პერინი #10კაფს

ზოგადი დახასიათება:
საერთაშორისო არაპატენტირებული დასახელება: აცეტილსალიცილის მჟავა, პარაცეტამოლი, კოფეინი;
ძირითადი ფიზიკურ-ქიმიური თვისებები: გაუმჭვირვალე მყარი ჟელატინის კრემისფერი კაფსულები, შევსებული თეთრი ფერის ფხვნილით;
შემადგენლობა:
1 კაფსულა შეიცავს:
აცეტილსალიცილის მჟავას - 240 მგ,
პარაცეტამოლს - 180 მგ,
კოფეინს - 30 მგ.
დამხმარე ნივთიერებები: ლაქტოზა, პოვიდონი (PVPK30), გასუფთავებული ტალკი, ნატრიუმის კროსკარმელოზა
გამოშვების ფორმა:
კაფსულები.
ფარმაკოლოგიური ჯგუფი:
აცეტილსალიცილის მჟავა კომბინაციაში სხვა პრეპარატებთან (ფსიქოლეფსიური საშუალებების გარდა). ათქ-კოდი: N02BA51.
ფარმაკოლოგიური თვისებები:
პერინი კომბინირებული პრეპარატია, რომლის მოქმედება განპირობებულია მასში შემავალი კომპონენტების თვისებებით.
აცეტილსალიცილის მჟავას გააჩნია ანთების საწინააღმდეგო და სიცხის დამწევი მოქმედება. ამცირებს ტკივილს, გამოწვეულს ანთებითი პროცესით, ასევე ზომიერად თრგუნავს თრომბოციტების აგრეგაციას და თრომბების წარმოქმნას, აუმჯობესებს მიკროცირკულაციას ანთების კერაში.
პარაცეტამოლი წარმოადგენს ეფექტურ ტკივილგამაყუჩებელ და სიცხის დამწევ საშუალებას, რომელსაც ასევე გააჩნია სუსტად გამოხატული ანთების საწინააღმდეგო მოქმედება. პრეპარატი ახდენს ზეგავლენას ჰიპოთალამუსში ლოკალიზებულ თერმორეგულაციის ცენტრზე და აინჰიბირებს პროსტაგლანდინების სინთეზს უპირატესად ცნს-ში. პარაცეტამოლი გავლენას არ ახდენს წყალ-მარილოვან ცვლაზე (არ იწვევს ნატრიუმისა და წყლის შეკავებას ორგანიზმში) და არ აზიანებს კუჭ-ნაწლავის ტრაქტის ლორწოვან გარსს.
კოფეინი ზრდის ზურგის ტვინის რეფლექსურ აგზნებადობას, აღაგზნებს სუნთქვისა და გულ-სისხლძარღვთა ფუნქციის მარეგულირებელ ცენტრებს, აფართოებს ჩონჩხის კუნთების, თავის ტვინის, გულისა და თირკმლების სისხლძარღვებს, ამცირებს თრომბოციტების აგრეგაციას. კოფეინი ამცირებს ძილიანობას, დაღლილობის შეგრძნებას, ზრდის გონებრივ და ფიზიკურ შესაძლებლობას. ამ კომბინაციაში კოფეინი მცირე დოზით პრაქტიკულად არ ახდენს მასტიმულირებელ მოქმედებას ცნს-ზე, თუმცა განაპირობებს ტვინის სისხლძარღვების ტონუსის ნორმალიზაციას და სისხლის ნაკადის დაჩქარებას.
ფარმაკოკინეტიკა:     
პერორალური მიღების შემდეგ აცეტილსალიცილის მჟავა სწრაფად აბსორბირდება.
კუჭში საკვების არსებობა მნიშვნელოვნად ცვლის მის შეწოვას.
აცეტილსალიცილის მჟავა მეტაბოლიზდება ღვიძლში. მისი კონცენტრაცია სისხლის პლაზმაში ცვალებადია. დაახლოებით 80% უკავშირდება პლაზმის ცილებს.
სალიცილატები  ადვილად აღწევენ ორგანიზმის მრავალ ქსოვილსა და სითხეში. სწრაფად გაივლის პლაცენტარულ ბარიერს, მცირე რაოდენობით აღინიშნება დედის რძეში.
აცეტილსალიცილის მჟავა გამოიყოფა თირკმლების საშუალებით, როგორც შეუცვლელი, ასევე მეტაბოლიტების სახით. მისი  ნახევარგამოყოფის პერიოდი (თ1/2) შეადგენს დაახლოებით 2-4 სთ-ს.
პარაცეტამოლი პერორალური მიღებისას სწრაფად და თითქმის მთლიანად აბსორბირდება. მაქსიმალურ კონცენტრაციას პლაზმაში 1 სთ-ში აღწევს. ანალგეზიური ეფექტი ვლინდება პრეპარატის მიღებიდან 0.5-2 სთ-ის განმავლობაში. პარაცეტამოლის ბიოშეღწევადობა ქსოვილებში შეადგენს 80%-ს, პლაზმის ცილებს უკავშირდება მისი 20%. პლაზმიდან ნახევარგამოყოფის პერიოდი შეადგენს 2-3 სთ-ს. პარაცეტამოლი მეტაბოლიზმს განიცდის ღვიძლში. წარმოქმნილი კონიუგატები (გლუკურონიდები და სულფატები) ორგანიზმიდან თირკმლების საშუალებით გამოიყოფა.
კოფეინი პერორალური მიღებისას სწრაფად და მთლიანად აბსორბირდება.Mმაქსიმალურ კონცენტრაციას პლაზმაში 15-45 წთ-ში აღწევს. კოფეინი აუმჯობესებს პრეპარატის სხვა კომპონენტების აბსორბციას. ადვილად აღწევს ორგანიზმის ყველა ქსოვილში, მეტაბოლიზდება ღვიძლში, მისი ნახევარგამოყოფის პერიოდი (თ1/2) შეადგენს დაახლოებით 3 სთ-ს.
ჩვენება:
 - თავის ტკივილი;
 - შაკიკი;
 - ყელის ტკივილი;
 - კბილის ტკივილი;
 - ნევრალგია;
 - მიალგია;
 - ართრალგია;
 - ალგოდისმენორეა.
ცხელების დროს:
 - მწვავე რესპირატორული დაავადება;
 - გრიპი.
მიღების წესი და დოზირება:
მოზრდილებში და ხანდაზმულებში ინიშნება 1-2 კაფსულა ყოველ 4 სთ-ში, მაქსიმალური დღიური დოზა – 8 კაფსულა. მკურნალობის კურსი – 7-10 დღე.
15 წლამდე ასაკის ბავშვებში პრეპარატი არ ინიშნება.  
გვერდითი მოვლენები:
პრეპარატის რეკომენდებული დოზით მიღებისას გვერდითი მოვლენები არ აღინიშნება.
იშვიათად მოსალოდნელია: კუჭის ტკივილი, გულისრევა, ღებინება, ჰეპატოტოქსიკურობა, ნეფროტოქსიკურობა, კუჭ-ნაწლავის ტრაქტის ეროზიულ-წყლულოვანი დაზიანებები, ალერგიული რეაქციები, ტაქიკარდია, არტერიული წნევის მომატება, ბრონქოსპაზმი. პრეპარატის ხანგრძლივი გამოყენებისას აღინიშნება: თავბრუ, თავის ტკივილი, მხედველობის დარღვევები, ყურებში შუილი, თრომბოციტების აგრეგაციის დაქვეითება, ჰიპოკოაგულაცია, ჰემორაგიული სინდრომი (სისხლდენა ცხვირიდან, ღრძილებიდან, პურპურა და სხვ.), თირკმლების დაზიანება, სმენის დაქვეითება, რეიეს სინდრომი ბავშვებში (ჰიპერპირექსია, მეტაბოლური აციდოზი, დარღვევები ნერვული სისტემის და ფსიქიკის მხრივ, ღებინება, ღვიძლის ფუნქციის დარღვევები). იმ შემთხვევაში, თუ გამოვლინდა ისეთი გვერდითი მოვლენა, რომელიც არ არის აღნიშნული გამოყენების ინსტრუქციაში, პაციენტმა უნდა მიმართოს მკურნალ ექიმს.
უკუჩვენება:
    - ჰიპერმგრძნობელობა;
    - კუჭ-ნაწლავის ტრაქტის ეროზიულ-წყლულოვანი დაზიანებები (გამწვავების ფაზაში);
    - “ასპირინული” ასთმა;
    - ჰემოფილია;
    - ჰემორაგიული დიათეზი;
    - ორსულობა (I და III ტრიმესტრი);
    - ლაქტაციის პერიოდი;
    - გლუკოზა-6-ფოსფატდეჰიდროგენაზის დეფიციტი;
    - გამოხატული არტერიული ჰიპერტენზია;
    - გულის იშემიური დაავადება მძიმე მიმდინარეობით;
    - გლაუკომა;
    - მომატებული აგზნებადობა;
    - ძილის დარღვევა;
    - ქირურგიული ჩარევა, რომელსაც თან ახლავს სისხლდენა;
    - ბავშვთა ასაკი 15 წლამდე (ბავშვებში მაღალია რეიეს სინდრომის განვითარების რისკი
     ჰიპერთერმიით მიმდინარე ვირუსული დაავადებების ფონზე).   
სიფრთხილით გამოიყენება: ნიკრისის ქარი, ღვიძლის დაავადებები.
ურთიერთქმედება სამკურნალო საშუალებებთან და სხვა სახის ურთიერთქმედება:
პრეპარატი აძლიერებს ჰეპარინის, არაპირდაპირი ანტიკოაგულანტების, რეზერპინის, სტეროიდული ჰორმონების და ჰიპოგლიკემიური საშუალებების მოქმედებას.
ერთდროული გამოყენება სხვა არასტეროიდულ ანთების საწინააღმდეგო საშუალებებთან, მეტოტრექსატთან ზრდის გვერდითი მოვლენების განვითარების რისკს.
ამცირებს სპირონოლაქტონის, ფუროსემიდის, ჰიპოტენზიური საშუალებების ეფექტურობას,
ასევე ამცირებს ნიკრისის ქარის საწინააღმდეგო საშუალებების ეფექტურობას, რომლებიც განაპირობებენ შარდმჟავას გამოყოფას.
ბარბიტურატები, რიფამპიცინი, სალიცილამიდი, ეპილეფსიის საწინააღმდეგო საშუალებები განაპირობებენ პარაცეტამოლის ტოქსიკური მეტაბოლიტების წარმოქმნას, რომლებიც მოქმედებენ ღვიძლის ფუნქციაზე.
მეტოკლოპრამიდი აჩქარებს პარაცეტამოლის შეწოვას.
პარაცეტამოლის ზემოქმედებით ქლორამფენიკოლის თ1/2 მატულობს 5-ჯერ. მეორადი მიღებისას პარაცეტამოლმა შეიძლება გააძლიეროს ანტიკოაგულანტების (დიკუმარინის წარმოებულების) მოქმედება.
პარაცეტამოლის და ეთანოლის ერთდროული მიღება ზრდის ჰეპატოტოქსიკური ეფექტების განვითარების რისკს. კოფეინი აჩქარებს ერგოტამინის შეწოვას.
ჭარბი დოზირება:
სიმპტომები (განპირობებული აცეტილსალიცილის მჟავით): მსუბუქი ინტოქსიკაციის დროს -გულისრევა, ღებინება, გასტრალგია, თავბრუ, ყურებში შუილი; მძიმე ინტოქსიკაციის დროს -ძილიანობა, კოლაფსი, კრუნჩხვები, ბრონქოსპაზმი, სუნთქვის გაძნელება, ანურია, სისხლდენა. თავდაპირველად ფილტვების ცენტრალური ჰიპერვენტილაცია იწვევს რესპირატორულ ალკალოზს (ქოშინი, მოხრჩობა, ციანოზი). ინტოქსიკაციის გაძლიერების შედეგად ვითარდება სუნთქვის პროგრესირებადი დამბლა და რესპირატორული აციდოზი.
მკურნალობა: მუდმივი კონტროლი მჟავა-ტუტოვან და ელექტროლიტურ ბალანსზე; ნივთიერებათა ცვლის მდგომარეობის მიხედვით - ნატრიუმის ჰიდროკარბონატის, ნატრიუმის ციტრატის ან ნატრიუმის ლაქტატის შეყვანა.
ორსულობა და ლაქტაცია:
აცეტილსალიცილის მჟავას გააჩნია ტერატოგენული მოქმედება ნაყოფზე.
გამოიყოფა დედის რძესთან, რაც ზრდის სისხლდენის რისკს ბავშვებში თრომბოციტების ფუნქციის დარღვევის შედეგად.
განსაკუთრებული მითითებები:
აცეტილსალიცილის მჟავას შემცველი პრეპარატები არ ინიშნება ბავშვებში, რადგან ვირუსული ინფექციის შემთხვევაში იზრდება რეიეს სინდრომის განვითარების რისკი. რეიეს სინდრომის სიმპტომები: გახანგრძლივებული ღებინება, მწვავე ენცეფალოპათია, ღვიძლის გადიდება. პრეპარატის ხანგრძლივი მიღებისას საჭიროა პერიფერიული სისხლის და ღვიძლის ფუნქციური მდგომარეობის კონტროლი.
ვინაიდან აცეტილსალიცილის მჟავას ახასიათებს სისხლის შედედების შენელება, პაციენტმა ქირურგიული ჩარევის საჭიროების შემთხვევაში უნდა გააფრთხილოს ექიმი პრეპარატის მიღების შესახებ.
აცეტილსალიცილის მჟავა დაბალი დოზებით ამცირებს შარდმჟავას გამოყოფას. შესაბამისი განწყობის მქონე პაციენტებში, ხშირ შემთხვევებში, შეიძლება გამოიწვიოს ნიკრისის ქარის შეტევა.
მკურნალობის დროს არ უნდა იქნეს მიღებული ეთანოლი (იზრდება კუჭ-ნაწლავის ტრაქტიდან სისხლდენის რისკი).
პრეპარატი შეიცავს ლაქტოზას, ამიტომ ლაქტოზა - გალაქტოზას მიმართ მემკვიდრეობითი აუტანლობის, ლაქტაზას დეფიციტის და გლუკოზა - გალაქტოზური მალაბსორბციის მქონე პაციენტებში გამოყენება რეკომენდებული არ არის.
პრეპარატის ზემოქმედება ავტოტრანსპორტისა და მექანიზმების მართვის უნარზე:
პრეპარატი არ ახდენს მნიშვნელოვან გავლენას სატრანსპორტო საშუალებების მართვის უნარსა და  ყურადღების კონცენტრაციაზე.
შეფუთვა:
10 კაფსულა ბლისტერში, 5 ბლისტერი მუყაოს კოლოფში.
შენახვის პირობები:
ინახება არა უმეტეს 25ºC ტემპერატურაზე, მშრალ, სინათლისაგან დაცულ და ბავშვებისათვის მიუწვდომელ ადგილას.
ვიზუალური დათვალიერების შედეგად აღმოჩენილი რაიმე სახის დეფექტის შემთხვევაში პრეპარატის მიღება დაუშვებელია.
ვარგისობის ვადა:
2 წელი. შეფუთვაზე აღნიშნული ვადის გასვლის შემდეგ პრეპარატის გამოყენება დაუშვებელია.
აფთიაქიდან გაცემის პირობა:
ფარმაცევტული პროდუქტის ჯგუფი III – გამოყენება შესაძლებელია ექიმის დანიშნულების გარეშე.
მწარმოებელი:
შპს “ავერსი-რაციონალი” (საქართველო).
მისამართი:
საქართველო 0198, თბილისი,
ჭირნახულის ქ. 14.
www.aversi.ge