ბიქსტონიმი ქსილო0,5მგ/მლ10მლ ცხ/წვ

ბიქსტონიმი ქსილო

0,5მგ /მლ ცხვირის სპრეი, ხსნარი

1. ბიქსტონიმი ქსილო და მისი გამოყენება

ბიქსტონიმი ქსილო ცხვირის  დეკონგესანტია, რომელიც სწრაფად ხსნის  ცხვირის გაჭედვას და აადვილებს სუნთქვას.

ბიქსტონიმი ქსილო გამოიყენება 2-10 წლის ასაკის ბავშვებში ცხვირის ლორწოვანი გარსის შეშუპების მოსახსნელად ვაზომოტორული რინიტისა და ალერგიული რინიტის დროს. ამის გარდა, მისი გამოყენება შესაძლებელია ყურის ინფექციების სამკურნალოდ ნაზოფარინქსის ლორწოვანი გარსის დეკონგესტის დასახმარებლად; ასევე, ექიმის დანიშნულებით ცხვირის გამოკვლევის ჩასატარებლად.

2. ბიქსტონიმი ქსილოს გამოყენებამდე გასათვალისწინებელი ინფორმაცია

ბიქსტონიმი ქსილო არ გამოიყენება შემდეგ შემთხვევებში:

- თუ ხართ ალერგიული (ჰიპერმგრძნობიარე) ქსილომეტაზოლინის ან რომელიმე სხვა ინგრედიენტის მიმართ (ჩამოთვლილი მე-6 ნაწილში);

- თუ გაქვთ ცხვირის ლორწოვანი გარსის მშრალი ქრონიკული ანთება, რომელსაც არ ახლავს სეკრეცია (rhinitis sicca);

- თუ გაქვთ ცერებრალური ინსულტის ისტორია ან რისკ-ფაქტორები, რომლებმაც შეიძლება ხელი შეუწყოს ცერებრალური ინსულტის განვითარებას ალფა-სიმპატომიმეტური აქტივობით: მკურნალობა ვაზოკონსტრიქტორებით, კრუნჩხვების ისტორია, ურეთროპროსტატული დაავადებები შარდის შეკავებით, რაც დაკავშირებულია პირდაპირი მოქმედების სიმპათომიმეტიკებთან;

- თუ ცოტა ხნის წინ გქონდათ ნეიროქირურგია (ტრანსსფენოიდული ჰიპოფიზექტომია ან  ქირურგიული ჩარევის შემდეგ ტვინის გარსის ექსპოზიცია);

- 2  წლამდე ასაკის ბავშვებში.

გაფრთხილებები და სიფრთხილის ზომები

პრეპარატის გამოყენებამდე მიმართეთ ექიმს და აცნობეთ ამის შესახებ, თუ:

- მკურნალობთ დეპრესიის სამკურნალო პრეპარატებით - მონოამინოქსიდაზას ინჰიბიტორებით (MAO ინჰიბიტორები) ან სხვა პრეპარატებით, რომლებმაც შეიძლება გამოიწვიოს მაღალი წნევა;

- თუ გაქვთ მომატებული თვალშიდა წნევა, განსაკუთრებით ვიწროკუთხოვანი გლაუკომა;

- თუ გაქვთ თირკმელზედა ჯირკვლის სიმსივნე (ფეოქრომოციტომა);

- თუ გაქვთ გადიდებული პროსტატის ჯირკვალი (პროსტატის ადენომა/პროსტატის კეთილთვისებიანი ჰიპერტროფია);

- თუ გაწუხებთ გულ-სისხლძარღვთა მძიმე დაავადება (მაგ., გახანგრძლივებული QT სინდრომი, გულის კორონარული დაავადება, მაღალი წნევა);

- თუ გაწუხებთ მეტაბოლური დარღვევები (მაგ., ჰიპერთირეოზი, შაქრიანი დიაბეტი).

ბიქსტონიმი ქსილოს განმეორებითი და/ან გახანგრძლივებული მიღების შემთხვევაში, არსებობს ტაქიფილაქსიისა და იატროგენული რინიტის (ქრონიკული შეშუპება და ცხვირის ლორწოვანის ატროფია) განვითარების რისკი.

ბიქსტონიმი ქსილოს განმეორებითი და/ან გახანგრძლივებული მიღების შემთხვევაში, არსებობს ქსილომეტაზოლინის სისტემური შეწოვის რისკი იმ რაოდენობით, რამაც შეიძლება გამოიწვიოს სისტემური გვერდითი რეაქციები.

სხვა მედიკამენტები და ბიქსტონიმი ქსილო

აცნობეთ თქვენს ექიმს ან ფარმაცევტს, თუ იყენებთ, ცოტა ხნის წინ იყენებდით ან შეიძლება გამოიყენოთ სხვა პრეპარატები.

ბიქსტონიმი ქსილოს  ერთდროულმა გამოყენებამ მონოამინ-ოქსიდაზას ინჰიბიტორებთან (MAO ინჰიბიტორებთან) ან ტრიციკლურ ანტიდეპრესანტებთან ან ტეტრაციკლურ ანტიდეპრესანტებთან შეიძლება გამოიწვიოს წნევის მომატება (ქსილომეტაზოლინით გამოწვეული გულ-სისხლძარღვთა ეფექტების გამო).

რეკომენდებული არ არის სიმპათომიმეტიკების შემცველი ცხვირის სხვა პრეპარატების ერთდროული მიღება.

ორსულობა, ძუძუთი კვება და ნაყოფიერება

თუ ხართ ორსულად ან ძუძუთი კვებავთ, ფიქრობთ, რომ შეიძლება იყოთ ორსულად ან გეგმავთ ბავშვის გაჩენას, ამ პრეპარატის მიღებამდე რჩევისთვის მიმართეთ თქვენს ექიმს ან ფარმაცევტს.

არ გამოიყენოთ ბიქსტონიმი ქსილო ორსულობის ან ლაქტაციის პერიოდში, ან თუ ხართ რეპროდუქციული ასაკისა და არ იყენებთ კონტრაცეფციას.

ავტომობილის და მექანიზმების მართვა

ბიქსტონიმი ქსილოს ხანგრძლივი გამოყენების ან მაღალი დოზების გამოყენების შემთხვევაში, არ მართოთ მანქანები და არ გამოიყენოთ მექანიზმები, რადგან  გამორიცხული არ არის აქტიური ნივთიერების სისტემური შეწოვა და შესაძლოა გავლენა იქონიოს მანქანის მართვისა და მექანიზმების მართვის უნარზე.

ბიქსტონიმი ქსილო შეიცავს ბენზალკონიუმის ქლორიდს.

ბენზალკონიუმის ქლორიდი იწვევს გაღიზიანებას. შესაძლოა გამოიწვიოს კანის მხრივ გვერდითი რექაციები.

ბიქსტონიმი ქსილო შეიცავს სორბიტოლს .

თუ ექიმის მიერ ინფორმირებული ხართ, რომ გაქვთ აუტანლობა ზოგიერთი კატეგორიის ნახშირწყლების მიმართ, ამ პრეპარატის გამოყენებამდე კონსულტაციისთვის მიმართეთ ექიმს.

3. ბიქსტონიმი ქსილოს გამოყენების წესი

ეს პრეპარატი ყოველთვის გამოიყენეთ ზუსტად ისე, როგორც ექიმმა ან ფარმაცევტმა გითხრათ. თუ არ ხართ დარწმუნებული, მიმართეთ თქვენს ექიმს ან ფარმაცევტს.

2-10 წლამდე  ასაკის ბავშვები

1 შესხურება თითოეულ ნესტოში, საჭიროების მიხედვით, მაგრამ არა უმეტეს 3-ჯერ დღეში.

რეკომენდებულზე მაღალი დოზების გამოყენება არ შეიძლება.

2 წლამდე ასაკის ბავშვები

ბიქსტონიმი ქსილო  უკუნაჩვენებია 2 წლამდე ასაკის ბავშვებში.

ხანდაზმულები

ბიქსტონიმი ქსილო ინიშნება  იმავე დოზებით,  როგორც მოზრდილებში.

მიღების ხანგრძლივობა

ბიქსტონიმი ქსილო არ უნდა იქნას გამოყენებული 5 დღეზე მეტი ხნის განმავლობაში, თუ ექიმი სხვაგვარად არ გირჩევთ.

გამოყენების  მეთოდი

გამოყენებისთვის, უნდა მოიხსნას დამცავი თავსახური. სწორი დოზირების  უზრუნველსაყოფად, პირველად  მიღების წინ, სპრეის ტუმბოზე 2-3 ჯერ დაჭერით გააფრქვიეთ სპრეი ჰაერში. ამგვარად, ტუმბო მზადაა გამოსაყენებლად.

ცხვირის სპრეის გამოყენებამდე ცხვირი  ნაზად გამოირეცხეთ. ბოლო დოზის მიღება რეკომენდებულია ძილის წინ.

გამოყენების მიზნით, დამცავი თავსახურის მოხსნის შემდეგ, სპრეის გამფრქვევი მოათავსეთ  ნესტოში და ტუმბოზე ერთხელ დაჭერით ნაზად ჩაისუნთქეთ ცხვირით.

შეყვანისას ბოთლი რჩება ვერტიკალურ მდგომარეობაში, ტუმბო - ზემოთ აწეული. პროდუქტი არ გამოიყენება ჰორიზონტალურ მდგომარეობაში ან ქვედამიმართულებით.

გამოყენების შემდეგ დაახურეთ დამცავი თავსახური.

ჰიგიენური მიზეზების გამო და ინფექციების თავიდან აცილების მიზნით, თითოეული ბოთლი პულვერიზერით უნდა გამოიყენოს მხოლოდ ერთი და იმავე პირმა.

თუ იყენებთ იმაზე მეტ ბიქსტონიმი ქსილოს ვიდრე საჭიროა

რეკომენდებულზე მაღალი დოზის მიღებისას  ან ხსნარის შემთხვევით გადაყლაპვისას, დაუყოვნებლივ მიმართეთ ექიმს ან საავადმყოფოს. შეიძლება განვითარდეს შემდეგი მოვლენები: გუგის გაფართოება (მიდრიაზი), გულისრევა, ღებინება, ტუჩების ლურჯი შეფერილობა (ციანოზი), ცხელება, კრუნჩხვები, გულ-სისხლძარღვთა დარღვევები (ტაქიკარდია/ბრადიკარდია, სხვა არითმიები, კოლაფსი, გულის გაჩერება, მაღალი წნევა), სუნთქვის დარღვევები (ფილტვის შეშუპება, ქოშინი და ა.შ.), ფსიქიკური დარღვევები, ძილიანობა, სხეულის დაბალი  ტემპერატურა, დაბალი გულისცემა, დაბალი წნევა, სუნთქვის გაჩერება და კომა.

თუ დაგავიწყდათ ბიქსტონიმი ქსილოს  გამოყენება

არ მიიღოთ ორმაგი დოზა გამოტოვებული დოზის კომპენსირების მიზნით.

თუ შეწყვეტთ ბიქსტონიმი ქსილოს  გამოყენებას

განმეორებითი და/ან გახანგრძლივებული მიღების შემთხვევაში და/ან მაღალი დოზებით, ბიქსტონიმი ქსილოს  შეწყვეტის შემდეგ შეიძლება განვითარდეს შეგუბებითი რებაუნდის  სინდრომი (რეაქტიული ჰიპერემია).

ამ მედიკამენტის გამოყენებასთან დაკავშირებით დამატებითი შეკითხვების შემთხვევაში, მიმართეთ თქვენს ექიმს ან ფარმაცევტს.

4. შესაძლო გვერდითი ეფექტები

ყველა პრეპარატის მსგავსად, ამ პრეპარატმაც შეიძლება გამოიწვიოს გვერდითი რეაქციები, თუმცა ისინი ყველას არ აღენიშნება.

გვერდითი რეაქციები კლასიფიცირდება შემდეგი სიხშირის მიხედვით: ძალიან ხშირი (აღენიშნება 10-დან 1 პაციენტზე მეტს), ხშირი (აღენიშნება 10-დან 1 პაციენტზე ნაკლებს), არახშირი (ვლინდება 100-დან 1-ზე ნაკლებ პაციენტში), იშვიათი (უვითარდება 1000 პაციენტში 1-ზე ნაკლებს), ძალიან იშვიათად (აღენიშნება 1-ზე ნაკლებ პაციენტს 10000-დან), უცნობი სიხშირით (რაც არ შეიძლება შეფასდეს არსებული მონაცემებით).

იშვიათი გვერდითი ეფექტები

- ჰიპერმგრძნობელობის მქონე პაციენტებში: ადგილობრივი ზომიერი და გარდამავალი გაღიზიანება (ცხვირის ლორწოვანი გარსის წვის ან სიმშრალის შეგრძნება).

ძალიან იშვიათი გვერდითი ეფექტები

- შეგუბებითი რებაუნდის სინდრომი (რეაქტიული ჰიპერემია) მკურნალობის შეწყვეტის შემდეგ;

- ხანგრძლივმა მკურნალობამ, ქსილომეტაზოლინის ხშირმა და/ან მაღალმა დოზებმა შეიძლება გამოიწვიოს გაღიზიანება (ცხვირის ლორწოვანი გარსის წვა ან სიმშრალე), ასევე რეაქტიული შეშუპება წამლით გამოწვეული რინიტით. ეს ეფექტი შეიძლება გაქრეს მკურნალობის დაწყებიდან მხოლოდ 5 დღის შემდეგ და, თუ მიღება გაგრძელდა, შეიძლება განვითარდეს ცხვირის ლორწოვანი გარსის ქრონიკული დაზიანება ქერქის წარმოქმნით;

- თავის ტკივილი;

- უძილობა;

 - ასთენია;

- მხედველობის დარღვევები;

- არანორმალური გულისცემა;

- სწრაფი გულისცემა;

- მაღალი  არტერიული წნევა.

გვერდითი მოვლენები უცნობი სიხშირით

- გულისრევა.

გვერდითი ეფექტების შესახებ შეტყობინება

რაიმე გვერდითი ეფექტის შემთხვევაში, მიმართეთ თქვენს ექიმს ან ფარმაცევტს. ეს მოიცავს ნებისმიერ გვერდით ეფექტს, რომელიც შესაძლოა არ არის აღნიშნული ამ ინსტრუქციაში. არასასურველი რეაქციების შესახებ ასევე შეგიძლიათ შეატყობინოთ პირდაპირ ეროვნული შეტყობინების სისტემის მეშვეობით, რომლის მონაცემები გამოქვეყნებულია ეროვნული მედიკამენტებისა და სამედიცინო მოწყობილობების სააგენტოს ვებ-გვერდზე http://www.anm.ro/.გვერდითი ეფექტების შეტყობინებით, თქვენ შეგიძლიათ დაეხმაროთ დამატებითი ინფორმაციის მოწოდებას ამ წამლის უსაფრთხოების შესახებ.

5. ბიქსტონიმი ქსილოს შენახვის წესი

შეინახეთ ბავშვებისთვის მიუწვდომელ ადგილას.

არ გამოიყენოთ ეს პრეპარატი შეფუთვაზე მითითებული ვარგისობის ვადის გასვლის შემდეგ, ვარგისობის ვადად ითვლება მითითებული თვის ბოლო დღე.

შეინახეთ 25°C-ზე დაბალ ტემპერატურაზე ორიგინალ შეფუთვაში.

გამოიყენეთ ბოთლის პირველი გახსნიდან მაქსიმუმ 30 დღის განმავლობაში.

არ გადაყაროთ პრეპარატები კანალიზაციაში ან საყოფაცხოვრებო ნაგავში. ჰკითხეთ ფარმაცევტს, როგორ გადაყაროთ პრეპარატები, რომელბსაც აღარ იყენებთ. ეს ზომები ხელს შეუწყობს გარემოს დაცვას.

6. შეფუთვის შიგთავსი და სხვა ინფორმაცია

ბიქსტონიმი ქსილოს შემადგენლობა

- აქტიური ნივთიერება: ქსილომეტაზოლინის ჰიდროქლორიდი. ცხვირის სპრეის ხსნარის  ერთი მილილიტრი შეიცავს 0,5 ქსილომეტაზოლინის ჰიდროქლორიდს.

- სხვა კომპონენტები: ბენზალკონიუმის ქლორიდი, კალიუმის დიჰიდროფოსფატი, დინატრიუმის ფოსფატის დოდეკაჰიდრატი, სორბიტოლი, დინატრიუმის ედეტატი, ნატრიუმის ქლორიდი, გაწმენდილი წყალი.

ბიქსტონიმი ქსილოს  გარეგნული აღწერა და შეფუთვის შიგთავსი

ბიქსტონიმი ქსილო არის გამჭვირვალე, უფერო და უსუნო ხსნარი, ხილული ნაწილაკების გარეშე.

მუყაოს კოლოფში  ერთი ქარვისფერი შუშის ბოთლი სპრეი ტუმბოთი, რომელიც შეიცავს 10 მლ ცხვირის სპრეის ხსნარს.

სავაჭრო ნებართვის მფლობელი და მწარმოებელი

BIOFARM S.A.

99 Logofătul Tăutu Street, მე-3 რაიონი, ბუქარესტი, რუმინეთი

ტელეფონი: +4 021 30.10.600

ფაქსი: +4 021 30.10.605

ელ.ფოსტა : [email protected]