ტანვარჯიში “ზარმაცებისთვის”

რას აღარ აკეთებენ ქალები ზედმეტი კილოგრამების დასაკლებად და ფორმების გასაუმჯობესებლად. მათი მთავარი “იარაღი” დიეტაა, მაგრამ საუკეთესო შედეგის მისაღწევად, დიეტოლოგებიც დაგვეთანხმებიან, კვების რაციონის შეცვლა არ კმარა. მას, ვისაც აერობიკისა და შეიპინგის მკვეთრი და სწრაფი მოძრაობები არ ხიბლავს, შეუძლია, სხეულის დასახვეწად ალტერნატიულ და არანაკლებ ეფექტიან მეთოდს მიმართოს, რომელსაც კალანეტიკა ჰქვია.

სპეციალისტების განმარტებით, კალანეტიკა ვარჯიშთა კომპლექსია, რომელიც სხეულში ღრმად მდებარე კუნთებს ჭიმავს. ეს არის ერთგვარი ნელი ტანვარჯიში, რომელიც კოლოსალურ სტატიკურ დატვირთვას ახდენს სხეულზე. ამ მეთოდით ერთსაათიანი დატვირთვა შვიდსაათიან შეიპინგსა და ოცდაოთხსაათიან აერობიკას უტოლდება. თითოეული ვარჯიში ისეა შემუშავებული, რომ სხეულის ყველა კუნთს ერთდროულად ამუშავებს. ვარჯიშთა ეს სისტემა მათთვისაა ზედგამოჭრილი, ვინც მშვიდ, ნაკლებად მოძრავ ვარჯიშებს ამჯობინებს. გარდა ამისა, კალანეტიკა სხეულსა და გონებას შორის ჰარმონიის დამყარების არაჩვეულებრივი საშუალებაცაა. ის დაგეხმარებათ, ტრავმების გარეშე მისცეთ სხეულს საუკეთესო ფორმა.

კლანეტიკის სპეციალისტებს მიაჩნიათ, რომ თუ ამ მეთოდით რეგულარულად ვივარჯიშებთ, ადვილი შესაძლებელია, დავიკლოთ წონა, დავიხვეწოთ ფორმები და მოვიწესრიგოთ პრობლემური ზონები, გავიუმჯობესოთ ნივთიერებათა ცვლა, ტონუსში მოვიყვანოთ კუნთები და ბოლომდე დავეუფლოთ საკუთარ სხეულს.

 

როგორ მოქმედებს კალანეტიკა

ვარჯიშთა ეს კომპლექსი იოგას ასანებზე დაფუძნებული 29 სტატიკური ვარჯიშისგან შედგება. მისი მეშვეობით შეიძლება ვავარჯიშოთ და ფორმაში მოვიყვანოთ მთელი სხეული, მისი ყველა ნაწილი, რომელიც სრულყოფას მოითხოვს, მათ შორის – ბარძაყები, დუნდულები, მკლავები, მხრები, მუცლის პრესი და ზურგი. კალანეტიკას ხშირად უწოდებენ “ტანვარჯიშს უხერხული პოზებით” და ამ გამოთქმას მართლაც აქვს საფუძველი: ვარჯიშების შესრულების დროს მოვარჯიშე ისეთ პოზებს იღებს და ისეთ მოძრაობებს აკეთებს, ყოველდღიურ ცხოვრებაში რომ ვერსად შეხვდებით. სწორედ ეს პოზები აიძულებს ამუშავებას იმ კუნთებს, რომლებიც “ძილს” არიან მიჩვეული. მაგალითად, მკერდის კუნთების დატვირთვის გარეშე მკერდის ფორმის გაუმჯობესება შეუძლებელია, თუმცა ამ კუნთების ამოძრავება ყოველდღიურ ცხოვრებაში არც ერთ ქალს არ სჭირდება და, შესაბამისად, არც აზრადაც მოუვა.

იგივე შეიძლება ითქვას წელზეც: შეუძლებელია წელის დაწვრილება შესაბამისი კუნთების გაუვარჯიშებლად.

ასეთი მიძინებული კუნთები ყველა ჩვენგანს აქვს. დროთა განმავლობაში მათ ადგილს, როგორც წესი, ცხიმოვანი ქსოვილი იკავებს. საკმარისია, ყველა მათგანი ავამოქმედოთ და შედეგიც არ დააყოვნებს: სათანადო ვარჯიშის წყალობით სუსტი კუნთები გაძლიერდება და ქონს განდევნის. კალანეტიკის ვარჯიშების სისტემატური შესრულების შედეგად კუნთები განსაზღვრულ ეტაპამდე ვითარდება და სხეულს ზედმეტი ძალისხმევის გარეშე ანიჭებს მოხდენილ კონტურს.

 

ცოტა რამ ვარჯიშების ავტორზე

როგორც ფიტნესმეთოდიკა, კალანეტიკა 60-იანი წლებში გაჩნდა. მისი ავტორი ამერიკელი მოცეკვავე კალან პინკნია. ის უამრავი დაავადებით დაიბადა: ხერხემლის გამრუდებით, მენჯ-ბარძაყის დისპლაზიით... ფეხებიც კი სხვადასხვა სიგრძისა ჰქონდა და შვიდი წლის განმავლობაში უწევდა სპეციალური ბრეკეტების ტარება კოჭლობის პრევენციისთვის. მკურნალობამ შედეგი გამოიღო და მონდომების, ოპტიმიზმისა და შრომისმოყვარეობის წყალობით კალან პინკნი ბალერინაც კი გახდა. თუმცა მას შემდეგ, რაც მსოფლიოს გარშემო თერთმეტწლიანი მოგზაურობის შემდეგ შინ დაბრუნდა, ახალგაზრდა მოცეკვავე მიხვდა, რომ ჯანმრთელობა სერიოზულად ჰქონდა შერყეული, განსაკუთრებული საფრთხე კი მის ზურგსა და ხერხემალს ემუქრებოდა. ქალი ბედს არ დანებდა და შექმნა ვარჯიშთა საკუთარი სისტემა, რომლის მეშვეობითაც არა მხოლოდ თავად აღიდგინა ჯანმრთელობა, არამედ მსოფლიოს მასშტაბით ათასობით ქალს მისცა აღნაგობის დახვეწისა და სხეულის გაჯანსაღების შანსი.

მეთოდიკის მთავარი მიზანი წონის დაკლება არ არის, მაგრამ თუ რეგულარულად ივარჯიშებთ, ასეთი შედეგი თავისთავად დადგება. კალანეტიკის კომპლექსში შემავალი ვარჯიშები აჩქარებს მეტაბოლიზმს, ორგანიზმში ცხიმის დაგროვება ნელდება, კუნთოვანი მასა კი იზრდება. შესაძლოა, სხეულის მასამ არ მოიკლოს, რადგან კუნთოვანი ქსოვილი ცხიმოვანზე მძიმეა, მაგრამ გარეგნობა შესამჩნევად დაგეხვეწებათ და გარდერობის შეცლაც კი მოგიწევთ. თავად კალანეტიკის ავტორი კალან პინკნი ცოცხალი მაგალითი გახლდათ იმისა, რაოდენ ეფექტურია აღნიშნული მეთოდით ვარჯიში. უკვე საკმაოდ ასაკოვანი, სამოცდაათ წელს გადაცილებული ქალბატონი იმდენად კარგ ფორმაში იყო, რომ ნებისმიერ გოგონას შეშურდებოდა. ის სიცოცხლის ბოლომდე ძალზე ახალგაზრდულად გამოიყურებოდა და ამასაც კალანეტიკას და რეგულარულ ვარჯიშს მიაწერდა. მისი თქმით, ათიოდე ერთსაათიანი დატვირთვა საკმარისი იყო, რომ ქალს თვალსა და ხელს შუა ჩამოეკლო ათი წელი.

“ამ ვარჯიშების წყალობით ერთსა და იმავე დროს იღებთ სიამოვნებას, იხვეწთ აღნაგობას და ახალგაზრდავდებით”, – ამბობდა ქალბატონი კალანი.

სხვათა შორის, სწორედ კალანეტიკის წყალობით მოიყვანა მშობიარობის შემდეგ თავი შესაშურ ფორმაში ბრიტანეთის დედოფლის უმცროსმა რძალმა, ჰერცოგინია იორნა სარამ, რომელიც ფართო წრეებში ფერჯის სახელითაა ცნობილი.

 

რაშია კალანეტიკის წარმატების საიდუმლო და ვისთვის არის განკუთვნილი ეს ვარჯიშები?

ტანვარჯიშისა და ფიტნესის სხვა სახეობებისგან განსხვავებით, კალანეტიკა არ მოითხოვს ტრენაჟორებით აღჭურვილ სპორტდარბაზს, სპეციალურ სპორტულ კოსტიუმსა და ფეხსაცმელს. ამ ვარჯიშების შესრულება ნებისმიერ ჩვენგანს შინაც შეუძლია თავისუფალ და მოხერხებულ სამოსში. გარდა ამისა, კალანეტიკა, ერთი მხრივ, მშვიდი და აუჩქარებელი ტანვარჯიშია (ამიტომაც უწოდებენ მას ტანვარჯიშს ზარმაცებისთვის), მეორე მხრივ კი, როგორც ზემოთ აღვნიშნეთ, ვარჯიშის დროს კუნთებზე კოლოსალური ინტენსივობის დატვირთვა მოდის, რაც განსაზღვრავს კიდეც მეთოდის ეფექტურობას.

კალანეტიკის სტატიკური ვარჯიშები კუნთების მიკროშეკუმშვებზეა გათვლილი. ხტუნვას, კიდურების სწრაფ და ენერგიულ მოძრაობებს აქ ვერ ნახავთ, თუმცა ყოველი პოზა ისეა დაგეგმილი, რომ მოძრაობაში მოჰყავს სხეულის ყველაზე ღრმა და უმოძრაო კუნთები. მიუხედავად იმისა, რომ კალანეტიკის ვარჯიშები სტატიკურია, ამ დროს გაცილებით მეტი კალორია იწვება, ვიდრე ხტუნვისა და სირბილის დროს. შესაბამისად, წონის კლებაც გარანტირებულია. ამასთან, კალანეტიკა ნიჭიერ მოქანდაკესავით ნელ-ნელა და თანმიმდევრულად აქანდაკებს თქვენს სხეულს: მკერდი მაღლა იწევს, მუცელი მკვრივდება, თეძოები და დუნდულები მრგვალდება და თავადაც გაოცდებით, ისე სწრაფად ხდება ეს.

კალანეტიკა ფიგურის კორექციისა და ტონუსში ყოფნის არაჩვეულებრივი საშუალებაა მათთვის:

*             ვისაც სურს, დაიკლოს წონა და გაიუმჯობესოს აღნაგობა;

* არ შეუძლია სწრაფი და ენერგიული ვარჯიშების შესრულება, რადგან აქვს ქოშინი და აწუხებს გული;

* არ უყვარს ხანგრძლივი და ქანცის გამწყვეტი ვარჯიშები;

* არ უყვარს სპორტდარბაზში სიარული;

* ურჩევნია ვარჯიშების მშვიდად, ნელ ტემპში შესრულება.

დაბოლოს, კალანეტიკის კიდევ ერთი უპირატესობა ის არის, რომ ამ ვარჯიშების შესრულება ნებისმიერი ასაკის ადამიანს შეუძლია. მთავარია, შესაბამისი ჯანმრთელობა ჰქონდეს.

 

ვისთვის არ შეიძლება კალანეტიკა

ისევე, როგორც ფიტნესისა და ტანვარჯიშის სხვა სახეობებს, უკუჩვენებები კალანეტიკასაც აქვს და ამას სათანადო ყურადღება უნდა მივაქციოთ.

გაგაცნობთ იმ დაავადებებსა და მდგომარეობებს, რომელთა დროსაც კალანეტიკის მეთოდით ვარჯიში სასურველი არ არის.

* კალანეტიკა არ შეიძლება მათთვის, ვინც ახლახან გადაიტანა ქირურგიული ოპერაცია. აღნიშნული ვარჯიშების შესრულება ოპერაციიდან მხოლოდ ერთი-ერთნახევრი წლის შემდეგაა ნებადართული.

* მან, ვისაც მხედველობასთან დაკავშირებული პრობლემები აწუხებს, აუცილებლად უნდა გაიაროს კონსულტაცია ექიმთან, რომელიც შეაფასებს მდგომარეობას და ეტყვის, შეიძლება თუ არა მისთვის ამა თუ იმ ვარჯიშის შესრულება.

* კალანეტიკა კატეგორიულად ეკრძალებათ ასთმური დაავადებებისა და ჰემოროიდული კვანძების მქონე ადამიანებს.

* მას, ვისაც ვარიკოზული დაავადება აწუხებს, ეკრძალება იმ ვარჯიშების შესრულება, რომლებიც ფეხის კუნთების გასამკვრივებლადაა განკუთვნილი.

 

რჩევები მათთვის, ვისაც სურს, ხელი მოჰკიდოს კალანეტიკას

* შეასრულეთ მხოლოდ ის ვარჯიშები, რომლებიც ხელგეწიფებათ. ნუ დააძალებთ სხეულს, აკეთოს ის, რისთვისაც მზად არ არის.

* კარგი იქნება, თუ ვარჯიშებს სარკის წინ შეასრულებთ. ასე უკეთესად შეამჩნევთ შეცდომებს და უსუფთაოდ შესრულებულ მოძრაობებს.

* უმჯობესია, ივარჯიშოთ სრულ სიჩუმეში ან მშვიდი, კლასიკური მუსიკის ფონზე – ასე უკეთესად მოახერხებთ კონცენტრირებას.

* ნუ შეშინდებით, თუ თავდაპირველად კი არ დაიკლებთ, არამედ მოიმატებთ წონას. გახსოვდეთ, ნავარჯიშევი კუნთი უფრო მეტს იწონის, ვიდრე მოშვებული. გახსოვდეთ ისიც, რომ, მიუხედავად წონის მომატებისა, ზომები აუცილებლად შემცირდება, მერე და მერე კი წონის კლებაც შესამჩნევი გახდება.

* დაბოლოს, ვარჯიში აუცილებლად კვალიფიციურ ინსტრუქტორთან ერთად დაიწყეთ. უკიდურეს შემთხვევაში, შეიძინეთ ვიდეოკურსი და ყურადღებით მოუსმინეთ თითოეულ ინსტრუქციას. დაუთმეთ ვარჯიშს კვირაში სამი დღე, დღეში თითო საათი. შედეგით უთუოდ კმაყოფილი დარჩებით.