მეხუთე გაკვეთილი კვების რეჟიმი

  შაქრიანი დიაბეტი ტიპი 2-ის დროს ცხოვრების სტილის მოდიფიკაცია დღის განმავლობაში საკვების სწორ განაწილებასაც გულისხმობს. დაავადების მართვისას ამას გადამწყვეტი მნიშვნელობა ენიჭება, თუმცა არ არის აუცილებელი, რეჟიმი წუთობრივად იყოს გაწერილი. მაგალითად, ეცადეთ, ყოველთვის ცხრიდან ათ საათამდე ისაუზმოთ, ორიდან სამამდე ისადილოთ და შვიდიდან რვამდე ივახშმოთ.
თანამედროვე თვალთახედვით, შაქრიანი დიაბეტის დროს 4-5-ჯერადი საფუძვლიანი კვება არ არის საჭირო. უპირატესობა ენიჭება სამჯერად კვებას ხუთსაათიანი ინტერვალებით. თითოეული კვებისას (საუზმეზე, სადილზე, ვახშამზე) ეცადეთ ზომიერი რაოდენობით მიირთვათ II ჯგუფის ანუ შაქრის დონის ამწევი პროდუქტები (ცეხვილი პური, ბურღულეული და მაკარონის ნაწარმი, კარტოფილი, რძის თხევადი ნაწარმი და ხილი). ეს საჭიროა იმისთვის, რომ დღის განმავლობაში გლუკოზა სისხლში მეტ-ნაკლებად სტაბილურ დონეზე შეინარჩუნოთ და თავიდან აიცილოთ როგორც ჰიპოგლიკემია (გლუკოზის ნორმაზე ქვემოთ დაწევა), ისე ჰიპერგლიკემია (გლუკოზის მაღალი დონე). დანაყრების შეგრძნების მისაღწევად რაციონი შეგიძლიათ შეავსოთ იმ პროდუქტებით, რომლებიც სისხლში შაქრის დონეს არ სწევს.
შუალედებში შეგიძლიათ წაიხემსოთ, მაგრამ მხოლოდ I ჯგუფის პროდუქტებით (შეგახსენებთ, პირველ ჯგუფში შედის ბოსტნეული კარტოფილის, ჭარხლისა და სტაფილოს გარდა, მჭლე ხორცი, თევზი, დაბალცხიმიანი ყველი და ხაჭო, უკალორიო სასმელები – უშაქრო ჩაი, ყავა, კოკა-კოლა ზერო, პეპსი ლაითი და სხვა).
სასურველია, საღამოს 7-8 საათის შემდეგ აღარაფერი მიირთვათ – ეს წაადგება როგორც ღამით სისხლში გლუკოზის შემცველობას, ისე სხეულის წონას. ძილის წინ განსაკუთრებით ერიდეთ გლუკოზის შემცველ და მაღალკალორიულ პროდუქტებს. გახსოვდეთ, თუ ამ პერიოდში შაქრით იტვირთებით, მთელ ღამეს, ანუ ცხოვრების ნახევარს, მაღალი შაქრის მავნე ზემოქმედების ქვეშ ატარებთ. სწორედ ამაზე მიუთითებს მაღალი შაქარი უზმოზე აღებულ სისხლში.
ფიზიკური აქტივობა 
საკვები რაციონის სწორად შერჩევასთან ერთად შაქრიანი დიაბეტის მართვაში რეგულარულ ფიზიკური აქტივობაც უდიდეს როლს ასრულებს. ფიზიკური აქტივობა დაგეხმარებათ არა მარტო სისხლში შაქრის დონის ნორმალიზებაში, არამედ წონის დაქვეითებაში, ლიპიდური ცვლის პარამეტრების გაუმჯობესებასა და არტერიული წნევის დარეგულირებაშიც.
სასურველია, ყოველკვირა 180 წუთი დაუთმოთ ფიზიკურ აქტივობას, ანუ კვირაში სამჯერ თითო საათი გაატაროთ ფიტნესკლუბში, აუზში ან, უბრალოდ, ისეირნოთ. უმჯობესია, ფიზიკური აქტივობა დაგეგმოთ საღამოს საათებში, ამის შემდეგ კი აღარაფერი მიირთვათ. უკალორიო სითხეები დღის ნებისმიერ მონაკვეთში, მათ შორის – ფიზიკური აქტივობის დროსაც და მის შემდეგაც, შეგიძლიათ სურვილისამებრ მიიღოთ. 
ფაქტები:
1. ცოცხალი ხილი უფრო სასარგებლოა, ვიდრე წვენები.
– ცოცხალ ხილში მეტია უჯრედისი, რაც ნაწილობრივ ხელს უშლის ხილში არსებული ნახშირწყლების შეწოვას, ხოლო მექანიკურად და თერმულად დამუშავებულ ხილში უჯრედისი დაზიანებულია და ნახშირწყლები სრულად შეიწოვება, შესაბამისად, ორგანიზმში იმატებს შაქრის დონე.
2. ნახშირწყლები აუცილებელია ენერგიის მისაღებად.
– დიახ, არ შეიძლება რაციონიდან ნახშირწყლების სრულიად გამორიცხვა, რადგან ისინი აუცილებელია ორგანიზმის ენერგეტიკული მარაგის აღსადგენად. გლუკოზა ჩვენი ორგანიზმისთვის ენერგიის უმთავრესი წყაროა. ნახშირწყლები იმდენი უნდა მივიღოთ, რომ ენერგიის წყაროდ გამოვიყენოთ, მაგრამ მათმა მიღებამ არ გამოიწვიოს სისხლში შაქრის დონის მატება და სამიზნე ორგანოების დაზიანება.
3. ყოველი კვებისას დაახლოებით ერთი და იმავე რაოდენობის ნახშირწყლები უნდა მივიღოთ.
– ეს მართლაც ძალზე სასურველია შაქრიანი დიაბეტის გართულებათა პროფილაქტიკისთვის. კარგი იქნება, თუ ყოველ ჯერზე ზომიერი რაოდენობით აიღებთ II ჯგუფის პროუდუქტს (ბურღლეულს, კარტოფილს და ა.შ.) და შეავსებთ ნებისმიერი რაოდენობის I ჯგუფის პროდუქტებით. დღის განმავლობაში საკვების ასეთი განაწილება თავიდან აგაცილებთ სისხლში შაქრის დონის მერყეობას. გახსოვდეთ, შაქრის მუდმივად მაღალი დონე სისხლძარღვებს ისე არ აზიანებს, როგორც მისი მკვეთრი ცვალებადობა.
მითები
1. დიაბეტიანი პაციენტებისთვის რეკომენდებულია წიწიბურა, რადგან ის არ ზრდის (პირიქით, აქვეითებს) სისხლში შაქრის დონეს.
– არ არის სწორი. წიწიბურა ბურღულია, რომელიც სისხლში შაქრის დონეზე ისევე მოქმედებს, როგორც ნებისმიერი სხვა ბურღული, ამიტომ მისი მიღებისას ისეთივე ზომიერება გმართებთ, როგორც სხვა სახის ბურღულეულის მიღებისას. 
2. შაქრიანი დიაბეტის მქონე პაციენტებმა უარი უნდა თქვან შოკოლადზე, მურაბასა და ნაყინზე. 
– ასეთი მკაცრი შეზღუდვა არ არის საჭირო. მართალია, სისხლში შაქრის შემცველობაზე დიაბეტური პროდუქტებიც (დიაბეტური ნაყინი, დიაბეტური ორცხობილა) ახდენს გავლენას, მაგრამ უფრო ნაკლებს, ვიდრე არადიაბეტური, ამიტომ შეგიძლიათ მიირთვათ, ოღონდ ზომიერად და კომბინირებულად. მათ ნუღარ დააყოლებთ II ჯგუფის პროდუქტებს, მაგალითად, ხილს ან რძის თხევად ნაწარმს. ასეთივე პირობით შეგიძლიათ მიირთვათ შოკოლადიც, სასურველია, შავი.
3. თუ გაქვთ შაქრიანი დიაბეტი ტიპი 2, თავს ძალიან იშვიათად (თვეში ერთხელ) უნდა მისცეთ რესტორანში წასვლის უფლება.
– ასე არ არის. დღეს ყველა რესტორანშია ჯანსაღი საკვების ფართო არჩევანი, ამიტომ იოლად დაუკვეთავთ გემრიელ საკვებს, რომელიც საფრთხეს არ შეუქმნის თქვენს ჯანმრთელობას.