ბუტორი 20მგ #30ტ

ბუტორი®

შემადგენლობა

აქტიური ნივთიერება: როზუვასტატინი.

ბუტორის აპკიანი გარსით დაფარული თითოეული ტაბლეტი შეიცავს კალციუმის როზუვასტატინს, 10 და 20 მგ როზუვასტატინის ექვივალენტურს.

სხვა ინგრედიენტები: მიკროკრისტალური ცელულოზა PH-101, უწყლო კოლოიდური სილიციუმი, კროსპოვიდონი ტიპი A, მიკროკრისტალური ცელულოზა PH-102, ლაქტოზას მონოჰიდრატი, მაგნიუმის სტეარატი, ჰიპრომელოზა, ტიტანის დიოქსიდი CI77891 E171, ჰიპროლოზა.

გამოყენება

ბუტორი მიეკუთვნება სამკურნალო საშუალებების ჯგუფს, რომლებსაც ეწოდება სტატინები.

ბუტორის გამოიყენება შემდეგი მდგომარეობების დროს:

• ქოლესტერინის მაღალი დონე, რომელიც ინფარქტის ან ინსულტის რისკი შეიძლება იყოს. ბუტორი გამოიყენება მოზრდილებში, მოზარდებში და 6 წლის ან მეტი ასაკის ბავშვებში მაღალი ქოლესტერინის სამკურნალოდ;
•  როცა  კვების რეჟიმის შეცვლა და ვარჯიში არ არის საკმარისი ქოლესტერინის დონის დასარეგულირებლად. ქოლესტერინის დონის დასაქვეითებელი დიეტა და ვარჯიში  უნდა გაგრძელდეს ბუტორის მიღების პერიოდშიც;
• სხვა ფაქტორების არსებობა, რომელიც ზრდის ინფარქტის, ინსულტის ან ჯანმრთელობის მსგავსი პრობლემების განვითარების რისკს. ინფარქტი, ინსულტი და სხვა პრობლემები შესაძლებელია გამოწვეული იყოს  ათეროსკლეროზით. ათეროსკლეროზის მიზეზია არტერიებში ცხიმის ნალექების დაგროვება.

ბუტორი გამოიყენება სისხლში ცხიმოვანი ნივთიერებების ე.წ. ლიპიდების (რომელთაგან  ყველაზე გავრცელებულია  ქოლესტერინი) დონის დასარეგულირებლად.

სისხლში გვხვდება სხვადასხვა ტიპის ქოლესტერინი. „ცუდი“ ქოლესტერინი (LDL) და „კარგი“ ქოლესტერინი (HDL).

• ბუტორის მოქმედებით შესაძლებელია   „ცუდი“ ქოლესტერინის დონის დაქვეითება და  „კარგი“ ქოლესტერინის დონის გაზრდა.
• იგი ხელს უწყობს ორგანიზმში „ცუდი“ ქოლესტერინის გამომუშავების დაბლოკვას. ასევე ის ზრდის  ორგანიზმის უნარს, გამოდევნოს „ცუდი“ ქოლესტერინი სისხლიდან.

ქოლესტერინის მაღალი დონე ადამიანების უმეტესობის მდგომარეობაზე არ მოქმედებს, ვინაიდან ის არ იწვევს რაიმე სიმპტომებს. თუმცა მკურნალობის გარეშე ცხიმის ნალექები შეიძლება დაგროვდეს სისხლძარღვების კედლებზე, რაც იწვევს სისხლძარღვების შევიწროებას. შევიწროებული სისხლძარღვები ზოგჯერ შეიძლება დაიხშოს, რაც აფერხებს  გულში ან თავის ტვინში სისხლის მიწოდებას და  იწვევს ინფარქტის ან ინსულტის  განვითარებას. ქოლესტერინის დონის დაქვეითებით შესაძლებელია ინფარქტის, ინსულტის ან  ჯანმრთელობის მსგავსი პრობლემების რისკის შემცირება.

ბუტორის მიღება უნდა გაგრძელდეს მაშინაც კი, თუ მისი გავლენით სასურველ დონემდე დაქვეითდა ქოლესტერინი, რადგან ის ხელს უშლის ქოლესტერინის დონის ხელახლა მომატებას და სისხლძარღვებში ცხიმის ნალექების დაგროვებას. ამის მიუხედავად, ბუტორის მიღება უნდა შეწყდეს თუ  ექიმი ამას მიუთითებს ან ორსულობისას.

უკუჩვენებები

ბუტორის მიღება არ უნდა მოხდეს შემდეგ შემთხვევებში:

• ბუტორის ან მის ნებისმიერი ინგრედიენტის (ჩამოთვლილია შემადგენლობაში) მიმართ ალერგია;
• ორსულობა ან ძუძუთი კვება. თუ პაციენტი დაორსულდა ბუტორის მიღების პერიოდში,  დაუყოვნებლივ უნდა შეწყვიტოს პრეპარატის მიღება და შეატყობინოს

ექიმს. ქალებმა, რომლებიც იღებენ ბუტორს, თავიდან უნდა აიცილონ ორსულობა  სათანადო კონტრაცეფციის გამოყენებით;

• ღვიძლის დაავადება;
• თირკმლების სერიოზული პრობლემები;
• განმეორებითი ან დაუდგენელი კუნთების ტკივილი;
• პრეპარატებთან სოფოსბუვირი/ ველპატასვირი/ვოქსილაპრევირი  (გამოიყენება ღვიძლის ვირუსული ინფექციისას, რომელსაც ეწოდება ჰეპატიტი C) კომბინაციასთან  მიღება;
• პრეპარატ ციკლოსპორინით (გამოიყენება, მაგალითად, ორგანოს ტრანსპლანტაციის შემდგომ) მკურნალობა;

რომელიმე ზემოაღნიშნულ (ან ეჭვის) შემთხვევაში  მიმართეთ  ექიმს.

როზუვასტატინი 40 მგ (ყველაზე მაღალი დოზა) უკუნაჩვენებია შემდეგ შემთხვევებში:

• საშუალო ხარისხის თირკმლის პრობლემა (ეჭვის შემთხვევაში მიმართეთ ექიმს);
• ფარისებრი ჯირკვალი ფუნქციის დარღვევა;
• განმეორებითი ან დაუდგენელი კუნთების ტკივილი, როცა ინდივიდუალურ ან ოჯახურ ანამნეზში აღინიშნება კუნთების პრობლემები ან კუნთების პრობლემების წინა ისტორია ქოლესტერინის დამაქვეითებელი სხვა პრეპარატების მიღების შემდეგ;
• დიდი რაოდენობით ალკოჰოლის რეგულარულად მიღება;
• აზიური წარმომავლობა(იაპონელი, ჩინელი, ფილიპინელი, ვიეტნამელი, კორეელი ან ინდოელი);
  • ქოლესტერინის დასაქვეითებლად ფიბრატებით მკურნალობა.

რომელიმე ზემოაღნიშნულ (ან ეჭვის) შემთხვევაში, ხელახლა მიმართეთ  ექიმს.

გაფრთხილებები და სიფრთხილის ზომები

ბუტორის მიღებამდე აცნობეთ ექიმს ან ფარმაცევტს შემდეგ მდგომარეობების შემთხვევაში:

• თირკმელებთან დაკავშირებული პრობლემა;
• ღვიძლთან დაკავშირებული პრობლემა;
• განმეორებითი ან დაუდგენელი კუნთების ტკივილი, ინდივიდუალურ ან ოჯახურ ანამნეზში  კუნთების პრობლემები ან კუნთების პრობლემების წინა ისტორია ქოლესტერინის დამაქვეითებელი სხვა პრეპარატების მიღების შემდეგ. დაუყოვნებლივ აცნობეთ  ექიმს თუ გამოგივლინდათ დაუდგენელი კუნთების ტკივილი, განსაკუთრებით, თუ თავს ცუდად გრძნობთ და გაქვთ ცხელება. გარდა ამისა, აცნობეთ  ექიმს ან ფარმაცევტს თუ გაქვთ კუნთების მუდმივი სისუსტე;
• ბუტორის ან სხვა მსგავსი პრეპარატების მიღების შემდეგ თუ როდესმე გქონიათ კანზე ძლიერი გამონაყარი, კანის აქერცვლა, ბუშტუკები და/ან წყლულები პირის ღრუში;
• დიდი რაოდენობით ალკოჰოლის რეგულარულად მიღება;
• ფარისებრი ჯირკვლის   ფუნქციის დარღვევა;
• ქოლესტერინის დასაქვეითებლად ფიბრატებით მკურნალობა;  
• აივ ინფექციის საწინააღმდეგო პრეპარატებით, როგორიცაა რიტონავირი ლოპინავირთან და/ ან ატაზანავირთან კომბინირებული მკურნალობა. იხილეთ თავი „სხვა პრეპარატები და ბუტორი“;
• ბოლო 7 დღის განმავლობაში პერორალურად ან ინექციის სახით სამკურნალო საშუალება ფუზიდის მჟავათი მკურნალობა. ფუზიდის მჟავის და ბუტორის კომბინაციამ შეიძლება გამოიწვიოს სერიოზული პრობლემები კუნთების მხრივ (რაბდომიოლიზი), იხ. თავი „სხვა პრეპარატები და ბუტორი“;
•  70 წელს ზემოთ ასაკი (ექიმმა უნდა შეარჩიოს ბუტორის შესაფერისი სწორი საწყისი დოზა);
• სუნთქვის მწვავე უკმარისობა;
• აზიური წარმომავლობა - იაპონელი, ჩინელი, ფილიპინელი, ვიეტნამელი, კორეელი ან ინდოელი. ექიმმა უნდა შეარჩიოს ბუტორის პაციენტისთვის შესაფერისი სწორი საწყისი დოზა.

რაიმე ზემოაღნიშნულის (ან ეჭვის) გამოვლენის შემთხვევაში:

• არ მიიღოთ როზუვასტატინი 40 მგ (ყველაზე მაღალი დოზა) და მიმართეთ ექიმს ან ფარმაცევტს ბუტორის ნებისმიერი დოზის მიღების დაიწყებამდე.

დაფიქსირებული იყო ბუტორით მკურნალობასთან დაკავშირებული კანის სერიოზული რეაქციები, მათ შორის სტივენს-ჯონსონის სინდრომი და წამლისმიერი რეაქცია ეოზინოფილიასთან და სისტემურ სიმპტომებთან (DRESS) ერთად. 

ადამიანთა მცირე რაოდენობაში სტატინებმა შესაძლოა გავლენა მოახდინოს ღვიძლზე. ამის იდენტიფიცირება შესაძლებელია მარტივი ტესტით, რომელიც გამოავლენს  ღვიძლის ფერმენტების მომატებულ დონეს სისხლში.  ამის გათვალისწინებით, ბუტორით მკურნალობის დაწყებამდე და მკურნალობის განმავლობაში, საჭიროა სისხლის ანალიზის ჩატარება ექიმის მოთხოვნით (ღვიძლის ფუნქციის ტესტი).

ამ მედიკამენტით მკურნალობისას  სამედიცინო მეთვალყურეობა ასევე საჭიროა, თუ პაციენტს აქვს დიაბეტი ან  დიაბეტის განვითარების რისკი. სავარაუდოდ, პაციენტი არის დიაბეტის განვითარების რისკის ქვეშ, თუ სისხლში აქვს შაქრის და ცხიმების მაღალი დონე, ჭარბი წონა და მაღალი წნევა.

ბავშვები და მოზარდები

6 წლამდე  ასაკი: ბუტორის მიცემა არ შეიძლება 6 წელზე ნაკლები ასაკის ბავშვებისთვის.

18 წლამდე ასაკი: როზუვასტატინის 40 მგ დოზა არ არის შესაფერისი ბავშვებისთვის და 18 წელზე ნაკლები ასაკის მოზარდებისთვის.

სხვა სამკურნალო საშუალებები და ბუტორი

აცნობეთ ექიმს ან ფარმაცევტს, თუ იღებთ, ახლახანს მიიღეთ ან შესაძლოა მიიღოთ ნებისმიერი სხვა მედიკამენტი

აცნობეთ  ექიმს თუ თქვენ იღებთ რომელიმე შემდეგ მედიკამენტს:

• ციკლოსპორინი (გამოიყენება, მაგალითად, ორგანოს ტრანსპლანტაციის შემდეგ);
• ვარფარინი ან კლოპიდოგრელი (ან რომელიმე სხვა პრეპარატი, რომელიც გამოიყენება სისხლის გასათხელებლად);
• ფიბრატები (როგორიცაა გემფიბროზილი, ფენოფიბრატი) ან ან რომელიმე სხვა სამკურნალო საშუალება, რომელიც გამოიყენება ქოლესტერინის დასაქვეითებლად (მათ შორის, ეზეტიმიბი);
• საჭმლის მომნელებელ სისტემაზე მოქმედი საშუალებები  ( კუჭში მჟავას გამანეიტრალებელი საშუალებები);
• ერითრომიცინი (ანტიბიოტიკი), ფუზიდის მჟავა (იხილეთ ქვემოთ "გაფრთხილებები და სიფრთხილის ზომები");
• ორალური კონტრაცეპტივი;
• რეგორაფენიბი (გამოიყენება კიბოს სამკურნალოდ);
• დაროლუტამიდი (გამოიყენება კიბოს სამკურნალოდ);
• ჰორმონჩანაცვლებითი თერაპია;
• ნებისმიერი შემდეგი პრეპარატი, რომელიც გამოიყენება ვირუსული ინფექციების სამკურნალოდ, აივ-ის ან C ჰეპატიტის ჩათვლით, ცალკე ან კომბინაციაში (იხილეთ გაფრთხილებები და სიფრთხილის ზომები): რიტონავირი, ლოპინავირი, ატაზანავირი, სოფოსბუვირი, ვოქსილაპრევირი, ომბიტასვირი, პარიტაპრევირი, დასაბუვირი, ველპატასვირი, გრაზოპრევირი, ელბასვირი, გლეკაპრევირი, პიბრენტასვირი.

ბუტორმა შეიძლება შეცვალოს ამ პრეპარატების ეფექტი ან მათი გავლენით შეიცვალოს ბუტორის ეფექტი.

ბაქტერიული ინფექციის  სამკურნალოდ პერორალური ფუზიდის მჟავის მიღების საჭიროებისას, დროებით უნდა შეწყდეს ამ სამკურნალო საშუალების გამოყენება. ექიმი განსაზღვრავს თუ როდის იქნება უსაფრთხო ბუტორის თავიდან გამოყენება. ფუზიდის მჟავასთან ერთად  ბუტორის  მიღებამ იშვიათად შეიძლება გამოიწვიოს კუნთების სისუსტე, მტკივნეულობა შეხებისას ან ტკივილი (რაბდომიოლიზი). რაბდომიოლიზის შესახებ დამატებითი ინფორმაცია იხილეთ ქვემოთ.

ორსულობა და ძუძუთი კვება

არ მიიღოთ ბუტორი  ორსულობისას ან ძუძუთი კვებისას. თუ  ბუტორის მიღების პერიოდში დაორსულდით, დაუყოვნებლივ შეწყვიტეთ მიღება და აცნობეთ ექიმს. ბუტორით მკურნალობისას ქალებმა თავი უნდა აარიდონ ორსულობას შესაფერისი კონტრაცეფციის გამოყენებით.

ნებისმიერი სამკურნალო საშუალების მიღებამდე რჩევისთვის თქვენს ექიმს ან ფარმაცევტს.

ავტომობილის მართვა და მექანიზმებთან მუშაობა

ადამიანთა უმეტესობას ბუტორის მიღებისას შეუძლია  ავტომობილის მართვა და  მექანიზმებთან მუშაობა, რადგან გავლენას არ ახდენს ამ უნარებზე. თუმცა ბუტორის მიღებისას ზოგიერთი ადამიანი გრძნობს თავბრუსხვევას. თუ გრძნობთ  თავბრუსხვევას,  სატრანსპორტო საშუალების მართვის ან მექანიზმების გამოყენების, მკურნალობის დაწყებამდე კონსულტაცია გაიარეთ ექიმთან.

ბუტორი შეიცავს ლაქტოზას

ზოგიერთი შაქრის მიმართ აუტანლობისას, ბუტორის მიღებამდე დაუკავშირდით  ექიმს.

მიღების წესი

ეს სამკურნალო საშუალება მიიღება ექიმის რეკომენდაციის მიხედვით.

ჩვეულებრივი დოზები მოზრდილთათვის მაღალი ქოლესტერინის გამო გამოყენებისას:

საწყისი დოზა

როზუვასტატინით მკურნალობა უნდა დაიწყოთ 5 მგ ან 10 მგ დოზით, მაშინაც კი, თუ ადრე გამოყენებული იყო სხვა სტატინის მაღალი დოზა. საწყისი დოზის შერჩევა დამოკიდებულია შემდეგზე:

• ქოლესტერინის დონე;
• ინფარქტის ან ინსულტის რისკის დონე;
• სხვა ფაქტორების არსებობა, რომლებმაც შესაძლებელია უფრო მგრძნობიარე გახადოს პაციენტი მოსალოდნელი გვერდითი ეფექტების მიმართ.

გადაამოწმეთ ექიმთან ან ფარმაცევტთან რომელი საწყისი დოზაა თქვენთვის შესაფერისი.

ექიმმა შეიძლება რეკომენდაცია გაუწიოს მინიმალურ (5 მგ) დოზას შემდეგ შემთხვევებში:

-         აზიური წარმოშობა (იაპონელი, ჩინელი, ფილიპინელი, ვიეტნამელი, კორეელი და ინდოელი);

-          70 წლის ზემოთ ასაკი;

-         თირკმლის საშუალო ხარისხის პრობლემები;

-         კუნთების ტკივილის განვითარების რისკი (მიოპათია).

დოზის გაზრდა და მაქსიმალური დღიური დოზა

ექიმმა შესაძლებელია მიიღოს გადაწყვეტილება დოზის გაზრდის შესახებ. ამგვარად შესაძლებელი გახდებაპაციენტისთვის  ბუტორის შესაფერისი დოზის მიღება. თუ მკურნალობა დაიწყება 5 მგ დოზის მიღებით,  ექიმმა შესაძლოა გადაწყვიტოს მისი გაორმაგება 10 მგ-მდე, შემდეგ 20 მგ და 40 მგ საჭიროების მიხედვით. თუ მკურნალობა დაიწყება 10 მგ-ის მიღებით, ექიმმა შესაძლოა გადაწყვეტოს მისი გაორმაგება 20 მგ-მდე და შემდეგ 40 მგ საჭიროების შემთხვევაში. დოზის ყოველი კორექტირების შორის ინტერვალი უნდა შეადგენდეს 4 კვირას.

როზუვასტატინის მაქსიმალური დღიური დოზაა 40 მგ. ეს დოზა განკუთვნილია მხოლოდ იმ პაციენტებისთვის, რომლებსაც აქვთ ქოლესტერინის მაღალი დონე და ინფარქტის ან ინსულტის მაღალი რისკი, და რომელთა ქოლესტერინის დონე 20 მგ დოზის მიღების შემდეგ საკმარისად არ ქვეითდება.

ბუტორის მიღება  ინფარქტის, ინსულტის ან ჯანმრთელობის მსგავსი პრობლემების შემცირების მიზნით:

რეკომენდებული დოზაა 20 მგ დღეში ერთხელ. თუმცა, რომელიმე ზემოთ აღნიშნული ფაქტორის არსებობისას,  ექიმმა შეიძლება გადაწყვიტოს უფრო დაბალი დოზის გამოყენება.

ბავშვებში და 6-17 წლის მოზარდებში გამოყენება

ბავშვებში და 6-დან 17 წლამდე ასაკის მოზარდებშიდღიური დოზის დიაპაზონი შეადგენს 5-20 მგ-ს დღეში ერთხელ. ჩვეულებრივი საწყისი დოზაა 5 მგ და ექიმი თანდათანობით გაზრდის ბუტორის  დოზას პაციენტისთვის შესაფერისი საჭირო რაოდენობის შესარჩევად.

6 წლიდან 17 წლამდე ასაკის ბავშვებში ბუტორის მაქსიმალური დღიური დოზაა 10 ან 20 მგ, რაც დამოკიდებულია იმ ძირითად მდგომარეობაზე, რომელიც საჭიროებს მკურნალობას.  რეკომენდებული დოზა მიიღება დღეში ერთხელ.

ბავშვებში არ შეიძლება როზუვასტატინის 40 მგ დოზის გამოყენება. 

ტაბლტების მიღება

ტაბლეტი უნდა გადაიყლაპოს მთლიანად, წყლის მიყოლებით.

ბუტორი მიიღება ერთხელ დღეში.   მიღება შეიძლება დღის ნებისმიერ დროს, საკვებთან ერთად ან საკვების გარეშე. სასურველია ტაბლეტების მიღება ყოველდღე ერთსა და იმავე დროს.

ქოლესტერინის რეგულარული შემოწმება

მნიშვნელოვანია ექიმის მეთვალყურეობით ქოლესტერინის რეგულარული კონტროლი, რათა უზრუნველყოფილი იყოს  ქოლესტერინის  სასურველი დონის მიღწევა და შენარჩუნება.

ექიმი იღებს გადაწყვეტილებას დოზის გაზრდასთან დაკავშირებით იმისთვის, რომ პაციენტმა მიიღოს პრეპარატის შესაფერისი დოზა.

დოზის გადაჭარბება

მედიკამენტის დოზის გადაჭარბების შემთხვევაში რჩევისთვის მიმართეთ  ექიმს ან უახლოეს საავადმყოფოს.

თუ მოხვდით საავადმყოფოში ან იღებთ მკურნალობას სხვა მდგომარეობასთან დაკავშირებით, აცნობეთ სამედიცინო პერსონალს რომ იღებთ  ბუტორს.

დოზის გამოტოვება

დოზის გამოტოვების შემთხვევაშიშემდეგი დოზა  მიიღეთ გეგმის მიხედვით, სწორ დროს. არ მიიღოთ გაორმაგებული დოზა გამოტოვებული დოზის სანაცვლოდ.

მკურნალობის შეწყვეტა

ბუტორის მიღების შეწყვეტამდე კონსულტაციისთვის მიმართეთ ექიმს. თუ შეწყვეტთ ბუტორის მიღებას, ქოლესტერინის დონე შესაძლოა ისევ ამაღლდეს.

ამ სამკურნალო საშუალების გამოყენებასთან დაკავშირებით რაიმე დამატებითი შეკითხვის შემთხვევაში, მიმართეთ  ექიმს ან ფარმაცევტს.

გვერდითი ეფექტები

სხვა სამკურნალო საშუალებების ანალოგიურად, ამ სამკურნალო საშუალებამაც შეიძლება გამოიწვიოს გვერდითი ეფექტები, თუმცა არა ყველა იმ პირში, ვინც მას იღებს.

მნიშვნელოვანია იმის ცოდნა თუ როგორი სახის შეიძლება იყოს ეს გვერდითი ეფექტები. ისინი, ჩვეულებრივ, სუსტადაა გამოხატული და მათი გაქრობა ხდება მოკლე დროში.

ბუტორის მიღება  და დაუყოვნებლივ მიმართეთ სამედიცინო დახმარებას თუ გაქვთ რომელიმე შემდეგი ალერგიული რეაქცია:

• სუნთქვის გაძნელება სახის, ტუჩების, ენის და/ან ხორხის შეშუპებით ან მის გარეშე;
• სახის, ტუჩების, ენის და/ან ხორხის შეშუპება, რამაც შეიძლება გამოიწვიოს ყლაპვის გაძნელება;
• კანის ძლიერი ქავილი (კანის ზედაპირიდან ამოწეული ელემენტებით);
• მოწითალო, სამიზნეს მსგავსი ან მრგვალი ლაქები სხეულზე, ბუშტუკებით ცენტრში, რომლებიც არ არის ამოწეული კანის ზედაპირიდან, კანის აქერცვლა, პირის ღრუს, ყელის, ცხვირის, გენიტალიების და თვალების წყლულები. კანზე ამ სერიოზულ გამონაყარს  შეიძლება წინ უძღოდეს ცხელება და გრიპისმაგვარი სიმპტომები (სტივენს-ჯონსონის სინდრომი);
• გავრცობილი გამონაყარი, სხეულის მაღალი ტემპერატურა და გადიდებული ლიმფური კვანძები (DRESS სინდრომი ან სამკურნალო საშუალებების მიმართ მომატებული მგრძნობელობის სინდრომი).

ბუტორის მიღება ასევე შეწყვიტეთ და დაუყოვნებლივ აცნობეთ  ექიმს:

• თუ გაქვთ კუნთების უჩვეულო სისუსტე ან ტკივილი, რაც გრძელდება მოსალოდნელზე მეტ ხანს. კუნთების მხრივ სიმპტომები უფრო ხშირია ბავშვებსა და მოზარდებში, ვიდრე მოზრდილებში. სხვა სტატინების მსგავსად, ადამიანების ძალიან მცირე რაოდენობას აღმოაჩნდა  უსიამოვნო ეფექტები კუნთების მხრივ და, იშვიათად, ეს გადაიზარდა სიცოცხლისათვის პოტენციურად საშიში კუნთების დაზიანებაში, რომელიც ცნობილია როგორც რაბდომიოლიზი;
• თუ გაქვთ კუნთების გაწყვეტა;
• თუ გაქვთ მგლურასმაგვარი სინდრომი (მათ შორის გამონაყარი, სახსრების მხრივ დარღვევები და ზეგავლენა სისხლის უჯრედებზე).

ხშირი შესაძლო გვერდითი ეფექტები (შეიძლება გამოვლინდეს დიაპაზონში 10-დან 1 და 100-დან 1 პაციენტში):

• თავის ტკივილი, მუცლის ტკივილი, ყაბზობა, შეუძლოდ ყოფნა, კუნთების ტკივილი, სისუსტე, თავბრუსხვევა;
• შარდში ცილების რაოდენობის მომატება – ჩვეულებრივ თავისთავად უბრუნდება ნორმას ბუტორის ტაბლეტების მიღების შეწყვეტის გარეშე (მხოლოდ 40მგ როზუვასტატინი);
• დიაბეტი, რომლის განვითარებას ხელს უწყობს შაქრის ან ცხიმების მაღალი დონე სისხლში,  ჭარბი წონა, მაღალი არტერიული წნევა.  ამ პრეპარატის მიღებისას ექიმი აწარმოებს შესაბამის მონიტორინგს.

არახშირი შესაძლო გვერდითი ეფექტები (შეიძლება გამოვლინდეს დიაპაზონში 100-დან 1 და 1000-დან 1 პაციენტში):

• გამონაყარი, ქავილი და სხვა რეაქციები კანის მხრივ;
• შარდში ცილების რაოდენობის მომატება – ჩვეულებრივ თავისთავად უბრუნდება ნორმას ბუტორის მიღების შეწყვეტის გარეშე (მხოლოდ 5 მგ, 10 მგ, 20 მგ როზუვასტატინი).

იშვიათი შესაძლო გვერდითი ეფექტები (შეიძლება გამოვლინდეს დიაპაზონში 1000-დან 1 და 10000-დან 1 პაციენტში):

• მძიმე ალერგიული რეაქციები –  ნიშნები მოიცავს სახის, ტუჩების, ენის და/ან ხორხის შეშუპებას, რამაც შეიძლება გამოიწვიოს ყლაპვის და სუნთქვის გაძნელება, კანის ძლიერი ქავილი (კანის ზედაპირიდან ამოწეული ელემენტებით).

თუ ფიქრობთ, რომ გაქვთ ალერგიული რეაქცია, შეწყვიტეთ ბუტორის მიღება და დაუყოვნებლივ მიმართეთ სამედიცინო დახმარებას;

• კუნთების დაზიანება მოზრდილებში – სიფრთხილის მიზნით შეწვიტეთ ბუტორის მიღება და დაუყოვნებლივ მიმართეთ ექიმს, თუ გაქვთ რაიმე უჩვეულო ტკივილი კუნთებში, რომელიც გრძელდება მოსალოდნელზე მეტხანს;
• კუჭის ძლიერი ტკივილი (პანკრეასეის ანთება);
• სისხლში ღვიძლის ფერმენტების მომატება;
• სისხლდენის ან სისხლჩაქცევების ჩვეულებრივზე იოლად განვითარება თრომბოციტების დაბალი დონის გამო;
• მგლურასმაგვარი სინდრომი (მათ შორის გამონაყარი, დარღვევები კუნთების მხრივ და გავლენა სისხლის უჯრედებზე).

ძალიან იშვიათი შესაძლო გვერდითი ეფექტები (შეიძლება გამოვლინდეს 10000-დან 1 პაციენთში ნაკლებად):

• სიყვითლე (კანის და თვალების გაყვითლება), ჰეპატიტი, ედემა (შეშუპება), სისხლის კვალი შარდში, ფეხების და ხელების ნერვების დაზიანება (დაბუჟება), სახსრების ტკივილი, მეხსიერების დაკარგვა და მკერდის გაზრდა მამაკაცებში (გინეკომასტია).

 გვერდითი ეფექტები უცნობი სიხშირით შეიძლება მოიცავდეს შემდეგს:

• დიარეა (თხიერი განავალი), ხველა, ქოშინი, ედემა (შეშუპება), ძილის დარღვევა, მათ შორის უძილობა და კოშმარები, სექსუალური დისფუნქცია, დეპრესია, სუნთქვის პრობლემები, მათ შორის მუდმივი ხველა და/ან ქოშინიან ცხელება, მყესების დაზიანება და კუნთების სისუსტე.

შეტყობინებები გვერდითი ეფექტების შესახებ

აცნობეთ ექიმს ან ფარმაცევტს თუ გაქვთ რაიმე გვერდითი ეფექტი. ეს მოიცავს   ნებისმიერ გვერდით ეფექტებსაც, რომლებიც ზემოთ არ არის ჩამოთვლილი. გვერდით ეფექტებზე  შეტყობინება ასევე შეგიძლიათ უშუალოდ ყვითელი ბარათის სქემის საშუალებით. გვერდით ეფექტების შესახებ შეტყობინებით თქვენ შეგიშლიათ დახმარების გაწევა ამ სამკურნალო საშუალების უსაფრთხოებაზე მეტი ინფორმაციის მიწოდებაში.

შენახვის წესი

ბლისტერები: შეინახეთ 30°C-ზე დაბალ ტემპერატურაზე. შეინახეთ ორიგინალურ შეფუთვაში ნესტისგან დასაცავად.

პრეპარატი შეინახეთ ბავშვებისთვის მიუწვდომელ ადგილას.

არ გამოიყენოთ პრეპარატი ვადის გასვლის შემდეგ, რომელიც მითითებულია კოლოფზე/ ბლისტერზე/ეტიკეტზე EXP-ის შემდეგ. ვადის გასვლის თარიღი ეხება იმ თვის ბოლო დღეს.

არ გადააგდოთ სამკურნალო საშუალებები გამდინარე წყლებში ან საყოფაცხოვრებო ნარჩენებთან ერთად. ჰკითხეთ ფარმაცევტს, თუ როგორ უნდა გადააგდოთ პრეპარატები, რომლებსაც აღარ იყენებთ. ეს ზომები ხელს შეუწყობს გარემოს დაცვას.

აღწერილობა და შეფუთვის შემადგენლობა

ბუტორი წარმოდგენილია OPA/Alu/PVC-ალუმინის ფოლგის ბლისტერებში, თითო ბლისტერი შეიცავს 10 ტაბლეტს, კოლოფში მოთავსებულია 30 ტაბლეტი.

ბუტორი წარმოდგენილია ორი დოზით:10 მგ და 20 მგ.

ბუტორის ტაბლეტები არის თეთრი, მრგვალი, ორმხრივამოზნექილი აპკიანი გარსით დაფარული ტაბლეტები.

გაცემის რეჟიმი

ფარმაცევტული პროდუქტის ჯგუფი - II, გაიცემა ფორმა №3 რეცეპტით.

სავაჭრო ლიცენზიის მფლობელი

Medicair Bioscience Laboratories CY Ltd

Anexartisias 3,

3036 Limassol, კვიპროსი

მწარმოებელი

Medicair Bioscience Laboratories S.A.

Athinon-Lamias National Road 61^st km,

Schimatari, 32009, საბერძნეთი.