დიმედროლი 1%1მლ#10ა(თბ.ფარმ)

გამოყენების ინსტრუქცია

დიმედროლი
DIMEDROL
საინექციო ხსნარი

შემადგენლობა
ხსნარის 1მლ შეიცავს:
აქტიური ნივთიერება: Dდიფენჰიდრამინის ჰიდროქლორიდი – 10 მგ;
დამხმარე ნივთიერებები: საინექციო წყალი.

აღწერილობა:
უფერო, გამჭვირვალე სითხე.

ფარმაკოლოგიური ჯგუფი:
სისტემური მოქმედების ანტიჰისტამინური საშუალება.

ATC Code: R06AA02

ფარმაკოლოგიური თვისებები:
ფარმაკოდინამიკა. დიფენჰიდრამინი ანტიჰისტამინური საშუალებაა. იგი ბლოკავს ჰისტამინის H1-რეცეპტორებს. ცნს-ზე მოქმედება განპირობებულია ტვინის H3-რეცეპტორების ბლოკადით და ცენტრალური ქოლინერგული სტრუქტურების ინჰიბირებით. პრეპარატი ამცირებს გლუვი მუსკულატურის სპაზმს, კაპილარების გაზრდილ განვლადობას, ქსოვილების შეშუპებას, ქავილსა და ჰიპერემიას. მას ადგილობრივი საანესთეზიო და ზომიერად გამოხატული განგლიომაბლოკირებელი მოქმედება გააჩნია. გარდა ამისა, დიმედროლს სედატიური, საძილე, ანტიპარკინსონული და ღებინების საწინააღმდეგო ეფექტები აქვს. ანთებისა და ალერგიის დროს დიმედროლის ანტიჰისტამინური მოქმედება უფრო გამოხატულია ადგილობრივი სისხლძარღვოვანი რეაქციების მიმართ, სისტემურ რეაქციებთან (არტერიული წნევის დაქვეითება) შედარებით. ამავე დროს, განგლიომაბლოკირებელი მოქმედების გამო, მოცირკულირე სისხლის მოცულობის დეფიციტის მქონე პაციენტებში პრეპარატის პარენტერული შეყვანისას შესაძლებელია არტერიული წნევის დაქვეითება და არსებული ჰიპოტონიის გაძლიერება. ეპილეფსიისა და ტვინის ლოკალური დაზიანების მქონე პაციენტებში პრეპარატმა (მცირე დოზებითაც) შეიძლება გამოიწვიოს ეპილეფსიური შეტევის პროვოცირება.
მოქმედება რამდენიმე წუთში ვითარდება და 12 სთ-მდე გრძელდება.
ფარმაკოკინეტიკა. დიმედროლის 98_99% უკავშირდება პლაზმის ცილებს. პრეპარატი გადის ჰემატოენცეფალურ ბარიერს. მეტაბოლიზდება ძირითადად ღვიძლში, ნაწილობრივ – ფილტვებსა და თირკმლებში. ქსოვილებიდან 6 სთ-ში გამოიყოფა. დიმედროლის ნახევარგამოყოფის პერიოდი (თ1/2) 4_10 სთ-ს შეადგენს. დღე-ღამის განმავლობაში ორგანიზმიდან სრულად გამოიყოფა თირკმელებით, გლუკურონის მჟავასთან დაკავშირებული მეტაბოლიტების სახით. მნიშვნელოვანი რაოდენობა გამოიყოფა დედის რძესთან ერთად, რამაც ჩვილ ბავშვებში შეიძლება სედატიური ეფექტი გამოიწვიოს (შეიძლება აღინიშნებოდეს პარადოქსული რეაქცია მომატებული აგზნებადობით).

ჩვენება:
ანაფილაქსიური შოკი, ჭინჭრის ციება, თივის ცხელება, შრატისმიერი დაავადება, ჰემორაგიული ვასკულიტი (კაპილაროტოქსიკოზი), პოლიმორფული ექსუდაციური ერითემა, კვინკეს შეშუპება, ქავილით მიმდინარე დერმატოზი, ქავილი, ალერგიული კონიუქტივიტი და თვალის ალერგიული დაავადებები, ალერგიული რეაქციები, დაკავშირებული სამკურნალო საშუალებების მიღებასთან, ქორეა, მენიერის დაავადება; ოპერაციის შემდგომი ღებინება.

მიღების წესი და დოზირება:
ინტრამუსკულური და ინტრავენური ინექციები. მოზრდილებისათვის ერთჯერადად 1 - 5 მლ 1% ხსნარი (10-50 მგ), ბავშვებისათვის 3-დან 6 წლამდე 0,5 - 1 მლ (5-10 მგ), ბავშვებისათვის 6-დან 12 წლამდე 1 - 2 მლ (10-20 მგ). მაქსიმალური სადღეღამისო დოზა მოზრდილებისათვის 150 მგ.

უკუჩვენება:
მომატებული მგრძნობელობა პრეპარატის მიმართ. ბრონქიალური ასთმის შეტევა, ფეოქრომოციტომა, ეპილეფსია, თანდაყოლილი გახანგრძლივებული Qთ-სინდრომი ან პრეპარატების ხანგრძლივი მიღება, რომლებსაც შეუძლიათ Qთ-ინტერვალის გახანგრძლივება, დახურულკუთხოვანი გლაუკომა, წინამდებარე ჯირკვლის ჰიპერპლაზია, კუჭის და თორმეტგოჯა ნაწლავის მასტენოზებელი წყლული, შარდის ბუშტის ყელის სტენოზი, ბრადიკარდია, გულის რითმის დარღვევა. პორფირია.

გვერდითი მოვლენები:
ნერვული სისტემის მხრივ: ძილიანობა, სისუსტე, ფსიქომოტორული რეაქციების სიჩქარის დაქვეითება, მოძრაობის კოორდინაციის დარღვევა, თავბრუსხვევა, ტრემორი, გაღიზიანება, ეიფორია, აგზნებადობა (განსაკუთრებით ბავშვებში), უძილობა.
სასუნთქი სისტემის მხრივ: პირის ღრუს, ცხვირისა და ბრონქების ლორწოვანი გარსის სიმშრალე (იზრდება ნახველის სიბლანტე).
სისხლმბადი სისტემის მხრივ: ჰემოლიზური ანემია, თრომბოციტოპენია, აგრანულოციტოზი.
გულ-სისხლძარღვთა სისტემის მხრივ: არტერიული ჰიპოტენზია, ტაქიკარდია, ექსტრასისტოლია.
შარდგამომყოფი სისტემის მხრივ: შარდის გამოყოფის დარღვევა.
ალერგიული რეაქციები: ჭინჭრის ციება, ფოტოსენსიბილიზაცია, გამონაყარი კანზე, ქავილი.

ჭარბი დოზირება:
სიმპტომები: ცენტრალური ნერვული სისტემის დათრგუნვა, აღგზნებადობა (განსაკუთრებით ბავშვებში) ან დეპრესია, გუგების გაფართოება, პირის სიმშრალე, კუჭ-ნაწლავის ტრაქტის ორგანოების პარეზი, სახის სიწითლე, არეული ცნობიერება, ჰიპერკინეზი, კრუნჩხვები, ბოდვები, ტაქიკარდია, არითმია. აღწერილია რაბდომიოლიზის შემთხვევები დიმედროლით ჭარბი დოზის შემდეგ.
მკურნალობა: სპეციფიური ანტიდოტი არ არის. საჭიროებისას – კუჭის ამორეცხვა, სამკურნალო საშუალებები არტერიული წნევის ასაწევად, ჟანგბადი, შრატის შემცვლელი ხსნარების ვენაში შეყვანა. არ შეიძლება ეპინეფრინის და ანალეფსიური საშუალებების გამოყენება.

განსაკუთრებული მითითებები:
დიფენჰიდრამინით მკურნალობის დროს საჭიროა ულტრაიისფერი გამოსხივებისა და ეთანოლის გამოყენებისაგან თავის არიდება.
ლოკალური ნეკროზის განვითარების რისკის გამო დიფენჰიდრამინის გამოყენება ადგილობრივი საანესთეზიო საშუალების სახით დაუშვებელია.

პრეპარატის ზემოქმედება ავტოტრანსპორტისა და მექანიზმების მართვის უნარზე: მკურნალობის პერიოდში საჭიროა თავის არიდება ისეთი ქმედებებისაგან, რომელიც ყურადღებასა და სწრაფ ფსიქომოტორულ რეაქციას მოითხოვს.

ორსულობა და ლაქტაციის პერიოდი:
პრეპარატი არ გამოიყენება ორსულობის პერიოდში, რადგან არ არსებობს ადექვატური მონაცემები მისი გამოყენების უსაფრთხოების და ეფექტურობის შესახებ.
პრეპარატის გამოყენების აუცილებლობის შემთხვევაში ძუძუთი კვება უნდა შეწყდეს.

ურთიერთქმედება სხვა სამკურნალო საშუალებებთან:
დიმედროლი ახდენს საანესთეზიო, საძილე, სედატიური საშუალებების, ნარკოტიკული ანალგეტიკების და ადგილობრივი საანესთეზიო საშუალებების ეფექტების პოტენცირებას. ტრიციკლურ ანტიდეპრესანტებთან ერთდროული გამოყენებისას შეასაძლებელია ცნს-ზე დამთრგუნველი და ქოლინომაბლოკირებელი მოქმედების გაძლიერება. შესაძლებელია კრუნჩხვების განვითარების რისკი ანალეფსიურ საშუალებებთან ერთდროული გამოყენებისას. მაო-ს ინჰიბიტორების და დიმედროლის ერთდროულმა გამოყენებამ შესაძლებელია გამოიწვიოს არტერიული წნევის მომატება, ასევე იმოქმედოს ცენტრალურ ნერვულ და სასუნთქ სისტემაზე. დიმედროლის ერთდროულმა გამოყენებამ ჰიპოტენზიურ პრეპარატებთან შეიძლება გააძლიეროს დაღლილობის შეგრძნება. პრეპარატი აძლიერებს ეთანოლის მოქმედებას, ამცირებს აპომორფინის, როგორც ღებინების საშუალების ეფექტურობას მოწამვლის მკურნალობისას. არ არის რეკომენდებული ერთდროულად დანიშვნა დიმედროლის შემცველ პრეპარატებთან, მათ შორის ადგილობრივი გამოყენებისათვის.

გამოშვების ფორმა:
1% საინექციო ხსნარი 1 მლ ამპულაში, #10 შეფუთვაში.

შენახვის პირობები:
ინახება სინათლისაგან დაცულ და ბავშვებისათვის მიუწვდომელ ადგილას, არაუმეტეს 25°С ტემპერატურაზე.

ვარგისობის ვადა:
5 წელი.
აკრძალულია გამოყენება შეფუთვაზე აღნიშნული ვადის გასვლის შემდეგ.

აფთიაქიდან გაცემის წესი:
ფარმაცევტული პროდუქტის ჯგუფი II, გაიცემა ფორმა №3 რეცეპტით (გადაუდებელი დახმარებისას გაიცემა რეცეპტის გარეშე)

მწარმოებელი:
შპს "თბილისის ფარმაცევტული ქარხანა"
საქართველო, თბილისი, კაიროს ქ. #4
ტელ: 271 00 29