ინდოვენოლი 20მგ+30მგ/1გ40გ ჟელ

გამოყენების ინსტრუქცია

ინდოვენოლი

INDOVENOL

შემადგენლობა:

მოქმედი ნივთიერებები:

ვენორუტინოლი, ინდომეტაცინი;

პრეპარატის 1 გ შეიცავს 20 მგ ვენორუტინოლს და 30 მგ ინდომეტაცინს;

დამხმარე საშუალებები: ეთანოლი 96%, პროპილენგლიკოლი, დიმეთილსულფოქსიდი, კარბომერი, პოლიეთილენგლიკოლი 400.

წამლის ფორმა

გელი

ძირითადი ფიზიკურ-ქიმიური თვისებები:

ყვითელი ფერის გელი, ერთგვაროვანი კონსისტენციის, სპეციფიკური სუნით.

ფარმაკოთერაპიული ჯგუფი:

ანგიოპროტექტორები, კაპილარების მასტაბილიზებელი საშუალებები. რუტოზიდი, კომბინაციები.

ათქ კოდი:

C05CA51.

ფარმაკოლოგიური თვისებები

ფარმაკოდინამიკა

ინდოვენოლის ფარმაკოლოგიური თვისებები განისაზღვრება მის შემადგენლობაში შემავალი მოქმედი ნივთიერებებით - ვენორუტინოლით და ინდომეტაცინით.

ვენორუტინოლი - ბიოფლავონოიდი, რომელსაც აქვს P-ვიტამინური აქტივობა, ავლენს გამოხატულ ანგიოპროტექტორულ, ვენომატონიზირებელ, ანთების საწინააღმდეგო, შეშუპების საწინააღმდეგო, ანტიოქსიდანტურ თვისებებს, ამცირებს კაპილარების შეღწევადობას და მსხვრევას, უზრუნველყოფს მათ ელასტიურობას, სიმკვრივეს და რეზისტენტობას ტრავმული დაზიანენების მიმართ, ამცირებს ექსუდაციურ ანთებას სისხლძარღვების კედლებში. ეს უზრუნველყოფს მიკროცირკულაციის ნორმალიზაციას, აუმჯობესებს ქსოვილების ტროფიკას, ამცირებს ვენებსა და პერივენოზურ ქსოვილებში შეგუბებით მოვლენებს.

ინდომეტაცინი - მიეკუთვნება არასტეროიდული ანთების საწინააღმდეგო პრეპარატების ჯგუფს, ადგილობრივი გამოყენებისას ახდენს გამოხატულ ანთების საწინააღმდეგო, ტკივილგამაყუჩებელ, შეშუპების საწინააღმდეგო და ანტიაგრეგანტულ მოქმედებას, რაც განპირობებულია პროსტაგლანდინების და ანთების სხვა მედიატორების სინთეზის დათრგუნვით.

პრეპარატის გელის ფუძე ხელს უწყობს მოქმედი ნივთიერებების სწრაფ და მაქსიმალურ გამოთავისფლებას და აუცილებელი თერაპიული კონცენტრაციების წარმოქმნას ანთებით ქსოვილებსა და სინოვიალურ სითხეებში.

ინდომეტაცინის ბმა სისხლის პლაზმის ცილებთან შეადგენს 90%-ს. მეტაბოლიზმი მიმდინარეობს ღვიძლში O-დემეთილირების და N-დეაცეტილირების გზით არაქტიურ ნაერთებამდე.

60% გამოიდევნება შარდით, ხოლო 30% - განავლით. გადადის დედის რძეში.

ფარმაკოკინეტიკა:

შესწავლილი არ არის.

კლინიკური მახასიათებლები

ჩვენებები:

შემდეგი მდგომარეოებების ადგილობრივი მკურნალობისთვის:

• · ტროფიკული დარღვევები ქრონიკული ვენური უკმარისობისას;
• · ვენების ვარიკოზული გაფართოება, ტკივილისა და შეშუპების თანხლებით;
• · კუნთებისა და სახსრების დაავადებები (ბურსიტი, ტენდოვაგინიტი, მიოზიტი, სინოვიტი);
• · ტრავმული წარმოშობის ჰემატომები.

უკუჩვენებები:

• · მომატებული მგრძნობელობა ინდომეტაცინის, სხვა არასტეროიდული ანთების საწინააღმდეგო პრეპარატების, ვენოპურინოლის ან პრეპარატის ნებისმიერი კომპონენტის მიმართ;
• · ჰიპერმგრძნობელობა ასპირინის ან ანთების საწინააღმდეგო პრეპარატების მიმართ, ასთმის შეტევის, ჭინჭრის ციების ან ალერგიული რინიტის კლინიკური გამოვლინებით.

ურთიერთქმედება სხვა სამკურნალო საშუალებებთან და ურთიერთქმედების სხვა ფორმები

ინდოვენოლის გამოყენებისას ურთიერთქმედების ალბათობა მინიმალურია. შეიძლება აღინიშნოს არასტეროიდული ანთების საწინააღმდეგო საშუალებების ურთიერთქმედება ისეთ პრეპარატებთან, რომლებიც ამცირებენ არტერიულ წნევას, თუმცა ამგვარი რისკი ადგილობრივი გამოყენებისას ძალიან მცირეა. თუმცა, არ შეიძლება შემდეგი სახის ურთიერთქმედებების გამორიცხვა რეკომენდებულზე მაღალი დოზების ხანგრძლივად გამოყენების შემთხვევაში:

• · ანტიკოაგულანტებთან და ანტითრომბულ საშუალებებთან - მატულობს სისხლდენების განვითარების რისკი;
• · ინდოვენოლმა შეიძლება შეამციროს ანტიჰიპერტენზიული თერაპიის ეფექტიანობა ბეტა-ადრენობლოკატორების, ანგიოტენზინგარდამქმნელი ფერმენტის, მარყუჟოვანი, თიაზიდური და კალიუმდამზოგავი დიურეტიკების ეფექტიანობის შემცირების გამო;
• · სხვა არასტეროიდულ ანთების საწინააღმდეგო პრეპარატებთან (მათ შორის ციკლოოქსიგენაზას სელექციურ ინჰიბიტორებთან (ცოგ-2), გლუკოკორტიკოიდებთან, ალკოჰოლთან - გვერდითი რეაქციების რისკის მომატება, ულცეროგენული მოქმედების გაძლიერება;
• · დიგოქსინთან, ლითიუმის პრეპარატებთან - შეიძლება გაიზარდოს სისხლის პლაზმაში ამ სამკურნალო საშუალებების კონცენტრაციები;
• · შეიძლება შემცირდეს მეთოტრექსატის ტუბულარული სეკრეცია და შესაბამისად, გაიზარდოს მისი ტოქსიკურობა;
• · პრობენეციდთან შეიძლება შემცირდეს პრობენეციდის ურიკოზურიული მოქმედება და დაყოვნდეს ორგანიზმიდან ინდომეტაცინის გამოყოფა;
• · ცულფინპირაზონმა შეიძლება შეაფერხოს ორგანიზმიდან ინდომეტაცინის გამოდევნა;
• · რეკომენდებული არ არის მიელოსუპრესიულ, სიმსივნის საწინააღმდეგო, ანტიდიაბეტურ საშუალებებთან, ცეფალოსპორინებთან, ვალპროის მჟავას პრეპარატებთან შეთავსება;
• · ალისკირენთან - შეიძლება აღინიშნოს ჰიპერგლიკემია;
• · აძლიერებს ასკორბინის მჟავას მოქმედებას სისხლძარღვების კედლების სტრუქტურასა და შეღწევადობაზე;
• · სულინდაკის პრეპარატებთან შეიძლება გამოიწვიოს პერიფერიული ნეიროპათია.

გამოყენების თავისებურებანი:

გელი განკუთვნილია მხოლოდ გარეგანი გამოყენებისათვის; წაისვით მხოლოდ დაუზიანებელ კანზე.

არ შეიძლება წასმა კანის ჭრილობიან ზედაპირზე, კანის ინფიცირებულ უბნებზე (მათ შორის, ჩირქოვანი პროცესების არსებობისას) და ყურადღება უნდა მიექცეს, რომ პრეპარატი არ მოხვდეს თვალებსა და ლორწოვან გარსებზე. შეიძლება წასმა ოკლუზიური სახვევის ქვეშ. არასასურველი ეფექტების განვითარების თავიდან აცილების მიზნით პრეპარატი ინდოვენოლი აუცილებლად უნდა წაისვათ სხვა სამკურნალო საშუალებებისგან, კოსმეტიკისგან და დაბინძურებისგან გასუფთავებულ კანზე. გელის წასმის შემდეგ მოერიდეთ კანის დამუშავებულ უბნებზე მზის სხივების ზემოქმედებას.

ქრონიკული ვენური უკმარისობის მქონე პაციენტებისათვის რეკომენდებულია პრეპარატის გამოყენება დაავადების როგორც საწყის, ისე გვიან სტადიებზე (მცირდება სიმძიმის შეგრძნება ფეხებში, ქვედა კიდურების შეშუპება, უმჯობესდება ტროფიკა).

თირკმელების ფუნქციის მძიმე დარღვევების დროს რეკომენდებული არ არის პრეპარატის ხანგრძლივად გამოყენება.

არ შეიძლება რეკომენდებული დოზის გადამეტება.

იმის გამო, რომ პრეპარატი შეიცავს არასტეროიდულ ანთების საწინააღმდეგო პრეპარატს, განსაკუთრებული სიფრთხილით გამოიყენება იმ პაციენტებში, რომლებსაც აქვთ ალერგიული დაავადებები და რეაქციები, ღვიძლის ან თირკმელების ფუნქციის დარღვევები, კანის დიდ უბნებზე წასმისას.

არასტეროიდული ანთების საწინააღმდეგო პრეპარატის გამოყენებამ ზოგჯერ შეიძლება გამოიწვიოს კუჭ-ნაწლავის ტრაქტის დაზიანება; გულის ფუნქციის გაუარესება გულ-სისხლძარღვთა უკმარისობის მქონე პაციენტებში, ღვიძლისა და თირკმელების ფუნქციის გაუარესება.

რეკომენდებულზე მაღალი დოზების ხანგრძლივად გამოყენების შესაძლებლობის გათვალისწინებით, სიფრთხილით ინიშნება პაციენტებში ისეთი დაავადებების არსებობისას, როგორიცაა: კუჭ-ნაწლავის ტრაქტის ეროზიულ-წყლულოვანი დაზიანებები, აგრეთვე მდგომარეოებები, რომლებსაც თან ახლავს სისხლდენა კუჭ-ნაწლავის ტრაქტის ორგანოებიდან (ჰემოროიდული სისხლდენის ჩათვლით); ქრონიკული გასტრიტი, ენტეროკოლიტი; სხვადასხვა ეტიოლოგიის სისხლის წარმოქმნის დარღვევები; გულის მძიმე უკმარისობა.

მიუხედავად იმისა, რომ კანზე ადგილობრივად წასმის შემდეგ სისტემური რეაბსორბცია მინიმალურია, ანამნეზში კუჭისა და თორმეტგოჯა ნაწლავის აქტიური წყლულის, თირკმლის დაავადების და გულის უკმარისობის არსებობისას, გელით მკურნალობა უნდა ჩატარდეს მხოლოდ ექიმთან კონსულტაციის შემდეგ.

თუ მკურნალობის ხანგრძლივობა აღემატება 10 დღეს, აუცილებელია ჩატარდეს ლეიკოციტების ფორმულისა და თრომბოციტების რაოდენობის განსაზღვრა.

პრეპარატით მკურნალობა განსაკუთრებული სიფრთხილით და მხოლოდ ექიმთან კონსულტაციის შემდეგ უნდა ჩატარდეს იმ პაციენტებში, რომლებშიც გამოვლინდება ჰიპერმგრძნობელობა საკვები პროდუქტების და სამკურნალო საშუალებების მიმართ ან ისეთი ალერგიული დაავადებების მქონე პაციენტებში, როგორიცაა პოლინოზი, ბრონქული ასთმა, ნაზალური პოლიპოზი.

არსებობს ჯვარედინი ჰიპერმგრძნობელობა სხვა არასტეროიდულ ანთების საწინააღმდეგო პრეპარატებთან, ამიტომ ასეთ პაციენტებში შეიძლება გამოვლინდეს მომატებული მგრძნობელობა ინდომეტაცინის მიმართაც.

გელის თვალებში მოხვედრისას აუცილებელია თვალების ამობანვა. გელის დიდი რაოდენობით შემთხვევით გადაყლაპვისას, აუცილებელია ღებინების გამოწვევა და ექიმთან კონსულტაცია.

თუ დაავადების ნიშნები არ დაიწყებს გავლას ან პირიქით, ჯანმრთელობის მდგომარეობა გაუარესდება, განვითარდება გამონაყარი ადგილობრივად გამოყენებისას, მკურნალობა უნდა შეწყდეს და პაციენტმა კონსულტაციისათვის ექიმს უნდა მიმართოს.

სამკურნალო საშუალების შემადგენლობაშია პროპილენგლიკოლი და

დიმეთილსულფოქსიდი, რომლებმაც შეიძლება გამოიწვიონ კანის გაღიზიანება.

გამოყენება ორსულობის ან ძუძუთი კვების პერიოდში:

პრეპარატი არ გამოიყენება ორსულობის ან ძუძუთი კვების პერიოდში.

ავტოტრანსპორტის ან სხვა მექანიზმების მართვისას რეაქციების სისწრაფეზე ზემოქმედების უნარი:

ინდოვენოლი გავლენას არ ახდენს რეაქციების სისწრაფეზე ავტოტრანსპორტის ან პოტენციურად სახიფათო მექანიზმების მართვისას.

გამოყენების წესი და დოზები:

პრეპარატი გამოიყენება გარეგანად! 0,5-1 გ ინდოვენოლის თხელი ფენა (გელის ზოლი 2,5-5 სმ სიგრძის) უნდა წაუსვათ კანს თანაბრად და ოდნავ შეაზილოთ 1-2 წუთის განმავლობაში. პრეპარატის აპლიკაციის შემდეგ აუცილებელია ხელების დაბანა (გარდა იმ შემთხვევისა, როდესაც მალამოს წასმა ხდება ხელებზე). პროცედურა განმეორებით უნდა ჩატარდეს დღეღამეში 2-3-ჯერ. გელის საერთო სადღეღამისო დოზა მოზრდილებსა და ბავშვებში 14 წლის ასაკიდან არ უნდა აღემატებოდეს 5 გ-ს.

ინდოვენოლით მურნალობის ხანგრძლივობას განსაზღვრავს ექიმი პაციენტის მდგომარეობის მიხედვით. მკურნალობის კურსი არ უნდა აღემატებოდეს 10 დღეს.

ბავშვები:

ინდოვენოლი არ გამოიყენება 14 წლამდე ასაკის ბავშვებში.

ჭარბი დოზირება:

ჭარბი დოზირების შემთხვევების შესახებ ცნობილი არ არის. მიუხედავად ამისა, რეკომენდებულზე მაღალი დოზების ხანგრძლივად გამოყენების, პრეპარატის კანის ფართო უბნებზე წასმის, ინდომეტაცინის სხვა პრეპარატების იმავდროულად მიღების შესაძლებლობის გათვალისწინებით, შეიძლება აღინიშნოს მითითებული გვერდითი რეაქციები. უნდა მოხდეს გელის მოცილება ან ჩამობანა კანიდან. აუცილებლობისას ტარდება სიმპტომატური თერაპია.

ხანგრძლივი მკურნალობისას (10 დღეზე მეტი) აუცილებელია კონტროლი შესაძლო სისტემური ეფექტების გამოსავლენად: ჰეპატოტოქსიკურობა, ძლიერი თავის ტკივილი, სისხლჩაქცევა, აგრეთვე სისხლის ლაბორატორიული გამოკვლევა (ლეიკოციტური ფორმულის და თრომბოციტების რაოდენობის მონიტორინგი).

გელის შემთხვევით შიგნით მიღებისას აღინიშნება პირის ღრუს ლორწოვანი გარსის წვა, ნერწყვდენა, გულისრევა, ღებინება. ღონისძიებები შიგნით მიღებისას - პირის ღრუს და კუჭის ამორეცხვა, აუცილებლობისას - სიმპტომატური მკურნალობა.

გელის თვალებში, ლორწოვან გარსებზე ან ღია ჭრილობებზე მოხვედრისას აღინიშნება ლოკალური გაღიზიანება: ცრემლდენა, გაწითლება, წვა, ტკივილი. ასეთ შემთხვევაში აუცილებელია დაზიანებული უბნების მობანა დიდი რაოდენობით დისტილირებული წყლით ან 0.9%-იანი ნატრიუმის ქლორიდის ხსნარით გაღიზიანების შემცირებამდე ან შეწყვეტამდე.

გვერდითი რეაქციები:

ცალკეულ შემთხვევებში შეიძლება აღინიშნოს ჰიპერმგრძნობელობის (ალერგიული რეაქციების) ადგილობრივი რეაქციები, მათ შორის, ჰიპერემია, ქავილი, ჭინჭრის ციება, ეგზემა, ანგიონევროტული შეშუპება, გამონაყარი (მათ შორის, ვეზიკულური), კანის გაღიზიანება, დერმატიტი (მათ შორის, კონტაქტური დერმატიტი), სითბოს შეგრძნება წასმის ადგილას, წვა, ადგილობრივი შეშუპება, აქერცვლა, კანის სიმშრალე; ზოგჯერ - მცირე პუსტულების, ბუშტების ან ბუშტუკების განვითარება.

ძალიან იშვიათად კანის ფართო უბნებზე ხანგრძლივი გამოყენებისას შეიძლება აღინიშნოს სისტემური გვერდითი რეაქციები:

საჭმლის მომნელებელი ტრაქტის მხრივ:

გულისრევა, ღებინება, ტკივილი კუჭის არეში, ღვიძლისმიერი ფერმენტების დონეების მომატება; მადის დაკარგვა, დიარეა, ტკივილი, სისხლჩაქცევა, წყლულები;

შარდგამომყოფი სისტემის მხრივ: შეშუპებები, შარდის გამოყოფის დარღვევა, ჰემატურია, შარდის ფერის ან სუნის ცვლილება;

ცენტრალური ნერვული სისტემის მხრივ:

თავბრუსხვევა, თავის ტკივილი, მეხსიერების დარღვევა, სმენისა და მხედველობის დარღვევები, ცნობიერების არევა, დეპრესია, მეტყველების მოშლა;

იმუნური სისტემის მხრივ:

ალერგიული რინიტი, კვინკეს შეშუპება, ქოშინი, ანაფილაქსია, ასთმის შეტევა;

სხვა:

კუნთების სისუსტე, მიალგია, სიყვითლე, პერიფერიული სისხლის შემადგენლობის ლაბორატორიული მაჩვენებლების ცვლილება, არტერიული წნევის მომატება, თვალების სიმშრალე და სიწითლე.

პრეპარატი შეიცავს პროპილენგლიკოლს და დიმეთილსულფოქსიდს, რომლებმაც შეიძლება გამოიწვიონ კანის გაღიზიანება.

როგორც წესი, ეს სიმპტომები დამოუკიდებლად გადის პრეპარატის მოხსნის შემდეგ.

ნებისმიერი უარყოფითი რეაქციის განვითარებისას აუცილებელია ექიმთან კონსულტაცია პრეპარატის შემდგომი გამოყენების შესახებ.

ვარგისიანობის ვადა:

3 წელი.

შენახვის პირობები:

ორიგინალ შეფუთვაში, არა უმეტეს 25⁰C-ზე, გაყინვა არ შეიძლება. ინახება ბავშვებისაგან მიუწვდომელ ადგილას.

შეფუთვა

40 გ ტუბი კოლოფში.

გაცემის კატეგორია: ფარმაცევტული პროდუქტის ჯგუფი III, გაიცემა რეცეპტის გარეშე.

მწარმოებელი:

საჯარო სააქციო საზოგადოება „სამეცნიერო-საწარმოო ცენტრი „ბორშაგოვსკის ქიმიურ-ფარმაცევტული ქარხანა“.

მწარმოებლის ადგილსამყოფელი და საქმიანობის განხორციელების ადგილის მისამართი:

უკრაინა, 03134, ქ. კიევი, მშვიდობის ქ. 17

ბოლო გადახედვის თარიღი:

21.03.2019