ტრადიცია გრძელდება: 17 მარტს საქველმოქმედო ფონდმა "ავერსმა" და "ავერსის კლინიკამ" განაახლეს საქართველოს ეროვნულ ოლიმპიურ კომიტეტთან დადებული მემორანდუმი. ფონდი ვალდებულებას იღებს, საქართველოს ეროვნული ოლიმპიური ნაკრების წევრებს და ვეტერან სპორტსმენებს უფასოდ გაუწიოს სამედიცინო მომსახურება "ავერსის" კლინიკათა ქსელში და უფასოდ უზრუნველყოს ყველა საჭირო მედიკამენტით.
მემორანდუმის განახლების აღსანიშნავ საზეიმო ღონისძიებას "ავერსმა" უმასპინძლა. მოწვეულ სტუმრებს შორის იყვნენ საქართველოს ოლიმპიური კომიტეტის წარმომადგენლები, ოლიმპიური თამაშების ჩემპიონები და პრიზიორები.
პაატა კურტანიძემ, კომპანია "ავერსის" დამფუძნებელმა, აღნიშნა, რომ ოლიმპიურ კომიტეტთან თანამშრომლობა ერთ-ერთი ყველაზე გამორჩეული მომენტია "ავერსის" ქველმოქმედების ისტორიაში:
- სამედიცინო მომსახურებას ვუწევთ როგორც მოქმედ, ისე ვეტერან სპორტსმენებსაც. გვეამაყება, რომ წვლილი შეგვაქვს იმ ადამიანების წარმატებაში, რომლებსაც ჩვენი ქვეყნის სახელი საერთაშორისო ასპარეზზე გააქვთ. ვეტერანი სპორტსმენების ჯანმრთელობაზე ზრუნვა კი გამორჩეულად სასიამოვნოა, - გვითხრა ბატონმა პაატამ და იმედი გამოთქვა, რომ "ავერსი" კიდევ მრავალი წელი შეძლებს სპორტსმენების მხარდაჭერას.
ხელმძღვანელობის გადაწყვეტილებით, "ავერსის" კლინიკები მხოლოდ უახლესი აპარატურით არის აღჭურვილი. კომპანიის პარტნიორები არიან სამედიცინო აპარატურის მწარმოებელი წამყვანი ბრენდები მთელი მსოფლიოდან, უახლესი ტექნოლოგიები კი მაღალი კლასის სამედიცინო მომსახურებას უზრუნველყოფს:
- თამამად შეგვიძლია განვაცხადოთ, რომ ჩვენი სპორტსმენები საერთაშორისო სტანდარტის შესაბამის სამედიცინო მომსახურებას და უმაღლესი ხარისხის მედიკამენტებს იღებენ. ღმერთის მადლიერი ვარ, რომ გვაქვს შესაძლებლობა, ასე დავუდგეთ გვერდით ქართულ სპორტს.
ლერი ხაბელოვმა, საქართველოს ეროვნული ოლიმპიური კომიტეტის პრეზიდენტმა, დიდი მადლობა გადაუხადა "ავერსს" და მის დამფუძნებელს ქართული სპორტის განვითარებაში შეტანილი უდიდესი წვლილისთვის და დასძინა, რომ სპორტსმენებისთვის განსაკუთრებული სტიმულია, როდესაც მხარდამჭერად ასეთი ძლიერი კომპანია ეგულებათ.
გასულ წელს კოვიდ-19-ის პანდემიის გამო გადადებული ოლიმპიური თამაშები წლეულს გაიმართება. ქართველი სპორტსმენები შეჯიბრებისთვის განსაკუთრებით ემზადებიან. "ავერსი" ამჯერადაც მათ გვერდითაა.
- მადლიერება უნდა გამოვხატო "ავერსის" მიმართ, რომელიც უკვე წლებია ასე უანგაროდ გვიდგას მხარში. თითოეული სპორტსმენი, ვისაც "ავერსის" საქველმოქმედო პროექტში მიუღია მონაწილეობა, აღნიშნავს, რომ "ავერსის კლინიკაში" თავს ისე გრძნობენ, როგორც საკუთარ სახლში. კეთილგანწყობა ყველასგან იგრძნობა, - აღნიშნა საქართველოს ოლიმპიურმა ჩემპიონმა გელა კეტაშვილმა.
მემორანდუმი პირველად 2009 წელის 19 თებერვალს გაფორმდა. როგორც საქველმოქმედო ფონდ "ავერსის" ხელმძღვანელმა ქეთევან ნემსაძემ აღნიშნა, პროექტის ფარგლებში სპორტსმენებმა დღემდე ისარგებლეს 1 158 958 ლარის სამედიცინო მომსახურებით და მიიღეს 745134 ლარის ღირებულების მედიკამენტები, რაც ჯამში 1 904 092 ლარს შეადგენს.
"ავერსი" წარმატებას და გამარჯვებას უსურვებს საქართველოს სახელით მოასპარეზე სპორტსმენებს.
