ვარჯიში მომავალი დედებისთვის

დაპირებისამებრ, განვაგრძობთ ვარჯიშების ბეჭდვას მომავალი დედებისათვის. ამჯერად მეორე ტრიმესტრისთვის განკუთვნილ კომპლექსსშემოგთავაზებთ.
მაია ხვიჩია
“ავერსის კლინიკის” ფიზიოთერაპიისა და რეაბილიტაციის სამსახურის მეთოდისტი
– როგორც უკვე ვთქვით, ვარჯიშების შერჩევისას მრავალი ფაქტორია გასათვალისწინებელი: ორსულობის ვადა, ქალის ასაკი, ფიზიკური მომზადება, ჯანმრთელობის მდგომარეობა, – ამიტომ საუკეთესო ვარიანტია, მეთოდისტმა თქვენივე გინეკოლოგის რეკომენდაციით შეგიდგინოთ ფიზიკური დატვირთვის გეგმა და თვალყური ადევნოს, რამდენად ზუსტად ასრულებთ ვარჯიშებს.
სამკურნალო ფიზკულტურის ერთადერთი მიზანი ორსულობისა და მშობიარობის ნორმალური მიმდინარეობისა და ნაყოფის სრულყოფილი განვითარების ხელშეწყობაა, ამიტომაც კომპლექსში შედის სუნთქვის, მუცლის პრესის, მენჯის ფუძის კუნთების ტონუსისა და ელასტიკურობის მოსამატებელი ვარჯიშები. ეს მშობიარობის პროცესს გააადვილებს, შეამცირებს ნახევების გაჩენის ალბათობას, ხელს შეუშლის შიგნითა სასქესო ორგანოების გამოვარდნას და მშობიარობის შემდეგ მუცლის წინა კედლის მოშვებას.მეორე ტრიმესტრში მეტ ყურადღებას ვაქცევთ ზურგისა და მუცლის კუნთებს. ვარჩევთ ვარჯიშებს, რომლებიც ხერხემლისა და მენჯის შესახსრებების მოქნილობასა და პლასტიკურობას აძლიერებს, ვავარჯიშებთ ფეხის კუნთებს ვენური შეგუბების პროფილაქტიკისთვის.
ორსულობის ამ პერიოდშიც არ შეიძლება ხტომა, მკვეთრი ბრუნვა, ძალისმიერი ვარჯიშები, ვარჯიშები, რომლებიც მოითხოვს ხელების სწრაფად აწევას, სხეულის აჭიმვას, სუნთქვის შეკავებას. ვარჯიშის დროს სუნთქვა და პულსი არ უნდა გახშირდეს, უკიდურეს შემთხვევაში, უმნიშვნელოდ უნდა მოიმატოს.
შეგახსენებთ: განურჩევლად იმისა, ორსულობის რომელ პერიოდში გადაწყვეტთ ვარჯიშის დაწყებას, გინეკოლოგთან კონსულტაცია აუცილებლად გაიარეთ.

1. დადექით, წელში გაიმართეთ. ფეხები მხრების სიგანეზე გაშალეთ. გამართული ხელებით ჯოხი მკერდის სიმაღლეზე დაიჭირეთ. ნელ-ნელა დაეშვით მენჯ-ბარძაყისა და მუხლის სახსრებში ნახევარბუქნის მდგომარეობამდე. გაიმეორეთ 5-7-ჯერ.

2. დადექით წელში გამართული. ფეხები მხრებზე ფართოდ დადგით. ხელები განზე გაშალეთ. დაიხარეთ წინ და სცადეთ, მარჯვენა ხელი მარცხენა ტერფთან მიიტანოთ. დაუბრუნდით საწყის მდგომარეობას და შეასრულეთ იგივე მოძრაობა მეორე მხარეს. გაიმეორეთ 5-7-ჯერ.
3. დაჯექით სკამზე. წელში გაიმართეთ. ხელებით მუხლებს დაეყრდენით. ორივე ფეხი განზიდეთ მენჯ-ბარძაყის სახსარში, ქუსლები შიგნით შეატრიალეთ და თითის წვერებზე აიწიეთ. დაუბრუნდით საწყის მდგომარეობას. გაიმეორეთ 5-7-ჯერ.
4. ღრმად დაჯექით სკამზე, ისე, რომ მთელი ბარძაყი დასაჯდომს ეყრდნობოდეს. ხელები მკერდის სიმაღლეზე გამართეთ. გამართეთ მარჯვენა ფეხიც, ისე, რომ სკამთან 90-გრადუსიანი კუთხე შექმნას. დაუშვით. გააკეთეთ იგივე მარცხენა ფეხით. გაიმეორეთ 5-7-ჯერ
5. საწყისი მდგომარეობა: დაწექით ზურგზე, ხელები თავქვეშ ამოიდეთ, ფეხები მუხლებში მოხარეთ და აქეთ-იქით გადაშალეთ, ტერფები ერთმანეთს მიაბჯინეთ.
ნელა გააცურეთ შეერთებული ტერფები იატაკზე, ისე, რომ ერთმანეთს არ დააცილოთ. მაქსიმალური გაშლისას, რომელიც ტკივილს და დისკომფორტს არ მოგაყენებთ, რამდენიმე წამი შეჩერდით და დაუბრუნდით საწყის მდგომარეობას.
6. დაწექით ზურგზე. ხელები თავქვეშ ამოიდეთ. ასწიეთ ფეხი და შემოხაზეთ ჰაერში წრე ჯერ საათის ისრის, შემდეგ საპირისპირო მიმართულებით.  გაიმეორეთ 5-7-ჯერ ჯერ ერთი, მერე მეორე ფეხით.
7. დაჯექით სავარჯიშო ბურთზე. წელში გაიმართეთ, ხელებით დოინჯი შემოირტყით. დაიკავეთ წონასწორობა და იბუქნავეთ 2 წუთის განმავლობაში.

“ავერსის კლინიკის” ფიზიოთერაპიისა და რეაბილიტაციის სამსახურის ტელეფონია: 0322 50 07 00