დოზილაქსი 10მგ #28ტ

დოზილაქსი 10მგ 28 ტაბლეტი

1. დოზილაქსის დახასიათება დაგამოყენება

დოზილაქსი (დონეპეზილის ჰიდროქლორიდი) მიეკუთვნება მედიკამენტების ჯგუფს, სახელწოდებით აცეტილქოლინესთერაზას ინჰიბიტორები.

იგი გამოიყენება დემენციის სიმპტომების სამკურნალოდ ადამიანებში, რომლებსაც აქვთ მსუბუქი და ზომიერი ალცჰაიმერის დაავადების დიაგნოზი. სიმპტომები მოიცავს მეხსიერების დაკარგვას, გონების არევას და ქცევის ცვლილებებს. შედეგად, ალცჰაიმერის დაავადების მქონე პაციენტებს უფრო და უფრო უძნელდებათ ნორმალური ყოველდღიური საქმიანობის განხორციელება.

დოზილაქსი გამოიყენება მხოლოდ მოზრდილ პაციენტებში.

2. დოზილაქსის მიღების წინ გასათვალისწინებელი ინფორმაცია

არ მიიღოთ დოზილაქსი:

• დონეპეზილის ჰიდროქლორიდის ან პიპერიდინის წარმოებულების ან დოზილაქსის

რომელიმე სხვა ინგრედიენტის მიმართ ალერგიის (ჰიპერმგრძნობელობის) შემთხვევაში;

• ძუძუთი კვების პერიოდში;

გამოიჩინეთ განსაკუთრებული სიფრთხილე დოზილაქსის მიღებისას

აცნობეთ თქვენს ექიმს ან ფარმაცევტს დოზილაქსის მიღების დაწყებამდე, თუ ოდესმე გქონიათ ან გაქვთ:

• კუჭის ან თორმეტგოჯა ნაწლავის წყლული;

• კრუნჩხვები (შეტევები) ან კრიზები;

• გულის დაავადება (არარეგულარული ან ძალიან ნელი გულისცემა);

• ასთმა ან ფილტვების სხვა ქრონიკული დაავადებები;

• ჰეპატიტი ან ღვიძლის პრობლემები;

• შარდვის პრობლემა ან თირკმლის მსუბუქი დაავადება;

• თუ ხართ ორსულად ან ფიქრობთ, რომ შეიძლება ორსულად იყოთ.

სხვა მედიკამენტების მიღება

აცნობეთ თქვენს ექიმს ან ფარმაცევტს, თუ იღებთ ან ცოტა ხნის წინ იღებდით სხვა პრეპარატებს. ეს მოიცავს ისეთ მედიკამენტებსაც, რომლებიც ექიმმა არ გამოგიწერათ, მაგრამ თავად შეიძინეთ აფთიაქში. აცნობეთ თქვენს ექიმს ან ფარმაცევტს ნებისმიერი მედიკამენტის შესახებ, რომელიც შეიძლება მიიღოთ მომავალში, თუ გააგრძელებთ დოზილაქსის მიღებას, რადგან ამ მედიკამენტებმა შეიძლება შეამციროს ან გააძლიეროს დოზილაქსის ეფექტი.

აცნობეთ თქვენს ექიმს განსაკუთრებით, თუ იღებთ რომელიმე შემდეგი ტიპის მედიკამენტს:

• ალცჰაიმერის დაავადების სხვა მედიკამენტები, მაგალითად, გალანტამინი;

• ტკივილგამაყუჩებლები ან ართრიტის სამკურნალო საშუალებები, მაგალითად, ასპირინი,  ანთების საწინააღმდეგო არასტეროიდული საშუალებები, როგორიცაა იბუპროფენი ან დიკლოფენაკის ნატრიუმი;

• ანტიქოლინერგული საშუალებები, მაგალითად, ტოლტეროდინი;

• ანტიბიოტიკები მაგალითად, ერითრომიცინი, რიფამპიცინი;

• სოკოს საწინააღმდეგო პრეპარატები, მაგალითად, კეტოკონაზოლი;

• ანტიდეპრესანტები, მაგალითად, ფლუოქსეტინი;

• ანტიკონვულსანტები, მაგალითად, ფენიტოინი, კარბამაზეპინი;

• გულის დაავადების სამკურნალო მედიკამენტები, მაგ. ქინიდინი, ბეტა ბლოკატორები (პროპანოლოლი და ატენოლოლი);

• კუნთების რელაქსანტები, მაგალითად, დიაზეპამი, სუქცინილქოლინი;

• ზოგად საანესთეზიო საშუალებები;

• რეცეპტის გარეშე გასაცემი მედიკამენტები მაგალითად, მცენარეული მედიკამენტები.

თუ აპირებთ ოპერაციის ჩატარებას, რომელიც მოითხოვს ზოგად ანესთეზიას, უნდა აცნობოთ ექიმს და ანესთეზიოლოგს, რომ იღებთ დოზილაქსს, რადგან დოზილაქსმა შეიძლება გავლენა მოახდინოს საანესთეზიო საშუალების საჭირო რაოდენობაზე.

დოზილაქსი შეიძლება გამოყენებული იყოს თირკმლის დაავადების ან ღვიძლის მსუბუქი და ზომიერი დაავადების მქონე პაციენტებში. აცნობეთ ექიმს, თუ გაქვთ თირკმელების ან ღვიძლის დაავადება. ღვიძლის მძიმე დაავადების მქონე პაციენტებმა არ უნდა მიიღონ დოზილაქსი.

უთხარით თქვენს ექიმს ან ფარმაცევტს იმ პირის სახელი, რომელიც ზრუნავს თქვენზე. ადამიანი, რომელიც თქვენზე ზრუნავს, დაგეხმარებათ მიიღოთ პრეპარატი დანიშნულების მიხედვით.

დოზილაქსის მიღება საკვებთან და სასმელთან ერთად

საკვები გავლენას არ მოახდენს დოზილაქსის ეფექტზე.

დოზილაქსის მიღება არ შეიძლება ალკოჰოლთან ერთად, რადგან ალკოჰოლმა შეიძლება შეცვალოს მისი ეფექტი.

ორსულობა და ძუძუთი კვება

დოზილაქსის გამოყენება არ შეიძლება ძუძუთი კვების დროს.

თუ ორსულად ხართ ან ფიქრობთ, რომ შეიძლება ორსულად იყოთ, ამ პრეპარატის მიღებამდე მიმართეთ ექიმს.

ავტომობილის და მექანიზმების მართვა

ალცჰაიმერის დაავადებამ შეიძლება გამოიწვიოს ავტომობილის მართვის ან მექანიზმებთან მუშაობის უნარის დაქვეითება და ეს აქტივობები თავიდან უნდა იქნას აცილებული, თუ ექიმი არ გეტყვით, რომ ეს უსაფრთხოა.

გარდა ამისა, მედიკამენტმა შეიძლება გამოიწვიოს დაღლილობა, თავბრუსხვევა და კუნთების კრუნჩხვები; თუ აღინიშნება ეს მდგომარეობები, არ მართოთ ავტომობილი ან მექანიზმები. 

მნიშვნელოვანი ინფორმაცია დოზილაქსის ზოგიერთი ინგრედიენტის შესახებ

პრეპარატი შეიცავს ლაქტოზას. თუ ექიმმა გითხრათ, რომ გაქვთ აუტანლობა ზოგიერთი შაქრის მიმართ, დოზილაქსის მიღებამდე კონსულტაციისთვის უნდა მიმართოთ ექიმს.

3. დოზილაქსის ტაბლეტების მიღების წესი

როგორც წესი, პრეპარატის მიღება უნდა დაიწყოთ 5 მგ დოზით ყოველ ღამე. ერთი თვის შემდეგ ექიმმა შეიძლება გირჩიოთ 10 მგ-ს მიღება ყოველ ღამე.

გადაყლაპეთ დოზილაქსი ტაბლეტი წყლის მიყოლებით, ძილის წინ. მიღებული ტაბლეტის სიძლიერე შეიძლება შეიცვალოს იმის მიხედვით, თუ რა ხანგრძლივობით იღებთ პრეპარატს და იმის მიხედვით, თუ როგორი რეკომენდაცია მოგცათ ექიმმა. მაქსიმალური რეკომენდებული დოზა არის 10 მგ ყოველ ღამე.

ყოველთვის მიჰყევით ექიმის ან ფარმაცევტის რჩევას იმის შესახებ, თუ როგორ და როდის უნდა მიიღოთ პრეპარატი. არ შეცვალოთ პრეპარატის დოზა ექიმის რჩევის გარეშე.

მიღების ხანგრძლივობა

თქვენი ექიმი ან ფარმაცევტი გირჩევთ, თუ რამდენ ხანს უნდა გააგრძელოთ ტაბლეტების მიღება. ექიმთან რეგულარული ვიზიტი აუცილებელია მკურნალობის და სიმპტომების შესაფასებლად.

თუ შეწყვეტთ დოზილაქსის მიღებას

არ შეწყვიტოთ ტაბლეტების მიღება, თუ ამის შესახებ ექიმმა არ გირჩიათ. თუ შეწყვეტთ დოზილაქსის მიღებას, მკურნალობის სარგებელი თანდათან შემცირდება.

თუ მიიღეთ საჭიროზე მეტი დოზილაქსი

არ მიიღოთ ერთ ტაბლეტზე მეტი დღეში. დაუყონებლივ დაუკავშირდით თქვენს ექიმს, თუ მიიღებთ საჭიროზე მეტ ტაბლეტს. თუ ვერ უკავშირდებით ექიმს, დაუყონებლივ დარეკეთ ადგილობრივი საავადმყოფოს გადაუდებელ ცენტრში. ყოველთვის თან იქონიეთ ტაბლეტები და ყუთი საავადმყოფოში მისვლისას, რათა ექიმმა იცოდეს რა მიიღეთ. 

ჭარბი დოზის მიღების სიმპტომებია გულისრევა და ღებინება, ნერწყვის გამოყოფა, ოფლიანობა, გულისცემის შენელება, დაბალი არტერიული წნევა (თავბრუსხვევა ან თავბრუსხვევა წამოდგომისას), სუნთქვის პრობლემები, გონების დაკარგვა და კრუნჩხვები (შეტევები).

თუ დაგავიწყდათ დოზილაქსის მიღება

თუ დაგავიწყდათ ტაბლეტის მიღება, მიიღეთ ერთი ტაბლეტი მეორე დღეს ჩვეულ დროს. არ მიიღოთ ორმაგი დოზა გამოტოვებული დოზის კომპენსირების მიზნით. თუ დაგავიწყდათ პრეპარატის მიღება ერთ კვირაზე მეტი ხნის განმავლობაში, პრეპარატის მიღებამდე მიმართეთ ექიმს.

4. შესაძლო გვერდითი ეფექტები

ყველა პრეპარატის მსგავსად, დოზილაქსმაც შეიძლება გამოიწვიოს გვერდითი ეფექტები, თუმცა არა ყველა ადამიანში. 

დოზილაქსის მიღებისას აღინიშნა შემდეგი გვერდითი ეფექტები. 

აცნობეთ თქვენს ექიმს, თუ განვითარდა რომელიმე ჩამოთვლილი ეფექტი დოზილაქსის მიღებისას.

სერიოზული გვერდითი ეფექტები:

დაუყოვნებლივ უნდა აცნობოთ ექიმს, თუ შეამჩნევთ რომელიმე ამ გვერდითი ეფექტს. შეიძლება დაგჭირდეთ სასწრაფო სამედიცინო დახმარება.

• ღვიძლის დაზიანება მაგალითდ, ჰეპატიტი. ჰეპატიტის სიმპტომები შემდეგია: გულისრევა ან ღებინება, მადის დაკარგვა, ზოგადი სისუსტე, ცხელება, ქავილი, კანისა და თვალების გაყვითლება და მუქი ფერის შარდი (სავარაუდოდ შეიძლება განვითარდეს 1000-დან 1-ზე ნაკლებ ადამიანში).

• კუჭის ან თორმეტგოჯა ნაწლავის წყლული. წყლულის სიმპტომებია კუჭის ტკივილი და დისკომფორტი ჭიპსა და მკერდის ძვალს შორის (სავარაუდოდ გამოვლინდება 100-დან 1-ზე ნაკლებ ადამიანში).

• სისხლდენა კუჭში ან ნაწლავებში. ამან შეიძლება გამოიწვიოს შავი განავალი ან ხილული სისხლი სწორი ნაწლავიდან (სავარაუდოდ შეიძლება განვითარდეს 100-დან 1-ზე ნაკლებ ადამიანში).

• კრუნჩხვები ან შეტევები (სავარაუდოდ შეიძლება განვითარდეს 100-დან 1-ზე ნაკლებ ადამიანში).

ძალიან ხშირი გვერდითი ეფექტები (სავარაუდოდ შეიძლება განვითარდეს 10-დან 1-ზე მეტ ადამიანში):

• დიარეა;

• გულისრევა ან ღებინება;

• თავის ტკივილები.

ხშირი გვერდითი ეფექტები (შეიძლება განვითარდეს 10-დან 1 ადამიანში):

• კუნთების კრუნჩხვები;

• დაღლილობა;

• ძილის გაძნელება (უძილობა);

• გაციება;

• მადის დაკარგვა;

• ჰალუცინაციები (არაარსებულის დანახვა ან გაგონება);

• ფსიქომოტორული სტიმულაცია;

• აგრესიული ქცევა;

• გონების დაკარგვა;

• თავბრუსხვევა;

• კუჭის სპაზმი;

• კანზე გამონაყარი;

• ქავილი;

• შარდის შეუკავებლობა;

• ტკივილი;

• ინციდენტები (პაციენტები შეიძლება მიდრეკილნი იყვნენ დაცემისა და დაზიანებებისკენ).

არახშირი გვერდითი ეფექტები (სავარაუდოდ ვითარდება 100-დან 1-ზე ნაკლებ ადამიანში):

• ბრადიკარდია.

იშვიათი გვერდითი ეფექტები (სავარაუდოდ ვითარდება 1000-დან 1-ზე ნაკლებ ადამიანში):

• რიგიდულობა, კანკალი ან უკონტროლო მოძრაობა, განსაკუთრებით სახის და ენის, აგრეთვე კიდურების.

ასევე აცნობეთ თქვენს ექიმს, თუ დოზილაქსის მიღებისას შეამჩნევთ სხვა გვერდით ეფექტებს, რომლებიც არ არის ჩამოთვლილი ამ ინსტრუქციაში.

5. პრეპარატის (დოზილაქსის ტაბლეტების) შენახვის წესი

არ შეინახოთ ეს პრეპარატი 25°C-ზე მაღალ ტემპერატურაზე. შეინახეთ ბავშვებისთვის მიუწვდომელ ადგილას.

არ გამოიყენოთ დოზილაქსის ტაბლეტები ეტიკეტზე მითითებული ვარგისობის ვადის გასვლის შემდეგ. ვარგისობის ვადა მითითებული თვის ბოლო დღეა.

6. დამატებითი ინფორმაცია

დოზილაქსის ტაბლეტების შემადგენლობა

• დოზილაქსის აქტიური ნივთიერებაა დონეპეზილის ჰიდროქლორიდი. 5 მგ ტაბლეტი შეიცავს 5 მგ დონეპეზილის ჰიდროქლორიდს და 10 მგ ტაბლეტი შეიცავს 10 მგ დონეპეზილის ჰიდროქლორიდს.

• სხვა ინგრედიენტებია ლაქტოზას მონოჰიდრატი, სიმინდის სახამებელი, მიკროკრისტალური ცელულოზა, ნატრიუმის სახამებლის გლიკოლატი, მაგნიუმის სტეარატი, ოპადრაი Y - 1 - 7000 თეთრი.

დოზილაქსის ტაბლეტების გარეგნული აღწერა

• 5 მგ თეთრი ფერის შემოგარსული ტაბლეტები

• 10 მგ თეთრი ფერის შემოგარსული ტაბლეტები

დოზილაქსის შეფუთვა

ტაბლეტები ხელმისაწვდომია 28 ტაბლეტიან ყუთებში.