WISH YOU HEALTH AND PEACE OF MIND!

NEWS

23.03.2018
The students of the British-Georgian Academy visited "Aversi-Rational"...

  1. Directory >
  2. Beauty care and a healthy lifestyle Diet


დიეტების კასტინგი

რაზე ოცნებობს ყველა ქალი? – რა თქმა უნდა, იმაზე, რომ მუდამ ახალგაზრდა და მშვენიერი იყოს. ამისთვის  კი უამრავ ხერხს მიმართავს, ზოგჯერ – ისეთსაც, ჭკუათამყოფელ კაცს აზრადაც რომ არ მოუვა.
საკუთარ გარეგნობაზე სოლიდური პროფესიის ადამიანებიც ზრუნავენ, მაგრამ მისი სრულყოფა ცხოვრების მიზნად მხოლოდ სცენისა თუ ეკრანის ვარსკვლავებს აქვთ დასახული.

ნიკოლ კიდმანი
გარდა იმისა, რომ საათობით ღვრის ოფლს სპორტულ დარბაზსა თუ აუზში, დიეტომანიითაც არის შეპყრობილი – მთელი ცხოვრება დიეტაზე ზის, მაგრამ
გულის სიღრმეში მისი ტყვეობიდან თავის დახსნაზე ოცნებობს.


პირველი დღე 
საუზმე: შავი ყავა
სადილი: მოხარშული ორი კვერცხი, ისპანახი, პომიდორი
ვახშამი: მოხარშული ხორცის ნაჭერი, მწვანე სალათი

მეორე დღე
საუზმე: ორცხობილა, შავი ყავა
სადილი: ქათმის ფილეს დიდი ნაჭერი, მწვანე სალათი
ვახშამი: ორი მოხარშული კვერცხი

მესამე დღე
საუზმე: ორცხობილა, შავი ყავა
სადილი: ზეთში შემწვარი ნიახურის ფესვები, პომიდორი, ხილი
ვახშამი: ორი მოხარშული კვერცხი, ჭიქა გახეხილი სტაფილო, ხმელი ყველის ნაჭერი

მეოთხე დღე
საუზმე: შავი ყავა
სადილი: მაგრად მოხარშული კვერცხი, ჭიქა გახეხილი სტაფილო, ხმელი ყველის ნაჭერი
ვახშამი: ხილის სალათის მოზრდილი ულუფა

მეხუთე დღე
საუზმე: შავი ყავა
სადილი: უცხიმო თევზის დიდი ნაჭერი
ვახშამი: 1 ჭიქა გახეხილი სტაფილო

მეექვსე დღე
საუზმე: ორცხობილა, შავი ყავა
სადილი: ქათმის ფილეს დიდი ნაჭერი, მწვანე სალათის ფოთლები
ვახშამი: მაგრად მოხარშული ორი კვერცხი

მეშვიდე დღე
საუზმე: უშაქრო ჩაი
სადილი: მოხარშული ხორცის დიდი ნაჭერი, ხილი
ვახშამი: მოხარშული თევზი ბოსტნეულთან ერთად

მერვე-მეცამეტე დღე
დიეტა მეორდება, ოღონდ პირუკუ.


ჯენიფერ ლოპესი
ერთი ჩვევა აქვს – დიეტის აღმართს რომ შეუდგება, თითოეული გადაგორებული დღის ბოლოს ერთ ულუფა სასუსნავს ყიდულობს და სამალავში მალავს. ასე იადვილებს მტანჯველ დღეებს. დიეტის ბოლოს სამალავს აღებს, ლამაზად შეფუთულ ტკბილეულს საწოლზე ცლის და პირს იტკბარუნებს. მანამდე კი უმარილო და უშაქრო დიეტურ თვითგვემას უნდა გაუძლოს…

საუზმე: 1 ჭიქა წყალი, ფორთოხალი, ფინჯანი კაკაო. 15 წუთის შემდეგ: ნებისმიერი ხილის ერთი ნაყოფი
სადილი: 200 გ ხაჭო და ამდენივე ხილი
სამხარი: ცოტაოდენი ხილის ჩირი
ვახშამი: 200 გ თევზი ან ფრინველის ხორცი, 300 გ ბოსტნეული
ძილის წინ: უცხიმო ნატურალური იოგურტი

ალისია სილვერსტოუნი
როგორც კი საკუთარ ანარეკლს გაფუშფუშებას შეატყობს, ვეგეტარიანულ რაციონზე გადადის. ამით წონასაც იკლებს და ძილსაც იუმჯობესებს, კანს ელასტიკურობას მატებს, ხოლო  თმას – ბზინვარებას, თანაც ხშირ-ხშირად იმეორებს: ჩემს სხეულს ყველაზე ჯანსაღ საკვებს ვაწვდიო.

სამდღიანი დიეტა
პირველი დღე
საუზმე: 170 გ გრეიპფრუტის წვენი, 1 ჭიქა უხეშად ნაფქვი მარცვლეული სოიის რძით
სადილი: 170 გ ბოსტნეული, 1/2 ჭიქა მოხარშული ლობიო
ვახშამი: 1 ჭიქა სოკოსა და  ბარდასთან ერთად შემწვარი 115 გ მაგარი ყველი ორთქლზე მოხარშული 2 ჭიქა ბრინჯის გარნირით

მეორე დღე
საუზმე: 2 ცალი ბლინი კენკრით (მაგალითად, მარწყვით)
სადილი: 1 ჭიქა ვეგეტარიანული ჩილი, მოხარშული სიმინდის ტარო
ვახშამი: 2 ნაჭერი ყველიანი პიცა, დიდი ლამბაქით ბოსტნეულის სალათი
დესერტი: 2 ქლიავი, ჭიქა შერბეტი

მესამე დღე
საუზმე: 2 ნაჭერი დაბალკალორიული პური სოიის მდნარი ყველით
სადილი: 1 ჭიქა ჩაშუშული ბოსტნეული და ჭვავის პურის ნაჭერი
ვახშამი: 2 ცალი მოზრდილი ბულგარული წიწაკა ბრინჯისა და სიმინდის გულსართით, ორთქლზე მოხარშული 1 ჭიქა ბროკოლი
დესერტი: 1 ჭიქა უცხიმო იოგურტი, 1 ჭიქა მარწყვი

მადონა
მისი სისუსტეც კანფეტებია. დროდადრო თავს უფლებას აძლევს და ფერად ქაღალდში გახვეული ტკბილეულით იკოკლოზინებს ყელს. “განუწყვეტელი თვითგვემა და უარის თქმა იმაზე, რაც გულით გსურს, შეუძლებელიცაა და საშიშიც. ჩემი ნერვული სისტემა ამას ვერ გაუძლებს”, – ამბობს მადონა. სამაგიეროდ, ყოველდღე ნახევარ საათს ვარჯიშობს, ველოსიპედით დაქრის, გორგოლაჭებიანი ციგურებით სრიალებს… ამ ექსცენტრული მსახიობის  მენიუ კი ასეთია:

საუზმე: ერთი ნაჭერი ორცხობილა 2 კვერცხის ცილასთან ერთად, ერთი კვერცხი, ვაშლი ან ატამი
სადილი: უხეშად დაფქული მარცვლეულის პური, ქათმის ან ინდაურის მკერდი მაიონეზით
ვახშამი: თევზის, ქათმის ან ძროხის ხორცის ნაჭერი  ბოსტნეულთან ერთად, ცოტა მაკარონი და ღუმელში მშრალად შემწვარი ნახევარი კარტოფილი

სოფი ლორენი
კინოს ჯადოქარი თურმე გრეიპფრუტის დიეტის წყალობით ინარჩუნებს ლერწამივით ტანს – ყოველი ჭამის წინ ამ ციტრუსს  მიირთმევს, მერე კი გემრიელად სადილობს. მთავარია, მენიუ 800 კალორიაზე მეტს არ  შეიცავდეს.
სოფი ლორენს სპაგეტიც ჰყვარებია. “ეს საკმაოდ ჯანმრთელი საკვებია, განსაკუთრებით – როცა პომიდორსა და ბოსტნეულთან ერთად მოგართმევენ”, – ირწმუნება მსახიობი.

 

სამდღიანი დიეტა 
პირველი დღე 
საუზმე: 170 გ ფორთოხლის წვენი, ორი მაგრად მოხარშული კვერცხი
სადილი: ბოსტნეულის სალათი 60 გ ინდაურის ხორცსა და უცხიმო ყველთან ერთად
ვახშამი: 115 გ მაკარონი კრევეტებით, ისპანახის სალათი
დესერტი: 1 ვაშლი

მეორე დღე
საუზმე: 1 ჭიქა ღერღილის ფაფა უცხიმო რძესთან ერთად
სადილი: ახალი ხილის სალათი, 1/2 ჭიქა უცხიმო ხაჭო
ვახშამი: 115 გ სპაგეტი მჭლე ინდაურის გუფთით, მწვანე სალათა
დესერტი: 1 მსხალი

მესამე დღე
საუზმე: ორცხობილა უცხიმო ყველთან ერთად
სადილი: 115 გ მწვანე სალათი მოხარშული ქათმით
ვახშამი: 170 გ ლაზანია უცხიმო ყველით, ზეთით შეზავებული მწვანილეულის სალათი
დესერტი: 2 ატამი

ჯულია რობერტსი 
მსახიობი, რომელსაც ჰოლივუდში ყველაზე მეტს უხდიან, სახის კანის დასაჭიმ დიეტას ეთაყვანება. ამ დიეტაში ჯულიამ  მთავარი როლი ორაგულს მიაკუთვნა – დიეტოლოგებმა დაარწმუნეს, ეს თევზი კანის ელასტიკურობის საწინდარიაო, ამიტომ  საუზმედ, სადილად, ვახშმად ორაგულს მიირთმევს და თუ ოდესმე ოკეანეში ამ თევზის ნასახიც აღარ დარჩება, მსი გენოციდში მშვენიერ მსახიობს დასდეთ ბრალი.

დიეტა
გაღვიძებისთანავე:  350 მლ წყალი
საუზმე: 100 გ მოხარშული ორაგული, 1/2 ლამბაქი წყალზე მომზადებული შვრიის ფაფა, მწვანე ვაშლი, 350 მლ მინერალური წყალი
მეორე საუზმე: 250 გ დაკონსერვებული ორაგული, ზეითუნის ზეთითა და ლიმონის წვენით შეკაზმული მწვანე სალათა, 350 მლ მინერალური წყალი
სადილი: 50 გ ქათმის გულმკერდი, 4  თხილის გული, 1/2 მწვანე ვაშლი, 350 მლ მინერალური წყალი
ვახშამი: მეორდება მეორე საუზმე.
ძილის წინ: მეორდება სადილი.
 

დიეტა

მენიუ დღეგრძელობისთვის 
დიეტის დაცვა დღეს მოდაშია. ლამის ნახევარი მსოფლიო ცდილობს, ამა თუ იმ წესით შედგენილი მენიუთი მიაღწიოს საწადელს – წონა დაიკლოს. არიან ისეთებიც, ვისთვისაც დიეტა ცხოვრების ჯანსაღ წესთან ასოცირდება და სულაც არ ემსახურება ზედმეტი კილოგრამების დაფერთხვის დიად მისიას. გარდა ამისა, უამრავია სამკურნალო დიეტა, რომელთა მიზანიც რომელიმე პათოლოგიის შემსუბუქება გახლავთ.

და მაინც, რა დანიშნულებაც არ უნდა ჰქონდეს დიეტას, იგი ყოველთვის მოდური იქნება. ბევრი სავსებით ჩვეულებრივი მენიუ “სასწაულმოქმედის”  სახელით ისარგებლებს, ხოლო ზოგიერთი მეტად სასარგებლო გაკიცხვას დაიმსახურებს.
ერთი სიტყვით, დიეტებსა და კვების რეჟიმზე საზოგადოებას არაერთგვაროვანი წარმოდგენა აქვს, თუმცა მათი მნიშვნელობა უდავოა. ასე რომ არ იყოს, დიეტის სპეციალისტები (სპეციალისტებს ვგულისხმობთ და არა დილეტანტებს) ესოდენ მრავლად არ იარსებებდნენ.
მაინც რომელი დიეტაა სჯობს? რა შეიძლება მოჰყვეს გამუდმებულ შიმშილსა და წონის რადიკალურ დაკლებას? ამ და სხვა საინტერესო საკითხებზე გვესაუბრება ენდოკრინოლოგი, პროფესორი ელენე გიორგაძე.


. ქალბატონო ელენე, დიეტა უმთავრესად წონის დაკლებასთან ასოცირდება, ნაკლებად –  ჯანსაღ საკვებსა და კვების მართებულ რეჟიმთან. თქვენ რას გვეტყოდით ამის თაობაზე?
– თავად  სიტყვა “დიეტა” სწორ, რაციონალურ, ჯანმრთელ და დაბალანსებულ კვებას ნიშნავს. შესაბამისად, სწორი კვება და კვების მართებული რეჟიმის შერჩევა არა მარტო წონის კორექციის მიზნით, არამედ ცხოვრების ჯანსაღი წესის დასაცავადაც გახლავთ აუცილებელი. 
. რამდენად მნიშვნელოვანია ჯანსაღი კვება ჯანმრთელობისთვის? რომელი დაავადებებია ასოცირებული არაადეკვატურ კვებასთან? შეიძლება თუ არა, მათგან მხოლოდ დიეტის მეშვეობით განვიკურნოთ?
– ვფიქრობ, მართებული კვება თითოეული ადამიანის ჯანმრთელობისთვის აუცილებელია. დაბალკალორიული დიეტა და ფიზიკური ვარჯიში სიმსუქნის  მკურნალობის მეტად ეფექტური თერაპიული საშუალება გახლავთ. კიდევ უფრო აქტიურად  უნდა მივდიოთ ცხოვრების ჯანსაღ წესს (ვიკვებოთ რაციონალურად, ხელი მოვკიდოთ სპორტს), თუკი სიმსუქნე უკვე დაავადებად არის ჩამოყალიბებული. საზოგადოდ, სიმსუქნე ნივთიერებათა ცვლის დარღვევით მიმდინარე ქრონიკულ დაავადებათაგანია, რომელიც ჭარბი ცხიმოვანი ქსოვილის განვითარებით ვლინდება. პათოლოგიის ქრონიკული ხასიათიდან  გამომდინარე, მკურნალობა მთელი სიცოცხლის მანძილზეა საჭირო. ამავე დროს, მაღალია რეციდივის განვითარების რისკი.
შესაძლოა, სიმსუქნით შეპყრობილ პირს აღენიშნებოდეს ზოგიერთი თანდართული დაავადება ან  მათკენ იყოს მიდრეკილი. ეს პათოლოგიებია:  
• შაქრიანი დიაბეტი ტიპი 2;
• არტერიული ჰიპერტენზია;
• ათეროსკლეროზი, გულის იშემიური დაავადება (გიდ);
• ჰიპერლიპიდემია;
• აპნოე (სუნთქვის დარღვევა); 
• რეპროდუქციული დისფუნქცია;
• ონკოლოგიური დაავადებები;
• ქოლელითიაზი (ნაღველკენჭოვანი დაავადება);
• ვენების ვარიკოზული გაგანიერება;
• პოდაგრა;
• ოსტეოართროზი  და ზოგიერთი სხვა.
. დღეს უამრავი რადიკალური დიეტაა გავრცელებული. რა აზრის ბრძანდებით მათზე? არის თუ არა დიეტა წონის კლების ყველაზე ეფექტური გზა?
– დიეტა თითოეული ადამიანისთვის ინდივიდუალურად უნდა იყოს შედგენილი და უთუოდ – კლინიკურ-ლაბორატორიული გამოკვლევების საფუძველზე. უნივერსალური დიეტა, რომელიც ყველას ერთნაირი ეფექტურობით დააკლებინებს წონას, არ არსებობს. გარდა ამისა, დიეტის თვითნებურად, ექიმის მეთვალყურეობის გარეშე დაცვა მიზანშეწონილი არამც და არამც არ გახლავთ. ნებისმიერ შემთხვევაში, რაციონში გათვალისწინებული უნდა იყოს მიკროელემენტების, ამინომჟავების ის ოდენობა, რომელიც კონკრეტული ადამიანისთვის არის აუცილებელი. დაიხსომეთ, რომ  თვითნებურ დიეტას ხშირად არაერთი დარღვევა მოსდევს.
რაც შეეხება უშუალოდ სიმსუქნეს, იგი ქრონიკული, მორეციდივე დაავადება გახლავთ, ამიტომ პაციენტმა საკუთარი წონა მთელი სიცოცხლის განმავლობაში უნდა აკონტროლოს. ექიმთან კონსულტაციის შემდეგ მას ეცოდინება, რას მიაქციოს ყურადღება და რა გაითვალისწინოს.
. რას გვეტყოდით წონის დასაკლებ სხვადასხვა სამკურნალო ფორმულასა თუ სპეციფიკურ მედიკამენტებზე, რომლებიც ზედმეტი კალორიებისგან გათავისუფლების  უტყუარ და მაღალ ეფექტს გვპირდება?
– საბედნიეროდ, დღესდღეობით ჩვენს ბაზარზეც არსებობს პრეპარატები, რომლებიც ექიმის კონსულტაციისა და სათანადო გამოკვლევების საფუძველზე თითოეულ პირს ინდივიდუალურად,  დიეტასთან ერთად ენიშნება. ასეთი რამ სავსებით გამართლებულია, მათი თვითნებური მიღება კი არამც და არამც არ შეიძლება. რაც შეეხება პროგნოზს, ის მეტად ინდივიდუალურია.

. გარდა კვების რეჟიმის კორექციისა, წონის დასაკლები კიდევ რომელი ეფექტური მეთოდი არსებობს? 
– მაგალითისთვის, ჩვენს კლინიკაში ფუნქციონირებს ფიზიოთერაპიული კაბინეტი, სადაც ელექტროსტიმულაციის მეთოდზე დამყარებული პროცედურით – ყურის ნიჟარაზე არსებულ ცთომილ ნერვსა და შენმენის წერტილზე (რელაქსაციის წერტილი) ერთდროული ზემოქმედებით ვთრგუნავთ მადას, რის შედეგადაც ძლიერდება სეროტონინის სეკრეცია, რომელიც სიმაძღრის შეგრძნებას იწვევს. ინდივიდუალურად შედგენილი დიეტისა და ამ პროცედურის ურთიერთშეხამება სასურველ შედეგს გვაძლევს.
. რომელი ასაკიდან არის დასაშვები წონაში დაკლების მიზნით დიეტის დაცვა? შეიძლება თუ არა, მოზარდმა დიეტა დაიცვას?
– სამწუხაროდ, დღეს ბავშვებსა და მოზარდებს შორის ხშირად გვხვდება ჭარბი წონაც, ანუ სიმსუქნის წინა საფეხური, და უკვე ჩამოყალიბებული დაავადება – სიმსუქნეც. სწორედ მოზარდები იცავენ დიეტას თვითნებურად და ამის შედეგად გამძაფრებული ენდოკრინული დარღვევებით  მოგვმართავენ. ამიტომაც კიდევ ერთხელ გავიმეორებ: ექიმთან კონსულტაციისა და სათანადო კვლევების გარეშე დიეტის დაცვა არამც და არამც არ არის მიზანშეწონილი.
. წონის კლების როგორი დინამიკაა უსაფრთხო ჯანმრთელობისთვის?  
– ნორმალურია, როდესაც ადამიანი თვეში საწყისი წონის დაახლოებით 5%-ის იკლებს. თუმცა, როგორც უკვე მოგახსენეთ, თითოეული ადამიანისთვის დიეტაც და წონის კლების დინამიკაც მეტ-ნაკლებად ინდივიდუალურად უნდა განისაზღვროს.
. რომელი პათოლოგიები იწვევს წონის მნიშვნელოვან მატებას? რა განაპირობებს სიმსუქნის ჩამოყალიბებას?
– არსებობს მეტაბოლური სინდრომი (მას პოლიმეტაბოლური,  მეტაბოლური ტრისინდრომის, სიუხვის სინდრომის სახელითაც იხსენიებენ). ეს გახლავთ მეტაბოლურ (ნივთიერებათა ცვლის)  დარღვევათა კომპლექსი, რომლის კომპონენტები ერთმანეთთან პათოგენეზურად მჭიდროდ არის დაკავშირებული და, ამდენად, მის პათოგენეზში (წარმოშობაში) პირველადი მიზეზის განსაზღვრა მეტად ძნელია. შესაძლოა, მიზეზი  ნახშირწყლოვანი ან ლიპიდური ცვლის დარღვევა იყოს. იგივე შეიძლება ითქვას აბდომინალურ სიმსუქნეზე. სავსებით შესაძლებელია, თითოეული ხსენებული მიზეზი გენეტიკური განწყობიდან გამომდინარეობდეს ანუ ადამიანს მემკვიდრეობით ერგოს  ნივთიერებათა ცვლის ამა თუ იმ სახის დარღვევა. 
. დაბოლოს, რას ურჩევდით ჩვენს მოსახლეობას, როგორ იკვებონ? საჭიროა თუ არა, მისდიონ სპორტს და დაიცვან ცხოვრების ჯანსაღი წესი?
– სასურველია, საჭმელი დღეში 5-ჯერ მივირთვათ, ანუ გვქონდეს სრულფასოვანი საუზმე, სადილი, ვახშამი და ორჯერ ხილიც მივიღოთ. სასურველია, კალორიული საკვები დღის პირველ ნახევარში მივირთვათ, რათა დღის ბოლომდე მიღებული ენერგიის დახარჯვა მოვასწროთ. თუ საკვების მეშვეობით მიღებული ენერგია დახარჯულს აღემატება, წონაში მოვიმატებთ. ვეცადოთ, ცხიმები საკვების სადღეღამისო ულუფის დაახლოებით 30%-ს შეადგენდეს (აქედან 10% ცხოველური იყოს, ხოლო 20% – მცენარეული), ცილები – 15-20%-ს, ხოლო ნახშირწყლები – დაახლოებით 50%-ს (თანაც უპირატესობა მივანიჭოთ არა საკონდიტრო ნაწარმს, მურაბას, შოკოლადს, არამედ ბოსტნეულში, ბურღულეულში შემავალ ნახშირწყლებს). ასევე აუცილებელია დოზირებული (თითოეული პირისთვის ინდივიდუალურად შედგენილი) ფიზიკური დატვირთვა.


აწონ-დაწონილი დიეტა

საკმარისია, ქალმა ორსულობის შესახებ შეიტყოს, რომ ერთბაშად ათასი აზრი აუფორიაქებს გონებას: ნეტავ, როგორი პაწია ეყოლება? როგორ ჩაივლის ეს ცხრა თვე?.. დრო გადის და მომავალ დედიკოს კიდევ ერთი, მეტად ქალური პრობლემა უჩნდება: როგორ ჩამოიფერთხოს ზედმეტი წონა, რომლითაც ფეხმძიმობამ ასე უხვად დაასაჩუქრა. და ისიც იმ დიეტების შესწავლას იწყებს, რომლებიც ყველაზე ეფექტურად მოაცილებს არასასურველ კილოგრამებს.
ნუთუ ორსულისთვის დიეტა უვნებელია? ალბათ, არა. რატომ? მოდით, ამ თემაზე ვრცლად ვისაუბროთ.

ესოდენ საჭირო კალორიები
საკვები ცოცხალ ორგანიზმს ისევე სჭირდება, როგორც ჰაერი. სწორედ საკვები ნივთიერებების წყალობით განახლდება და ენერგიით ივსება მკვდარი თუ  გაცვეთილი უჯრედები და ქსოვილები. ორსულობის დროს ამგვარი საშენი მასალა არა მარტო დედას, არამედ ნაყოფსაც სჭირდება. ამრიგად, ადვილი შესაძლებელია, საკვები ნივთიერებების დეფიციტი სხვადასხვა მეტად სერიოზული პრობლემის, მაგალითად, თანდაყოლილი მანკის მიზეზადაც კი იქცეს.
ქალს დღის განმავლობაში, ჩვეულებრივ, 1800-2000 კკალ აკმაყოფილებს, ორსულობისას კი, როგორც ჩანს, მადაზე მოდის – მისი დღიური მოთხოვნილება 2500-2800 კკალ-მდე იზრდება.   

ცილები, ცხიმები, ნახშირწყლები...
ვიწყებთ ცილებით. მათ სხვაგვარად ორგანიზმის საშენ მასალასაც უწოდებენ. ამგვარი ცილოვანი “აგურები” ორსულს (და, შესაბამისად, ნაყოფს) ყველაზე დიდი რაოდენობით მეორე ტრიმესტრში ანუ ნაყოფის აქტიური ზრდის პერიოდში სჭირდება. ორსულობის მე-5 თვიდან მოყოლებული, ქალმა დღეში 100გ-მდე ცილა უნდა მიიღოს.
მართალია, ცილა უამრავ საკვებში მოიპოვება, მაგრამ ჯანმრთელობისთვის ყველაზე მნიშვნელოვანი ცილები მაინც ცხოველურ სურსათშია თავმოყრილი. ტყუილად როდი დაარქვეს ამინომჟავებს (სწორედ მათგან შედგება ცილები) შეუცვლელი – ისინი ჩვენსავე ორგანიზმში კი არ წარმოიქმნება, არამედ საკვების მეშვეობით ხვდება იქ, თანაც მხოლოდ და მხოლოდ ცხოველურ პროდუქტებში მოიპოვება.
ამდენად, ორსულის ულუფა 100 გ ცილიდან 60% სასურველია ცხოველური წარმოშობის იყოს. აქედან 30% ხორცი და უცხიმო თევზი უნდა იყოს, 25% – რძის ნაწარმი, ხოლო 5% – კვერცხი.  საერთო ჯამში, მენიუ დაახლოებით ასე გამოიყურება: 100-150 გ საქონლის (უმჯობესია ხბოს) ხორცი, 120-200 გ თევზი, 50-100 გ უცხიმო ხაჭო, 50-70 გ ყველი. დანარჩენი 40% ხილსა და ბოსტნეულზე მოდის.
გახდომის მიზნით არამც და არამც არ გირჩევთ მხოლოდ ვეგეტარიანული საკვების მიღებას. გარდა იმისა, რომ ორგანიზმს (ნაყოფს!) შეუცვლელი ამინომჟავები მოაკლდება, ადვილი შესაძლებელია, მეტეორიზმმა (აირების დაგროვებამ) შეგაწუხოთ. 
ვაგრძელებთ ცხიმებით. მათი დღიური მოთხოვნილება ორსულისთვის 80 გ-ია. 30% მცენარეული წარმოშობისა უნდა იყოს. ამისთვის სავსებით საკმარისია, საკვები 25-30 გ არარაფინირებული ზეთით შევკაზმოთ.  თუკი ჭარბი წონისკენ ხართ მიდრეკილი, ცხიმის შეზღუდვას გირჩევთ, ოღონდ ეცადეთ, ცხოველური და მცენარეული წარმოშობის ცხიმებს შორის თანაფარდობა არ დაირღვეს.
გაითვალისწინეთ, რომ ცხიმები (განსაკუთრებით – უჯერი) აუცილებელია თავის ტვინისა და თვალის ბადურას ფორმირებისთვის. გარდა ამისა, ცხიმები ხელს უწყობს ზოგიერთი (ე.წ. ცხიმში ხსნადი) ვიტამინის (A-ს, D-სა და E-ს)  შეთვისებას.
თქვენ წარმოიდგინეთ, კრიტიკის ქარცეცხლში გატარებული ქოლესტერინიც კი გარკვეულწილად სასარგებლოა: იგი როგორც დედის, ისე ნაყოფის ორგანიზმში ზოგიერთი ჰორმონის წარმოქმნაში მონაწილეობს.
ვამატებთ ნახშირწყლებს. ისინი ენერგიის მთავარი წყაროა. პური, რომელშიც დიდი რაოდენობითაა ნახშირწყლები, B ჯგუფის ვიტამინებსაც უხვად შეიცავს. მეტად სასარგებლოა ჭვავის პური.
საზოგადოდ, სასურველია, ორსულმა დღეში 300 გ პური მიირთვას, მაგრამ თუკი სიმსუქნისკენ არის მიდრეკილი, პურის (განსაკუთრებით – თეთრის) ოდენობის შეზღუდვა მოუწევს. ასეთ შემთხვევაში გირჩევთ, დღის განმავლობაში 50 გ პური მიირთვათ და ნახშირწყლების მარაგი უმთავრესად ხილის ხარჯზე შეივსოთ. 
ნახშირწყლების საწყობია შაქარი, საკონდიტრო ნაწარმი, უმაღლესი ხარისხის ფქვილისგან გამომცხვარი პური, შოკოლადი, თუმცა ორსულობისას ამ სურსათს უმჯობესია ერიდოთ.

მინერალები და ვიტამინები
რკინა ელემენტია, რომლის დეფიციტსაც განსაკუთრებით უფრთხიან ორსულები. ეს გასაგებიც არის, რადგან მისი ნაკლოვანება ანემიას იწვევს, რაც მეტად უარყოფითად აისახება ნაყოფის სისხლმომარაგებაზე.
რკინას ორგანიზმი ყველაზე უკეთ ხორცპროდუქტებიდან ითვისებს. მართალია, ეს ელემენტი ხილშიც მოიპოვება, მაგრამ მეტად მცირე რაოდენობით
შეიწოვება. მაგალითად, 100 გ ხორცისგან ორგანიზმი იმდენ რკინას ითვისებს, რამდენსაც 2 კგ ვაშლისგან.

კალციუმი აუცილებელია ნაყოფის ძვლების შენებისა და სიმტკიცისთვის. მისი დეფიციტი, გარდა ძვლების სიმყიფისა, კარიესს იწვევს.
კალციუმის მთავარი წყარო რძე და რძის ნაწარმია: ხაჭო, ყველი, მაწონი, იოგურტი, კეფირი. თუკი ორსული დღის განმავლობაში 100 გ ყველს, ნახევარ ლიტრ რძეს ან მაწონს მიირთმევს, კალციუმის მოთხოვნილებას სავსებით შეივსებს.
მინერალური ნივთიერებებიდან აღსანიშნავია ფოსფორისა და მაგნიუმის მარილებიც. ისინი აუცილებელია ნაყოფის ძვლოვანი ჩონჩხის ფორმირებისთვის, ნერვული სისტემის ფუნქციონირებისთვის. ფოსფორით მდიდარია თევზი, სოკო, მწვანე ბარდა, ხიზილალა.
ფოსფორს ორგანიზმი ცხოველური საკვებიდან უკეთ შეითვისებს.
მაგნიუმს უხვად შეიცავს ზღვის კომბოსტო, საზამთრო, ქატო, შვრია, ლობიო, ბარდა, თევზი, კვერცხი. თუკი ორსული რაციონში ჩართავს ერთ კვერცხს, 100 გ უხეშად ნაფქვი ხორბლის პურს, შვრიის (ჰერკულესის) ფაფას (50 გ ჰერკულესს + 150 გ რძე), 100 გ საზამთროს, მაგნიუმის დღიურ მოთხოვნილებას სავსებით დაიკმაყოფილებს. 
რაც შეეხება ვიტამინებს, მოარული აზრით, ისინი ბევრია ხილსა და ბოსტნეულში, მაგრამ  ყველა არა. B ჯგუფის, D, E და K ვიტამინებს ხილზე მეტად ხორცის ნაწარმში იპოვით.
ამდენად, ორსულის მენიუდან ცხოველური საკვების გამორიცხვა არასდიდებით არ შეიძლება. გაითვალისწინეთ ისიც, რომ რა სრულფასოვნადაც არ უნდა იკვებებოდეთ, დროდადრო ვიტამინებისა და მინერალების კომპლექსის მიღება არ გაწყენდათ.

ორის მაგივრად? – არამც და არამც!
როგორც ვხედავთ, ორსულისა და მისი პატარას ჯანმრთელობისთვის უაღრესად დიდი მნიშვნელობა აქვს რაციონალურ კვებას. თუმცა ეს როდი ნიშნავს, რომ ფეხმძიმე ქალმა ორის მაგივრად მიირთვას. ჭარბი კვება არამცთუ არ გარგებთ, პირიქით, გავნებთ და ზოგიერთი პათოლოგიის (ტოქსიკოზის, შეშუპების და ა.შ.) ჩამოყალიბებას შეუწყობს ხელს.
ნორმაში ორსულმა 12 კილოგრამამდე უნდა მოიმატოს. თუკი კილოგრამი კილოგრამს ელვის სისწრაფით ემატება, დროდადრო განტვირთვის დღეები მოიწყვეთ და ჯანმრთელობისთვის მავნე პროდუქტები მენიუდან ამოიღეთ.

განიტვირთე
განტვირთვის დღეები მეტად სასარგებლოა არა მარტო ჭარბი წონის დროს, არამედ გვიანი გესტოზის შემთხვევაშიც, როდესაც ორსულს არტერიული წნევის მატება, შეშუპება და შარდში ცილა აღენიშნება.
განტვირთვა 7-10 დღეში ერთხელ მოიწყვეთ. ამ დროს საკვების დღიური ნორმა 5-6 ულუფად ნაწილდება, ხოლო ჭამიდან ჭამამდე შუალედი 3-4 საათს მოიცავს. საღამოს ექვსი საათის შემდეგ საკვების მიღება რეკომენდებული არ არის. გარდა ამისა, გაითვალისწინეთ: განტვირთვის დღეების მოწყობა სასურველია ორსულობის 28-ე კვირიდან, როდესაც ნაყოფის ორგანოები უკვე ფორმირებულია.
ჩვენ განტვირთვის მიზნით შემდეგ დიეტებს გირჩევთ:
. ვაშლის – დღის განმავლობაში 5-6 ჯერზე მიირთვით 1,5 კგ ვაშლი;
. რძის – ანალოგიურად გადაანაწილეთ ნახევარი ლიტრი უცხიმო ხაჭო ან ერთი ლიტრი მაწონი.

ორსულისთვის მეტად არასასურველი საკვების “შავ სიაში” (თუ გნებავთ, “შავ მენიუში”) მოხვდა:
. ალერგენების შემცველი პროდუქტები, რომლებიც ალერგიული რეაქციის გამომწვევი ნივთიერების – ჰისტამინის გამოთავისუფლებას იწვევს. ესენია: მარწყვი, პამიდორი, კაკაო, შოკოლადი, ციტრუსები, კრევეტები და ა.შ.
. სურსათი, რომელიც მადას აღძრავს: თევზისა და ხორცის ნახარში, ეთერზეთებით მდიდარი ბოსტნეული (ხახვი, ნიორი);
. მარილითა და სუნელებით გაჯერებული საკვები: თევზის დელიკატესები, კონსერვები, ძეხვეული, სოსისი;
. სინთეზური ნივთიერებების, საღებავებისა და არომატიზატორების შემცველი სურსათი (საკონდიტრო ნაწარმი, უალკოჰოლო გამაგრილებელი სასმელები და ა.შ.),
. ალკოჰოლური სასმელები (ვფიქრობთ, ამ შემთხვევაში კომენტარი ზედმეტია).


საინტერესო ფაქტები დიეტების ისტორიიდან

უხსოვარი დროიდან
ექიმების რეკომენდაციებით გაწამებული ერთი რუსი პოეტი ჩიოდა, ვიდრე დიეტებს მოიგონებდნენ, საწუთრო უფრო გრძელი იყოო, მაგრამ თუ ისტორიას 
დავუჯერებთ, ასეთი ბედნიერი ხანა კაცობრიობას საერთოდ არ ჰქონია.
დიეტა ბერძნულად ცხოვრების წესს ნიშნავს, თუმცა კარგა ხანია, ამ სიტყვას ასე ფართო მნიშვნელობით აღარ ვიყენებთ – მისი წარმოთქმისას კონკრეტულად რაციონს, კვების რეჟიმს ვგულისხმობთ. თავისებურ დიეტას – მართალია, გაუაზრებლად, მაგრამ მაინც – პირველყოფილი ადამიანებიც იცავდნენ – უბრალოდ, იმას ჭამდნენ, რასაც მოიხელთებდნენ. მათი რაციონი მრავალი თანამედროვე დიეტოლოგის ოცნებაა: უამრავი კენკრა და ძირხვენა, ცოტა ხორცი და არავითარი შემწვარ-მოხრაკული, შესაბამისად, ნაკლები ქოლესტეროლი და ბევრზე ბევრი უჯრედისი... ზოგიერთი პროდუქტის შეგნებული არჩევანი, სხვებზე კი უარის თქმა, შეიძლება ითქვას, ცივილიზაციის მონაპოვარია – მასთან ერთად ვისწავლეთ.

ანტიკური სამყაროდან
ნადიმის ერთ-ერთი პირველი აღწერა ძველეგვიპტური სამარხის კედლებზეა აღმოჩენილი. მიზეზი ნამდვილად მნიშვნელოვანი ყოფილა – ფარაონს ტყუპი ვაჟი შესძენია. წვეულთათვის ჯერ თხის ყველი, შემწვარი ღორის ხორცი, არაჟანში ჩაწყობილი ნიორი, ქერის სუპი და მდინარის თევზი მიურთმევიათ, ჩაროზად კი თაფლიანი ფუნთუშები, ფინიკი და ბროწეული. მომავალი რამზეს III-ისა და მისი ძმის დაბადების ასე მოკრძალებულად აღნიშვნას მზეთამზეს, სავარაუდოდ, არც სიღარიბე აიძულებდა და არც სიძუნწე. ვინ იცის, იქნებ ქურუმებმა ღმერთების ნება გადასცეს... ასეა თუ ისე, კარგად მოფიქრებული და, სხვათა შორის, დაბალანსებული რაციონი სახეზეა.
კათეტებსა და ჰიპოტენუზას შორის ურთიერთკავშირის დადგენასთან ერთად პითაგორა ისტორიას ფილოსოფიური სკოლის დამაარსებლის სახელითაც შემორჩა. თავის მიმდევრებს ელინი ბრძენი ცხოვრების ჯანსაღი წესის საფუძვლებს – ჭამის, სმისა და დასვენების სწორ თანაფარდობას უნერგავდა. პითაგორელები მკაცრ მცენარეულ დიეტას იცავდნენ და პარკოსნებზეც კი უარს ამბობდნენ. ლეგენდა მოგვითხრობს, როგორ ხდებოდნენ ტყის ნადირები ვეგეტარიანელები პითაგორასთან გასაუბრების შემდეგ (ძველი ბერძნები არც იუმორთან ყოფილან მწყრალად ).
სპარტული შეჭამანდის გასინჯვის შემდეგ სპარსეთის მეფე მიმხვდარა სპარტელთა სიმამაცისა და შეუპოვრობის საიდუმლოს: “ამის ჭამას ხომ სიკვდილი სჯობიაო”... მართლა ასე იყო თუ არა, ფაქტია, სპარტელი მეომრები მთელ ანტიკურ სამყაროში ამტანობით, ძალითა და სიმამაცით იყვნენ განთქმულნი. შვიდი წლიდან ბიჭები ყაზარმებში გადაჰყავდათ, სადაც სანახევროდ შიმშილობდნენ და საზრდო თავად უნდა მოეპოვებინათ (ან მოეპარათ), ზრდასრული მეომრების მთავარი საჭმელი კი სისხლიანი შეჭამანდი იყო – მას ღორის ხორცისა და ოსპისგან ხარშავდნენ და ძმრითა და მარილით აზავებდნენ. კერძი მაწიერი კი გამოდიოდა, მაგრამ გემო საზიზღარი ჰქონდა.
ვილჰელმ დამპყრობელს კი სულ სხვა საზრუნავი ჰქონია: ერთ დღეს აღმოაჩინა რომ მის უზარმაზარ სხეულს ვერც ერთი ცხენი ვეღარ ძრავდა და სასწრაფოდ შეუდგა შესაბამისი ზომების მიღებას: შეწყვიტა ჭამა და დაიწყო სმა… რა თქმა უნდა, ღვინისა. ამბობენ, რომ თავის დიეტას შეეწირა კიდეც – ცხენმა კი დაძრა, მაგრამ თავად ვეღარ შეიმაგრა თავი, ჩამოვარდა და სული განუტევა.

არჩენს თუ კლავს
მოლიერის ეპოქაში, თუ მისი პიესების მიხედვით ვიმსჯელებთ, ორად ორი წამალი სცოდნიათ: ოყნა და სისხლის გამოშვება, თუმცა მაშინდელი ექიმების სასახელოდ უნდა ითქვას, რომ შემწვარ-მოხრაკულისგან გაჩენილი კუჭის წყლული უწამლოდ, რძე-მცენარეული დიეტითაც მშვენივრად მოურჩინეს.  უცხიმო ყველი, მჟავე რძე, ხილ-ბოსტნეული და სუფთა ჰაერზე სეირნობა – ამ დანიშნულების წყალობით დრამატურგი მარტო წყლულისგან კი არა, ტუბერკულოზისგანაც განკურნებულა, სართად კი ჯანსაღი სახის ფერი და მშვენიერი ფიგურაც მიუღია.
ვერ ვიტყვით, რომ დიეტამ იდუმალ ლორდ ბაირონზეც ეგზომ კეთილისმყოფელი გავლენა მოახდინა. არისტოკრატულ ტრინიტი-კოლეჯში სწავლისას დონდლო და მსუქანა ყოფილა, მაგრამ, მიუხედავად კოჭლობისა, ფარიკაობისა და კრივის შესწავლა დაიწყო, ცურავდა, ჯირითობდა, შვიდ ჟილეტსა და პალტოში ჩატენილი კრიკეტსაც თამაშობდა, დღეში მხოლოდ ერთხელ ჭამდა, არც ხორცს ეკარებოდა და არც ლუდს. ერთი წლის შემდეგ უკვე ნეკნებს დაუთვლიდით, სახე კი პირდაპირ უბრწყინავდა და იდუმალი სიფითრით იზიდავდა ქალებს. მიღწეულ შედეგს თითქოსდა უნდა შეეჩერებინა ლორდი, მაგრამ არამცთუ თავი არ დაანება ვარჯიშს, რეჟიმი უფრო მეტადაც კი გაიმკაცრა: კვირაში სამჯერ თურქულ აბანოში დაიწყო სიარული, მხოლოდ ძმრიან წყალს სვამდა და ბრინჯს ჭამდა, შიმშილს კი თამბაქოს ღეჭვით ებრძოდა. ყოველივე ამის შემდეგ უბრალოდ გასაკვირია, რომ პოეტმა 37-ე დაბადების დღეს მიაღწია... მედიკოსებმა მაინც ვერ დაადგინეს, რომელმა სენმა იმსხვერპლა. გაკვეთისას აღმოჩნდა, რომ ტვინი, გული და ღვიძლი ნაადრევად ჰქონდა დაბერებული.

კაცი ვარ და ქუდი მხურავს
ავადმყოფური სიფითრე მოდიდან მალევე გავიდა და ჭირვეულმა მოდამ “ნამდვილ მამაკაცს” სულ სხვა მოთხოვნები წაუყენა. XIX საუკუნის ბოლოს მოკრივეები ხორცით, რძით, ღვინოთი და ლუდით საზრდობდნენ. კუნთები დღესაც მოდაშია. როკი-რემბო სტალონე ფორმას ხილის სალათით, სპაგეტით, ლობიოთი და იოგურტში გამომცხვარი ბადრიჯნით ინარჩუნებს.
კუნთები კუნთებად და არანაკლები გამოწვევა გვესროლა კოსმოსმა. მას შემდეგ, რაც გაგარინმა დედამიწას შემოუფრინა და არმსტრონგმა მთვარეზე ფეხი დადგა, ბუნებრივია, კოსმონავტების გამოკვების საკითხიც დადგა. თავდაპირველად საუკეთესო გამოსავალი საკვები აბები ეგონათ, ყველა აუცილებელ კომპონენტს რომ მიაწვდიდა ორგანიზმს და გრამ ნარჩენს არ დატოვებდა, მაგრამ ასეთი რამ ვერ გამოიგონეს. პირველი კოსმოსური სადილი გერმან ტიტოვს ერგო. ტუბებიდან სიამოვნებით თუ არა, ინტერესით მაინც გამოწუწნა სუპ-პიურე, ხორცის პაშტეტი და შავი მოცხარის წვენი. ოცდახუთსაათიანი ფრენის განმავლებაში ასე სამჯერ იტრაპეზა, მაგრამ მიწაზე დაშვებისთანავე იკივლა, ხალხი არა ხართ, რამე მაჭამეთ, სადაცაა შიმშილისგან გული წამივაო. მას შემდეგ კოსმოსურ მენიუში ბორშჩიც შევიდა, ღვეზელიც, კატლეტიც და ქათმის ფილეც. მეცნიერულად დაბალანსებული, ვიტამინებით გაძეძგილ საკვებს ერთადერთი ნაკლი აქვს – უგემურია. ეს რუსული ვარიანტია, ნასა კი თავის კოსმოსურ დიეტას არ ახმაურებს, თორემ ვინ იცის, იქნებ სასარგებლოსა და გემრიელის კომბინაციაც მოიფიქრეს...
 
არც ისე ახალი
თუ მოვინდომებთ, მრავალ თანამედროვე დიეტურ ახირებას საკმაოდ ღრმა ისტორიულ ფესვებს გამოვუძებნით. თუნდაც ასე პოპულარულ ანანასს, ცხიმების დაწვას რომ აბრალებენ. ეკატერინე II-ს კარისკაცს, გრაფ ზავადოვსკის, ეს ხილი ისე ჰყვარებია, რომ ყოველგვარი სახით მიირთმევდა და მისი დამწნილებაც კი მოიფიქრა. ჩვენი მტერ-მოყვარე მეზობლები ამტკიცებენ, დამჟავებული ანანასი ჩვენი გამოგონილიაო.
ანანასისა არ იყოს, საზღვარგარეთ დღეს ძალიან პოპულარულია დიეტა ნიახურის სუპით. ეს კერძი ცნობილი კურტიზანის მარკიზა დე პომპადურის საიდუმლო იარაღი ყოფილა. სპეციალურ აღმგზნებ წვნიანს ქალბატონი თურმე ტრიუფელების, ნიახურის, წიწაკისა და ნივრისგან ამზადებდა. მისი მეშვეობით მხოლოდ ფიგურას კი არ ინარჩუნებდა, უავგუსტოეს საყვარელს ლუდოვიკო XV-საც უღვიძებდა ვნებას და პაემანზე სათანადო ფორმაში ყოფნასაც ახერხებდა – თურმე ყოვლისშემძლე ფავორიტს სინამდვილეში სუსტი ჯანმრთელობა და, თავისივე აღიარებით, “ქათმის” ტემპერამენტი ჰქონია.
მომავალში ჩვენი დროის დიეტური ტენდენციების აღწერა თუ მოინდომეს, მათი მრავალფეროვნება და უკიდურესობები, სავარაუდოდ ძალიან დააბნევთ. ასე რომ, თვალები ფართოდ გაახილეთ და ყურადღებით ამოარჩიეთ. დიეტამ შეიძლება კიდეც მოგკლათ და კიდეც მოაგარჩინოთ. სხვა თუ არაფერი, ბაირონისა და მოლიერის მაგალითი თვალწინ გაქვთ.


წონის განსაზღვრის ფორმულები

სასურველი 90-60-90-ის მისაღწევად ზოგი შიმშილობს, ზოგი კი ქანცის გაწყვეტამდე ვარჯიშობს. არიან ისეთებიც, რომლებიც ორივე მეთოდს იდეალურად უხამებენ ერთმანეთს და დამატებით არც წონის დასაკლებ აბებზე გეტყვიან უარს. ერთი სიტყვით, სურვილი იყოს, თორემ კილოგრამებთან გამოთხოვების მეთოდი უამრავია.
     წონის დაკლების სურვილი რომ გაჩნდეს, სარკე და სასწორიც საკმარისია, მაგრამ ბევრი ამასაც არ სჯერდება და ზედმეტი წონის განსაზღვრის უფრო რთულ და მეცნიერულად დასაბუთებულ მეთოდს იყენებს.
    მოდი, გავეცნოთ მასის განსაზღვრის ყველაზე პოპულარულ და აპრობირებულ მეთოდებს. შემდეგ კი ერთად გადავწყვიტოთ, რომელი გამოგვადგება. 
ვაზუსტებთ BMI-ს
     ნორმალური წონის განსაზღვრის ფორმულებს შორის ყველაზე მოდური სხეულის მასის ინდექსი – Body Mass Index (BMI) გახლავთ. მისი გამოთვლა არც ისე რთულია: სხეულის წონა, აღებული კილოგრამებში, იყოფა სიმაღლეზე (სანტიმეტრებში), რომელიც კვადრატშია აყვანილი. რაც შეეხება ნორმას, მისი მაჩვენებლის განსაზღვრა ცოტათი რთულია, რადგან სხვადასხვა ქვეყანაში სხვადასხვა რიცხვია მიღებული. უმეტესად ეს რიცხვი 24,9-ს უდრის, თუმცა ფრანგი მიშელ მონტიაკი სილამაზეს, როგორც ჩანს, მკაცრად აფასებს – მიიჩნევს, რომ BMI 20-დან 13-მდეა ნორმა, 24-დან 29-მდე ჭარბ წონაზე მეტყველებს, ხოლო თუ თქვენი მასის ინდექსი 30-ს ასცდა, მეტისმეტად მსუქანი ბრძანდებით.  ამერიკელები ყველაზე დემოკრატიული ერი რომ არის, BMI-ს განსაზღვრის დროსაც კი ჩანს. მათი აზრით, თუ ეს რიცხვი 30-ზე ნაკლები აღმოჩნდა, სასურველია, დიეტა დაიცვათ და ივარჯიშოთ; 30-დან 40-მდე მკაცრი დიეტა არამცთუ სასურველი, აუცილებელიც კია, ხოლო თუ მაჩვენებელი 40-ს ასცდა, ენდოკრინოლოგს უნდა ეწვიოთ.
რას გვთავაზობს დებეიკი
    ამერიკელი მაიკლ დებეიკი ერთ-ერთი პირველთაგანია, ვინც გულის ტრანსპლანტაცია განახორციელა. ალბათ, იფიქრებთ, მიუხედავად უდიდესი დამსახურებისა, ამ სტატიაში მისტერ დებეიკის ადგილი არ უნდა იყოსო. ჩვენი ჟურნალის ამ გვერდზე სახელმოხვეჭილი ქირურგი სხვა მიზეზით მოხვდა. საქმე ის არის, რომ მანვე შეიმუშავა წონის განსასაზღვრი ცხრილი (იხ. ცხრილი ჟურნალში), რომელიც იმდენად ესთეტიკურ კრიტერიუმებს არ ეფუძნება, რამდენადაც გულ-სისხლძარღვთა სისტემის ფუნქციურ მაჩვენებლებს. მარტივად, საქმე ასეა: რაც უფრო მეტად აღემატება ზედა ზღვარს მიღებული მაჩვენებელი, მით უფრო მეტია გულ-სისხლძარღვთა სისტემის დაავადების რისკი.
     თუ დებეიკის ცხრილსა და ამერიკელების BMI-ს შორის პარალელს გავავლებთ, აი, რა აღმოჩნდება: თუ თქვენი მასის ინდექსი 30-ზე ნაკლებია, გულ-სისხლძარღვთა სისტემის პათოლოგიები არ გემუქრებათ.
მათემატიკის გაკვეთილი
     ცოტა არითმეტიკა და წონის გამოსათვლელი კიდევ ერთი ფორმულა, რომელსაც ვინმე ბარბარა ედელშტეინი გვთავაზობს, ათვისებული გვექნება. თავდაპირველად ვიღებთ წონას, რომელიც ნორმალური ნივთიერებათა ცვლის პირობებში გვექნებოდა: 45 კგ+1 კგ 150 სმ-ს აცდენილ ყოველ სანტიმეტრზე+0,5 კგ 25 წელს გადაცდენილ ყოველ წელიწადზე, ოღონდ არა უმეტეს 7 კგ-ისა. თუმცა ეს ყველაფერი როდია: თუ თქვენი წონა 90-ს აჭარბებს – კიდევ 4-7 კგ-ის, ხოლო თუ 100 კგ-ს ასცდით, კიდევ რამდენიმე კილოგრამის მიმატება მოგიწევთ.
მოდი, ყოველივე ეს ერთ მაგალითზე განვიხილოთ.
     50 წლის და 158 სმ სიმაღლის ქალბატონისთვის, რომელიც 90 კგ-ს იწონის, ფორმულა ასე წარმოგვიდგება: 45 კგ+1 კგX(158 სმ-150 სმ)+7 კგ+7 კგ+7კგ=74 კგ. შედეგად მივიღეთ ნორმალური წონა ხსენებული ასაკისა და სიმაღლის ქალისთვის, რომელსაც, როგორც ჩანს, ჭარბი წონა აწუხებს.
 ვითვლით ცხიმს


     წონა ცხიმის ოდენობაზეც ყოფილა დამოკიდებული. ქალის ორგანიზმში ცხიმის პროცენტული შემცველობა უნდა იყოს არანაკლებ 18-ისა და არა უმეტეს 25-ისა. მამაკაცებს ეს მაჩვენებელი უფრო დაბალი აქვთ: 12-დან 18-მდე. სპეციალისტთა აზრით, იდეალური წონის მქონე ქალის ორგანიზმში ცხიმი სხეულის მასის 22%-ს შეადგენს.
    ცხიმის შემცველობის განსაზღვრა შინაურ პირობებში შეუძლებელია, თუმცა მრავალ სამედიცინო ცენტრში თქვენთვის სასურველ სერვისს უთუოდ შემოგთავაზებენ და სულ მილიგრამებში აწონიან ავადსახსენებელ ცხიმოვან მასას.
     თუ სპეციალურმა აპარატურამ დაადგინა, რომ ჭარბი ცხიმის მფლობელი ბრძანდებით, გულს ნუ გაიტეხთ. რაციონალურად შედგენილი დიეტის წყალობით (ცილები – 20%, ცხიმები – 30%, ნახშირწყლები – 50%) პროცენტული მაჩვენებელი მალე მიუახლოვდება სასურველ რიცხვს.

მოდური დიეტა

ეს ჭირვეული ქალბატონი მხოლოდ სილამაზის სტანდარტებს კი არ გვიწესებს, მათი მიღწევის გზებსაც თვითონვე არჩევს. გახდომის მანია დროდადრო ეპიდემიასავით მოედება ხოლმე საზოგადოებას. ჩვენც გადავწყვიტეთ, პოპულარული დიეტები შეგვეფასებინა, ოღონდ – ჯანმრთელობასა და საღ აზრთან დამოკიდებულების თვალსაზრისით.

პირველი–მეორე
ეს მშვენიერი მეთოდი მისი შემქმნელის ჰერბერტ შელტონის სამშობლოში უკვე დიდი ხანია დაივიწყეს, ჩვენში კი დანაწევრებული კვება ჭარბ წონასთან 
ბრძოლისა და ფორმის შენარჩუნების ერთ–ერთ ყველაზე პოპულარულ მეთოდად რჩება. ნებადართულია ყველაფერი, ოღონდ სხვადასხვა დროს და ცალ–ცალკე: კარტოფილი კატლეტის გარეშე, პური უკარაქოდ. თუ ორი რამის ერთად დაგემოვნება მოინდომეთ, მოგიწევთ გაარკვიოთ, როგორი დამოკიდებულება აქვთ მათ ერთმანეთთან. მერე რა, თუ თეორია უკვე ას წელს ითვლის, მეცნიერებმა კი მისი ფაქტობრივი დასაბუთება ვერ მოიპოვეს! ისე კი, თუ ჩვეული სადილის ნაცვლად მხოლოდ და მხოლოდ ბოსტნეულის სუპს დასჯერდებით, მეორეს ვახშმად შეექცევით, გარნირს კი სულაც მეორე დილისთვის შემოინახავთ, ჭარბ (და არა მარტო ჭარბ) წონას პოზიციების დათმობა ნამდვილად მოუწევს.
ღირსებები: დანაწევრებული კვების მიმდევრებს ჭარბი წონა მართლაც არ აწუხებთ, თანაც თუ რაციონი ჭკვიანურად არის შედგენილი, არც სასარგებლო ნივთიერებების დანაკლისს განიცდიან. ისე, თუ პროდუქტების ურთიერთდამოკიდებულების გაზვიადებულ და გამოგონილ სირთულეებს გამოვრიცხავთ და არც რძისა და პარკოსნების უმიზეზო ათვალწუნებას მივაქცევთ ყურადღებას, შეიძლება დანაწევრებული კვება სრულფასოვან დაბალკალორიულ დიეტამდე დავიყვანოთ, ამ უკანასკნელს კი მეცნიერები ურჩევენ ყველას, ვისაც მინიმუმ 150 წელი სიცოცხლე სურს.
ნაკლოვანებები: ქრონიკულად და გამუდმებით გშიათ, უცნაური, თითიდან გამოწოვილი წესების დაცვა გიწევთ, ორგანიზმი შერეულ საკვებთან გამკლავების უნარს კარგავს და დიეტიდან ნებისმიერ გადახრაზე მტკივნეულად რეაგირებს.

მხსნელი აბები
ჯადოსნური ელექსირის რწმენა ჩვენთვის ისეთივე ეროვნული თვისებაა, როგორიც სიზარმაცე, ამიტომაც გასახდომ პრეპარატებს მოდიდან გამოსვლა კიდევ დიდხანს არ ემუქრება. არალეგალურად თუ ნახევრად ლეგალურად შემოტანილ საშუალებებსა და კოქტეილებზე სიტყვას აღარ გავაგრძელებთ; თუ მძაფრი განცდები გიტაცებთ, საკუთარი ჯანმრთელობა და სიცოცხლე კი კაპიკადაც არ გიღირთ, შეგიძლიათ გამოსცადოთ კიდეც. შედარებით უსაფრთხოდ შეიძლება გახდომა ჯანდაცვის სამინისტროს მიერ სერტიფიცირებული საშუალებებით, მაგრამ ისინი მხოლოდ ორნაირია. პირველი სახის პრეპარატები საკვებიდან ცხიმების სრულყოფილ შეწოვას უშლის ხელს, მეორე კი ტვინში მადის ცენტრზე ზემოქმედებს. შეგახსენებთ: ეს საშუალებები მხოლოდ და მხოლოდ გონივრული დიეტის ეფექტს აძლიერებს, მისი სავსებით შეცვლა კი არ ძალუძს.
ღირსებები: სპეციალური პრეპარატები წონის დაკლებას მართლაც უწყობს ხელს.
ნაკლოვანებები: არავინ იცის, რას მოგიტანთ მათი გამოყენება 20–30 წლის შემდეგ – ასეთი დაკვირვების შედეგი არ არსებობს. თანაც “გახდომის კურსის” დასრულების შემდეგ წონა ბრუნდება.

კურანტების ნოსტალგია
“კრემლის”  დიეტამ ელვის სისწრაფით აირბინა რეიტინგის ზემოთა საფეხურებზე და ცოტა ხანში ბებერ შელტონსაც გამოაძევებს. დიეტოლოგები გაკვირვებას ვერ მალავენ: იდეა არც ახალია და არც ორიგინალური.
 “რევოლუცია დიეტოლოგიაში” (არ ვაჭარბებთ, სწორედ ასე დაარქვა ამერიკელმა ექიმმა ატკინსმა ნაშრომს ამ დიეტის შესახებ) გასული საუკუნის 70–იან წლებში მოხდა და მას შემდეგ უამრავი მიმდევრის წონა და ჯანმრთელობა შეიწირა (ავი ენები იმასაც კი ამბობენ, თვით საწყალი ატკინსიც საკუთარ რეკომენდაციებს გადაჰყვაო). რევოლუციური იდეა დიდი რაოდენობით ცილისა და ცხიმის მიღებას გულისხმობს (ესე იგი, ხორცი, კვერცხი, ყველი იმდენი მიირთვით, რამდენიც გენებოთო), ნახშირწყლები კი, მას თუ დავუჯერებთ, სრულებით არ არის საჭირო. ეს იმას ნიშნავს, რომ მხოლოდ ტკბილეულზე როდი მოგიწევთ უარის თქმა, ეგზეკუცია ხილს, ბოსტნეულს (მცირე გამონაკლისების გარეშე), ბურღულეულს და მრავალ სხვა პროდუქტსაც ეხება. ნახშირწყლების უკმარისობის გამო (ისინი კი ჩვენი ორგანიზმისთვის ენერგიის ძირითადი წყაროა) ცხიმის მარაგი იწვის.
კრემლის აქტივისტები სწორედ ამ დიეტის რუსიფიცირებულ ვარიანტს გვთავაზობენ. დღიური რაციონის გამოსათვლელი ქულებიც 100 გ პროდუქტში ნახშირწყლების შემცველობას გულისხმობს. 
ღირსებები: ამ დიეტით აუცილებლად გახდებით, თანაც საკმაოდ სწრაფად...
ნაკლოვანებები: ...ოღონდ საკუთარი ჯანმრთელობის ხარჯზე. თანაც მხოლოდ ფიზიკური კი არა, სულიერისაც – ტვინს ნახშირწყლები სჭირდება, ამიტომაც ცილოვანი დიეტის დროს უარესდება ყურადღება, მეხსიერება, გუნება–განწყობა. ცხიმების სიჭარბის გამო ღვიძლი იჩაგრება, ცილების გამო კი თირკმელები. ყველა სიკეთესთან ერთად, ამ დიეტაზე დიდხანს (კვირაზე მეტხანს) ყოფნა არასდიდებით არ შეიძლება, მისი შეწყვეტის შემდეგ კი წონის აკრეფა გარდაუვალია.

მხოლოდ შენ ერთს
ვაშლისა თუ კეფირის დიეტა ჩვენი საბჭოთა წარსულის გარიჟრაჟზეც საკმაოდ პოპულარული იყო. იმხანად ესტრადის ვარსკვლავებიც და უბრალო ფეიქრებიც ასე ხდებოდნენ. კაცმა არ იცის, რატომ მოგვეძალა ასე ძალიან ეს თეთრი ნოსტალგია (კეფირი იქნება ეს, არაჟანი, იოგურტი თუ მაწონი)... შეგვიძლია ვივარაუდოთ, რომ კეფირული ეიფორია მალე ჩაცხრება, მის ნაცვლად კი სხვა გაუგონარი და მშიერი მონოდიეტა წამოტივტივდება. არჩევანი დიდია: ბრინჯის, ბანანის, შვრიის...
ღირსებები: წონის დაკლება გარდაუვალია.
ნაკლოვანებები: ასევე გარდაუვალია მისი ხელახლა აკრეფა კეფირით (არაჟნით, მაწვნით...) თვითგვემის დამთავრების შემდეგ. თავისთავად ამ შესანიშნავი პროდუქტის ღირსებებზე არვინ დავობს, მაგრამ ასეთი დიეტა აბსოლუტურად შეუთავსებელია ჯანსაღ ცხოვრებასთან. სხვა საქმეა, თუ კვირაში მხოლოდ ერთ განტვირთვის დღეს მოიწყობთ.

“სისხლიანი” გახდომა
ამ დიეტის ავტორები მარტივ, თუმცა საკმაოდ უცნაურ რეკომენდაციებს გვთავაზობენ: პირველი ჯგუფის სისხლის მქონენი თურმე მონადირეთა შთამომავალნი ყოფილან და მათ რაციონში ხორცი უნდა ჭარბობდეს; თუ თქვენს ძარღვებში მეორე ჯგუფის სისხლი ჩქეფს, მიწათმოქმედი წინაპრები გყოლიათ, ამიტომ თქვენთვის საუკეთესო საკვები მინდვრებისა და ბოსტნების მოსავალია; მესამე ჯგუფში მოხვედრილებს კი ბედმა ყველაზე მეტად გაუღიმათ: თურმე მომთაბარე ტომების ჩამომავალნი ბრძანებულან, ამიტომ მათთვის ყველაფერია დასაშვები. ასეთივე იღბლიანები არიან ყველაზე “ახალგაზრდა” და გამოუცნობი მეოთხე ჯგუფის წარმომადგენელნიც.
საკმაოდ ორიგინალური იდეაა, თუმცა მისი მეცნიერული დასაბუთება ჯერ ვერ ხერხდება.
ღირსებები: თქვენ წარმოიდგინეთ, ზოგიერთი ამ გზით მართლაც იკლებს.
ნაკლოვანებები: იძულებული ხართ, დაუსაბუთებელ და ზოგჯერ საღ აზრს სრულიად მოკლებულ რჩევებს აჰყვეთ. თანაც უკვე მრავლად მოიძებნება ხალხი, ვინც ყველა რეკომენდაცია სკრუპულოზურად შეასრულა, შედეგად კი... გასუქდა.

კვლავ თქვენი იმედი გაქვს, მსიე!
კვების ფრანგი მაესტროს რეიტინგი ოდნავ დაეცა, თუმცა მისი დიეტა კვლავ მყარად ინარჩუნებს ადგილს ტოპ ათეულის ზედა სტრიქონებში. მონტინიაკმა პირველად ამცნო გასუქების გზაზე შემდგარ კაცობრიობას გლიკემიური ინდექსის შესახებ და აჩვენა, რომ ტკბილეული, ცომეული, შემწვარი კარტოფილი და რაფინირებული პროდუქტები (გაწმენდილი ბრინჯი, სწრაფად მოსამზადებელი ფაფები) კარგი ფიგურის მოსისხლე მტრები არიან. მათი გლიკემიური ინდექსი ძალიან მაღალია, დანაყრების განცდა, რომელსაც ეს პროდუქტები გვიჩენს, დიდხანს არ გასტანს. ეს იმას ნიშნავს, რომ ტორტის ნაჭრით გამგელებულ მადას ვერ დააწყნარებთ და ცოტა ხნის შემდეგ კვლავ დაიწყებთ სასუსნავის ძებნას. ცხიმებს მაღალი გლიკემიური ინდექსი არ აქვთ, თუმცა არც მათი მიღებაა მაინცდამაინც სასურველი. 
ღირსებები: თუ სწორად დაიცავთ, მონტინიაკის სისტემა შეუცდომლად მუშაობს. ასეთი დიეტა ორგანიზმისთვის მართლაც სასარგებლოა.
ნაკლოვანებები: განაჩენი სამუდამო პატიმრობას ითვალისწინებს; მარჯვნივ ან მარცხნივ ერთი ნაბიჯით გადაცდომაც კი თქვენს თეძოებზე დაუყოვნებლივ აისახება. თანაც აკრძალვა უამრავია. განა რამდენი ჩვენგანი გაძლებს ტკბილეულის გარეშე?..

ჩამოვსხდეთ... დიეტაზე
დიეტა ცხიმების ნაკლები შემცველობით ნელ–ნელა, მაგრამ მყარად იკიდებს ფეხს და სულ უფრო და უფრო მეტ თაყვანისმცემელს იძენს, ეს კი იმას ნიშნავს, რომ გახდომის მოსურნეთა შორის საღი აზრი თანდათან იმარჯვებს.  ჩვენი ორგანიზმის ცხიმოვანი მარაგი საკვები ცხიმების უზომო მოხმარების გამო იზრდება, ასე რომ, მათი შემცირება მოგიწევთ. არც ტკბილეულით გატაცებაა მიზანშეწონილი – ისინი ცხიმების ჩალაგებას უწყობს ხელს. არავითარი აკრძალვა, ნებადართულია ყველაფერი: ტორტი, ნამცხვარი, ლორიც კი, – ოღონდ ცოტ-ცოტა და მაძღარ კუჭზე. ყველაზე შესაფერისი საკვებია რძის უცხიმო და რძემჟავა პროდუქტები, ბოსტნეული, ბურღულეული, პარკოსნები, პური, ხილი, მჭლე ხორცი, უცხიმო თევზი.
ღირსებები: ეს ნებისმიერი ორგანიზმის ოცნებაა. რაკი წონა სწრაფი ნახტომებით არ იკლებს, შედეგის სტაბილურობა მეტ–ნაკლებად გარანტირებულია. კვებითი ჩვევების შეცვლა თითქმის არ მოგიწევთ, ამიტომაც დიეტის დაცვა საკმაოდ ადვილია.
ნაკლოვანებები: სწრაფი ეფექტის იმედი ნუ გექნებათ; კილოგრამები შედარებით ნელა (თვეში 1–4 ცალი) ტოვებს ორგანიზმს, მაგრამ სამაგიეროდ, სამუდამოდ ქრება. 


დიეტა ნაოჭების წინააღმდეგ


სახის კანი ერთგვარი სარკეა იმისა, რამდენად მშვიდ ან მღელვარე ცხოვრებას ეწევი, რამდენად სუფთა ჰაერით სუნთქავ და რაც მთავარია, რამდენად ჯანსაღად იკვებები.
     უფლებას ვიტოვებთ, მხოლოდ უკანასკნელი პუნქტის გამოსწორებაში დაგეხმაროთ.
     ექიმები (უმთავრესად – დერმატოლოგები და დიეტოლოგები) მიიჩნევენ, რომ ნაოჭების პირველი მტერი ის საკვებია, რომლებიც ანტიოქსიდანტებით (C, E და A ვიტამინებით, სელენითა და ომეგა-3-ით) არის მდიდარი. ამჯერად თქვენ და თქვენს მშვენიერ კანს სწორედ სამდღიან ანტიოქსიდანტურ დიეტას გთავაზობთ.
     გაითვალისწინეთ: დიეტა ბრიტანულია და, შესაბამისად, ბრიტანელების გასტრონომიულ მოთხოვნილებათა მიხედვით არის შედგენილი: ჯერ – საუზმე, შემდეგ – ლანჩი, ნაშუადღევს – წახემსება და ბოლოს (დაახლოებით 7 საათისთვის) – სადილი.

პირველი დღე
საუზმე
იოგურტი ნუშითა და კენკრით: ერთ ჭიქა (დაახლოებით 120 გ) იოგურტს შეურიეთ იმავე მოცულობის კენკრა, დაამატეთ 1-2 სადილის კოვზი გატარებული ნუში ან ნიგოზი და ბოლოს – 2 სადილის კოვზი ხორბლის ღივი (თუ, რა თქმა უნდა, გაქვთ).
ენერგეტიკული ღირებულება – 360 კალორია.
ლანჩი
ინდაურის ხორცის ბურგერი ქამა სოკოთი და ყვავილოვანი კომბოსტოთი (500 კალორია): მოამზადეთ ჩვეულებრივი ზომის ბურგერი, სასურველია, ინდაურის ხორცისა, თუმცა შეგიძლიათ, მჭლე ჰამბურგერიც მიირთვათ. დაამატეთ თხლად დაჭრილი პომიდორი, მოშუშული სოკო და ერთი სადილის კოვზი კეტჩუპი. სასურველია, ბურგერს მოშუშული ყვავილოვანი კომბოსტო მიატანოთ.
ნაშუადღევს
ნახევარი მანგო ან ერთი ნაჭერი ნესვი ნახევარ ჭიქა უცხიმო ხაჭოსთან ერთად (180 კალორია)
სადილი
ორთქლზე შემწვარი ორაგული (ფაქტობრივად, ჩვენებური მწვადი) სატაცურითა და კარტოფილით. თქვენი ულუფაა ორაგულის საშუალო ზომის ფილე ნახევრად შემწვარ კარტოფილსა და სატაცურთან ერთად. ამ უკანასკნელის მაგ

ივრობას ისპანახი და ყვავილოვანი კომბოსტოც გაგიწევთ (560 კალორია).

მეორე დღე
საუზმე

ომლეტი და გახუხული პური (350 კალორია): ზეითუნის ზეთში ერთად მოშუშეთ ნახევარი ჭიქა თხლად დაჭრილი ნიორი და ბულგარული წიწაკა, დაამატეთ კვერცხი და წვით, ვიდრე გვერდები არ დაებრაწება.
ლანჩი
თინუსი (500 კალორია): საშუალო ზომის თევზს დაამატეთ ერთი სადილის კოვზი მაიონეზი, დანაყილი ნიორი და ახალდაფქული შავი პილპილი. ეს ყოველივე პურის ორ ფენაში შეახვიეთ და ერთად გახუხეთ. შემდეგ ზედა ფენა ააცალეთ, თევზზე დააწყვეთ პომიდვრის რამდენიმე თხელი ნაჭერი და უცხიმო ან ნაკლებცხიმიანი ყველი და შედგით ღუმელში, ვიდრე ყველი დნობას არ დაიწყებს. თინუსის მაგივრად შეგიძლიათ ორაგული გამოიყენოთ.
ნაშუადღევს
ერთი ვაშლი, მსხალი ან კივი. შეიძლება გარგარის ჩირიც (200 კალორია).
სადილი
შემწვარი წიწილი კარტოფილსა და ყვავილოვან კომბოსტოსთან ერთად (580 კალორია): შეწვით წიწილის თეთრი ხორცი (გულის ჩანათალი) ორ ჩაის კოვზ ზეითუნის ზეთში, დაჭყლეტილ ნიორსა და სუნელებში (ისინი თავად შეარჩიეთ), მოუწყვეთ შემწვარი კარტოფილი და მოშუშული ყვავილოვანი კომბოსტო.

მესამე დღე
საუზმე
ხაჭო გარგარითა და თხილით (350 კალორია): ერთი ჭიქა ხაჭო თეფშზე გადმოიღეთ, ზემოდან დააწყვეთ ორი (შეგიძლიათ ოთხიც) ცალი უკურკო გარგარი და მოაყარეთ ორი სადილის კოვზი წვრილად დაჭრილი თხილი. გარგრის მაგივრობას ნახევარი ჭიქა ნებისმიერი კენკრა ან ნახევარი მანგო გაგიწევთ, თხილის ნაცვლად კი შეგიძლიათ ნიგოზი ან ნუში გამოიყენოთ.
ლანჩი
სალათა  შემწვარ წიწილსა და კრევეტებთან ერთად (450 კალორია): სალათის ფურცლებზე დაალაგეთ ქათმის დაჭრილი ხორცი (ან კრევეტები) და მოაყარეთ 4-5 სადილის კოვზი დაფხვნილი ყველი.
ნაშუადღევს
ერთი ჭიქა კენკრა და 20 ცალი ნუში (220 კალორია)
სადილი
საქონლის ხორცი ბრინჯით (590 კალორია): ხორცი  დაჭერით, მოასხით 2 ჩაის კოვზი ზეითუნის ზეთი, მოაყარეთ პილპილი და მარილი (გემოვნებით). გარნირად ნახევარი ჭიქა ბრინჯი და ისპანახი შემოუწყვეთ.


დიეტა მოხდენილი ფიგურისთვის


გთავაზობს დიეტას, რომელიც დაგეხმარება, საგრძნობლად შეამცირო თეძოებისა და დუნდულების გარშემოწერილობა და თამამად გამოეწყო შენს საყვარელ მოტმასნილ ქვედაბოლოში.
      დიეტის არსი ასეთია: მაქსიმალურად ერიდე ცხიმს, ხოლო “შავ სიაში” მოხვედრილ პროდუქტებს სათოფეზეც არ გაეკარო.
      თუ მოინდომებ, ამ დიეტის მეშვეობით კვირაში 500 გრამიდან 1,5 კგ-მდე დაიკლებ. ცვლილება ყველაზე ადრე თეძოებს ეტყობა, ღაწვები და მკერდი კი, ფაქტობრივად, არ ხდება, ან, თუ შეთხელდა – ძალიან გვიან. ამგვარი დიეტით, რომელიც უჯრედისით არის დატვირთული,  შეგიძლია ცელულიტსაც შეუტიო და, რაც მთავარია, კალორიების დათვლა სრულებით არ დაგჭირდება.

      ნებადართულ პროდუქტთა სია: მჭლე ხორცი, უცხიმო თევზი, ბოსტნეული, პური, კარტოფილი, ბრინჯი, მაკარონი.

      “შავი სია”: ნაღების კარაქი, რძის ნაწარმი, მცენარეული ზეთი, თხილი, კაკალი, მზესუმზირა, ნამცხვრები, ტორტი, შოკოლადი, შემწვარი კერძები.

      შეიძლება: ჩაი, ყავა, წვენები, ხილი, ცოტა ალკოჰოლიც.

მედლის მეორე მხარე: ყველა დიეტას თავისი ნაკლოვანებები აქვს და არც ეს გახლავთ გამონაკლისი. მისი ნაკლი ის არის, რომ:
. შიმშილი ჭამის შემდეგ მალევე შეგაწუხებს.
. უცხიმო კერძები მაინცდამაინც გემრიელი არ არის. . ნახევარფაბრიკატებზე უარის თქმა მოგიწევს, შესაბამისად, კერძის მომზადებაზე მეტი დრო დაგეხარჯება.
. თეძოებისა და დუნდულებისთვის განკუთვნილი ვარჯიშის გარეშე სასურველ ეფექტს სწრაფად ვერ მიიღებ.
. უცხიმო დიეტა კანს აშრობს, ასე რომ, კანის მოსავლელად საგანგებოდ მოგიწევს მკვებავი კოსმეტიკური საშუალებების შეძენა.

 

თავდასხმა ცელულიტზე
     
ცელულიტი ის გახლავთ, რისიც ყველაზე მეტად ეშინია თანამედროვე თავმომწონე ქალბატონს. ამიტომაც არის, რომ მასთან საბრძოლველად სპეციალისტებმა უამრავი მეთოდი შეიმუშავეს. შეუტიეს მასაჟითაც, ძვირადღირებული ანტიცელულიტური კრემებითაც, ქირურგიული ხელსაწყოებითაც... მაგრამ ვერც ერთი მათგანი შედეგს ვერ გამოიღებს, თუ რაციონალურად არ ვიკვებეთ. ერთი სიტყვით, ვიცავთ დიეტას პირობითი სახელწოდებით “ძირს ცელულიტი!”, რომლის ძირითადი პრინციპებია:
. შეზღუდე მარილის, შაქრისა და ცხიმის მოხმარება.
. ნუ დალევ მეტისმეტად ბევრ წყალს.
. ერიდე ყავას, ალკოჰოლს, სამაგიეროდ, შეგიძლია კვირაში ორჯერ პირი ჭიქა ნატურალური წითელი ღვინით ჩაიტკბარუნო.
. მიირთვი რაც შეიძლება მეტი სალათა და ხილი. რის, რის და ამის საშუალებას სეზონი ნამდვილად მოგცემს.
. ერიდე საღებავებისა და კონსერვანტების შემცველ საკვებს.
. არ გაეკარო შაქრის შემცვლელებს.

ანტიცელულიტური დიეტის ნიმუში
საუზმე – ერთი ცალი მოხარშული კარტოფილი, ისპანახისა და პომიდვრის სალათი, ერთი ჭიქა ხილის წვენი
ლანჩი – 50 გ ჩირი, ვაშლი
სადილი – ბოსტნეულის წვნიანი, ბოსტნეულის სალათი კომბოსტოს მწნილით, მწვანე ჩაი
სამხარი – მჭლე თევზი, ფინიკი
ვახშამი – ჩაი, ხილფაფა, უხეშად ნაფქვი ხორბლის პური


ახალგაზრდობის ელექსირი

არსებობს დიეტა, რომელსაც ცოტა არ იყოს უცნაური სახელწოდება აქვს: გეროპროტექტორული დიეტა, – და ის, როგორც მისი შემქმნელები გვარწმუნებენ, კალორიებთან ერთად წლებსაც აქრობს.
     შეიძლება, ოდნავ ვაჭარბებდეთ, მაგრამ ფაქტია, რომ დიეტოლოგებმა მართლაც შეიმუშავეს კვების მეთოდიკა, რომელიც ორგანიზმს დაბერებისგან იცავს და სიცოცხლეს ახანგრძლივებს. თქვენ წარმოიდგინეთ, ამისთვის არავითარი ჯადოსნობა არ არის საჭირო. მარადიული ახალგაზრდობის საიდუმლო მარტივზე მარტივია: მიირთვით დაბალკალორიული და ამავე დროს სასარგებლო პროდუქტები. ეს არც ისე რთულია, თუმცა გარკვეულ ცოდნას მაინც მოითხოვს.

სასიამოვნო და სასარგებლო მსხვერპლშეწირვა
     იმაზე, რომ არ უნდა ვიშიმშილოთ, უკვე შევთანხმდით. ახლა ის გავარკვიოთ, რომელი საკვების ხარჯზე გამოვემშვიდობოთ ზედმეტ კილოგრამებს.
    დიეტოლოგებმა ბევრი იფიქრეს თუ ცოტა, ერთი ფრიად საინტერესო და სასარგებლო დასკვნა გამოიტანეს: საკვები რაციონი ზედმეტი ცხიმისა (ძირითადად ძეხვეულის, ნაღების კარაქისა და მეტისმეტად ცხიმიანი ხორცის ხარჯზე)  და სრ

ულიად უსარგებლო ნახირწყლოვანი პროდუქტისგან (ძირითადად ტკბილეულისგან) უნდა გავწმინდოთ. დიახ, სწორედ ზედმეტისგან და არა ყოველგვარისგან, რადგან ადამიანის ორგანიზმს ორივე საკვები ნივთიერება სჭირდება. ცხიმი დღიური კალორიების მხოლოდ 20%-ს უნდა შეადგენდეს. ეს დაახლოებით 2 ს`კ მცენარეული ზეთი ან 60 გ თხილეულია.
     ორგანიზმისთვის აუცილებელი საშენი მასალაა ცილები, რომელთა დღიური ნორმა 60 გრამს შეადგენს. სწორედ ამდენ პროტეინს მიიღებთ, თუ დღის განმავლობაში  300 გ ხორცს ან 2 ლიტრ რძეს მიირთმევთ.

დაითვალე კალორიები
     დიეტოლოგები მიიჩნევენ, რომ თავმოყვარე ქალბატონმა დღის განმავლობაში 1500 კკალ-ზე მეტი არამც და არამც არ უნდა მიიღოს. გამონაკლისი მხოლოდ მათთვის დაუშვეს, ვინც შედარებით მძიმე ფიზიკურ შრომას ეწევა – მათ უფლება, 1800 კკალ-ით ჩაიტკბარუნონ პირი.
     ეგებ 1500 კკალ მეტისმეტად ცოტა მოგეჩვენოთ, მაგრამ თუკი ენერგეტიკული მარაგის შესავსებად ისეთ პროდუქტებს მიირთმევთ, როგორიც ბურღული, ხორბლეული, ხილი და ბოსტნეულია, არაფერი გიშავთ, ფუნთუშების, ღვეზელებისა და კანფეტების მოყვარულებს კი დანაყრება ცოტა არ იყოს გაუჭირდებათ და ისე მიუკაკუნებენ 3000 კკალ-ს, ვერც კი შეამჩნევენ.

აიწონე
      აი კიდევ ერთი საიდუმლო, რომელიც დაგეხმარებათ, 40 წლის შემდეგაც ახალგაზრდულად გამოიყურებოდეთ: ე.წ. ბუნებრივი წონის 10-25%-ს შეელიოთ. ასე მაგალითად, თუკი 25 წლის ასაკში 170 სმ სიმაღლის შემთხვევაში 60-65 კგ-ს იწონიდით, რაც, თავისთავად ნორმას წარმოადგენს, 40 წლის შემდეგ ცოტათი – 55-58 კგ-მდე მოგიწევთ დაფერთხვა. როგორ? ისევ, და ისევ დღიური კალორაჟის შემცირების ხარჯზე. თუკი პირდაპირ 1500 კკალ-ზე გადასვლა თქვენი მოუსვენარი კუჭისთვის ტანჯვის ტოლფასია, შეგიძლიათ, 2000 კკალ-იდან დაიწყოთ და თანდათანობით სასურველ ციფრებამდე ჩამოხვიდეთ. ყველაფერს კი აჯობებს, დაბალკალორიულ დიეტას ორგანიზმი ახალგაზრდობიდანვე შეაჩვიოთ. ამისთვის დიდი გმირობის ჩადენა არ მოგიწევთ; უბრალოდ, ნუ გადაიტვირთავთ თავს ფუჭი კალორიებით: ერიდეთ გაზიან სასმელებს, ფუნთუშეულს, კრემიან ნამცხვრებს, კანფეტებს და მაინცდამაინც ნურც ნაყინს მიეძალებით.

ბერძნული დაბალკალორიული დიეტა 
    მსუბუქი ვახშამი – უცხიმო ხაჭო ან ყველი, ლიმონის წვენით შეკაზმული ბოსტნეულის სალათა, უკარაქო, უშაქრო და უმარილო ფაფა, ახალგამოწურული წვენი ან ასკილის ჩაი.
    სადილი – ბოსტნეულის სალათა თხილეულითა და მწვანილით, ბოსტნეულის წვნიანი, უცხიმო ხორცი სანელებლებით ან თევზი.
     ვახშამი – ბოსტნეული, დაუფქვავი ხორბლის ფაფა, რძე, სიტკბონაკლული ნამცხვარი.


დიეტური საფრთხე

გამოთვლილია, რომ სადღეისოდ 28000-ზე მეტი დიეტა არსებობს. წესრიგის მოყვარულმა ამერიკელებმა ისიც დაადგინეს, რომ მათ თანამემამულეთა 65 პროცენტი წელიწადში ერთხელ მაინც მოსინჯავს ხოლმე ახალ დიეტას.
იქნებ პოპულარობის საიდუმლო მათსავე ეფექტურობაში იმალება? რა მოგახსენოთ. სტატისტიკური მონაცემებით, დიეტაზე მყოფთა 98% მისი შეწყვეტის 
შემდეგ მხოლოდ დაკლებულ წონას კი არ აღიდგენს, ზედმეტსაც მიაყოლებს ხოლმე.
ისეთი ხალხიც არსებობს (უმთავრესად მანდილოსნები), რომელთაც ჯადოსნური დიეტის მიგნება და მისი დაცვა ცხოვრების წესადაც გაიხადეს. იმდენად ჯიუტად იბრძვიან საკუთარ წონას, რომ ასეთივე მონდომება რომ მოგვცა მთებს გადავდგამდით... და ხშირად არც კი ფიქრობენ, რამდენად შეესაბამება იდეა-ფიქსად ქცეული 49 თუ 53 კილოგრამი მათ სიმაღლეს ასაკს და რაც მთავარია მემკვიდრეობით-კონსტიტუციურ ტიპს. დიახ, ყველა ადამიანს თავისი იდეალური წონა აქვს და ის შეიძლება არ ემთხვეოდეს ჰოლივულის ტანკენარი ვარსკვლავებისა თუ პოდიუმის გაძვალტყავებული  დედოფლების პარამეტრებს. საერთო წონასთან დიდი მნიშვნელობა აქვს ცხიმის რაოდენობას (სპეციალური ფორმულებითა თუ ხელსაწყოებით ამის გამოთვლაც შეიძლება). ცნობილია ცხიმის შემცველობა ქალებში 20-22% უნდა იყოს, მამაკაცებში 12-15%. მეტი სასურველი ნამდვილად არ არის, მაგრამ არც ნაკლებია დიდი შეღავათი. ამას მოსდევს მენსტრუაციული ციკლის დარღვევა, კანის ნაადრევი დაბერება, თმის გაძლიერებული ცვენა, იმუნიტეტის დაქვეითება...
ასე რომ, სანამ ორგანიზმს საშინელ გამოცდას მოუწყობთ, გაარკვიეთ საერთოდ გჭირდებათ თუ არა წონის კორექცია. 
ჭარბი წონის დაკლება რაღა თქმა უნდა აუცილებელია, ოღონდ ამ შემთხვევაში მეთოდს და მიდგომას განსაკუთრებული მნიშვნელობა აქვს.
ზოგიერთი თვლის, რომ მკაცრი დიეტა განსაკუთრებით ეფექტურია. ეს წმინდა წყლის მითია. ასეთი დიეტები, ნახშირწყლების გამორიცხვის ხარჯზე წყალს გვაკარგინებენ. მოდიეტეც სწრაფად იკლებს წონაში და ბედნიერია, ჰგონია, საზიზღარი ცხიმისგან განთავისუფლდა. ცხიმი კი ძალიან ნელა იწვება, დიეტის შემდეგ კი ძალიან სწრაფად გროვდება. წონაც ცხადია მეტი ხდება, ვიდრე დიეტის დაწყებამდე იყო. მიზეზი უბრალოა: შიმშილობით გათანგული ორგანიზმი მძიმე დროის დადგომას გრძნობს და ხარჯვის ეკონომიურ რეჟიმზე გადადის. ნივთიერებათა ცვლა 10-30%-ით ნელდება, ე.ი კალორიებიც ნელა იწვება. გავა გარკვეული დრო და ძველ ჩვეულებებს დაუბრუნდებით, ორგანიზმს კი ასეთი სწრაფი გადაწყობა არ შეუძლია, კალორიებს კვლავ ძალიან ნელა წვავს და ახალი წარღვნისთვის (მორიგი დიეტისთვის) მარაგს წინასწარ ამზადებს.
ვინც წონის დასაკლებად არაერთხელ სცადა დიეტის დაცვა, აუცილებლად შეამჩნევდა, რომ წონის დაკლება ყოველ ჯერზე უფრო და უფრო რთულია. ორგანიზმი დიეტას როგორც ექსტრემალურ შემთხვევას ისე იმახსოვრებს და სულ უფრო და უფრო მეტად ეწინააღმდეგება.
ეს კიდევ არაფერი, ცოტა ხნის წინ ბრიტანელმა ექიმებმა დაამტკიცეს, რომ ცხიმი, რომელიც დიეტისთვის თავის დანებების შემდეგ გროვდება, ბევრად უფრო საშიშია ვიდრე პირვანდელი. წონის თანმიმდევრობით კლება და მომატება ცხიმის განლაგებას ცვლის. ახლად დაგროვილი ფენა კვლავ თეძოებსა და ბარძაყებს კი არ მიაკითხავს, არამედ მუცლის ღრუში, შინაგან ორგანოებთან ახლოს დისლოცირდება. ეს კი ძალიან სახიფათოა, რადგანაც ღვიძლსა და სისხლის ნაკადში შეუძლია გაჟონოს, ქოლესტარინის დონე ძალიან მოიმატოს, ეს კი ინსულტების განვითარების საშიშროებას ზრდის, ქოლესტერინის ნაწილი შეიძლება ნაღვლის ბუშტში დაკრისტალდეს და ქვების წარმოქმნას შეუწყოს ხელი.

ვიქცევით სწორად
არ გეგონოთ რომ ზოგადად დიეტების აკრძალვას გირჩევთ. ეს აუცილებელი და ძალიან სასარგებლო საშუალებაა. ოღონდ მხოლოდ მაშინ, თუ მასში ხანმოკლე  მკაცრ ეგზეკუციას კი არა, საერთოდ ცხოვრების წესის შეცვლას ვიგულისხმებთ.
გახსოვდეთ ჭარბი წონა ცხოვრების ხანმოკლე ეპიზოდი როდია, რომელიც გახდომის შემდეგ უკვალოდ გაქრება. როგორც უკვე აღვნიშნეთ, თუ შესაბამისი ზომები არმიიღეთ წონა დაბრუნდება და უწინდელსაც კი გადააჭარბებს. სამედიცინო თვალსაზრისით სიმსუქნე ქრონიკული დაავადება პროგრესირების ტენდენციით და “განკურნების“ შემდეგ ხშირი რეციდივებით. თუ წონის ნორმალიზაციის მეთოდიკა არ ითვალისწინებს მრავალწლიან შემანარჩუნებელ პროგრამას იგი დროებითი დადებითი შედეგისა (ესეც თუ გაგიმართლათ) და ხანგრძლივი მარცხისთვისაა განწირული.
 ასე რომ ზღვა არჩევანიდან თავად შეიმუშავეთ თქვენეული გეგმა. სხვადასხვანაირ დიეტებს ჩვენ თითქმის ყოველ ნომერში გთავაზობთ. ნელ-ნელა შეიცვალეთ კვებითი და გემოვნებითი ჩვევები, მოიწესრიგეთ კვების რეჟიმი, დრო გამონახეთ ფიზკულტურისა და აქტიური დასვენებისთვის... და, რაც მთავარია, ეს მთელი სიცოცხლე უნდა გაგრძელდეს. რადიკალურ ცვლილებებსა და ყოველგვარ სტრეს-თერაპიას აჯობებს, თანდათანობით გაატაროთ მნიშვნელოვანი ცვლილებები. ექიმების რჩევით ყველაზე უსაფრთხო და გამოცდილი მეთოდიკები კვირაში მხოლოდ 700-1000 გრამის დაკლებას გულისხმობს
თუმცა ზოგჯერ დამოუკიდებელმა მოქმედებამ სიფრთხილის ზომების დაცვის მიუხედავად შეიძლება მაინც გავნოთ. ამიტომაც სჯობს ექიმს მიაკითხოთ, თუ:
- წონა ნორმას 10 კგ-ით და მეტით აჭარბებს;
- გაწუხებთ მაღალი წნევა, შაქრიანი დიაბეტი, გულის რომელიმე დაავადება;
- წარსულში გქონდათ წონაში მატების გამოხატული და სწრაფი ეპიზოდები. (მაგალითად, სამ თვეში 20 კგ-ზე მეტი მოიმატეთ, ანდა  თვეში _ 7 კგ მაინც);
- გამოხატულია ცვლილებები მეორეული სასქესო ნიშნების მხრივ _ ჭარბთმიანობა ქალებში, ანდა სარძევე ჯირკვლების გადიდება მამაკაცებში;
- დარღვეულია მენსტრუაციული ციკლი;
- გაცხიმოვნებას ასიმეტრიული ხასიათი აქვს. მაგალითად, სხეული და სახე გასუქებულია, კიდურები კი წვრილი, ანდა თეძოებსა და დუნდულებზე ცხიმი მნიშვნელოვნადაა დაგროვილი, ხელები და მხრები კი შედარებით თხელია. 


« < 12 > »
TOP