კლოტრიმაზოლი 1% 25გ მალამო

გამოყენების ინსტრუქცია

კლოტრიმაზოლი

(CLOTRIMAZOLE)

შემადგენლობა:

მოქმედი ნივთიერება: კლოტრიმაზოლი;

მალამოს 1 გ შეიცავს კლოტრიმაზოლს (100% მშრალ ნივთიერებაზე გადაანგარიშებით) 10 მგ;

დამხმარე ნივთიერებები: პროპილენგლიკოლი, პოლიეთილენგლიკოლი 400, პოლოქსამერი 338, ცეტოსტეარილის სპირტი, პოლიეთილენგლიკოლის ცეტოსტაერილის ეთერი.

დოზირების ფორმა. მალამო.

ძირითადი ფიზიკურ-ქიმიური თვისებები: თეთრი ფერის მალამო, ერთგვაროვანი კონსისტენციის მსუბუქი სპეციფიკური სუნით.

ფარმაკოთერაპიული ჯგუფი. სოკოს საწინააღმდეგო პრეპარატები ადგილობრივი გამოყენებისთვის. იმიდაზოლის და ტრიაზოლის წარმოებულები. კლოტრიმაზოლი. ათქ კოდი D01AC01.

ფარმაკოლოგიური თვისებები.

ფარმაკოდინამიკა.

სოკოს საწინააღმდეგო საშუალება იმიდაზოლის წარმოებულების ჯგუფიდან გარეგანი გამოყენებისთვის. კლოტრიმაზოლის მოქმედების მექანიზმი მოიცავს ნუკლეინური მჟავების, პროტეინების და ერგოსტეროლის სინთეზის ბლოკირებას სოკოვან უჯრედებში, რაც იწვევს სოკოების უჯრედული გარსების დაზიანებას და უჯრედების სიკვდილს. აქტიურია პათოგენური დერმატოფიტების (Trichophyton spp., Epidermophyton floccosum, Microsporum spp.); საფუარის და ობის სოკოების (Candida spp., Torulopsis spp., Rhodotorula-ს სახეობის); მრავალფეროვანი ლიქენის გამომწვევების (Malassezia furfur) და ერითრაზმების (Corynebacterium minutissimum); გრამდადებითი მიკროორგანიზმების (Staphylococcus spp., Streptococcus spp.) მიმართ;

პრეპარატს გააჩნია ფუნგისტატიკური, ხოლო დერმატოფიტების და Candida-ს სახეობის სოკოების მიმართ - ფუნგიციდური მოქმედება.

ფარმაკოკინეტიკა.

პრეპარატს გააჩნია მაღალი შეღწევადობის უნარი. გარეგანი გამოყენებისას პრეპარატის კონცენტრაცია ეპიდერმისში უფრო მაღალია, ვიდრე დერმასა და კანქვეშა უჯრედისში. პრაქტიკულად არ აბსორბირდება სისტემურ სისხლის ნაკადში.

კლინიკური მახასიათებლები.

ჩვენებები.

• კანის სოკოვანი ინფექციები, გამოწვეული დერმატოფიტებით, საფუარის, ობის სოკოებით და სხვა გამომწვევებით, რომლებიც მგრძნობიარეა კლოტრიმაზოლის მიმართ.
• კანის ინფექციები, გამოწვეული Malassezia furfur-ით (მრავალფეროვანი ლიქენი) და Corynebacterium minutissimum-ით (ერითრაზმა).

უკუჩვენებები

მომატებული მგრძნობელობა კლოტრიმაზოლის, ცეტოსტეარილის სპირტის ან პრეპარატის სხვა კომპონენტების მიმართ.

არ გამოიყენება ფრჩხილების ან თავის კანის ინფექციების სამკურნალოდ.

ურთიერთქმედება სხვა სამკურნალო საშუალებებთან და ურთიერთქმედების სხვა ფორმები

პრეპარატმა შეიძლება დააქვეითოს სხვა ადგილობრივი სოკოს საწინააღმდეგო პრეპარატების, მათ შორის ამფოტერიცინის, ნისტატინის და ნატამიცინის მოქმედება.

დექსამეთაზონი მაღალი დოზებით აფერხებს პრეპარატის სოკოს საწინააღმდეგო მოქმედებას.

ჰიდროქსიბენზოის მჟავების პროპილის ეთერის მაღალი დოზების ადგილობრივი გამოყენება აძლიერებს პრეპარატის სოკოს საწინააღმდეგო მოქმედებას.

გამოყენების თავისებურებები.

პრეპარატი შეიცავს ცეტოსტეარილის სპირტს, რომელმაც შეიძლება გამოიწვიოს კანის ადგილობრივი რეაქციები (მაგალითად, კონტაქტური დერმატიტი), და  პროპილენგლიკოლს, რომელმაც შეიძლება გამოიწვიოს კანის გაღიზიანება. ასეთ შემთხვევებში რეკომენდებულია პრეპარატის სხვა დოზირების ფორმების გამოყენება, რომლებიც არ შეიცავენ ამ კომპონენტს.

პრეპარატი არ გამოიყენება ოფთალმოლოგიურ პრაქტიკაში. აუცილებელია პრეპარატის თვალებთან შეხების თავიდან აცილება. და თუ ეს მაინც მოხდა, აუცილებელია დიდი რაოდენობით წყლით მობანვა. პრეპარატის გადაყლაპვა არ შეიძლება.

მკურნალობის პერიოდში რეკომენდებული არ არის ისეთი ტანსაცმლის და ფეხსაცმლის ტარება, რომელიც არ ატარებს ჰაერს და ტენს. პრეპარატის წასმის შემდეგ არ შეიძლება დამუშავებული ზედაპირის დაფარვა ან მასზე ოკლუზიური (ჰაერგაუმტარი) სახვევის დადება.

აუცილებელია პრეპარატის გამოყენება მკურნალობის დანიშნულ პერიოდის განმავლობაში, მაშინაც კი, თუ დაავადების სიმპტომები უფრო ადრე გადის. აღნიშნული რეკომენდაციების დაცვა უზრუნველყოფს რეინფექციის განვითარების თავიდან აცილებას.

გაღიზიანების ან მომატებული მგრძნობელობის სხვა ნიშნების განვითარებისას პრეპარატის გამოყენება უნდა შეწყდეს.

გამოყენება ორსულობის ან ძუძუთი კვების პერიოდში.

კლინიკური კვლევები კლოტრიმაზოლის ქალებში ფერტილურობაზე ზემოქმედების შესახებ არ ჩატარებულა, თუმცა ცხოველებზე ჩატარებული კვლევებით არ გამოვლენილა კლოტრიმაზოლის ზემოქმედება ფერტილურობაზე.

ორსულობის პერიოდში კლოტრიმაზოლის გამოყენებით კვლევების რაოდენობა შეზღუდულია. ცხოველებზე ჩატარებული კვლევებისას არ გამოვლენილა პირდაპირი ან არაპირდაპირი საზიანო ზემოქმედება რეპროდუქციული ტოქსიკურობის მხრივ. სიფრთხილის ზომის სახით, სასურველია კლოტრიმაზოლის გამოყენებისგან თავის შეკავება ორსულობის I ტრიმესტრში.

პრეპარატის წასმა არ შეიძლება სარძევე ჯირკვლებზე ძუძუთი კვების პერიოდში.

კლოტრიმაზოლით მკურნალობის პერიოდში ძუძუთი კვება უნდა შეწყდეს.

ავტოტრანსპორტის ან სხვა მექანიზმების მართვისას რეაქციების სისწრაფეზე ზემოქმედების უნარი.

ზემოქმედებას არ ახდენს.

გამოყენების წესი და დოზები.

მალამოს წასმამდე აუცილებელია კანის დაზიანებული უბნების წინასწარ გასუფთავება (pH-ის ნეიტრალური მნიშვნელობის საპნის გამოყენებით) და კარგად გამშრალება; ტერფების დაბანა თბილი წყლით და საპნით, მალამოს კარგად შეზელვა, განსაკუთრებით თითებს შორის.

პრეპარატის თხელი ფენა უნდა წაისვათ დღე-ღამეში 1-3-ჯერ კანის დაზიანებულ უბნებზე და მსუბუქად შეიზილოთ, დაზიანების კერის ირგვლივ კანის მცირე უბნის დაფარვით. ერთჯერადი დოზა ხელის გულის ზომის ზედაპირის ფართობზე გამოანგარიშებით შეადგენს 5 სმ სიგრძის მალამოს.

მკურნალობის საერთო ხანგრძლივობა შეადგენს:

დერმატომიკოზები - 3-4 კვირა;

ერითრაზმა - 2-4 კვირა;

მრავალფეროვანი ლიქენი - 1-3 კვირა.

ერთი წასმის გამოტოვების შემთხვევაში, პრეპარატი უნდა წაისვათ როგორც კი გაგახსენდებათ, მაგრამ უმჯობესია გამოტოვოთ წასმა, თუ უკვე თითქმის დამდგარია პრეპარატის შემდეგი მიღების დრო.

დაავადების ხასიათისა და სიმძიმის მიხედვით, ექიმმა შეიძლება დანიშნოს პრეპარატის დოზირების ინდივიდუალური რეჟიმი და გამოყენების წესი, აგრეთვე მკურნალობის ხანგრძლივობა.

გამომწვევის საიმედოდ აღმოსაფხვრელად და სიმპტომების გათვალისწინებით, მკურნალობა უნდა გაგრძლდეს სუბიექტური სიმპტომების მოგვარებიდან დაახლოებით 2 კვირა.

პაციენტმა ექიმს უნდა მიმართოს განმეორებითი მიკრობიოლოგიური გამოკვლევის და თერაპიის კორექციისთვის, თუ კლინიკური გაუმჯობესება არ აღინიშნება მკურნალობის დაწყებიდან 4 კვირის გასვლის შემდეგ.

ბავშვები.

ბავშვებში პრეპარატის გამოყენების გამოცდილება არ არის.

დოზის გადაჭარბება

თუ პრეპარატი გამოიყენება ისე, როგორც მითითებულია პუნქტში „გამოყენების წესი და დოზები“, მოქმედი ნივთიერების (კლოტრიმაზოლი) მხოლოდ ძალიან უმნიშვნელო ნაწილი შეიწოვება ორგანიზმის მიერ. შესაბამისად, მოსალოდნელი არ არის სისტემური ეფექტების (ზემოქმედება სხვა ორგანოებზე) განვითარების შესაძლებლობა.

პრეპარატის დიდი რაოდენობის გადაყლაპვის შემთხვევაში, შეიძლება აღინიშნოს თავბრუსხვევა, გულისრევა, ღებინება, ტკივილი მუცლის არეში, ღვიძლის ფუნქციის დარღვევები.

მკურნალობა: პრეპარატის გამოყენება უნდა შეწყდეს, ჩატარდეს კუჭის ამორეცხვა, აუცილებლობისას - სიმპტომური თერაპია.

გვერდითი რეაქციები.

იმუნური სისტემა: ალერგიული რეაქციები, მათ შორის ანაფილაქსური/ანაფილაქტოიდური რეაქციები (ანაფილაქსური შოკი, ანგიონევროზული შეშუპება, გონების დაკარგვა, არტერიული ჰიპოტენზია, ქოშინი და ჭინჭრის ციება).

კანი და კანქვეშა უჯრედისი: სიწითლე (ერითემა), ბუშტუკების წარმოქმნა, აქერცვლა, წვის/სიცხის შეგრძნება, ჩხვლეტა, ლოკალური შეშუპება, ქავილი, გამონაყარი, ზოგადი გაღიზიანება, ტკივილი/დისკომფორტი, სიმშრალის შეგრძნება, ალერგიული კონტაქტური დერმატიტი.

ცეტოსტეარილის სპირტის და პროპილენგლიკოლის მიმართ მომატებული მგრძნობელობისას შეიძლება განვითარდეს კანზე ალერგიული რეაქციები.

აღნიშნული სიმპტომების განვითარებისას საჭიროა პრეპარატით მკურნალობის შეწყვეტა.

ვარგისიანობის ვადა. 2 წელი.

შენახვის პირობები.

ორიგინალ შეფუთვაში არაუმეტეს 25⁰C-ზე, დაუშვებელია გაყინვა.

ინახება ბავშვებისგან მიუწვდომელ ადგილას.

შეფუთვა. 25 გ ტუბში და ყუთში.

გაცემის კატეგორია. ფარმაცევტული პროდუქტის ჯგუფი III, გაიცემა რეცეპტის გარეშე.

მწარმოებელი.  საჯარო სააქციო საზოგადოება „სამეცნიერო-საწარმოო ცენტრი „ბორშჩაგოვსკის ქიმიურ-ფარმაცევტული ქარხანა“.

მწარმოებლის ადგილსამყოფელი და საქმიანობის განხორციელების ადგილი.

უკრაინა, 03134, ქ. კიევი, მშვიდობის ქ. 17.

ბოლო გადახედვის თარიღი. 27.03.2022