სერაირ კაპსაირ50/250მგ#60კ ინჰ

სარეკომენდაციო ვერსია

სამედიცინო პროდუქტის გამოყენების ინსტრუქცია

სერაირი^® 50 მკგ/250 მკგ კაპსაირი

საინჰალაციო ფხვნილი, მყარი კაფსულა

არ გადაყლაპოთ, გამოიყენება მხოლოდ ინჰალაციის გზით.

• · აქტიური ნივთიერებები: ინჰალაციისათვის განკუთვნილი ფხვნილის შემცველი თითოეული კაფსულა შეიცავს 50 მკგ სალმეტეროლს (სალმეტეროლის ქსინაფოატის სახით) და 250 მკგ ფლუტიკაზონის პროპიონატს.
• · დამხმარე ნივთიერება: ლაქტოზა (მიღბული ძროხის რძისგან)

გამოყენების ინსტრუქცია შეიცავს:

1. რას წარმოადგენს სერაირი და რისთვის გამოიყენება

2. ინფორმაცია სერაირის გამოყენებამდე

3. სერაირის გამოყენების წესი

4. მოსალოდნელი გვერდითი ეფექტები

5. სერაირის შენახვის პირობები

1. რას წარმოადგენს სერაირი და რისთვის გამოიყენება

სერაირი შეიცავს აქტიურ ნივთიერებებს სალმეტეროლს და ფლუტიკაზონს.

სალმეტეროლი მიეკუთვნება ბრონქოდილატატორების (ბრონქების გამაფართოვებელი საშუალებები) ჯგუფს და მოქმედებს ფილტვებში სასუნთქი გზების კუნთების მოდუნებით, რის შედეგადაც იწვევს მათ გაფართოვებას.

ფლუტიკაზონი კი მიეკუთვნება კორტიკოსტეროიდების ჯგუფს და, ანთების საწინააღმდეგო ეფექტის შედეგად იწვევს სუნთქვის გაძნელების შემსუბუქებას ფილტვებში სასუნთქი გზების კედლების შეშუპებისა და ჰიპერმგრძნობელობის შემცირების ხარჯზე.

სერაირი 50 მკგ/250 მკგ ხელმისაწვდომია 60 საინჰალაციო ფხვნილის შემცველი კაფსულის სახით ბლისტერულ შეფუთვაში, რომელიც ასევე შეიცავს ინჰალატორს.

სერაირი გამოიყენება შემდეგ სიტუაციებში:

• · ასთმის სიმპტომების გასაუმჯობესებლად და კონტროლისთვის. მისი გამოყენება იწყება ასთმის მკურნალობის მესამე ეტაპიდან.
• · სიმპტომების და ასთმის შეტევების სიხშირის შესამცირებლად პაციენტებში, რომლებსაც აქვთ საშუალო და მძიმე სიმძიმის ფილტვების ქრონიკული ობსტრუქციული დაავადება (COPD), როგორც მათი სტანდარტული მკურნალობის ნაწილი.

2. ინფორმაცია სერაირის გამოყენებამდე

არ შეიძლება სერაირის გამოყენება შემდეგ შემთხვევებში

თუ:

• · გაქვთ ალერგია (ჰიპერმგრძნობელობა) აქტიური ინგრედიენტების - სალმეტეროლის ან ფლუტიკაზონის, ან დამხმარე ნივთიერების - ლაქტოზის მიმართ.

სერაირი გამოიყენება სიფრთხილით შემდეგ სიტუაციებში:

• · არ გამოიყენოთ სერაირი უეცარი შეტევითი სიმპტომების შესამსუბუქებლად; ყოველთვის თან იქონიეთ მედიკამენტები, რომლებსაც ასეთი მდგომარეობების სამკურნალოდ იყენებთ.
• · თუ სიმპტომების შესამსუბუქებლად გააძლიერეთ ხანმოკლე მოქმედების ბრონქოდილატატორის (ბრონქის გამაფართოებელი) გამოყენება, აცნობეთ ექიმს. ეს მიუთითებს, რომ თქვენი ასთმის კონტროლი გაუარესდება.
• · თუ თქვენი ასთმა მოულოდნელად და პროგრესულად გაუარესდება, აცნობეთ ექიმს.
• · არ შეწყვიტოთ მედიკამენტების მიღება ექიმთან კონსულტაციის გარეშე. სერაირით მკურნალობა უნდა შეწყდეს თანდათანობით, სამედიცინო მეთვალყურეობის ქვეშ.
• · COPD-პაციენტებს, რომლებიც იყენებენ სერაირს, აღენიშნებათ ფილტვების ანთების (პნევმონიის) განვითარების მომატებული რისკი.
• · აცნობეთ ექიმს, თუ გაქვთ აქტიური ან ლატენტური ფილტვის ტუბერკულოზი; ისინი შესაბამისად შეცვლიან თქვენს მკურნალობას.
• · ასევე აცნობეთ ექიმს, თუ გაქვთ ფარისებრი ჯირკვლის ჰიპერფუნქცია (ჰიპერთირეოზი); ისინი შესაბამისად შეცვლიან თქვენს მკურნალობას.
• · სერაირმა შეიძლება გამოიწვიოს მაღალი არტერიული წნევა და გულისცემის გახშირება, თუ მიიღება თერაპიულზე მაღალი დოზებით. ამიტომ, აცნობეთ ექიმს, თუ გაწუხებთ გულ-სისხლძარღვთა დაავადება; საჭიროების შემთხვევაში, ისინი შეგიცვლიან მკურნალობას.
• · სერაირმა შეიძლება შეამციროს კალიუმის დონე სისხლში, თუ მიიღებთ მაღალი თერაპიული დოზებით. ამიტომ, აცნობეთ ექიმს, თუ გაქვთ ან მიდრეკილი ხართ კალიუმის დაბალი დონისკენ; საჭიროების შემთხვევაში, ისინი შეგიცვლიან მკურნალობას.
• · ხანგრძლივი გამოყენებისას, განსაკუთრებით მაღალი დოზებით, სერაირმა შეიძლება გამოიწვიოს სისტემური ეფექტები, როგორიცაა კუშინგის სინდრომი (ზურგზე კეხის მსგავსი ცხიმის დაგროვება, სახის მომრგვალება, თმის ჭარბი ზრდა და ოსტეოპოროზი, განსაკუთრებით წელისა და მენჯის არეში), კუშინგის მსგავსი სიმპტომები, თირკმელზედა ჯირკვლის უკმარისობა (თირკმელზედა ჯირკვლის მიერ ჰორმონების გამოყოფის დათრგუნვა), ზრდის შეფერხება ბავშვებსა და მოზარდებში, ძვლის სიმკვრივის შემცირება, კატარაქტა და გლაუკომა (თვალშიდა წნევის მომატება) მასში შემავალი კორტიკოსტეროიდების გამო.
• · მას შეუძლია გამოიწვიოს ზრდის შეფერხება ბავშვებსა და მოზარდებში. ამიტომ, სერაირის ხანგრძლივი პერიოდის განმავლობაში გამოყენებისას ბავშვების სიმაღლე რეგულარულად უნდა შემოწმდეს.
• · ზოგიერთი პაციენტი უფრო მგრძნობიარეა საინჰალაციო კორტიკოსტეროიდების მიმართ. ამიტომ, თუ პერორალური თერაპიისგან საინჰალაციო კორტიკოსტეროიდულ თერაპიაზე გადახვალთ, ექიმი ყურადღებით გააკონტროლებს თქვენს მდგომარეობას.
• · საინჰალაციო ფლუტიკაზონის პროპიონატით მკურნალობის დაწყების შემდეგ, თან უნდა ატაროთ გამაფრთხილებელი ეტიკეტი, რომელიც მიუთითებს, რომ სტრესულ სიტუაციებში შეიძლება დაგჭირდეთ დამატებითი მკურნალობა.
• · სერაირმა შეიძლება გაზარდოს სისხლში შაქრის დონე. ამიტომ, აცნობეთ ექიმს, თუ გაქვთ დიაბეტი; საჭიროების შემთხვევაში, ის შეცვლის თქვენს მკურნალობას.
• · თუ იღებთ რიტონავირს (ანტივირუსული პრეპარატი), აცნობეთ ექიმს; საჭიროების შემთხვევაში, ის შეცვლის თქვენს მკურნალობას.
• · მკურნალობის პირველი სამი თვის განმავლობაში ექიმმა შეიძლება გაკონტროლოთ ასთმასთან დაკავშირებული შესაძლო გვერდითი მოვლენები.

თუ ეს გაფრთხილებები თქვენ გეხებათ, თუნდაც წარსულში, მიმართეთ ექიმს.

სერაირის გამოყენება საკვებთან და სასმელთან ერთად

მიღების მეთოდის გამო, სერაირი არ ურთიერთქმედებს საკვებთან და სასმელთან.

ორსულობა

ამ მედიკამენტის გამოყენებამდე გაიარეთ კონსულტაცია ექიმთან ან ფარმაცევტთან. თუ ხართ ორსულად ან გეგმავთ ორსულობას, აუცილებლად აცნობეთ ამის შესახებ ექიმს.

თუ მკურნალობის დროს დაორსულდით, დაუყოვნებლივ მიმართეთ ექიმს ან ფარმაცევტს.

ძუძუთი კვება

ამ მედიკამენტის გამოყენებამდე გაიარეთ კონსულტაცია ექიმთან ან ფარმაცევტთან.

ვინაიდან არ არსებობს სალმეტეროლის და ფლუტიკაზონის ძუძუთი კვების დროს გამოყენების საკმარისი გამოცდილება, ამიტომ გამოიყენეთ ისინი ძუძუთი კვების დროს მხოლოდ ექიმის დანიშნულების შემთხვევაში.

ავტომობილის მართვა და მექანიზმებთან მუშაობა

სერაირი, სავარაუდოდ, გავლენას არ მოახდენს ავტომობილის მართვის ან მექანიზმებთან მუშაობის უნარზე.

მნიშვნელოვანი ინფორმაცია სერაირში შემავალი ზოგიერთი დამხმარე ნივთიერების შესახებ

სერაირი არ შეიცავს ისეთ დამხმარე ნივთიერებებს, რომლებიც საჭიროებენ განსაკუთრებულ ყურადღებას.

ურთიერთქმედება სხვა სამკურნალო საშუალებებთან

თუ იღებთ სელექციურ ან არასელექტიურ ბეტა-ბლოკატორებს (გულის სამკურნალო საშუალებები), რიტონავირს (ანტივირუსული საშუალება), კეტოკონაზოლს (სოკოს საწინააღმდეგო საშუალება) ან P450 3A4 ფერმენტების დამთრგუნველ მედიკამენტებს (მაგალითად, კეტოკონაზოლი), გთხოვთ, აცნობოთ ექიმს. საჭიროების შემთხვევაში, ისინი შეცვლიან თქვენს მკურნალობას.

თუ ამჟამად იღებთ ან ბოლო დროს იღებდით რაიმე რეცეპტით ან ურეცეპტოდ გაცემულ მედიკამენტებს, გთხოვთ, აცნობოთ ექიმს ან ფარმაცევტს.

3. სერაირის გამოყენების წესი

მითითებები სწორი გამოყენებისა და დოზირების/გამოყენების სიხშირის შესახებ:

გამოიყენება ასთმის სამკურნალოდ:

მოზრდილები და 12 წლის და უფროსი ასაკის მოზარდები:

1 ინჰალაცია (50 მიკროგრამი სალმეტეროლი და 250 მიკროგრამი ფლუტიკაზონი) დღეში ორჯერ.

18 წლის და უფროსი ასაკის მოზრდილები: ექიმმა შეიძლება გირჩიოთ დოზის გაზრდა 2 ინჰალაციამდე (50 მიკროგრამი სალმეტეროლი და 250 მიკროგრამი ფლუტიკაზონი) დღეში ორჯერ, 14 დღის განმავლობაში.

ფილტვების ქრონიკული ობსტრუქციული დაავადების (COPD) დროს:

მოზრდილები: 1 ინჰალაცია (50 მიკროგრამი სალმეტეროლი და 250 მიკროგრამი ფლუტიკაზონი) დღეში ორჯერ.

გამოყენების წესი და მეთოდი:

სერაირი გამოიყენება პირის ღრუს მეშვეობით ინჰალაციის გზით.

ინჰალატორით ჩასუნთქვისას, მედიკამენტი ფილტვებში აღწევს. ამიტომ, მნიშვნელოვანია, რომ ღრმად და ძლიერად ისუნთქოთ მუნდშტუკის მეშვეობით.

თქვენი ექიმი ან სხვა ჯანდაცვის სპეციალისტი გიჩვენებთ ინჰალატორის გამოყენების წესს.

თუ სერაირი ბავშვისთვისაა დანიშნული, ის უნდა იქნეს გამოყენებული ზრდასრული ადამიანის მეთვალყურეობის ქვეშ, რომელიც კარგად იცნობს სერაირის გამოყენების წესებს.

სერაირის სრული სარგებლის მისაღებად აუცილებელია მისი რეგულარული გამოყენება. არ შეწყვიტოთ მკურნალობა, თუნდაც თავს უკეთ გრძნობდეთ.

არ შეცვალოთ მედიკამენტის დოზა ექიმის ნებართვის გარეშე.

არ გადაყლაპოთ კაფსულები. კაფსულები უნდა გამოიყენოთ მხოლოდ შეფუთვაში მოთავსებული ინჰალატორის (აპარატის) მეშვეობით. ეს აპარატი სპეციალურად შექმნილია სერაირი 50მკგ/250 მკგ კაპსაირის საინჰალაციო ფხვნილის შემცველი კაფსულების გამოსაყენებლად.

• · კაფსულებში არსებული ფხვნილი მხოლოდ ინჰალაციის გზით უნდა იქნას გამოყენებული.
• · გამოყენების წინ დაუყოვნებლივ ამოიღეთ კაფსულები ფოლგის შეფუთვიდან. დარწმუნდით, რომ თითები მშრალი გაქვთ, რათა კაფსულები არ დასველდეს.
• · მედიკამენტის გამოყენების შემდეგ, კარგად გამოივლეთ პირი წყლით და გამორეცხვის შემდეგ გადმოაფურთხეთ წყალი. ეს ამცირებს პირის ღრუში სოკოვანი ინფექციის (კანდიდოზის) განვითარების რისკს.
• · არ გამოიყენოთ კაფსულები ყუთში მოთავსებული მოწყობილობის გარდა სხვა მოწყობილობასთან ერთად.
• · სერაირის ყოველდღიურად ერთსა და იმავე დროს გამოყენება დაგეხმარებათ გახსოვდეთ, როდის უნდა მიიღოთ მედიკამენტი.
• · მნიშვნელოვანია სერაირის რეგულარული გამოყენება, ექიმის დანიშნულების შესაბამისად.
• · თუ თქვენ გაქვთ კითხვები სერაირის გამოყენების ხანგრძლივობის შესახებ, მიმართეთ ექიმს ან ფარმაცევტს.

დამატებითი ინფორმაცია მედიკამენტის გამოყენების შესახებ იხილეთ თანდართულ გამოყენების ინსტრუქციაში. ინჰალატორის სათანადო გამოყენებისთვის ყურადღებით გაეცანით ქვემოთ მოცემულ ინსტრუქციებს.

ინჰალატორის გამოყენების ინსტრუქცია:

ძვირფასო მომხმარებელო,

ინჰალატორი განკუთვნილია სერაირის საინჰალაციო კაფსულაში შემავალი მედიკამენტების ინჰალაციისთვის, რომლებიც ექიმმა დაგინიშნათ სასუნთქი გზების პრობლემების დროს.

ინჰალატორი, რომელიც გაიცემა მუყაოს კოლოფში, უსაფრთხოების მიზნით შეფუთულია დამცავ შეფუთვაში.

ინჰალატორის გამოყენებამდე ამოიღეთ იგი შეფუთვიდან, როგორც ეს ნაჩვენებია სურათზე.

შენიშვნა: ინჰალატორის გასაწმენდად არ გამოიყენოთ წყალი.

კაფსულები არ უნდა შეინახოთ ექსტრემალურ ტემპერატურაზე. სერაირის ინჰალატორის კაფსულები შეიცავს მცირე რაოდენობით ფხვნილს, ამიტომ ისინი მხოლოდ ნაწილობრივ არის შევსებული.

კითხვები და პასუხები გამოყენებასთან დაკავშირებით

1. როგორ ავიცილო თავიდან კაფსულების პატარა ნაჭრებად დაშლა?

გამოყენების დროს კაფსულები შეიძლება გატყდეს და შესუნთქვის შემთხვევაში მცირე ნაწილაკები პირის ღრუში ან ყელში მოხვდეს. ამის თავიდან აცილება შეგიძლიათ შემდეგი გზით:

• · გამოყენებამდე კაფსულები შეინახეთ ორიგინალ შეფუთვაში (ბლისტერში);
• · კაფსულები შეინახეთ არაუმეტეს 25°C ოთახის ტემპერატურაზე;
• · კაფსულები დაიცავით ნესტისგან.

2. საზიანოა თუ არა კაფსულის ნაწილაკები?

არა. კაფსულა დამზადებულია საკვებად ვარგისი, უვნებელი ჟელატინისგან. ნებისმიერი ჟელატინის ნაწილაკი, რომელიც პირის ღრუში ან ყელში მოხვდება, შეიძლება გადაყლაპოთ.

3. როგორ ამოვიღო კაფსულის კორპუსში გაჭედილი კაფსულა?

გახსენით აპარატი, გადმოაბრუნეთ და ნაზად დააკაკუნეთ ძირზე.

4. როგორ გავიგო, ნამდვილად მივიღე თუ არა დოზა?

• · მოწყობილობიდან ჩასუნთქვისას კაფსულის ვიბრაციას იგრძნობთ.
• · პირში ლაქტოზისგან „შაქრის გემოს“ იგრძნობთ. შესაძლოა, ყელის უკანა ნაწილში მტვერიც იგრძნოთ. ეს ნორმალურია.
• · დოზის მიღების შემდეგ კაფსულა დაცარიელდება.

5. როგორ მოვაშორო მტვერი მოწყობილობის შიგნიდან?

• · გამოიყენეთ მშრალი ქაღალდის ხელსახოცი ან რბილი ჯაგრისი.
• · გახსოვდეთ, რომ არასდროს არ უნდა გარეცხოთ მოწყობილობა წყლით.

სხვადასხვა ასაკობრივი ჯგუფები

გამოყენება ბავშვებში: 4-დან 12 წლამდე ასაკის ბავშვებს ეძლევათ სერაირის 50 მკგ/100 მკგ საინჰალაციო ფხვნილი კაფსულების სახით. არ არსებობს ინფორმაცია სერაირის 4 წლამდე ასაკის ბავშვებში გამოყენების შესახებ.

გამოყენება ხანდაზმულებში: ხანდაზმულებში დოზის კორექცია საჭირო არ არის.

მითითებები სპეციალური გამოყენების შესახებ:

თირკმლის/ღვიძლის უკმარისობა: თირკმლის ან ღვიძლის უკმარისობის მქონე პაციენტებისთვის დოზის კორექცია საჭირო არ არის.

თუ ფიქრობთ, რომ სერაირის ეფექტი ძალიან ძლიერი ან ძალიან სუსტია, მიმართეთ ექიმს ან ფარმაცევტს.

თუ მიიღეთ სერაირის საჭიროზე მეტი დოზა

თუ მიიღეთ სერაირის საჭიროზე მეტი დოზა, მიმართეთ ექიმს ან ფარმაცევტს.

თუ დაგავიწყდათ სერაირის მიღება

თუ სერაირის მიღება დაგავიწყდათ, შემდეგი დოზა მიიღეთ ჩვეულ დროს და გააგრძელეთ შემდეგი დოზების მიღება ჩვეულებრივ.

არ მიიღოთ ორმაგი დოზა გამოტოვებული დოზის კომპენსაციისთვის.

სერაირით მკურნალობის შეწყვეტის შესაძლო ეფექტები

ასთმით დაავადებულმა პაციენტებმა სერაირით მკურნალობა არ უნდა შეწყვიტონ უეცრად, რადგან შესაძლოა აღნიშნოს სიმპტომების გაუარესება. სამკურნალო დოზა თანდათან უნდა შემცირდეს ექიმის მეთვალყურეობის ქვეშ. მკურნალობის შეწყვეტის შემთხვევაში შესაძლოა აღინიშნოს სუნთქვის პრობლემების გაუარესება და იშვიათ შემთხვევებში გამოიწვიოს სერიოზული გვერდითი მოვლენები. ესენია:

• · კუჭის ტკივილი
• · დაღლილობა და მადის დაკარგვა
• · გულისრევა და დიარეა
• · წონის დაკლება
• · თავის ტკივილი და თავბრუსხვევა
• · სისხლში კალიუმის დაბალი დონე
• · დაბალი არტერიული წნევა და კრუნჩხვები

ფილტვების ქრონიკული ობსტრუქციული დაავადების მქონე (COPD) პაციენტებში მკურნალობის შეწყვეტამ შეიძლება გამოიწვიოს სიმპტომური დეკომპენსაცია (ორგანოს დისფუნქცია); ამიტომ, მკურნალობა უნდა შეწყდეს ექიმის მეთვალყურეობის ქვეშ.

4. მოსალოდნელი გვერდითი ეფექტები

ნებისმიერი მედიკამენტის მსგავსად, სერაირმაც შეიძლება გამოიწვიოს გვერდითი მოვლენები იმ ადამიანებში, რომლებსაც აქვთ მომატებული მგრძნობელობა მისი რომელიმე ინგრედიენტის მიმართ. გვერდითი მოვლენების რისკის შემცირების მიზნით, ექიმი დაგინიშნავთ სერაირის ყველაზე დაბალ დოზას, რომელიც საჭიროა თქვენი ასთმის კონტროლისთვის.

ძალიან ხშირი (ვლინდება 10-დან 1-ზე მეტ პაციენტში):

• · თავის ტკივილი - ეს, როგორც წესი, უმჯობესდება მკურნალობის გაგრძელებისას.
• · ფილტვების ქრონიკული ობსტრუქციული დაავადების მქონე პაციენტებში გაციების შემთხვევების ზრდა დაფიქსირდა.

ხშირი (ვლინდება 10-დან 1-ზე ნაკლებ პაციენტში):

• · პირის ღრუს წყლულები (მტკივნეული, კრემისფერიდან ყვითელამდე, ამობურცული წყლულები) პირის ღრუსა და ყელში. ასევე შეიძლება განვითარდეს ენისა და ყელის შეშუპება, ასევე ხმის ჩახლეჩა. ყოველი ჩასუნთქვის შემდეგ გამოივლეთ პირი წყლით და დაუყოვნებლივ გადმოაფურთხეთ. ექიმმა შეიძლება დაგინიშნოთ სოკოს საწინააღმდეგო პრეპარატი პირის ღრუს წყლულების სამკურნალოდ.
• · კანკალი და გულისცემის აჩქარება ან გულის არარეგულარული რიტმი (გულისცემის შეგრძნება) – ეს სიმპტომები, როგორც წესი, უვნებელია და მკურნალობის განმავლობაში ქრება.
• · კუნთების სპაზმები.

ფილტვების ქრონიკული ობსტრუქციული (COPD) დაავადების მქონე პაციენტებში ასევე აღინიშნა შემდეგი გვერდითი მოვლენები:

• · პნევმონია და ბრონქიტი (ფილტვის ინფექცია). აცნობეთ ექიმს, თუ შეამჩნევთ რომელიმე შემდეგ სიმპტომს: ნახველის გამოყოფის მომატება, ნახველის ფერის შეცვლა, ცხელება, შემცივნება, ხველის გაძლიერება და სუნთქვის გაძნელების გაუარესება.
• · სისხლჩაქცევები და ძვლების მოტეხილობები.
• · სინუსიტი (ცხვირის, ლოყების და თვალების უკან დაჭიმულობის ან ზეწოლის შეგრძნება, რომელსაც ზოგჯერ თან ახლავს პულსირებადი ტკივილი).
• · სისხლში კალიუმის დონის შემცირება (გულისცემა შეიძლება გახდეს არარეგულარული, კუნთები შეიძლება დასუსტდეს და შეიძლება განიცადოთ სპაზმები).

არახშირი (ვლინდება 100 პაციენტიდან 1-ზე ნაკლებში):

• · კანის გამონაყარი
• · ძალიან გახშირებული გულისცემა (ტაქიკარდია)

ძალიან იშვიათი (ვლინდება 10,000 პაციენტიდან 1-ზე ნაკლებში):

• · ალერგიული რეაქციები: სერაირის გამოყენების შემდეგ, შესაძლოა სუნთქვა მოულოდნელად გაუარესდეს. შეიძლება განვითარდეს ძლიერი ხიხინი და ხველა. ასევე შესაძლებელია ქავილი და შეშუპება (ძირითადად სახის, ტუჩების ან ყელის). თუ ეს გვერდითი მოვლენები განვითარდა, ან გამოვლინდა სერაირის გამოყენებისთანავე, შეწყვიტეთ პრეპარატის გამოყენება და დაუყოვნებლივ აცნობეთ ექიმს ან მიმართეთ უახლოესი საავადმყოფოს სასწრაფო დახმარების განყოფილებას.
• · განსაკუთრებით მაღალი დოზების ხანგრძლივი გამოყენებისას, სერაირმა შეიძლება ხელი შეუშალოს ორგანიზმის მიერ სტეროიდული ჰორმონების ნორმალურ გამომუშავებას. ეს ეფექტები მოიცავს მოვლენებს, როგორიცაა:

- ბავშვებსა და მოზარდებში ზრდის შენელება.

- ძვლების გათხელება.

- კატარაქტა და გლაუკომა.

- წონაში მატება.

- მრგვალი (მთვარის ფორმის) სახე (კუშინგის სინდრომი).

ექიმი რეგულარულად გასინჯავთ, რათა დაადგინოს, გამოვლინდა თუ არა ეს გვერდითი მოვლენები და დარწმუნდეს, რომ იღებთ სერაირის ყველაზე დაბალ დოზას ასთმის კონტროლისთვის.

• · გულის არარეგულარული ან ნორმაზე სწრაფი გულისცემა (არითმია).

აცნობეთ ექიმს, მაგრამ არ შეწყვიტოთ სერეარის მიღება მანამ, სანამ არ მიიღებთ რეკომენდაციას.

• · სისხლში შაქრის დონის მომატება (ჰიპერგლიკემია). თუ გაქვთ დიაბეტი, შესაძლოა საჭირო გახდეს სისხლში შაქრის დონის უფრო ხშირი შემოწმება და დიაბეტის მკურნალობის ჩვეული რეჟიმის კორექტირება.
• · ქცევითი ცვლილებები, როგორიცაა შფოთვა, ძილის დარღვევა და უჩვეულო აქტივობა ან მოუსვენრობა (ეს სიმპტომები უფრო ხშირია ბავშვებში).
• · სახსრების მტკივნეული, შეშუპებული და კუნთების ტკივილი.

თუ შეამჩნევთ რაიმე გვერდით მოვლენას, რომელიც არ არის მითითებული ამ ინსტრუქციაში, მიმართეთ ექიმს ან ფარმაცევტს.

გვერდითი ეფექტების შეტყობინება

თუ თქვენ შენიშნავთ რაიმე გვერდით მოვლენას, მიუხედავად იმისა, არის თუ არა ეს მითითებული ინსტრუქციაში, გთხოვთ, მიმართოთ ექიმს, ფარმაცევტს ან სხვა ჯანდაცვის სპეციალისტს. ასევე, შეატყობინეთ ნებისმიერი გვერდითი მოვლენის შესახებ თურქეთის წამლის უსაფრთხოების ორგანოს (TÜFAM). ამისათვის გადადით „გვერდითი მოვლენების შესახებ შეტყობინების“ ბმულზე ვებ-გვერდის www.titck.gov.tr მეშვეობით ან დარეკეთ გვერდითი მოვლენების ცხელ ხაზზე 0 800 314 00 08 ნომერზე. გვერდითი მოვლენების შესახებ შეტყობინებით, თქვენ ხელს შეუწყობთ თქვენს მიერ გამოყენებული მედიკამენტის უსაფრთხოების შესახებ მეტი ინფორმაციის მოპოვებას.

5. სერაირის შენახვის პირობები

სერაირი ინახება საწყის შეფუთვაში, ბავშვებისთვის მიუწვდომელ და შეუმჩნეველ ადგილას.

შეინახეთ სერაირი არაუმეტეს 25°C ოთახის ტემპერატურაზე, მშრალ ადგილას,

ეს პროდუქტი გამოიყენეთ მხოლოდ ვარგისიანობის ვადის შესაბამისად.

არ გამოიყენოთ სერაირი შეფუთვაზე მითითებული ვარგისიანობის ვადის გასვლის შემდეგ.

არ გამოიყენოთ სერაირი, თუ შეამჩნევთ პროდუქტის და/ან შეფუთვის დაზიანებას.

არ მიიღოთ ვადაგასული ან გამოუყენებელი მედიკამენტები.

გამოუყენებელი მედიკამენტები გთხოვთ მიაწოდოთ ურბანიზაციის სამინისტროს მიერ განსაზღვრული შეგროვების სისტემას.

გაცემის წესი -ფარმაცევტული პროდუქტის ჯგუფი II, გაიცემა ფორმა №3 რეცეპტით.

სავაჭრო ნებართვის მფლობელი და წარმოების ადგილი:

ნოიტეკ ინჰალერ ილაჩ სან. ვე ტიკ. ა.ს.

არიფიე/საკარია

ტელეფონი: 0850 201 23 23

ფაქსი: 0212 481 61 11

ელ-ფოსტა: [email protected]

წინამდებარე გამოყენების ინსტრუქციის დამტკიცების თარიღია 03.08.2017.