მოლდი 100მგ #30კაფს

ზოგადი დახასიათება:
საერთაშორისო არაპატენტირებული დასახელება: რაცეკადოტრილი;

ძირითადი ფიზიკურ-ქიმიური თვისებები:
კაფსულა: ყვითელი ფერის, გაუმჭვირვალე, მყარი ჟელატინის კაფსულები, შევსებული თეთრი ფერის ფხვნილით;
ტაბლეტები: თეთრი ან მოთეთრო ფერის, მრგვალი ფორმის, შემოუგარსავი ხსნადი ტაბლეტები ჭდით, გარგლის გემოთი.

შემადგენლობა:
1 კაფსულა შეიცავს:
რაცეკადოტრილს – 100 მგ;
დამხმარე ნივთიერებები: სიმინდის სახამებელი, ლაქტოზა, გასუფთავებული ტალკი, კოლოიდური სილიციუმის დიოქსიდი, ნატრიუმის ლაურილსულფატი, მაგნიუმის სტეარატი.
1 შემოუგარსავი ხსნადი ტაბლეტი შეიცავს:
რაცეკადოტრილს - 10 მგ;
დამხმარე ნივთიერებები: მიკროკრისტალური ცელულოზა, ნატრიუმის კროსკარმელოზა, მაგნიუმის სტეარატი, კოლოიდური სილიციუმის დიოქსიდი, საქარინი, ნატრიუმის საქარინი, ასპარტამი, მეტაკრილის მჟავას კოპოლიმერი, გარგლის არომატიზატორი.

გამოშვების ფორმა:
კაფსულა, 100 მგ.
შემოუგარსავი ხსნადი ტაბლეტი, 10 მგ.

ფარმაკოლოგიური ჯგუფი:
ფაღარათის საწინააღმდეგო სხვა პრეპარატები. ათქ-კოდი: A07XA04.

ფარმაკოლოგიური თვისებები:
ენდოგენური ოპიატური ნივთიერებები - ენკეფალინები საჭმლის მომნელებელ ტრაქტში მოქმედებენ როგორც ნეირომედიატორები და გააჩნიათ ანტისეკრეტორული აქტივობა. ენკეფალინები სწრაფად იშლებიან ფერმენტ ენკეფალინაზას მოქმედებით.
რაცეკადოტრილი წარმოადგენს ფერმენტ ენკეფალინაზას ინჰიბიტორს, იგი აძლიერებს ენდოგენური ენკეფალინების ფიზიოლოგიურ აქტივობას და მოტორიკაზე მოქმედების გარეშე იწვევს ნაწლავის ანტისეკრეტორულ აქტივობას.

ფარმაკოკინეტიკა:
პერორალურად მიღების შემდეგ რაცეკადოტრილი სწრაფად შეიწოვება კუჭ-ნაწლავის ტრაქტიდან და გარდაიქმნება აქტიურ მეტაბოლიტად. სისხლის პლაზმის ცილებს უკავშირდება პრეპარატის 90%, მიღებიდან 30 წთ-ში იწყება მისი მოქმედება პლაზმის ენკეფალინაზაზე და გრძელდება 8 სთ-ის განმავლობაში. რაცეკადოტრილის ნახევარგამოყოფის პერიოდი შეადგენს 3-4 სთ-ს, ორგანიზმიდან გამოიყოფა თირკმლების საშუალებით.

ჩვენება:
პრეპარატი ინიშნება მწვავე ინფექციური (ვირუსული ან ბაქტერიული) და არაინფექციური ეტიოლოგიის ფაღარათის დროს რეჰიდრატაციულ თერაპიასთან ერთად. რაცეკადოტრილი გამოიყენება მოზრდილებში და ბავშვებში 3 თვის ასაკიდან.

მიღების წესი და დოზირება:
მოზრდილები:
მკურნალობას იწყებენ 100 მგ რაცეკადოტრილის მიღებით დღეში 3-ჯერ ფაღარათის გაქრობამდე. პრეპარატის დღიური დოზა არ უნდა აღემატებოდეს 400 მგ-ს.
ბავშვები:
დოზა დგინდება სხეულის წონის მიხედვით. 3 თვის ასაკიდან ინიშნება 1.5 მგ/კგ 8 სთ-ში ერთხელ. მიღების წინ ტაბლეტი უნდა გაიხსნას 5-10 მლ წყალში. კუჭის ორი ნორმალური მოქმედების შემდეგ პრეპარატის მიღება უნდა შეწყდეს.
თუ 7 დღიანი მკურნალობის შედეგად მდგომარეობის გაუმჯობესება არ აღინიშნება, საჭიროა ექიმთან კონსულტაცია.

გვერდითი მოვლენები:
ძილიანობა, გულისრევა, ღებინება, ყაბზობა, თავბრუ, თავის ტკივილი.
იმ შემთხვევაში, თუ გამოვლინდა ისეთი გვერდითი მოვლენა, რომელიც არ არის აღნიშნული გამოყენების ინსტრუქციაში, პაციენტმა უნდა მიმართოს მკურნალ ექიმს.

უკუჩვენება:
მომატებული მგრძნობელობა პრეპარატის რომელიმე კომპონენტის მიმართ, 3 თვემდე ასაკი, ღვიძლის ან თირკმლის ფუნქციის დარღვევა, მწვავე დიზენტერია, ფართო სპექტრის ანტიბიოტიკებით გამოწვეული ფაღარათი.

ურთიერთქმედება სამკურნალო საშუალებებთან და სხვა სახის ურთიერთქმედება:
არ არსებობს სათანადო კვლევები რაცეკადოტრილის სხვა პრეპარატებთან ურთიერთქმედების შესახებ. ცხოველებზე ჩატარებულმა კვლევებმა აჩვენა, რომ რაცეკადოტრილი არ მოქმედებს ციტოქრომ  P - 450 ფერმენტულ სისტემაზე.

ჰიპერდოზირება:
დოზის გადაჭარბების შემთხვევები არ დაფიქსირებულა.

ორსულობა და ლაქტაცია:
ორსულობის დროს მოლდის გამოყენება შესაძლებელია მხოლოდ იმ შემთხვევაში, როდესაც დედისათვის მოსალოდნელი სარგებელი მკვეთრად სჭარბობს ნაყოფზე მოსალოდნელი უარყოფითი მოქმედების რისკს.
ლაქტაციის დროს მოლდის გამოყენება არ არის რეკომენდებული, რადგან არ არსებობს პრეპარატის გამოყენების უსაფრთხოების დამადასტურებელი უტყუარი კლინიკური მონაცემები.

განსაკუთრებული მითითებები:
დაუშვებელია მოლდის გამოყენება ცხელებით მიმდინარე მწვავე დიზენტერიის, განავალში სისხლის არსებობის დროს, ასევე ანტიბიოტიკებით გამოწვეული ფაღარათის სამკურნალოდ. მოლდის კაფსულა შეიცავს ლაქტოზას, ამიტომ ლაქტოზა-გალაქტოზას მიმართ მემკვიდრეობითი აუტანლობის მქონე პაციენტებში მისი გამოყენება რეკომენდებული არ არის.
პრეპარატის ზემოქმედება ავტოტრანსპორტისა და მექანიზმის მართვის უნარზე:
პრეპარატი არ მოქმედებს ავტოტრანსპორტისა და მექანიზმების მართვის უნარზე.

შეფუთვა:
10 კაფსულა კონტურულ უჯრედოვან შეფუთვაში, 3 კონტურული შეფუთვა მუყაოს კოლოფში.
10 ტაბლეტი ალუმინის სტრიპში, 2 სტრიპი მუყაოს კოლოფში.

შენახვის პირობები:
ინახება არა უმეტეს 25ºC ტემპერატურაზე, მშრალ, სინათლისაგან დაცულ და ბავშვებისათვის მიუწვდომელ ადგილას.
ვიზუალური დათვალიერების შედეგად აღმოჩენილი რაიმე სახის დეფექტის შემთხვევაში პრეპარატის მიღება დაუშვებელია.

ვარგისობის ვადა:
2 წელი. შეფუთვაზე აღნიშნული ვადის გასვლის შემდეგ პრეპარატის გამოყენება დაუშვებელია.

აფთიაქიდან გაცემის პირობა:
ფარმაცევტული პროდუქტის ჯგუფი II - გაიცემა რეცეპტით.

მწარმოებელი:
შპს “ავერსი-რაციონალი” (საქართველო).

მისამართი: 
საქართველო 0198, თბილისი,
ჭირნახულის ქ. 14.
www.aversi.ge