ეს შეუცვლელი კომპიუტერი

 

XXI საუკუნეში, ფაქტობრივად, არ არსებობს საქმიანობა, კომპიუტერით რომ არ იმართებოდეს, საოფისე სამუშაო კი სულაც დილიდან საღამომდე პერსონალურ კომპიუტერთან ჯდომას გულისხმობს.

ბევრმა არ იცის, რა საფრთხეს გვიქადის ეს გენიალური მანქანა. მოდი, ერთად გავიგოთ, როგორ ვიმეგობროთ კომპიუტერთან ისე, რომ ჩვენს ჯანმრთელობას ზიანი არ მიადგეს.

 

ვის ეკრძალება

* მსოფლიოს მოსახლეობის 0.5%-ს ეპილეფსიის ესა თუ ის ფორმა აღენიშნება, თუმცა ეს დაავადება სრულიადაც არ არის კომპიუტერთან მუშაობაზე უარის სათქმელად საკმარისი საფუძველი. სიფრთხილე საჭიროა მხოლოდ უძველესი თაობის კომპიუტერებთან, რომელთა ეკრანიც ციმციმებს, რადგან ეპილეფსიის ზოგიერთი ფორმის დროს გულყრის შეტევას პროვოცირებას სწორედ მოციმციმე სინათლე უწევს.

* კომპიუტერის ეკრანი ასხივებს ელექტრომაგნიტურ ტალღებს, თუმცა ძალიან მცირე ოდენობით, რომელიც ჯანმრთელობისთვის უსაფრთხოდ მიიჩნევა. არსებობდა მოსაზრება, თითქოს ეს ტალღები თვალებსა და კანს აზიანებდა და კიბოსაც კი იწვევდა, მაგრამ ეს მოსაზრება არ დადასტურდა და გამოსხივებისგან დამცავი ეკრანებიც თანდათან კარგავს მნიშვნელობას.

* რამდენიმე საერთაშორისო ეპიდემიოლოგიურმა კვლევამ აჩვენა, რომ კომპიუტერთან მომუშავე ორსულებს და იმ ორსულებს, რომლებსაც კომპიუტერთან მუშაობა არ უწევთ, ორსულობასთან ასოცირებული პათოლოგიების განვითარების თანაბარი ალბათობა აქვთ. ასე რომ, კომპიუტერი არაფერ შუაშია. მიუხედავად ამისა, ზოგირთი კომპანია ორსულ თანამშრომლებს ურჩევს, ნაკლები ხანი გაატარონ მასთან.

პრაქტიკულად კი ვიქცევით ასე:

 

ვირგებთ სავარძელს

როგორი უნდა იყოს საოფისე სავარძელი? ისეთი, რომ მასში თავს კომფორტულად გრძნობდეთ.

დასაჯდომი ნაწილის სიმაღლე იმგვარად უნდა დაარეგულიროთ, რომ ფეხები მყარად გედგათ იატაკზე, წვივები და ბარძაყები კი ერთმანეთისადმი 90-გრადუსიან კუთხეს ქმნიდეს.

საზურგე ბოლომდე ასწიეთ და ნელ-ნელა დაუშვით, სანამ კომფორტულად არ მოერგება ზურგს. ყურადღება მიაქციეთ წელის არეს – მისი სათანადო ფიქსაცია კომფორტისთვის ძალიან მნიშვნელოვანია.

მნიშვნელოვანია საზურგის დახრის კუთხეც. მეტისმეტად გადაწეული საზურგე კარგია რელაქსაციისთვის, მაგრამ არამც და არამც – კომპიუტერთან სამუშაოდ.

ზოგიერთი საოფისე სავარძელი უსახელუროა. ამას პრაქტიკული მიზეზი აქვს: მაღალი სახელურები, რომლებიც მაგიდის ზედაპირს სწვდება, მუშაობაში ხელის შემშლელია, დაბალი კი მოუხერხებელი. რეგულირებადი სახელურები საუკეთესო ვარიანტია.

რა კომფორტულიც უნდა იყოს სავარძელი, მაინც გირჩევთ, ნახევარ საათში ერთხელ წამოდგეთ და 20-30 წამით გაიარ-გამოიაროთ.

 

ვერგებით მაგიდას

საოფისე სამუშაოს უმთავრესად მაგიდასთან ვასრულებთ, ასე რომ, მისი მორგებაც აუცილებელია. ვიწყებთ სასურველი სიმაღლის შერჩევით. თუ მაგიდის სიმაღლე რეგულირდება, ეცადეთ, ზედაპირი იმგვარად დააფიქსიროთ, რომ თქვენს დაშვებულ იდაყვებს გაუსწორდეს. ამ შემთხვევაში მუშაობისას მკლავი 90 გრადუსით მოიხრება, რაც იდეალური კომფორტის საწინდარია.

თუ მაგიდა უძრავია, არჩევისას მიუჯექით, მოეწყვეთ ისე, თითქოს თქვენს სამუშაო მაგიდასთან იჯდეთ, ხელები ზედ დააწყვეთ და დააკვირდით, მოხერხებულად ზიხართ თუ არა. თუ კი – შეიძინეთ.

ხოლო თუ დილით ოფისში ახალი სამუშაო მაგიდა დაგხვდათ, რომელიც გაცილებით მაღალია, ვიდრე კომფორტისთვის არის საჭირო, ასე მოიქეცით: სკამის დასაჯდომი ისე ასწიეთ, რომ იდაყვის მაგიდაზე დადებისას მკლავი 90 გრადუსით მოიხაროს. ოღონდ ფეხები არამც და არამც არ უნდა ჩამოგეკიდოთ – ფეხქვეშ დაიდგით პატარა სკამი ან მყარი კოლოფი, რომ ფეხებიც 90 გრადუსით გქონდეთ მოხრილი.

თუ მაგიდა საჭიროზე დაბალი აღმოჩნდა, სკამის დადაბლება მოწევთ, მაგრამ თუ ამის შემდეგ ფეხები მაგიდის ქვეშ უხერხულად მოთავსდა, ისევ ის აჯობებს, მაგიდა აამაღლოთ (ფეხებქვეშ მყარი საგნები ამოუწყოთ).

 

ვარეგულირებთ ეკრანს

კომპიუტერის ეკრანის დადგმა რეკომენდებულია ისე, რომ მისი ზედა ჩარჩო თქვენი თვალების გასწვრივ ან მათზე ოდნავ დაბლა აღმოჩნდეს. თუ ეკრანს სიმაღლის მარეგულირებელი მოწყობილობა არ გააჩნია, აამაღლეთ წიგნით, რვეულით, ძველი ბლოკნოტით, ქაღალდის დასტით... სახემდე, სასურველია, თქვენი მკლავის სიგრძე მანძილი იყოს, თუმცა ოდნავ ნაკლები ან მეტიც არ წარმოადგენს დიდ პრობლემას. მთავარია, ეკრანზე გამოსახულებას თუ ტექსტს კარგად ხედავდეთ.

როგორც წინა წერილშიც გითხარით, გამოსახულების უკეთ დასანახავად რეკომენდებულია, სინათლე ეკრანს არ ეცემოდეს. ნუ დადგამთ მონიტორს ფანჯრის წინ.

 

ვზოგავთ მაჯას

როდესაც, თაგუნას ჩაფრენილი, საათობით შეუსვენებლად მუშაობთ, მტევნის კუნთები იტვირთება და შესაძლოა, განვითარდეს კუნთების სპაზმი, კარპული სინდრომი, რომელსაც უკვე სამედიცინო ჩარევა სჭირდება. ასე რომ არ მოხდეს, მტევანი დროდადრო შეასვენეთ. შეგიძლიათ, თაგუნათი მუშაობა მეორე ხელსაც ასწავლოთ და ხელები დროდადრო შეუნაცვლოთ ერთმანეთს.

 

რამდენიმე სასარგებლო ვარჯიში

ვიწყებთ კისრით

დაჯექით სწორად. მხრები არ ამოძრაოთ. თავი ხან ერთ მხარეს დახარეთ ისე, თითქოს ყურით მხრის შეხება გსურდეთ, ხან – მეორე მხარეს. ასე გაიმეორეთ რამდენჯერმე.

შემდეგ თავი ჯერ ერთ მხარეს მიაბრუნეთ, თითქოს მხარზე დახედვა გსურდეთ, მერე – მეორე მხარეს. ესეც რამდენჯერმე გაიმეორეთ.

თავი სწორად დაიჭირეთ, მერე ქვედა ყბა დაბლა დაუშვით და ოდნავ შიგნით შესწიეთ, დაახლოებით ისე, თითქოს ღაბაბის გამოკვეთა გსურდეთ. გაიმეორეთ რამდენჯერმე.

 

ვაგრძელებთ მხრებით

აბრუნეთ მხრები წინიდან უკანა მიმართულებით. 3-5-ჯერ მაინც გაიმეორეთ.

 

...და ხელებით

გამართული ხელები წინ გაიწოდეთ. თითები ბოქლომივით შეკარით. მტევნები ამოაბრუნეთ ხელისგულებით გარეთ და დაჭიმეთ დაახლოებით 10 წამით.

გამართული ხელები წინ გაიწოდეთ. ცალი ხელის მტევანი ამოატრიალეთ ისე, რომ ხელისგული გარეთ მოაქციოთ და მეორე მტევნით ასე დაიჭირეთ 10 წამით. შემდეგ ხელები ერთმანეთს შეუნაცვლეთ.

 

ზურგითაც

გააკეთეთ ბოქლომი, ხელები თავს ზემოთ ასწოეთ და მტევნები ისე ამოატრიალეთ, რომ ხელისგულები ზემოთ იყოს მიმართული. ხელები გაჭიმეთ და ასე ნელ-ნელა გადაიხარეთ ჯერ ერთ, მერე მეორე მხარეს. გაიმეორეთ რამდენჯერმე.

დადექით სწორად, ხელები წელზე შემოიწყვეთ და ნელა გადაიხარეთ უკან. ასე გაჩერდით 5-10 წამი. გაიმეორეთ რამდენჯერმე.

გაიმართეთ, ხელები გაშალეთ გულმკერდის დონეზე. მტევნები მკერდთან მიიტანეთ. ამ პოზიციიდან იდაყვები მაქსიმალურად წაიღეთ უკან, თითქოს გინდოდეთ, ბეჭის ძვლები ერთმანეთს შეახოთ. გაიმეორეთ რამდენჯერმე.

 

ფეხებითაც

წონასწორობის შესანარჩუნებლად სკამის საზურგეს დაეყრდენით. მონაცვლეობით ასწიეთ თითოეული ფეხის ქუსლი და წვერი. შეანაცვლეთ ფეხები 10-ჯერ.

 

ვასრულებთ თვალებით

ისე, რომ თავი არ ამოძრაოთ, აიხედეთ ზემოთ, გაიხედეთ აქეთ-იქით, ბოლოს დაიხედეთ დაბლა.

მოაცილეთ მზერა ეკრანს და გაიხედეთ შორს, დაახლოებით სამ მეტრზე. შეაჩერეთ მზერა რამე საგანზე. მერე მზერა ისევ კომპიუტერის ეკრანზე გადაიტანეთ და იქ გამოსახულ რომელიმე საგანზე დააფიქსირეთ.

 

ამ ვარჯიშების შესრულება დღეში რამდენჯერმეა რეკომენდებული, მაგრამ ნურც კი ეცდებით, თუ რომელიმე მათგანი თუნდაც მცირედ ტკივილს გაყენებთ.

ინა ჟირარi