ციპროფლოქსაცინი VIR 500მგ#14ტ

სარეკომენდაციო ვერსია

დანართი ფურცელი: ინფორმაცია მომხმარებლისათვის

ციპროფლოქსაცინი VIR 500 მგ აპკიანი გარსით დაფარული ტაბლეტები EFG

ამ მედიკამენტის მიღების დაწყებამდე ყურადღებით წაიკითხეთ გამოყენების ინსტრუქცია.

• · შეინახეთ ეს ინსტრუქცია. შესაძლოა მოგვიანებით დაგჭირდეთ მისი ხელახლა წაკითხვა.
• · დამატებითი კითხვების შემთხვევაში, მიმართეთ ექიმს ან ფარმაცევტს.
• · ეს მედიკამენტი დაგენიშნათ თქვენ ინდივიდუალურად. არ გადასცეთ ის სხვებს. მან შეიძლება ზიანი მიაყენოს მათ, მაშინაც კი, თუ მათი სიმპტომები თქვენის მსგავსია.
• · თუ რომელიმე გვერდითი მოვლენა გამწვავდება, ან თუ შეამჩნევთ რაიმე გვერდით ეფექტს, რომელიც არ არის ჩამოთვლილი ამ ინსტრუქციაში, გთხოვთ, აცნობოთ ექიმს ან ფარმაცევტს.

გამოყენების ინსტრუქცია შეიცავს:

1. რას წარმოადგენს ციპროფლოქსაცინი VIR და რისთვის გამოიყენება

2. ინფორმაცია ციპროფლოქსაცინი VIR-ის მიღებამდე

3. ციპროფლოქსაცინი VIR-ის მიღების წესი

4. შესაძლო გვერდითი მოვლენები

5. ციპროფლოქსაცინი VIR-ის შენახვის პირობები

6. დამატებითი ინფორმაცია

1. რა ს წარმოადგენს ციპროფლოქსაცინი VIR და რისთვის გამოიყენება

ციპროფლოქსაცინი VIR არის ანტიბიოტიკი, რომელიც მიეკუთვნება ფტორქინოლონების ოჯახს. აქტიური ნივთიერებაა ციპროფლოქსაცინი. ციპროფლოქსაცინი მოქმედებს ინფექციების გამომწვევი ბაქტერიების განადგურებით. ის მოქმედებს მხოლოდ ბაქტერიის სპეციფიკურ შტამებზე.

მოზრდილები

ციპროფლოქსაცინი გამოიყენება მოზრდილებში შემდეგი ბაქტერიული ინფექციების სამკურნალოდ:

• · სასუნთქი გზების ინფექციები
• · ყურის ან სინუსების ხანგრძლივი ან მორეციდივე ინფექციები
• · საშარდე გზების ინფექციები
• · სასქესო გზების ინფექციები მამაკაცებსა და ქალებში
• · კუჭ-ნაწლავის ტრაქტის ინფექციები და მუცლის ღრუს ინფექციები
• · კანისა და რბილი ქსოვილების ინფექციები
• · ძვლებისა და სახსრების ინფექციები
• · ბაქტერია Neisseria meningitidis-ით გამოწვეული ინფექციების პრევენციისთვის
• · ინჰალაციური ფორმის ჯილეხის დროს

თუ გაქვთ მძიმე ინფექცია ან ისეთი ინფექცია, რომელიც გამოწვეულია ბაქტერიის ერთზე მეტი ტიპით, ციპროფლოქსაცინი VIR-თან ერთად შეიძლება დაგენიშნოთ დამატებითი ანტიბიოტიკური მკურნალობა.

ბავშვებიდამოზარდები

ციპროფლოქსაცინი გამოიყენება ბავშვებსა და მოზარდებში, სპეციალისტის მეთვალყურეობის ქვეშ, შემდეგი ბაქტერიული ინფექციების სამკურნალოდ:

• · ფილტვებისა და ბრონქების ინფექციები ბავშვებსა და მოზარდებში, რომლებსაც აქვთ კისტოზური ფიბროზი
• · საშარდე გზების გართულებული ინფექციები, მათ შორის თირკმელების ინფექციები (პიელონეფრიტი)
• · ინჰალაციური ფორმის ჯილეხი

ციპროფლოქსაცინი ასევე შეიძლება გამოყენებულ იქნას ბავშვებსა და მოზარდებში სხვა სპეციფიკური მძიმე ინფექციების სამკურნალოდ, როდესაც ექიმი ამას საჭიროდ ჩათვლის.

2. ინფორმაცია ციპროფლოქსაცინი VIR -ის გამოყენებამდე

არ შეიძლება ციპროფლოქსაცინი VIR -ის გამოყენება თუ:

• · გაქვთ ალერგია (ჰიპერმგრძნობელობა) აქტიური ნივთიერების, სხვა ქინოლონური პრეპარატების ან ციპროფლოქსაცინი VIR-ის რომელიმე დამხმარე ნივთიერების მიმართ (იხილეთ ნაწილი 6)
• · იღებთ ტიზანიდინს (იხილეთ ნაწილი 2: სხვა მედიკამენტების მიღება).

აუცილებელია განსაკუთრებული სიფრთხილე ციპროფლოქსაცინის VIR-ის გამოყენებისას

ციპროფლოქსაცინის VIR-ის მიღებამდე

არ მიიღოთ ფტორქინოლონების ან ქინოლონების შემცველი ანტიბაქტერიული პრეპარატები, მათ შორის ციპროფლოქსაცინი, თუ ადრე გამოგივლინდათ სერიოზული გვერდითი რეაქცია ქინოლონის ან ფტორქინოლონის მიღებისას. გვერდითი რეაქციის შემთხვევაში, რაც შეიძლება მალე უნდა მიმართოთ ექიმს.

აცნობეთ ექიმს, თუ:

• · გქონიათ თირკმლის პრობლემები, რადგან შესაძლოა საჭირო გახდეს მკურნალობის კორექტირება.
• · გაქვთ ეპილეფსია ან სხვა ნევროლოგიური დაავადებები.
• · ანამნეზში გაქვთ მყესების პრობლემები ადრე ანტიბიოტიკებით, როგორიცაა ციპროფლოქსაცინი VIR, მკურნალობის დროს.
• · გაქვთ მიასთენია გრავისი (კუნთების სისუსტის სახეობა).
• · ანამნეზში გაქვთ გულის რიტმის დარღვევები (არითმიები).
• · თუ დაგისვეს დიდი სისხლძარღვის გადიდებული ან „ამობურცული“ „ბურთის“ დიაგნოზი (აორტის ანევრიზმა ან პერიფერიული დიდი სისხლძარღვების ანევრიზმა)
• · თუ წარსულში გქონიათ აორტის დისექციის ეპიზოდი (აორტის კედლის გახევა).
• · თუ დაგისვეს გულის სარქვლის უკმარისობის დიაგნოზი (გულის სარქვლების რეგურგიტაცია).
• · თუ გაქვთ აორტის ანევრიზმის ან აორტის დისექციის ან გულის სარქვლის თანდაყოლილი დაავადების ოჯახური ისტორია, ან სხვა რისკ-ფაქტორები ან წინასწარგანწყობის გამომწვევი მდგომარეობები (მაგ. შემაერთებელი ქსოვილის დარღვევები, როგორიცაა მარფანის სინდრომი ან ელერს-დანლოსის სინდრომი, ტერნერის სინდრომი, შოგრენის სინდრომი (ანთებითი აუტოიმუნური დაავადება), ან სისხლძარღვების დარღვევები, როგორიცაა ტაკაიასუს არტერიიტი, გიგანტურუჯრედოვანი არტერიიტი, ბეჰჩეტის დაავადება, მაღალი არტერიული წნევა ან ათეროსკლეროზი, რევმატოიდული ართრიტი (სახსრების დაავადება) ან ენდოკარდიტი (და გულის ინფექცია)).

აცნობეთ ექიმს, თუ თქვენ ან თქვენი ოჯახის წევრს აქვს გლუკოზა-6-ფოსფატ დეჰიდროგენაზას (G6PD) დეფიციტი, რადგან ციპროფლოქსაცინის მიღებისას შეიძლება გქონდეთ ანემიის რისკი.

ციპროფლოქსაცინი VIR-ის მიღების დროს

დაუყოვნებლივ აცნობეთ ექიმს, თუ ციპროფლოქსაცინი VIR-ის მიღების დროს განვითარდა რომელიმე შემდეგი სიმპტომები. ექიმი გადაწყვეტს, საჭიროა თუ არა ციპროფლოქსაცინი VIR-ით მკურნალობის შეწყვეტა.

• · მძიმე, უეცარი ალერგიული რეაქცია (ანაფილაქსიური რეაქცია/შოკი, ანგიოედემა). პირველი დოზის მიღების შემდეგაც კი არსებობს მცირე შანსი, რომ განვითარდეს მძიმე ალერგიული რეაქცია შემდეგი სიმპტომებით: გულმკერდის არეში შებოჭილობა, თავბრუსხვევა, ღებინება ან გონების დაკარგვის შეგრძნება, ან თავბრუსხვევა წამოდგომისას. თუ განვითარდა ეს მოვლენები, შეწყვიტეთ ციპროფლოქსაცინი VIR-ის მიღება და დაუყოვნებლივ დაუკავშირდით ექიმს.
• · მძიმე, დამბლის გამომწვევი, ხანგრძლივი და პოტენციურად შეუქცევადი გვერდითი მოვლენები. ფტორქინოლონების ან ქინოლონების შემცველი ანტიბაქტერიული პრეპარატები, მათ შორის ციპროფლოქსაცინი VIR, დაკავშირებულია ძალიან იშვიათ, მაგრამ სერიოზულ გვერდით მოვლენებთან, რომელთაგან ზოგიერთი იყო ხანგრძლივი (გრძელდებოდა თვეების ან წლების განმავლობაში), დამბლის გამომწვევი ან პოტენციურად შეუქცევადი. ეს მოვლენებია ტკივილი ზედა და ქვედა კიდურების მყესებში, კუნთებსა და სახსრებში, სიარულის გაძნელება, პათოლოგიური შეგრძნებები, როგორიცაა ჩხვლეტა, დაბუჟება ან წვა (პარესთეზია), სენსორული დარღვევები, როგორიცაა მხედველობის, გემოს, ყნოსვის და სმენის დაქვეითება, დეპრესია, მეხსიერების დაქვეითება, ძლიერი დაღლილობა და ძილის მძიმე დარღვევები.

თუ ციპროფლოქსაცინი VIR-ის მიღების შემდეგ შენიშნავთ რომელიმე ამ გვერდით მოვლენას, მკურნალობის გაგრძელებამდე დაუყოვნებლივ დაუკავშირდით ექიმს. თქვენ და თქვენი ექიმი გადაწყვეტთ გაგრძელდეს თუ არა მკურნალობა, ასევე განიხილავთ სხვა კლასის ანტიბიოტიკის გამოყენებას.

• · იშვიათ შემთხვევებში, შეიძლება განვითარდეს სახსრების ტკივილი და შეშუპება და მყესების ანთება ან გახეთქვა. რისკი უფრო მაღალია, თუ ხართ ხანდაზმული (60 წელზე მეტი), გადატანილი გაქვთ ორგანოს გადანერგვა, გაქვთ თირკმლის პრობლემები ან თუ მკურნალობთ კორტიკოსტეროიდებით. მყესების ანთება და გახეთქვა შეიძლება განვითარდეს მკურნალობის პირველი 48 საათის განმავლობაში ან ციპროფლოქსაცინი VIR-ით თერაპიის შეწყვეტიდან რამდენიმე თვის განმავლობაშიც კი. მყესის (მაგ., კოჭის, მაჯის, იდაყვის, მხარის ან მუხლის) ნებისმიერი ტკივილის ან ანთების პირველივე ნიშნის გამოვლენისას შეწყვიტეთ ციპროფლოქსაცინ VIR-ის მიღება, დაუკავშირდით ექიმს და დაასვენეთ მტკივნეული ადგილი. მოერიდეთ ნებისმიერ არასაჭირო ფიზიკურ დატვირთვას, რადგან ამან შეიძლება გაზარდოს მყესის გაწყვეტის რისკი.
• · თუ გაქვთ უეცარი, ძლიერი ტკივილი მუცლის არეში ან ზურგში, რაც შეიძლება იყოს აორტის ანევრიზმის ან დისექციის სიმპტომები, დაუყოვნებლივ მიმართეთ სასწრაფო დახმარების განყოფილებას. რისკი შეიძლება გაიზარდოს, თუ მკურნალობთ სისტემური კორტიკოსტეროიდებით.
• · თუ განვითარდა სუნთქვის უკმარისობის სწრაფი დაწყება, განსაკუთრებით საწოლში დაწოლისას, ან შეამჩნევთ კოჭების, ტერფების ან მუცლის შეშუპებას, ან გულის ფრიალის დაწყებას (სწრაფი ან არარეგულარული გულისცემის შეგრძნება), დაუყოვნებლივ უნდა აცნობოთ ექიმს.
• · თუ გაქვთ ეპილეფსია ან სხვა ნევროლოგიური დაავადებები, როგორიცაა ცერებრალური იშემია ან ინსულტი, შეიძლება განვითარდეს გვერდითი მოვლენები, რომლებიც დაკავშირებულია ცენტრალურ ნერვულ სისტემასთან. თუ განვითარდა ეს მოვლენები, შეწყვიტეთ ციპროფლოქსაცინ VIR-ის მიღება და დაუყოვნებლივ დაუკავშირდით ექიმს.
• · იშვიათად, შეიძლება აღინიშნოს ნერვის დაზიანების (ნეიროპათიის) სიმპტომები, როგორიცაა ტკივილი, წვა, ჩხვლეტა, დაბუჟება და/ან სისუსტე, განსაკუთრებით ტერფებსა და ფეხებში ან ხელებსა და მკლავებში. თუ ეს მოვლენები განვითარდა, შეწყვიტეთ ციპროფლოქსაცინის მიღება და დაუყოვნებლივ აცნობეთ ექიმს პოტენციურად შეუქცევადი დაავადების განვითარების თავიდან ასაცილებლად.
• · ციპროფლოქსაცინი VIR-ის პირველი მიღებისას შეიძლება განვითარდეს ფსიქიატრიული რეაქციები. თუ გაწუხებთ დეპრესია ან ფსიქოზი, ციპროფლოქსაცინი VIR-ით მკურნალობის დროს თქვენი სიმპტომები შეიძლება გაუარესდეს. იშვიათ შემთხვევებში, დეპრესია ან ფსიქოზი შეიძლება გადაიზარდოს თვითმკვლელობის შესახებ ფიქრებში, თვითმკვლელობის მცდელობაში ან დასრულებულ თვითმკვლელობაში. თუ ეს მოხდება, შეწყვიტეთ ციპროფლოქსაცინი VIR-ის მიღება და დაუყოვნებლივ დაუკავშირდით ექიმს.
• · დიარეა შეიძლება განვითარდეს ანტიბიოტიკების, მათ შორის ციპროფლოქსაცინი VIR-ის მიღების დროს, ან მათი მიღების შეწყვეტიდან რამდენიმე კვირის შემდეგაც კი. თუ ის მძიმე ან მუდმივი გახდება ან შეამჩნევთ, რომ განავალი შეიცავს სისხლს ან ლორწოს, დაუყოვნებლივ შეწყვიტეთ ციპროფლოქსაცინი VIR-ის მიღება, რადგან ეს შეიძლება სიცოცხლისთვის საშიში იყოს. არ მიიღოთ მედიკამენტები, რომლებიც აჩერებენ ან ანელებენ ნაწლავების მოქმედებას და დაუკავშირდით ექიმს.
• · თუ განვითარდა მხედველობის რაიმე ცვლილება ან თვალებთან დაკავშირებულ რაიმე პრობლემა, დაუყოვნებლივ მიმართეთ ოფთალმოლოგს.
• · ციპროფლოქსაცინის მიღებისას თქვენი კანი უფრო მგრძნობიარე ხდება მზის ან ულტრაიისფერი (UV) სხივების მიმართ. მოერიდეთ ძლიერ მზის სხივებს ან ხელოვნურ ულტრაიისფერ სხივებს, როგორიცაა სოლარიუმი.
• · სისხლის ან შარდის ნიმუშის ჩაბარების შემთხვევაში, აცნობეთ ექიმს ან ლაბორატორიის პერსონალს, რომ იღებთ ციპროფლოქსაცინს.
• · ციპროფლოქსაცინმა შეიძლება გამოიწვიოს ღვიძლის დაზიანება. თუ შეამჩნევთ რაიმე სიმპტომს, როგორიცაა მადის დაკარგვა, სიყვითლე (კანის გაყვითლება), მუქი შარდი, ქავილი ან კუჭის მგრძნობელობა, შეწყვიტეთ ციპროფლოქსაცინის მიღება და დაუყოვნებლივ მიმართეთ ექიმს.
• · ციპროფლოქსაცინმა შეიძლება გამოიწვიოს ლეიკოციტების რაოდენობის შემცირება და ინფექციის მიმართ თქვენი მდგრადობა შეიძლება შემცირდეს. თუ გაქვთ ინფექცია ისეთი სიმპტომებით, როგორიცაა ცხელება და ზოგადი მდგომარეობის სერიოზული გაუარესება, ან ცხელება ადგილობრივი ინფექციის სიმპტომებით, როგორიცაა ყელის/ხახის/პირის ტკივილი ან საშარდე გზების პრობლემები, დაუყოვნებლივ უნდა მიმართოთ ექიმს. სისხლის ანალიზი ჩატარდება ლეიკოციტების შესაძლო შემცირების (აგრანულოციტოზი) შესამოწმებლად. მნიშვნელოვანია აცნობოთ ექიმს თქვენი მედიკამენტის შესახებ.

სხვა მედიკამენტების მიღება

გთხოვთ აცნობოთ თქვენს ექიმს ან ფარმაცევტს, თუ იღებთ ან ცოტა ხნის წინ იღებდით ნებისმიერ სხვა მედიკამენტს, მათ შორის ურეცეპტოდ გაცემულ მედიკამენტებს.

არ მიიღოთ ციპროფლოქსაცინი ტიზანიდინთან ერთად , რადგან ამან შეიძლება გამოიწვიოს გვერდითი მოვლენები, როგორიცაა დაბალი არტერიული წნევა და ძილიანობა (იხილეთ ნაწილი 2: "არ მიიღოთ ციპროფლოქსაცინი Vir").

ცნობილია, რომ შემდეგი მედიკამენტები ურთიერთქმედებენ ციპროფლოქსაცინთან თქვენს ორგანიზმში. ციპროფლოქსაცინი Vir-ის მიღებამ ამ მედიკამენტებთან ერთად შეიძლება გავლენა მოახდინოს ამ მედიკამენტების თერაპიულ ეფექტზე. ასევე, შეიძლება გაზარდოს გვერდითი მოვლენების განვითარების ალბათობა.

აცნობეთ ექიმს, თუ იღებთ:

• · ვარფარინს ან სხვა პერორალურ ანტიკოაგულანტებს (სისხლის გასათხელებლად)
• · პრობენეციდს (პოდაგრის სამკურნალოდ)
• · მეთოტრექსატს (გარკვეული სახის კიბოს, ფსორიაზის, რევმატოიდული ართრიტის სამკურნალოდ)
• · თეოფილინს (სუნთქვის პრობლემების სამკურნალოდ)
• · ტიზანიდინს (გაფანტული სკლეროზის დროს კუნთების სპასტიურობის სამკურნალოდ)
• · კლოზაპინს (ანტიფსიქოზურ საშუალებას)
• · როპინიროლს (პარკინსონის დაავადების სამკურნალოდ)
• · ფენიტოინს (ეპილეფსიის სამკურნალოდ)

ციპროფლოქსაცინმა შეიძლება გაზარდოს შემდეგი მედიკამენტების დონე სისხლში:

• · პენტოქსიფილინი (სისხლის მიმოქცევის დარღვევების სამკურნალოდ)
• · კოფეინი

ზოგიერთი მედიკამენტი ამცირებს ციპროფლოქსაცინის ეფექტს. აცნობეთ ექიმს, თუ იღებთ ან გსურთ მიიღოთ:

• · ანტაციდები
• · მინერალური დანამატები
• · სუკრალფატი
• · პოლიმერული ფოსფატის შემკვრელი (მაგ. სეველამერი)
• · კალციუმის, მაგნიუმის, ალუმინის ან რკინის შემცველი მედიკამენტები ან დანამატები.

თუ ეს პრეპარატები აუცილებელია, მიიღეთ ციპროფლოქსაცინი VIR მათ მიღებამდე დაახლოებით ორი საათით ადრე ან მინიმუმ ოთხი საათის შემდეგ.

ციპროფლოქსაცინი VIR-ის მიღება საკვებთან და სასმელთან ერთად

თუ ციპროფლოქსაცინს იღებთ ჭამის დროს, ტაბლეტების მიღებისას არ მიირთვათ და არ დალიოთ რძის პროდუქტები (მაგალითად, რძე ან იოგურტი) ან კალციუმის შემცველი სასმელები, რადგან მათ შეიძლება გავლენა მოახდინონ აქტიური ნივთიერების შეწოვაზე.

ორსულობა და ძუძუთი კვება

სასურველია, თავიდან აიცილოთ ციპროფლოქსაცინის გამოყენება ორსულობის დროს. აცნობეთ ექიმს, თუ გეგმავთ ორსულობას.

არ მიიღოთ ციპროფლოქსაცინი VIR ძუძუთი კვების დროს, რადგან ციპროფლოქსაცინი გადადის დედის რძეში და შეიძლება საზიანო იყოს თქვენი ბავშვისთვის.

ავტომობილის მართვა და მექანიზმებთან მუშაობა

ციპროფლოქსაცინმა შეიძლება გამოიწვიოს ყურადღების დაქვეითება. შესაძლოა განვითარდეს ზოგიერთი ნევროლოგიური გვერდითი მოვლენა. ამიტომ, ავტომობილის მართვამდე ან მექანიზმებთან მუშაობამდე დარწმუნდით, თუ რა რეაქციას იწვევს თქვენში ციპროფლოქსაცინი VIR. ეჭვის შემთხვევაში მიმართეთ ექიმს.

3. ციპროფლოქსაცინი VIR -ის მიღების წესი

ექიმი ზუსტად აგიხსნით, რამდენი ციპროფლოქსაცინი VIR უნდა მიიღოთ, ასევე რა სიხშირით და ხანგრძლივობით. ეს დამოკიდებული იქნება თქვენი ინფექციის ტიპზე და სიმძიმეზე.

აცნობეთ ექიმს, თუ გაწუხებთ თირკმლის პრობლემები, რადგან შესაძლოა დაგჭირდეთ დოზის კორექტირება.

მკურნალობა ჩვეულებრივ გრძელდება 5-დან 21 დღემდე, მაგრამ მძიმე ინფექციების შემთხვევაში, შეიძლება უფრო მეტი დრო დასჭირდეს. მიიღეთ ტაბლეტები ზუსტად ისე, როგორც ექიმმა დაგინიშნათ. ციპროფლოქსაცინ VIR-ის ტაბლეტების რაოდენობასა და მათი მიღების წესთან დაკავშირებით შეკითხვების არსებობის შემთხვევაში, მიმართეთ ექიმს ან ფარმაცევტს, რამდენი ტაბლეტი უნდა მიიღოთ და როგორ.

ა. გადაყლაპეთ ტაბლეტები დიდი რაოდენობით სითხესთან ერთად. არ დაღეჭოთ ტაბლეტები, რადგან მათ არ აქვთ სასიამოვნო გემო.

ბ. ეცადეთ, ტაბლეტები ყოველდღიურად დაახლოებით ერთსა და იმავე დროს მიიღოთ.

გ. ტაბლეტების მიღება შეგიძლიათ კვების დროს ან კვებებს შორის. კვების დროს მიღებული კალციუმი სერიოზულად არ იმოქმედებს შეწოვაზე. თუმცა, არ მიიღოთ ციპროფლოქსაცინი VIR-ის ტაბლეტები რძის პროდუქტებთან, როგორიცაა რძე ან იოგურტი, ან გამდიდრებულ ხილის წვენებთან (მაგ., კალციუმით გამდიდრებული ფორთოხლის წვენი).

გახსოვდეთ, რომ ციპროფლოქსაცინი VIR-ის მიღების დროს უნდა დალიოთ დიდი რაოდენობით სითხე.

თუ მიიღეთ ციპროფლოქსაცინი VIR-ის საჭიროზე მეტი დოზა

• Ø თუ მიიღეთ დანიშნულ დოზაზე მეტი, დაუყოვნებლივ მიმართეთ ექიმს. თუ შესაძლებელია, თან იქონიეთ ტაბლეტები ან კოლოფი ექიმისთვის საჩვენებლად.

ასევე შეგიძლიათ დარეკოთ ტოქსიკოლოგიის საინფორმაციო სამსახურში. ტელეფონი: 91 562 04 20

თუ დაგავიწყდათ ციპროფლოქსაცინი VIR-ის მიღება

• Ø მიიღეთ ჩვეულებრივი დოზა რაც შეიძლება მალე და შემდეგ გააგრძელეთ დანიშნული დოზის მიღება. თუმცა, თუ ახლოვდება შემდეგი დოზის მიღების დრო, არ მიიღოთ გამოტოვებული დოზა და გააგრძელეთ ჩვეულებისამებრ. არ მიიღოთ ორმაგი დოზა გამოტოვებული დოზის ასანაზღაურებლად. აუცილებლად დაასრულეთ მკურნალობის კურსი.

თუ შეწყვეტთ ციპროფლოქსაცინი VIR-ის მიღებას

• Ø მნიშვნელოვანია, რომ დაასრულოთ მკურნალობის კურსი მაშინაც კი, თუ რამდენიმე დღის შემდეგ თავს უკეთ იგრძნობთ. თუ ამ პრეპარატის მიღებას ნაადრევად შეწყვეტთ, შესაძლოა ინფექციისგან სრულად არ განიკურნოთ და ინფექციის სიმპტომები დაბრუნდეს ან გაუარესდეს. ასევე, შესაძლოა განვითარდეს ანტიბიოტიკის მიმართ რეზისტენტობა.

ამ პროდუქტის გამოყენებასთან დაკავშირებით დამატებითი კითხვების შემთხვევაში, მიმართეთ ექიმს ან ფარმაცევტს.

4. შესაძლო გვერდითი მოვლენები

ნებისმიერი მედიკამენტის მსგავსად, ციპროფლოქსაცინი VIR-მაც შეიძლება გამოიწვიოს გვერდითი მოვლენები, თუმცა არა ყველა ადამიანში.

თუ რომელიმე გვერდითი ეფექტი გამწვავდა, ან თუ შენიშნეთ ნებისმიერ გვერდითი ეფექტი, რომელიც ჩამოთვლილი არ არის ამ ინსტრუქციაში, მიმართეთ თქვენს ექიმს ან ფარმაცევტს.

ხშირი გვერდითი მოვლენები (შეიძლება აღინიშნოს ყოველი 100-დან 1-10 ადამიანში):

- გულისრევა, დიარეა

- სახსრების ტკივილი ბავშვებში

არახშირი გვერდითი მოვლენები (შეიძლება აღინიშნოს ყოველი 1,000-დან 1-10 ადამიანში):

- სოკოვანი სუპერინფექციები (სოკოსგან გამოწვეული)

- ეოზინოფილების ანუ სისხლის თეთრი უჯრედების ერთ-ერთი სახეობის მაღალი კონცენტრაცია

- მადის დაკარგვა (ანორექსია)

- ჰიპერაქტიურობა ან აჟიტირება

- თავის ტკივილი, თავბრუსხვევა, ძილის პრობლემები ან გემოს დარღვევები

- ღებინება, მუცლის ტკივილი, საჭმლის მონელების პრობლემები, როგორიცაა შენელებული მონელება (მონელების დარღვევა/გულძმარვა) ან მეტეორიზმი

- სისხლში გარკვეული ნივთიერებების (ტრანსამინაზების და/ან ბილირუბინის) რაოდენობის მომატება

- გამონაყარი, ქავილი ან ჭინჭრის ციება

- სახსრების ტკივილი მოზრდილებში

- თირკმელების ფუნქციის დარღვევა

- კუნთებისა და ძვლების ტკივილი, ცუდად ყოფნა (ასთენია) ან ცხელება

- სისხლში ტუტე ფოსფატაზას (სისხლში არსებული გარკვეული ნივთიერება) დონის მომატება

იშვიათი გვერდითი მოვლენები (შეიძლება აღინიშნოს ყოველი 10,000-დან 1-10 ადამიანში):

- ნაწლავის ანთება (კოლიტი), რომელიც დაკავშირებულია ანტიბიოტიკების გამოყენებასთან (ძალიან იშვიათ შემთხვევებში შეიძლება ფატალური იყოს) (იხილეთ ნაწილი 2: განსაკუთრებული სიფრთხილე გამოიჩინეთ ციპროფლოქსაცინი VIR-ის გამოყენებისას)

- სისხლის ანალიზში ცვლილებები (ლეიკოპენია, ლეიკოციტოზი, ნეიტროპენია, ანემია), სისხლის შედედების ფაქტორის (თრომბოციტების) რაოდენობის მომატება ან შემცირება

- ალერგიული რეაქცია, შეშუპება (ედემა) ან კანისა და ლორწოვანი გარსების სწრაფი შეშუპება (ანგიოედემა)

- სისხლში შაქრის დონის მომატება (ჰიპერგლიკემია)

- დაბნეულობა, დეზორიენტაცია, შფოთვითი რეაქციები, უცნაური სიზმრები, დეპრესია ან ჰალუცინაციები

- ჩხვლეტის შეგრძნება და დაბუჟება, უჩვეულო მგრძნობელობა შეგრძნებების სტიმულებზე, კანის მგრძნობელობის დაქვეითება, კანკალი, კრუნჩხვები (იხილეთ ნაწილი 2: განსაკუთრებული სიფრთხილე გამოიჩინეთ ციპროფლოქსაცინის გამოყენებისას) ან თავბრუსხვევა

- მხედველობის პრობლემები

- ტინიტუსი, სმენის დაკარგვა, სმენის დაქვეითება

- სწრაფი გულისცემა (ტაქიკარდია)

- სისხლძარღვების გაფართოება (ვაზოდილატაცია), დაბალი არტერიული წნევა ან გონების დაკარგვა

- ქოშინი, მათ შორის ასთმური სიმპტომები

- ღვიძლის დარღვევები, სიყვითლე (ქოლესტაზური იქტერუსი) ან ჰეპატიტი

- სინათლის მიმართ მგრძნობელობა (იხილეთ ნაწილი 2: განსაკუთრებული სიფრთხილე გამოიჩინეთ ციპროფლოქსაცინი VIR-ს გამოყენებისას)

- კუნთების ტკივილი, სახსრების ანთება, კუნთების ტონუსის მომატება ან სპაზმი

- თირკმლის უკმარისობა, სისხლი ან კრისტალები შარდში (იხილეთ ნაწილი 2: განსაკუთრებული სიფრთხილე გამოიჩინეთ ციპროფლოქსაცინი VIR-ს გამოყენებისას), საშარდე გზების ანთება

- სითხის შეკავება ან ჭარბი ოფლიანობა

- შედედების ფაქტორის (პროთრომბინის) ან ფერმენტ ამილაზას დონის მომატება

ძალიან იშვიათი გვერდითი მოვლენები (შეიძლება აღინიშნოს 10,000-დან 1-ზე ნაკლებ ადამიანში):

- სისხლის წითელი უჯრედების სპეციალური სახეობის რაოდენობის დაქვეითება (ჰემოლიზური ანემია); სისხლის თეთრი უჯრედების სახეობის სახიფათო ვარდნა (აგრანულოციტოზი); წითელი და თეთრი უჯრედების და თრომბოციტების დაცემა (პანციტოპენია), რომელიც შეიძლება ასევე იყოს ფატალური; და ძვლის ტვინის დათრგუნვა, რომელიც შეიძლება ასევე ფატალური იყოს (იხილეთ ნაწილი 2: განსაკუთრებული სიფრთხილე გამოიჩინეთ ციპროფლოქსაცინი VIR-ის გამოყენებისას)

- მძიმე ალერგიული რეაქციები (ანაფილაქსიური რეაქცია ან ანაფილაქსიური შოკი, რომელიც შეიძლება ფატალური იყოს - შრატისმიერი დაავადება) (იხილეთ ნაწილი 2: განსაკუთრებული სიფრთხილე გამოიჩინეთ ციპროფლოქსაცინი VIR-ის გამოყენებისას)

- ფსიქიკური დარღვევები (ფსიქოზური რეაქციები) (იხილეთ ნაწილი 2: განსაკუთრებული სიფრთხილე გამოიჩინეთ ციპროფლოქსაცინი VIR-ის გამოყენებისას)

- შაკიკი, კოორდინაციის დარღვევა, არასტაბილური სიარული (სიარულის დარღვევა), ყნოსვის დარღვევა (ოლფაქტორული დარღვევები), ტვინზე ზეწოლა (ქალაშიდა წნევა)

- ფერების მხედველობის დარღვევა

- სისხლძარღვების კედლის ანთება (ვასკულიტი)

- პანკრეატიტი

- ღვიძლის უჯრედების კვდომა (ღვიძლის ნეკროზი) ძალიან იშვიათად იწვევს სიცოცხლისთვის საშიშ ღვიძლის უკმარისობას;

- კანქვეშ მცირე, წვრილი წერტილოვანი სისხლდენა (პეტექიები); სხვადასხვა სახის კანის გამონაყარი (მაგალითად, პოტენციურად ფატალური სტივენს-ჯონსონის სინდრომი ან ტოქსიკური ეპიდერმული ნეკროლიზი)

- კუნთების სისუსტე, მყესების ანთება, მყესის გაწყვეტა - განსაკუთრებით ტერფის უკანა მხარეს მდებარე დიდი მყესის (აქილევსის მყესი) (იხილეთ ნაწილი 2: განსაკუთრებული სიფრთხილე გამოიჩინეთ ციპროფლოქსაცინი VIR-ის გამოყენებისას); მიასთენია გრავისის სიმპტომების გაუარესება (იხილეთ ნაწილი 2: განსაკუთრებული სიფრთხილე გამოიჩინეთ ციპროფლოქსაცინი VIR-ის გამოყენებისას);

სიხშირე უცნობია (არსებული მონაცემებით შეფასება შეუძლებელია)

- ნერვულ სისტემასთან დაკავშირებული პრობლემები, როგორიცაა ტკივილი, წვა, ჩხვლეტა, დაბუჟება და/ან სისუსტე კიდურებში

- გულის რიტმის მძიმე დარღვევები, გულის არარეგულარული რიტმი (Torsades de Pointes)

- წყლის სეკრეციის დაქვეითებასთან და ნატრიუმის დაბალ კონცენტრაციასთან დაკავშირებული სინდრომი (SIADH).

ქინოლონებისა და ფტორქინოლონების შემცველი ანტიბიოტიკების მიღება დაკავშირებულია ხანგრძლივი (თვეების ან წლების განმავლობაში მიმდინარე) ან მუდმივი გვერდითი რეაქციების ძალიან იშვიათ შემთხვევებთან, როგორიცაა მყესების ანთება, მყესების გაწყვეტა, სახსრების ტკივილი, კიდურების ტკივილი, სიარულის გაძნელება, პათოლოგიური შეგრძნებები, როგორიცაა ჩხვლეტა, წვა, დაბუჟება ან ტკივილი (ნეიროპათია), დაღლილობა, მეხსიერების და კონცენტრაციის დარღვევა, ფსიქიკური ჯანმრთელობის დარღვევები (რაც შეიძლება მოიცავდეს ძილის დარღვევებს, შფოთვას, პანიკურ შეტევებს, დეპრესიას და სუიციდურ აზრებს), სმენის, მხედველობის, გემოს და ყნოსვის დაქვეითება, ზოგიერთ შემთხვევაში, წინასწარი რისკ-ფაქტორების არსებობის მიუხედავად.

ფტორქინოლონების მიმღებ პაციენტებში დაფიქსირებულია აორტის კედლის გადიდებისა და შესუსტების ან აორტის კედლის რღვევის (ანევრიზმები და დისექცია) შემთხვევები, რომელიც შეიძლება გასკდეს და ფატალური იყოს, და გულის სარქვლების გაჟონვის შემთხვევები. იხილეთ აგრეთვე ნაწილი 2.

გვერდითი მოვლენების შეტყობინება

თუ შეამჩნევთ რაიმე გვერდით მოვლენას, მიმართეთ ექიმს, ფარმაცევტს ან ექთანს. ეს მოიცავს ნებისმიერ შესაძლო გვერდით მოვლენას, რომელიც არ არის ჩამოთვლილი ამ ფურცელ-ჩანართში. გვერდითი ეფექტების შეტყობინება თქვენ ასევე შეგიძლიათ უშუალოდ ესპანეთის ადამიანური გამოყენების სამედიცინო პროდუქტების ფარმაკოზედამხედველობის სისტემის ვებ-გვერდის მეშვეობით: www.notificaRAM.es.

გვერდითი მოვლენების შესახებ შეტყობინებით, თქვენ ხელს შეუწყობთ ამ მედიკამენტის უსაფრთხოების შესახებ დამატებითი ინფორმაციის მოპოვებას.

5. ციპროფლოქსაცინი V IR -ის შენახვის პირობები

ეს მედიკამენტი არ საჭიროებს შენახვის განსაკუთრებულ პირობებს.

შეინახეთ ბავშვებისთვის მიუწვდომელ და შეუმჩნეველ ადგილას.

არ გამოიყენოთ ციპროფლოქსაცინი VIR ვარგისიანობის ვადის გასვლის შემდეგ, რომელიც მითითებულია ბლისტერზე ან კოლოფზე „EXP”-ის შემდეგ. ვარგისიანობის ვადა გულისხმობს შესაბამისი თვის ბოლო დღეს.

მედიკამენტები არ უნდა გადაყაროთ კანალიზაციაში ან საყოფაცხოვრებო ნარჩენებთან ერთად. არასაჭირო შეფუთვები და მედიკამენტები განათავსეთ თქვენი ჩვეული აფთიაქის SIGRE პუნქტში. ჰკითხეთ ფარმაცევტს, თუ როგორ უნდა განადგურდეს მედიკამენტები და შეფუთვები, რომელსაც აღარ იყენებთ. ეს ზომები ხელს შეუწყობს გარემოს დაცვას.

გაცემის წესი:

ფარმაცევტული პროდუქტის ჯგუფი II, გაიცემა ფორმა №3 რეცეპტით

6. დამატებითი ინფორმაცია

ციპროფლოქსაცინი VIR-ის შემადგენლობა

- აქტიური ნივთიერებაა ციპროფლოქსაცინი. თითოეული ტაბლეტი შეიცავს 500 მგ ციპროფლოქსაცინს (ქლორჰიდრატის სახით)

- დამხმარე ნივთიერებებია სიმინდის სახამებელი, მიკროკრისტალური ცელულოზა, პოვიდონი, უწყლო კოლოიდური კაჟბადი, მაგნიუმის სტეარატი, ტიტანის დიოქსიდი (E 171), ჰიპრომელოზა, მაკროგოლი 6000.

ციპროფლოქსაცინი VIR-ის გარეგნული სახე და შეფუთვის შემცველობა

აპკიანი გარსით დაფარული ტაბლეტები, მომრგვალებული, თეთრი და გლუვი ზედაპირით.

თითოეული კოლოფი შეიცავს 1 ან 14 ტაბლეტს. კლინიკური შეფუთვა შეიცავს კოლოფს 500 ტაბლეტით.

სავაჭრო ნებართვის მფლობელი და მწარმოებელი

სავაჭრო ნებართვის მფლობელი და მწარმოებელი

Industria Química y Farmacéutica VIR, S.A.

C/Laguna 66-68-70, Polígono Industrial Urtinsa II

28923 Alcorcón. Madrid

Spain

წინამდებარე გამოყენების ინსტრუქციის ბოლო გადახედვის თარიღია: 2025 წლის მარტი.

დეტალური და განახლებული ინფორმაცია აღნიშნული სამკურნალო საშუალების შესახებ ხელმისაწვდომია ესპანეთის წამლისა და სამედიცინო პროდუქტების სააგენტოს ვებ-გვერდზე (AEMPS) http://www.aemps.gob.es