ციტრამონი პ #6ტ (რუსეთი)

გამოყენების ინსტრუქცია

ციტრამონი პ

პრეპარატის სავაჭრო დასახელება: ციტრამონი პ

საერთაშორისო არაპატენტირებული დასახელება

ან ჯგუფური დასახელება: აცეტილსალიცილის მჟავა+კოფეინი+პარაცეტამოლი

წამლის ფორმა: ტაბლეტები

შემადგენლობა

1 ტაბლეტი შეიცავს:

აქტიური ნივთიერებები: აცეტილსალიცილის მჟავა 0,24 გ

კოფეინი (მონოჰიდრატზე გადაანგარიშებით) 0,03 გ

პარაცეტამოლი 0,18 გ

დამხმარე საშუალებები: კაკაოს მარცვლების ფხვნილი (კაკაოს ფხვნილი), ლიმონმჟავას მონოჰიდრატი, კარტოფილის სახამებელი, კალციუმის სტეარატის მონოჰიდრატი (კალციუმის სტეარატი 1-წყლიანი), პოვიდონი (პოლივინილპიროლიდონი), ტალკი.

აღწერილობა ღია-ყავისფერი ტაბლეტები წინწკლებით, კაკაოს სუნით, ბრტყელცილინდრული ფორმის, ნაზოლითა და გამყოფი ხაზით.

ფარმაკოთერაპიული ჯგუფი

კომბინირებული ანალგეზიური საშუალება (აასპ + ანალგეზიური არანარკოტიკული საშუალება + ფსიქომასტიმულირებელი საშუალება).

ათქ კოდი: [ N02BA51].

ფარმაკოლოგიური თვისებები

კომბინირებული პრეპარატი.

აცეტილსალიცილის მჟავას გააჩნია სიცხის დამწევი და ანთების საწინააღმდეგო მოქმედება, ასუსტებს ტკივილს, განსაკუთრებით, ანთებითი პროცესით გამოწვეულ ტკივილს, აგრეთვე თრგუნავს თრომბოციტების აგრეგაციას და თრომბების წარმოქმნას, აუმჯობესებს მიკროცირკულაციას ანთების კერაში.

კოფეინი ზრდის ზურგის ტვინის რეფლექტორულ აგზნებას, იწვევს სუნთქვითი და სისხლძარღვების მამოძრავებელი ცენტრების აგზნებას, აფართოვებს ჩონჩხის კუნთების, თავის ტვინის, გულის, თირკმელების სისხლძარღვებს, ამცირებს თრომბოციტების აგრეგაციას; ამცირებს ძილიანობას, დაღლილობის გრძნობას, ზრდის გონებრივ და ფიზიკურ შრომისუნარიანობას. მოცემულ კომბინაციაში კოფეინი მცირე დოზით პრაქტიკულად არ ახდენს მასტიმულირებელ მოქმედებას ცენტრალურ ნერვულ სისტემაზე, თუმცა, ხელს უწყობს თავის ტვინის სისხლძარღვების ტონუსის ნორმალიზაციას და სისხლის ნაკადის დაჩქარებას.

პარაცეტამოლს გააჩნია ანალგეზიური, სიცხის დამწევი და უკიდურესად სუსტი ანთების საწინააღმდეგო მოქმედება, რაც დაკავშირებულია მის ზემოქმედებასთან თერმორეგულაციის ცენტრზე ჰიპოთალამუსში და პერიფერიულ ქსოვილებში პროსტაგლანდინების (Pg) სინთეზის ინჰიბირების სუსტად გამოხატულ უნართან.

გამოყენების ჩვენებები

ციტრამონი პ გამოიყენება საშუალოდ ან სუსტად გამოხატული ტკივილის სინდრომის (სხვადასხვა გენეზის) მქონე მოზრდილებში: თავის ტკივილი, შაკიკი, კბილის ტკივილი, ნევრალგია, მიალგია, რადიკულური სინდრომი, ლუმბაგო, ართრალგია, ტკივილი მენსტრუაციის დროს.

მოზრდილებსა და 15 წლის ზემოთ ასაკის ბავშვებში სხეულის მომატებული ტემპერატურის დასაწევად „გაციების“ და სხვა ინფექციურ-ანთებითი დაავადებებისას.

უკუჩვენებები

ჰიპერმგრძნობელობა პრეპარატის კომპონენტების მიმართ; კუჭ-ნაწლავის ტრაქტის ეროზიულ-წყლულოვანი დაზიანებები (გამწვავების ფაზაში); კუჭ-ნაწლავური სისხლდენა; ბრონქული ასთმის, ცხვირისა და ცხვირის დანამატების მორეციდივე პოლიპოზის იმავდროული არსებობა სრულად ან არასრულად და აცეტილსალიცილმჟავას ან სხვა არასტეროიდული ანთების საწინააღმდეგო საშუალებების (აასპ) აუტანლობა (მათ შორის ანამნეზში), ჰემოფილია, ჰემორაგიული დიათეზი, ჰიპოპროთრომბინემია, პორტალური ჰიპერტენზია; K ავიტამინოზი; თირკმლის უკმარისობა; გლუკოზო-6-ფოსფატდეჰიდროგენაზას დეფიციტი, III ხარისხის არტერიული ჰიპერტენზია, გულის იშემიური დაავადების მძიმე მიმდინარეობა, გლაუკომა, მომატებული აგზნება, ძილის დარღვევა; ქირურგიული ჩარევები სისხლდენით.

პრეპარატის შემადგენლობაში აცეტილსალიცილის მჟავას არსებობის გამო, პრეპარატი არ ინიშნება სიცხის დამწევი საშუალების სახით ვირუსული ინფექციებით გამოწვეული მწვავე რესპირატორული დაავადებების მქონე 15 წლამდე ასაკის ბავშვებში, რეიეს სინდრომის განვითარების რისკის გამო (ენცეფალოპათია და ღვიძლის მწვავე ცხიმოვანი დისტროფია, ღვიძლის უკმარისობის განვითარებით).

სიფრთხილით

პოდაგრა, ღვიძლის დაავადებები, ხანდაზმულობა.

გამოყენება ორსულობისა და ლაქტაციის პერიოდში

პრეპარატი უკუნაჩვენებია ორსულობისას, მკურნალობის დროს ძუძუთი კვება უნდა შეწყდეს.

გამოყენების წესი და დოზები

პრეპარატი მიიღება შიგნით ჭამის დროს ან შემდეგ. კუჭ-ნაწლავის ტრაქტზე გამაღიზიანებელი მოქმედების შესამცირებლად პრეპარატი მიიღება წყლის, რძის, ტუტოვანი მინერალური წყლის მიყოლებით.

1 ტაბლეტი ყოველ 4 საათში, ტკივილის სინდრომისას - 1-2 ტაბლეტი; საშუალო სადღეღამისო დოზა - 3-4 ტაბლეტი, მაქსიმალური სადღეღამისო დოზა - 8 ტაბლეტი. მკურნალობის კურსი - არა უმეტეს 7-10 დღე. პრეპარატი არ გამოიყენება 5 დღეზე მეტ ხანს ანალგეზიური საშუალების სახით და 3 დღეზე მეტ ხანს - სიცხის დამწევის სახით (ექიმის დანიშნულების და დაკვირვების გარეშე).

გვერდითი მოქმედება

გასტრალგია, გულისრევა, ღებინება, ჰეპატოტოქსიკურობა, ნეფროტოქსიკურობა, კუჭ-ნაწლავის ტრაქტის ეროზიულ-წყლულოვანი დაზიანება, ალერგიული რეაქციები (მათ შორის სტივენს-ჯონსონის სინდრომი, ლაიელის სინდრომი), ტაქიკარდია, არტერიული წნევის მომატება, ბრონქოსპაზმი. რეიეს სინდრომი ბავშვებში (ჰიპერპირექსია, მეტაბოლური აციდოზი, დარღვევები ნერვული სისტემისა და ფსიქიკის მხრივ, ღებინება, ღვიძლის ფუნქციის დარღვევა).

თუ ინსტრუქციაში მითითებული რომელიმე გვერდითი ეფექტი გამწვავდა ან შენიშნეთ ისეთი სხვა გვერდითი ეფექტი, რომლებიც მითითებული არ არის ამ ინსტრუქციაში, აცნობეთ ექიმს ამის თაობაზე.

ჭარბი დოზა

აცეტილსალიცილჟავას მიერ განპირობებული სიმპტომები: მსუბუქი ინტოქსიკაციისას - გულისრევა, ღებინება, გასტრალგია, თავბრუსხვევა, ხმაური ყურებში; მძიმე ინტოქსიკაცია - შენელებული მოქმედებები, ძილიანობა, კოლაფსი, კრუნჩხვები, ბრონქოსპაზმი, სუნთქვის გაძნელება, ანურია, სისხლდენა.

თავდაპირველად ფილტვების ცენტრალური ჰიპერვენტილაცია იწვევს სუნთქვით ალკალოზს (ქოშინი, ხუთვა, ციანოზი, ოფლიანობა). ინტოქსიკაციის გაძლიერებისას სუნთქვის მოპროგრესირე დამბლა და მჟანგავი ფოსფოლირების გავრცელება იწვევს რესპირატორულ აციდოზს.

პარაცეტამოლით განპირობებული სიმპტომები: მიღების შემდეგ პირველი 24 სთ-ის განმავლობაში - კანის საფარების სიფერმკრთალე, გულისრევა, ღებინება, ანორექსია, აბდომინური ტკივილი; გლუკოზის მეტაბოლიზმის დარღვევა, მეტაბოლური აციდოზი. ღვიძლის ფუნქციის დარღვევის სიმპტომები შეიძლება განვითარდეს ჭარბი დოზის მიღებიდან 12-48 საათის შემდეგ. მძიმე ინტოქსიკაციის დროს - ღვიძლის უკმარისობა მოპროგრესირე ენცეფალოპათიით, კომა, სიკვდილი; თირკმლის მწვავე უკმარისობა ტუბულარული ნეკროზით (მათ შორის ღვიძლის მძიმე დაზიანების არარსებობისას); არითმია, პანკრეატიტი.

ქრონიკული ჭარბი დოზირება: აცეტილსალიცილის მჟავას მიერ განპირობებული სიმპტომები: ხანგრძლივი გამოყენებისას - თავბრუსხვევა, თავის ტკივილი, მხედველობის დარღვევა, ხმაური ყურებში, თრომბოციტების აგრეგაციის დაქვეითება, ჰიპოკოაგულაცია, ჰემორაგიული სინდრომი (სისხლდენა ცხვირიდან, ღრძილებიდან, პურპურა და სხვა), თირკმელების დაზიანება პაპილარული ნეკროზით, სიყრუე.

პარაცეტამოლით განპირობებული სიმპტომები: მაღალი დოზებით ხანგრძლივი გამოყენებისას შეიძლება განვითარდეს ჰეპატოტოქსიკური და ნეფროტოქსიკური მოქმედება (თირკმლის კოლიკა, ჰემოლიზური ანემია, აპლასტური ანემია, მეტჰემოგლობინემია, პანციტოპენია). მოზრდილებში ჰეპატოტოქსიკური ეფექტი ვლინდება 10 გ და მეტი დოზის მიღებისას.

მკურნალობა:მჟავა-ფუძის მდგომარეობის (მფმ) და ელექტროლიზების ბალანსის პარამეტრების ცვლილებაზე მუდმივი კონტროლი; ნივთიერებათა ცვლის მდგომარეობის მიხედვით - ნატრიუმის ჰიდროკარბონატის, ნატრიუმის ციტრატის ან ნატრიუმის ლაქტატის შეყვანა. მომატებული რეზერვული ტუტოვანება აძლიერებს აცეტილსალიცილმჟავას გამოდევნას შარდის გატუტოვნების გამო. ღვიძლის დაზიანებისას შეიყვანება SH-ჯგუფის და გლუტატიონის - მეთიონინის სინთეზის წინამორბედების დონატორები ჭარბი დოზის მიღებიდან 8-9 საათის განმავლობაში, ხოლო აცეტილცისტეინის - 8 საათის განმავლობაში. დამატებითი თერაპიული ღონისძიებების ჩატარების აუცილებლობა (მეთიონინის შემდგომი შეყვანა, აცეტილცისტეინის ვენებში შეყვანა) განისაზღვრება სისხლში პარაცეტამოლის კონცენტრაციების მიხედვით, აგრეთვე მიღების შემდეგ გასული დროის მიხედვით.

ურთიერთქმედება სხვა სამკურნალო საშუალებებთან

აცეტილსალიცილმჟავა აძლიერებს მეთოტრექსატის ტოქსიკურობას, ამცირებს რა მის თირკმლისმიერ კლირენსს, ვალპროის მჟავას მიერ; აძლიერებს არასტეროიდული ანთების საწინააღმდეგო პრეპარატების, ნარკოტიკული ანალგეტიკების, პერორალური ჰიპოგლიკემიური პრეპარატების, ჰეპარინის, არაპირდაპირი ანტიკოაგულანტების, თრომბოლიტიკებისა და ანტიაგრეგანტების, სულფანილამიდების (მათ შორის კო-ტრიმოქსაზოლის), T3 (ტრიიოდტირონინის) ეფექტებს; აქვეითებს ურიკოზურიული პრეპარატების (ბენზბრომარონის, სულფინპირაზონის), ჰიპოტენზიური პრეპარატების, დიურეტიკების (სპირონოლაქტონის, ფუროსემიდის) მოქმედებას.

გლუკოკორტიკოსტეროიდული საშუალებები, ეთანოლი და ეთანოლის შემცველი პრეპარატები აძლიერებენ კუჭ-ნაწლავის ტრაქტის ლორწოვან გარსზე დამაზიანებელ მოქმედებას, ზრდიან კუჭ-ნაწლავური სისხლდენების განვითარების რისკს.

ზრდის პლაზმაში დიგოქსინის, ბარბიტურატების, ლითიუმის მარილების კონცენტრაციებს.

მაგნიუმის იონის და/ან ალუმინის იონის შემცველი ანტაციდები ანელებენ და აუარესებენ აცეტილსალიცილის მჟავას შეწოვას.

მიელოტოქსიკური პრეპარატები აძლიერებენ აცეტილსალიცილის მჟავას ჰემატოტოქსიკურ გამოვლინებებს.

პარაცეტამოლი ამცირებს ურიკოზურიული პრეპარატების ეფექტიანობას.

პარაცეტამოლის მაღალი დოზების იმავდროული მიღება ზრდის ანტიკოაგულაციური საშუალებების ეფექტს (პროკოაგულანტური ფაქტორების სინთეზის შემცირება ღვიძლში).

ღვიძლის მიკროსომალური ფერმენტების ინდუქტორები (ფენიტოინი, ბარბიტურატები, რიფამპიცინი, ფენილბუტაზონი, ტრიციკლური ანტიდეპრესანტები), ეთანოლი და ჰეპატოტოქსიკური საშუალებები ზრდიან ჰიდროქსილირებული აქტიური მეტაბოლიტების პროდუქციას, რაც განაპირობებს მძიმე ინოქსიკაციის განვითარების შესაძლებლობას მცირე ზედოზირების შემთხვევაშიც კი.

ბარბიტურატების ხანგრძლივი გამოყენება ამცირებს პარაცეტამოლის ეფექტიანობას.

ეთანოლი ხელს უწყობს მწვავე პანკრეატიტის განვითარებას.

მიკროსომალური ჟანგვის ინჰიბიტორები (მათ შორის ციმეტიდინი) ამცირებენ ჰეპატოტოქსიკური მოქმედების რისკს.

პარაცეტამოლის და სხვა არასტეროიდული ანთების საწინააღმდეგო საშუალებების ერთობლივად ხანგრძლივად გამოყენება ზრდის ანალგეზიური ნეფროპათიის და თირკმლისმიერი პაპილარული ნეკროზის განვითარების, თირკმლის უკმარისობის ტერმინალური სტადიის დადგომის რისკს.

პარაცეტამოლის მაღალი დოზების და სალიცილატების ერთდროულად და ხანგრძლივად დანიშვნა ზრდის თირკმლისა და შარდის ბუშტის კიბოს განვითარების რისკს.

დიფლუნისანი ზრდის პარაცეტამოლის პლაზმურ კონცენტრაციას 50%-ით - ჰეპატოტოქსიკურობის განვითარების რისკი.

მიელოტოქსიკური სამკურნალო საშუალებები აძლიერებენ პრეპარატის ჰეპატოტოქსიკურობის განვითარებას.

კოფეინი არის ადენოზინის ანტაგონისტი (შეიძლება საჭირო გახდეს ადენოზინის მაღალი დოზები). კოფეინისა და ბარბიტურატების, პრიმიდონის, კრუნჩხვის საწინააღმდეგო საშუალებების (გიდანტოინის წარმოებულები, განსაკუთრებით ფენიტოინი) ერთდროული გამოყენებისას შეიძლება გაძლიერდეს კოფეინის მეტაბოლიზმი და გაიზარდოს კოფეინის კლირენსი; ციმეტიდინის, პერორალური კონტრაცეპციული საშუალებების, დისულფირამის, ციპროფლოქსაცინის, ნორფლოქსაცინის და კოფეინის ერთდროული გამოყენებისას - ღვიძლში კოფეინის მეტაბოლიზმის შემცირება (მისი გამოყოფის შენელება და სისხლში კონცენტრაციების მომატება).

მექსილეთინი - ამცირებს კოფეინის გამოყოფას 50%-მდე; ნიკოტინი - ზრდის კოფეინის გამოყოფის სიჩქარეს.

მონოამინოოქსიდაზას ინჰიბიტორები, ფურაზოლიდონი, პროკარბაზინი და სელეგინინი - კოფეინის მაღალმა დოზებმა შეიძლება გამოიწვიონ გულის სახიფათო არითმიების ან არტერიული წნევის გამოხატული მომატების განვითარება.

კოფეინი ამცირებს კალციუმის პრეპარატების შეწოვას კუჭ-ნაწლავის ტრაქტში.

ამცირებს ნარკოტიკული და საძილე პრეპარატების ეფექტს.

ზრდის ლითიუმის პრეპარატების გამოყოფას შარდით.

აჩქარებს გულის გლიკოზიდების შეწოვას და აძლიერებს მათ მოქმედებას, ზრდის მათ ტოქსიკურობას.

კოფეინის გამოყენებამ ბეტა-ადრენობლოკატორებთან ერთად შეიძლება გამოიწვიოს თერაპიული ეფექტების ურთიერთდათრგუნვა; ადრენერგიულ ბრონქოგამაფართოვებელ პრეპარატებთან ერთად გამოყენებამ - ცენტრალური ნერვული სისტემის დამატებითი სტიმულაცია.

განსაკუთრებული მითითებები

15 წლამდე ასაკის ბავშვებში არ შეიძლება აცეტილსალიცილის მჟავას შემცველი პრეპარატების დანიშვნა, ვინაიდან ვირუსული ინფექციის შემთხვევაში, შეიძლება გაიზარდოს რეიეს სინდრომის განვითარების რისკი. რეიეს სინდრომის სიმპტომებია ხანგრძლივი ღებინება, მწვავე ენცეფალოპათია, ღვიძლის გადიდება.

პრეპარატის ხანგრძლივად გამოყენებისას აუცილებელია პერიფერიული სისხლისა და ღვიძლის ფუნქციონალური მდგომარეობის კონტროლი.

ვინაიდან აცეტილსალიცილის მჟავა აფერხებს სისხლის შედედებას, პაციენტმა წინასწარ უნდა აცნობოს ექიმს პრეპარატის მიღების შესახებ, თუ დაგეგმილია ქირურგიული ჩარევა.

აცეტილსალიცილმჟავა დაბალი დოზებით ამცირებს შარდმჟავას გამოყოფას, რამაც რიგ შემთხვევებში, შესაბამისი წინასწარგანწყობის მქონე პაციენტებში შეიძლება პოდაგრის შეტევის პროვოცირება მოახდინოს.

მკურნალობის დროს უნდა მოერიდოთ ეთანოლის მოხმარებას (კუჭ-ნაწლავიდან სისხლდენის რისკის მომატება).

პრეპარატის შემადგენლობაში შემავალი კოფეინი მაღალი დოზებით შიგნით მიღებისას (დღე-ღამეში 8 ტაბლეტამდე) ართულებს ყურადღების კონცენტრაციას, ამიტომ აუცილებელია ავტოტრანსპორტის მართვისა და პოტენციურად სახიფათო ისეთი საქმიანობის შესრულებისაგან თავის შეკავება, რაც საჭიროებს ყურადღების მომატებულ კონცენტრაციას და ფსიქომოტორული რეაქციების სისწრაფეს.

გამოშვების ფორმა

ტაბლეტები.

6, 10 ტაბლეტი კონტურულ არაუჯრედულ, პოლიმერული საფარის მქონე ქაღალდის შეფუთვაში.

კონტურული არაუჯრედული შეფუთვები შესაბამისი რაოდენობის გამოყენების ინსტრუქციებით მოთავსებულია პოლიეთილენის აპკიან პაკეტში ან მუყაოს კოლოფში.

შენახვის პირობები.

მშრალ ადგილას არა უმეტეს 25⁰C ტემპერატურაზე.

შეინახეთ ბავშვებისაგან მიუწვდომელ ადგილას.

ვარგისობის ვადა.

4 წელი.

არ გამოიყენება ვარგისობის ვადის გასვლის შემდეგ.

აფთიაქიდან გაცემის წესი

ფარმაცევტული პროდუქტის ჯგუფი III, გაიცემა რეცეპტის გარეშე.

მწარმოებელი

ღსს „ურალბიოფარმი“, რუსეთი, 620026, ქ. ეკატერინბურგი, კუიბიშევის ქ. სახლი 60

ტელ: (343) 254-01-83, ფაქსი: (343) 254-01-79.