხდეს კალციუმის შემცველი გამხსნელების გამოყენება, ცეფტრიაქსონის და კალციშემცველი სამკურნალო საშუალებების შერევა ან ერთდროული შეყვანა პაციენტების ნებისმიერ კატეგორიაში. კალციშემცველი ხსნარები არ უნდა დაინიშნოს ცეფტრიაქსონის ბოლო შეყვანიდან 48 საათის განმავლობაში.
კალციშემცველმა პროდუქტებმა შესაძლებელია შეამცირონ კალციუმის მილაკების ბლოკატორების ეფექტურობა, კალციტონინის ეფექტი ჰიპერკალციემიის დროს, ფენიტოინის ბიოშეღწევადობა. კალციუმის მარილები ამცირებენ რიგი სამკურნალო საშუალებების შეწოვას, როგორებიც არიან ბისფოსფონატები, ფტორიდები, ზოგიერთი ფტორქინოლონები და ტეტრაციკლინები; შეყვანა უნდა გადანაწილდეს არაუმცირეს 3 საათზე.
კალციუმის ქლორიდი ამცირებს დობუტამინის კარდიოტონულ ეფექტებს.
ქინიდინთან ერთდროული გამოყენების დროს შესაძლებელია პარკუჭშიდა გამტარობის შენელება და ქინიდინის ტოქსიკურობის მატება.
გულის გლიკოზიდებთან სამკურნალო საშუალების ერთდროული გამოყენების დროს ძლიერდება ამ უკანასკნელების კარდიოტოქსიკური ეფექტები.
კალციუმის მარილების შერევა არ შეიძლება კარბონატებთან, ფოსფატებთან, სულფატებთან ან ტარტრატებთან პარენტერალურ ნარევებში.
თიაზიდური დიურეტიკები ამცირებენ კალციუმის ექსკრეციას შარდით, რაც ზრდის ჰიპერკალციემიის განვითარების რისკს.
D ვიტამინთან ან მის წარმოებულებთან ერთდროული გამოყენებისას იზრდება კალციუმის შეწოვა.
სხვა კალცი- ან მაგნიშემცველ სამკურნალო საშუალებებთან ერთდროული გამოყენებისას იზრდება ჰიპერკალიემიის ან ჰიპერმაგნიემიის რისკი, შესაბამისად, განსაკუთრებით პაციენტებში თირკმელების ქრონიკული უკმარისობით.
ამცირებს არამადეპოლარიზირებელი მიორელაქსანტების ეფექტურობას. შესაძლებელია გაზარდოს ტუბოკურარინის ქლორიდის მოქმედების ხანგრძლივობა.

გამოყენების თავისებურებები
მაღალი დოზების ხანგრძლივი გამოყენებისას შესაძლებელია ჰიპერკალციემია კალციუმის მარილების დალექვით ორგანიზმში.
სისხლძარღვის კედელზე სამკურნალო საშუალების დამაზიანებელი მოქმედების შემცირების მიზნით, ინექცია უნდა ჩატარდეს მხოლოდ წვრილი ნემსით მსხვილ ვენაში. საჭიროა ხსნარის შეთბობა სხეულის ტემპერატურამდე.
სამკურნალო საშუალების ვენაში შეყვანისას ვლინდება ჩვეული რეაქცია – სიცხის შეგრძნება პირის ღრუში, ხოლო შემდეგ მთელ სხეულში.
კალციუმის ქლორიდი–დარნიცა შეყვანა არ შეიძლება კანქვეშ ან კუნთში მისი გამაღიზიანებელი და მანეკროტიზირებელი მოქმედების გამო. სამკურნალო საშუალების ხსნარის კანქვეშ ან კუნთში მოხვედრის შემთხვევაში საჭიროა შესაძლებლობის მიხედვით კალციუმის ქლორიდის გამოქაჩვა შპრიცის საშუალებით და ინექციის ადგილას 10 მლ ნატრიუმის სულფატის, საინექციო ხსნარი 25%, ან 5-10 მლ მაგნიუმის სულფატის, საინექციო ხსნარი 25%, შეყვანა. რეზორბციული ზემოქმედების თავიდან აცილების მიზნით ინიშნება დიმედროლი, ჰიპერკალციემიის დროს – ედტა.
სიფრთხილით გამოიყენება პაციენტებში თირკმელების მსუბუქი და საშუალო ხარისხის სიმძიმის ქრონიკული უკმარისობით, დეჰიდრატაციით, ელექტროლიტური ბალანსის დარღვევით (ჰიპერკალციემიის რისკი), გულის დაავადებებით (არითმიის რისკი), თირკმელების დაავადებებით, ნეფროლითიაზით ან დაავადებებით, რომლებსაც თან ახლავს ჰიპერკალციემია (ძირითადად ავთვისებიანი ახალწარმონაქმნებით და სარკოიდოზით), ,,ფილტვისმიერი” გულით, რესპირატორული აციდოზით, სუნთქვითი უკმარისობით (ტოქსიკური რეაქციების რისკი კალციუმის ქლორიდის ჟანგვის შედეგად). გამოყენებისას საჭიროა კალციუმის დონის მკაცრი მონიტორინგი სისხლში.
ვენაში სწრაფი შეყვანისას შესაძლებელია არტერიული წნევის ზომიერი შემცირება ვაზოდილატაციის შედეგად.
საინექციო კალციუმის ქლორიდი არ ინიშნება ბავშვებში ვენაში კუჭ-ნაწლავის ტრაქტზე მძიმე გამაღიზიანებელი ზემოქმედების გამო.
ბავშვებში ინექცია არ უნდა ჩატარდეს თავის კანიდან.

გამოყენება ორსულობის და ლაქტაციის პერიოდში
სამკურნალო საშუალების უსაფრთხოების და ეფექტურობის ადექვატური და მკაცრად კონტროლირებადი კვლევები ორსულ ქალებში არ ჩატარებულა. ორსულობის პერიოდში გამოყენება შესაძლებელია მხოლოდ მაშინ, როცა მოსალოდნელი სარგებელი დედისთვის აღემატება პოტენციურ რისკს ნაყოფისთვის.
სამკურნალო საშუალების გამოყენება ლაქტაციის პერიოდში შესაძლებელია.

ზემოქმედება ავტოსატრანსპორტო საშუალებების მართვის ან სხვა მექანიზმებთან მუშაობის უნარზე
სამკურნალო საშუალებით მკურნალობის პერიოდში უკუნაჩვენებია ავტოსატრანსპორტო საშუალებების მართვა ან სხვა მექანიზმებთან მუშაობა.

გამოყენების წესი და დოზები
კალციუმის ქლორიდი ინიშნება ვენაში ნაკადად (ძალიან ნელა) ან ვენაში წვეთოვნად (ნელა).
მოზრდილები
ვენაში ნაკადად შეყვანა: 5 მლ 10% ხსნარი შეიყვანება 1 მლ/წთ სიჩქარით.
ვენაში წვეთოვნად შეყვანა: 5-10 მლ 10% სამკურნალო საშუალების ხსნარის განზავება ხდება 100-200 მლ 0,9% ნატრიუმის ქლორიდის ხსნარში ან 5% გლუკოზის ხსნარში, შეიყვანება სიჩქარით – 6-8 წვეთი/წუთში.
სისხლის ჩანაცვლებითი გადასხმა ან ციტრატული სისხლის გადასხმა: მოზრდილებში და ბავშვებში 30 მგ (0,3 მლ) 100 მლ სისხლზე.
ტეტანია: 10 მლ 10% ხსნარი (1 გ) 10-30 წუთის განმავლობაში, საჭიროებისას ხდება გამეორება 6 საათის შემდეგ.
ჰიპოკალციემია: 500 მგ-დან 1 გ-მდე (5-10 მლ) ინტერვალით 1-3 დღე, რაც დამოკიდებულია პაციენტის რეაქციაზე ან კალციუმის დონეზე სისხლის შრატში. საჭიროებისას შესაძლებელია პრეპარატის განმეორებითი დოზის შეყვანა.
მაგნიუმით ინტოქსიკაცია: 500 მგ (5 მლ) შეიყვანება სწრაფად. შეყვანა ხდება ექიმის მეთვალყურეობით და პაციენტის მდგომარეობის მონიტორინგით, მომდევნო დოზების შეყვანამდე.
ჰიპერკალიემია, რომელიც ეკგ-ზე დარეგისტრირებულია როგორც გულის ფუნქციის დარღვევა: დოზა ირჩევა ინდივიდუალურად, რაც დამოკიდებულია პაციენტის მდგომარეობაზე, საჭიროა მუდმივი კონტროლი კარდიოგრამით.
ხანდაზმულ პაციენტებში გამოიყენება მოზრდილების დოზები.
ბავშვები
ჰიპოკალციემია: შეიყვანება ნელა, 0,5 მლ/წთ-მდე სიჩქარით, 10-20 მგ/კგ (0,1-0,2 მლ/კგ სხეულის წონის) დოზით, საჭიროებისას გამეორება ხდება ყოველ 4-6 საათში.
ტეტანია: 10 მგ/კგ (0,1 მლ/კგ სხეულის წონის) 5-10 წუთის განმავლობაში, საჭიროებისას გამეორება ხდება 6 საათის შემდეგ ან შეყვანა გრძელდება ინფუზიის სახით. მაქსიმალური სადღეღამისო დოზა ბავშვებისთვის (ასაკის მიუხედავად) – 10 მლ (1000 მგ).

ბავშვები
ბავშვებში გამოიყენება სიცოცხლის 1 წლიდან.

ჭარბი დოზა
ჰიპერკალციემიის სიმპტომები: სისუსტე, ანორექსია, მუცლის ტკივილი, ღებინება, გულისრევა, ყაბზობა, პოლიდიპსია, პოლიურია, მომატებული დაღლა, გაღიზიანება, ცუდად ყოფნა, დეპრესია, დეჰიდრატაცია, შესაძლებელია გულის რითმის დარღვევა, ტაქიკარდია, შესაძლებელია არტერიული წნევის მკვეთრი დაწევა და არტერიული ჰიპერტენზია, მიალგია, ართრალგია, კომა.
მკურნალობა: უმნიშვნელო ჭარბი დოზის დროს (კალციუმის კონცენტრაცია სისხლის შრატში – 2,6-2,9 მმოლ/ლ) წყდება შეყვანა და სხვა კალციშემცველი სამკურნალო საშუალებების გამოყენება. მძიმე ჭარბი დოზის დროს (კალციუმის კონცენტრაცია სისხლის შრატში 2,9 მმოლ/ლ-ზე მეტი) პარენტერალურად შეიყვანება კალციტონინი 5-10 სე/კგ სხეულის წონის დოზით დღეში (მისი განზავება ხდება 500 მლ 0,9% ნატრიუმის ქლორიდის ხსნარში), ვენაში წვეთოვნად 6 საათის განმავლობაში. შესაძლებელია ვენაში ნაკადით ნელი შეყვანა 2-4-ჯერ დღეში.
გამოიყენება არათიაზიდური დიურეტიკები; ტარდება კალიუმის და მაგნიუმის კონცენტრაციის კონტროლი შრატში, საჭიროებისას – შეიყვანება კალიუმის და მაგნიუმის სამკურნალო საშუალებები; ტარდება გულ-სისხლძარღვთა სისტემის ფუნქციის კონტროლი, შეიყვანება ბეტა-ადრენობლოკატორები არითმიის პროფილაქტიკის მიზნით. საჭიროებისას ტარდება ჰემოდიალიზი.

გვერდითი რეაქციები
მგრძნობელობითი ორგანოების მხრიდან: ცარცის გემო პირში.
ნივთიერებათა ცვლის, მეტაბოლიზმის მხრიდან: ჰიპერკალციემია.
ფსიქიკის მხრიდან: დეპრესია.
გულ-სისხლძარღვთა სისტემის მხრიდან: არტერიული წნევის ზომიერი და ხანმოკლე დაწევა, ბრადიკარდია, არითმია, არტერიული ჰიპერტენზია, ვენოზური თრომბოზი. ძალიან სწრაფი შეყვანისას – გულის პარკუჭების ფიბრილაცია.
იმუნური სისტემის მხრიდან: ცხელების, ჩხვლეტის შეგრძნება ჯერ პირის ღრუში, შემდეგ მთელ სხეულში, სახის კანის ჰიპერემია, ალერგიული რეაქციები, ჭინჭრის ციება.
საერთო დარღვევები და რეაქციები შეყვანის ადგილას: ტკივილი და ჰიპერემია ვენის არეში. ექსტრავაზაციის დროს შესაძლებელია წვა, ქსოვილის ნეკროზი და ქერქის, ცელულიტის წარმოქმნა, რბილი ქსოვილის კალციფიკაცია.

ვარგისიანობის ვადა
5 წელი.

შენახვის პირობები
ინახება ორიგინალურ შეფუთვაში არაუმეტეს 25°С ტემპერატურაზე. არ იყინება.
ინახება ბავშვებისათვის მიუწვდომელ ადგილას.

შეუთავსებლობა
ფარმაცევტულად შეუთავსებელია ტეტრაციკლინებთან, მაგნიუმის სულფატთან, ცეფტრიაქსონთან, ფოსფატების, კარბონატების ან ტარტრატების შემცველ სამკურნალო საშუალებებთან. არ უნდა მოხდეს კალციუმის ქლორიდის შერევა ცეფტრიაქსონთან ერთ ინექციაში, რადგან შესაძლებელია ნალექის წარმოქმნა.

შეფუთვა
5 მლ ან 10 მლ ამპულაში; 5 ამპულა კონტურულ უჯრედოვან შეფუთვაში, 2 კონტურულ უჯრედოვანი შეფუთვა კოლოფში.

გაცემის წესი:
ფარმაცევტული პროდუქტის ჯგუფი II ჯგუფი, გაიცემა ფორმა №3 რეცეპტით

მწარმოებელი
კსს ,,ფარმაცევტული ფირმა ,,დარნიცა”.

მწარმოებლის ადგილმდებარეობა და მისი საქმიანობის განხორციელების ადგილის მისამართი
უკრაინა, 02093, ქ. კიევი, ბორისპოლსკაიას ქ., 13.