გისურვებთ ჯანმრთელობას და სულიერ სიმშვიდეს!

სიახლეები

10.05.2016
ყოველ სამშაბათს, ოთხშაბათს და პარასკევს 25%–მდე ფასდაკლება მედიკამენტებზე...

  1. სამედიცინო თემები >
  2. გინეკოლოგია


რა იწვევს უნაყოფობას

უნაყოფობა დღეს ბევრს აწუხებს. ზუსტი სტატისტიკური მონაცემებით განთქმულ ამერიკაში წყვილთა10-15% უნაყოფოა.
თითქოს ადვილი მისახვედრია, რას უნდა გულისხმობდეს ტერმინი “უნაყოფობა” – დაორსულების უნარის უქონლობას. მიუხედავად მარტივი დეფინიციისა, ექიმები ამ დიაგნოზის დასმას არ ჩქარობენ. თურმე წყვილი უნაყოფოდ მხოლოდ მაშინ შეიძლება ჩაითვალოს, თუ დაორსულება ერთწლიანი დაუცველი სქესობრივი კავშირის შემდეგაც ვერ მოხერხდა.
აღმოჩნდა, რომ წყვილების უმრავლესობა მოსალოდნელი დედობისა და მამობის შესახებ დაქორწინებიდან (ან უბრალოდ რეგულარული სქესობრივი 
ცხოვრების დაწყებიდან) 6 თვის განმავლობაში იგებს, 85% – ერთი წლის განმავლობაში, ხოლო 50%-ს ამ სასიხარულო ამბავს შეუღლებიდან სამი წლის განმავლობაში აცნობებენ.
მიუხედავად ასეთი სტანდარტისა, შეუღლებულ წყვილთა უმრავლესობა რამდენიმეთვიანი უნაყოფო თანაცხოვრების შემდეგ საგონებელში ვარდება, ვაითუ შვილი არ გვეყოლოსო. იწყება კვალიფიციური გინეკოლოგის ძებნა, ვიზიტის დანიშვნა...
სინამდვილეში კი სანერვიულო არაფერია. ყოველ შემთხვევაში, უახლოესი ერთი წლის მანძილზე მაინც. მეტ-ნაკლები ყურადღება (რაც ნერვიულობას და წამდაუწუმ ექიმთან სირბილს არამც და არამც არ ნიშნავს!) მხოლოდ მაშინ არის საჭირო, თუ ქალმა 30 წელს გადააბიჯა და ბოლო ხანს მენსტრუაციული ციკლის დარღვევა (მაგალითად, ამენორეა – მენსტრუაციის გაქრობა) აღენიშნება, ასევე – თუ ქალს წლობით ტანჯავდა მენსტრუაციული ციკლის დარღვევა, მენჯის ტკივილის სინდრომი, ენდომეტრიოზი, მცირე მენჯის ღრუს ორგანოების ანთებითი დაავადება ან სულაც რამდენჯერმე გადაიტანა სპონტანური აბორტი (მუცელი მოეშალა). ექიმთან კონსულტაციას გირჩევთ მაშინაც, თუ მამაკაცს ჰიპოსპერმია ანუ სპერმატოზოიდების რაოდენობის სიმცირე აღმოაჩნდა, ასევე მაშინ, თუ სქესობრივი გზით გადამდები დაავადება, სათესლეების ან წინამდებარე ჯირკვლის რომელიმე პათოლოგია აქვს გადატანილი.
წლების, ათწლეულების და ლამის საუკუნეების მანძილზე ითვლებოდა, რომ უშვილობა მხოლოდ ქალის ბრალი იყო. არავინ იცის, ქალთა ემანსიპაციამ შეცვალა საზოგადოებრივი აზრი თუ სამედიცინო ტექნოლოგიები დაიხვეწა, მაგრამ დღეს მიიჩნევა, რომ უნაყოფობაში მამრსა და მდედრს ბრალი თითქმის თანაბრად მიუძღვით. უფრო ზუსტად, ათიდან 2 შემთხვევაში უნაყოფოა მამაკაცი, 4-5 შემთხვევაში – ქალი, ხოლო 3-4 შემთხვევაში – ორივე.

რატომ, რატომ?..
რატომ არ უჩნდება ქალს შვილი? ამის მიზეზი მრავლად შეიძლება მოიძებნოს. მათ შორის აღსანიშნავია:
კვერცხსავალი მილების დაზიანება-დახშობა. ამგვარ არასასურველ ცვლილებებს ფალოპის (კვერცხსავალი) მილების ანთებითი დაზიანება იწვევს: ვითარდება შეხორცებები, რაც სპერმატოზოიდებს კვერცხუჯრედისკენ მიმავალ გზას უღობავს. ანთებას და მილების ამომფენი ლორწოვანის დაზიანებას კი სქესობრივი გზით გადამდები დაავადებები იწვევს.
თუ სპერმატოზოიდმა იყოჩაღა, დაბრკოლებათა მიუხედავად კვერცხუჯრედამდე მიაღწია და გაანაყოფიერა, შესაძლოა საშვილოსნოსგარე ორსულობა განვითარდეს. ამის მიზეზიც მილში არსებული დაბრკოლებებია, რომელთა გადალახვა და საშვილოსნოს ღრუში ჩანერგვა განაყოფიერებულ კვერცხუჯრედს უჭირს.
ენდომეტრიოზი. ამ დაავადების დროს საშვილოსნოს ამომფენი გარსის ნაფლეთი უადგილო ადგილას გადაიტყორცნება ხოლმე: შესაძლოა, საკვერცხემდე მიაღწიოს ან სულაც ფალოპის მილში გაძვრეს და მუცლის ღრუში აღმოჩნდეს. სადაც არ უნდა ამოყოს თავი ენდომეტრიუმის ნაწილმა, ის ისევე იმოქმედებს, როგორც ჰორმონებმა “დააპროგრამეს”: თვეში ერთხელ აშრევებასა და სისხლდენას იწყებს. ამ არასასურველი ცვლილებების შედეგად ვითარდება იმ ორგანოს ანთება, რომელშიც გზააბნეული ქსოვილი იბუდებს. ენდომეტრიოზის ძირითადი ნიშანი მენჯის არეში აღმოცენებული ტკივილია, რაც უყურადღებოდ არ უნდა დაგრჩეთ.
ოვულაციის დარღვევა. კვერცხუჯრედი საკვერცხიდან ყოველთვე ამოიტყორცნება. ამ პროცესს თავის ტვინში სინთეზირებული (ფოლიკულმასტიმულირებელი, მალუთეინიზებელი) ჰორმონები აკონტროლებენ. თუ მათი ბალანსი დაირღვა, ვეღარც ოვულაცია განხორციელდება ჯეროვნად. პრობლემის თავიდათავი, თავის ტვინში მოთავსებული ჰიპოთალამუს-ჰიპოფიზის (სწორედ აქ წარმოიქმნება ზემოხსენებული ჰორმონები) ფუნქციის მოშლის მიზეზი, შესაძლოა იყოს ტრავმა, სიმსივნე, მეტისმეტი ფიზიკური დატვირთვა, შიმშილობა ან უმკაცრესი დიეტა. რიგი მონაცემის თანახმად, ოვულაციის დარღვევა შესაძლოა ზოგიერთი მედიკამენტის მიღებამაც გამოიწვიოს. 
ჰიპერპროლაქტინემია. ეს იმ ჰორმონის სიჭარბეა, რომელიც ლაქტაციას – რძის წარმოქმნას – ასტიმულირებს. ორსულობისა და ძუძუს წოვებისას პროლაქტინის დონის მატება ნორმალურია, სხვა შემთხვევაში კი ოვულაციის პროცესის დარღვევას იწვევს.
ჰიპერპროლაქტინემიას რამდენიმე მიზეზი აქვს. მათ შორის – ჰიპოფიზის სიმსივნე, ზოგიერთი მედიკამენტის მიღება. საზოგადოდ, ძუძუდან რძის ჟონვა (რაღა თქმა უნდა, არა ორსულობისა და მით უმეტეს ლაქტაციის პერიოდში) პროლაქტინის დონის მომატების მაჩვენებელია. 
საკვერცხეების პოლიკისტოზი. ამ შემთხვევაში დამნაშავეა სხვა ჰორმონი – ანდროგენი. ამ დროსაც ოვულაციის პროცესი ირღვევა. საზოგადოდ, საკვერცხეების პოლიკისტოზი სიმსუქნესა და დიაბეტთან არის დაკავშირებული.
ადრეული მენოპაუზა, რაც მენსტრუაციის 40 წლამდე გაქრობას ნიშნავს. როგორც კვლევებმა აჩვენა, გარდა გენეტიკური განწყობისა, ციკლის ადრეულ გაქრობას იწვევს იმუნური სისტემის ზოგიერთი დაავადება, რადიაცია, ქიმიოთერაპია, სიგარეტის წევა.
საშვილოსნოს ფიბრომა. ამ დროს საშვილოსნოს კედელში კეთილთვისებიანი სიმსივნე ჩნდება. ის სხვადასხვა ლოკალიზაციისა და ზომისაა. შესაძლოა, კვერცხსავალი მილის სანათურს ფარავდეს, არც სპერმატოზოიდებს უშვებდეს დანიშნულების ადგილას და არც განაყოფიერებულ კვერცხუჯრედს – საშვილოსნომდე. ამ პათოლოგიის შესახებ ვრცლად ჩვენი ჟურნალის 63-ე ნომერში მოგიყევით. 
ფარისებრი ჯირკვლის პრობლემები. არ აქვს მნიშვნელობა, თირეოიდული ჰორმონის გამოყოფის სიჭარბე (ჰიპერთირეოზი) იქნება ეს თუ მისი დეფიციტი (ჰიპოთირეოზი) – მენსტრუაციული ციკლი ორივე შემთხვევაში ირღვევა, რაც, თავის მხრივ, უნაყოფობას იწვევს. 
ზოგიერთი მედიკამენტი. ჩასახვის საწინააღმდეგო აბები, თავისთავად, იმისთვის არის შექმნილი, რომ ქალი არასასურველი ორსულობისგან დაიცვას, მაგრამ არსებობს სხვა ჯგუფის წამლები, რომლებიც ასევე ახდენენ გავლენას რეპროდუქციულ ფუნქციაზე. საკმარისია, ქალმა მათი მიღება შეწყვიტოს, რომ შვილოსნობის უნარი აღუდგება. 
სიმსივნე და მისი თერაპია. როცა კიბო ქალის რეპროდუქციული სისტემის რომელიმე ორგანოზეა, უნაყოფობის პრობლემა ხშირად იჩენს თავს. ნაყოფიერებაზე რადიაციული და ქიმიური თერაპიაც ძლიერ გავლენას ახდენს.
სხვა მიზეზებიდან აღსანიშნავია კუშინგის დაავადება, ნამგლისებრუჯრედოვანი ანემია, თირკმელების ზოგიერთი დაავადება, ზოგჯერ დიაბეტიც.

რას ვრისკავთ
არსებობს ფაქტორები, რომლებიც ხელს უწყობს უნაყოფობის ჩამოყალიბებას. ესენია:
ასაკი. 32 წლის შემდეგ მხოლოდ ნაყოფიერების მაჩვენებელი კი არ იკლებს, არამედ იზრდება პირველმშობიარებში ნაყოფის ქრომოსომული პათოლოგიების ჩამოყალიბების ალბათობაც. სპონტანური აბორტის რისკიც იმატებს. აი, მამაკაცებში კი სხვაგვარადაა: მათი ნაყოფიერების მაჩვენებელი მხოლოდ 40 წლის შემდეგ იკლებს.
სიგარეტის წევა გავლენას ახდენს როგორც მამაკაცის, ისე ქალის ნაყოფიერებაზე. მუცელიც უფრო ხშირად იმ ქალებს ეშლებათ, ვინც მრავალი წელია ეწევა.
ალკოჰოლის მიღება. თუ მამაკაცი ზომიერად სვამს, ეს მის ფერტილობაზე არ იმოქმედებს, მაგრამ ქალებისთვის ჯერ ვერ დაუდგენიათ ალკოჰოლური სასმლის ნორმა, რომელიც მის რეპროდუქციულ ფუნქციაზე გავლენას არ მოახდენდა.
ჭარბი წონა. გამოთვალეს, რომ იმ ამერიკელ ქალებს შორის, რომლებსაც ჭარბი წონა აწუხებთ ან ჰიპოდინამიურ ცხოვრებას ეწევიან (ფიზიკურად არ იტვირთავენ თავს), უშვილობის შემთხვევები უფრო ხშირია. ჭარბი წონა თურმე მამაკაცთა ნაყოფიერებაზეც მოქმედებს. 
წონის დეფიციტი. თუ ქალს ნერვული ანორექსია აწუხებს ან დიდხანს იცავს მკაცრ დიეტას, ადვილი შესაძლებელია, უნაყოფობის პრობლემა გაუჩნდეს. ხშირია უნაყოფობა იმ ვეგეტარიანელებს შორისაც, რომლებიც მხოლოდ მცენარეულ საკვებს მიირთმევენ (ალბათ გაგიგონიათ, რომ ვეგეტარიანელებს შორისაც არის განსხვავება – ზოგიერთი მათგანი კვერცხსაც მიირთმევს და რძესაც). ამის მიზეზი ვიტამინ B12-ის, ფოლიუმის მჟავას, თუთიისა და რკინის დეფიციტი ყოფილა.
ჭარბი ფიზიკური დატვირთვა. თუკი კვირაში 7 საათზე მეტხანს ვარჯიშობთ, შესაძლოა უნაყოფობის პრობლემამ იჩინოს თავი. ასე რომ, ნურც გაზარმაცდებით და ნურც მეტისმეტად გაირჯებით. ოქროს შუალედი აქაც საჭიროა.
კოფეინის ჭარბი მიღება. უნაყოფობასთან კოფეინის კავშირს ყველა მეცნიერი არ აღიარებს, მაგრა მათ, ვინც ამ ურთიერთკავშირზე ლაპარაკობს, მიაჩნიათ, რომ  რისკი ნამდვილად იზრდება. ისინი ჭარბ კოფეინს სპონტანური აბორტის განვითარებაშიც სდებენ ბრალს.

ვამხელთ დამნაშავეს
უნაყოფობის დიაგნოზის დასმა თანამედროვე სამედიცინო ტექნოლოგიების საშუალებით ძნელი არ არის, მიზეზის დადგენა კი მართებული მკურნალობისთვის მეტად მნიშვნელოვანია. ხშირად სულ მცირე პრობლემის მოგვარებაც საკმარისია, რომ წყვილმა შვილის ყოლა შეძლოს.
ალბათ ხვდებით, რომ უნაყოფობის მიზეზის დასადგენად ქალიც და კაციც უნდა გამოიკვლიონ.
მას შემდეგ, რაც რამდენიმე “ქალურ” შეკითხვას დაუსვამს (მენსტრუაციის დაწყების თარიღის, ციკლის თავისებურებების შესახებ), გინეკოლოგი ქალს გამოკვლევებს ურჩევს. მათ შორის – ტესტს ჰორმონებზე, ლაპაროსკოპიულ, მენჯის ღრუს ულტრაბგერით გამოკვლევას, ჰისტეროსალპინგოგრაფიას... 
რაც შეეხება მკურნალობას, ის დიაგნოზზეა დამოკიდებული. ექიმი წყვეტს, ნაყოფიერების აღსადგენად მედიკამენტებია საჭირო, ქირურგიული ჩარევა თუ ერთადერთი გამოსავალი ხელოვნური განაყოფიერებაა.
დაორსულების მსურველ ქალს ხშირად ოვულაციის მასტიმულირებელი მედიკამენტის მიღება უწევს, რასაც რამდენიმე კვერცხუჯრედის მომწიფება და გამოტყორცნა მოჰყვება. თუ ყველა მათგანი განაყოფიერდა, ვითარდება მრავალნაყოფიანი ორსულობა. თუ წყვილს ტყუპის ყოლა პრინციპულად არ სურს (როგორც ჩანს, ამგვარი შემთხვევებიც არსებობს), შეუძლია, ულტრაბგერითი კვლევის საშუალებით აკონტროლოს მომწიფებული ფოლიკულების რაოდენობა და ჩასახვა მაშინ სცადოს, როდესაც გასანაყოფიერებლად მხოლოდ ერთი კვერცხუჯრედი იქნება მზად. 


საშვილოსნოს ფიბრომა

არსებობს დაავადებები, რომლებიც მხოლოდ ქალებს ემართებათ. ეს ბუნებრივიც არის – წარმოუდგენელია, მამაკაცს საშვილოსნოს რომელიმე პათოლოგია დაემართოს. ამ ღრუ ორგანოს, რომელიც ქალს დედობრივ ბედნიერებას აზიარებს, უამრავი პრობლემა აწუხებს. მათ შორის – ფიბროზული კვანძებიც,
რომლებსაც საუბარში საშვილოსნოს ფიბრომად იხსენიებენ. ლეიომიომა ან უბრალოდ მიომა – ეს ამ პათოლოგიის კიდევ ორი სახელწოდება გახლავთ.
საშვილოსნოს ფიბრომა კეთილთვისებიანი სიმსივნეა, რომელიც თითქმის არასდროს განიცდის ავთვისებიან გადაგვარებას. მას სხვადასხვა აქვს ზომა, ფორმა, რაოდენობა, ადგილმდებარეობა, ასე რომ, ერთ პატარა ღრუ ორგანოში თავისუფლად შეიძლება წამოყოს თავი როგორც ათეულობით წვრილ-წვრილმა, ბროწეულის მარცვლისოდენა წარმონაქმნმა, ისე ერთმა ან რამდენიმე ფორთოხლისხელა სიმსივნემ. და, წარმოიდგინეთ, მთელ ამ სიმსივნური ქსოვილის გროვას საშვილოსნოს ღრუ იტევს!
უფრო მძიმე მდგომარეობაც არსებობს: ფიბროზული ქსოვილი მხოლოდ საშვილოსნოს ღრუში კი არა, მის გარეთა ზედაპირზეც იზრდება. სოკოებივით წამოზრდილი ქსოვილის გროვები, განსაკუთრებით – არცთუ სავსებით მოკრძალებული ზომისა, ირგვლივ მდებარე ორგანოებს აწვება. წარმოიდგინეთ, რა მოხდება, როდესაც უზარმაზარი ფიბროზული კვანძი საშარდე ბუშტზე დაწოლას დაიწყებს!

სად უდევთ ბინა
ფიბროიდები შესაძლოა “დაბინავდნენ”:
. სუბმუკოზურად. ამ დროს სიმსივნური კვანძები საშვილოსნოს შიგნითა კედლიდან ამოყოფენ თავს და ღრუში იზრდებიან. სწორედ მათი ბრალია უხვი სისხლდენა, პრობლემები ორსულობის დროს.
. ინტრამურალურად ანუ უშუალოდ საშვილოსნოს კედელში, მის კუნთოვან შრეში. აქ ყველაზე უწყინარი კვანძები “ცხოვრობენ”.
. სუბსეროზულად ანუ საშვილოსნოს გარეთ. სწორედ ასეთი ფიბროიდებია, გარშემო მდებარე ორგანოებს რომ ავიწროებენ. სწორ ნაწლავზე ზეწოლისას ქალს შეკრულობა აწუხებს, ზურგის ტვინზე ზეწოლისას – ზურგის ტკივილი. ხშირად იჩაგრება შარდის ბუშტი – ასეთ დროს შარდვის გახშირება იჩენს თავს. ხდება ისეც, რომ სუბსეროზული კვანძი (ან კვანძები) მეტისმეტად დიდი ზომისაა და მუცლის წინა კედლისკენ არის მიმართული. ასეთ დროს ქალი ორსულს ემსგავსება.

ფიბროსტატისტიკა
ციფრებს თუ დავუჯერებთ, საშვილოსნოს ფიბროიდული კვანძები ლამის ყოველ მეორე ქალს აქვს, თუმცა უმრავლესობას არ აწუხებს და, შესაბამისად, არც კი იცის, რომ მისი საშვილოსნო სიმსივნური კვანძებით არის ამოვსებული.
სტატისტიკოსთა ნაწილს მიაჩნია, რომ ქალების 20-80%-ს ფიბროიდული კვანძები 50 წლამდე უჩნდება, ნაწილი კი ირწმუნება, საშვილოსნოს ფიბროზული გადაგვარება 4-დან 3 ქალს აღენიშნებაო. ექიმთა ნაწილი ფიქრობს, რომ  ეს პათოლოგია უმთავრესად 30-40 წლის ქალებისთვის არის დამახასიათებელი, ნაწილი კი სხვა რიცხვებს ასახელებს – 40-50 წელს. ერთადერთი, რაზეც არავინ დავობს, ის არის, რომ საშვილოსნოს ფიბრომა ნებისმიერ ასაკში შეიძლება გაჩნდეს.

რა იწვევს
საშვილოსნოს ფიბროზული გადაგვარების უშუალო მიზეზი უცნობია, თუმცა გამოიკვეთა რიგი ფაქტორი, რომლებიც ამ პათოლოგიის ჩამოყალიბებას უწყობს ხელს. მათ შორის:
გენეტიკა და მემკვიდრეობა. როგორც ჩანს, ადამიანი მემკვიდრეობით იღებს გენებს, რომლებიც საშვილოსნოს კუნთოვან შრეში ფიბროზული ქსოვილის ჩალაგებას უწყობს ხელს. თუკი რომელიმე ნათესავს (დედას, დას...) ეს დაავადება აქვს, საფრთხე სამჯერ მეტი ყოფილა.
ასაკი – ეს ის ფაქტორია, რომელზეც უკვე ვისაუბრეთ. დამატებით გეტყვით, რომ მენოპაუზის დაწყებისთანავე ფიბროზული კვანძები შეჭმუხვნას იწყებს და საშიში და შემაწუხებელი აღარ არის.
კანის ფერი. ხელშემწყობ ფაქტორად შეიძლებოდა მიგვეჩნია ეროვნებაც, მაგრამ კანის შეფერილობას უფრო მეტი მნიშვნელობა ჰქონია. შავკანიან ქალებს საშვილოსნოს ფიბროიდები უფრო ხშირად უჩნდებათ. ამასთანავე, ეს დაავადება აფროამერიკელებში გაცილებით ადრეულ ასაკში იჩენს თავს. კვანძებიც უფრო დიდია.
ჰორმონები. თავისთავად ცხადია, ეს ბიოლოგიურად აქტიური ნივთიერებები ორგანიზმისთვის ძალიან საჭიროა, მაგრამ მათი დონის ცვლილებამ შესაძლოა ჯანმრთელობაზე ნეგატიური გავლენა მოახდინოს. მაგალითად, ქალური ჰორმონები, ესტროგენი და პროგესტერონი, უშუალო გავლენას ახდენენ ზოგიერთი ქსოვილის ზრდაზე და ზოგჯერ შეცდომით ფიბროზული ქსოვილის ზრდის სტიმულირებასაც ახერხებენ.
მიუხედავად იმისა, რომ ჰორმონების სიჭარბე ფიბროიდების გაჩენასთან ასოცირდება, დამტკიცებულია, რომ კომბინირებული ორალური კონტრაცეპტივების (კოკ) მიღებისას ფიბრომის ჩამოყალიბების რისკი იკლებს. მაგრამ, სამწუხაროდ, არა ყველა ასაკში... კოკ-ები ფიბრომისგან ვერც იმ ქალებს დაიცავს, რომელთაც მათი სმა 13-დან 16 წლამდე ასაკში დაიწყეს.
ჭარბი წონა. რისკის ამ ფაქტორს მკვლევართა მხოლოდ ნაწილი აღიარებს. არსებობს მოსაზრება, რომ რაც უფრო მსუქანია ქალი, მით უფრო მეტია (დაახლოებით 2-3-ჯერ!) საშვილოსნოს ფიბრომის ჩამოყალიბების ალბათობა, თუმცა ზოგიერთი გამოკვლევა ამ მოსაზრებას სავსებით აბათილებს.
განსაზღვრული საკვები. შესაძლოა, უცნაური მოგეჩვენოთ, მაგრამ ზოგიერთი მეცნიერი ამტკიცებს, რომ დიდი რაოდენობით ხორცის ჭამა, განსაკუთრებით კი ლორისა, საშვილოსნოს კუნთოვანი შრის ფიბროზულ გადაგვარებას უწყობს ხელს. სამაგიეროდ, მწვანე ბოსტნეული ამ დაავადების პრევენციას ახდენს...

საშვილოსნოს ფიბრომის განვითარებაში ჰორმონების უდიდეს როლზე ისიც მეტყველებს, რომ ორსულობისას, ანუ მაშინ, როდესაც ჰორმონების დონე განსაზღვრული კანონზომიერებით იცვლება, ფიბროიდების წარმოქმნის ალბათობა იკლებს. საზოგადოდ, ორსულობა და მშობიარობა ამ დაავადების ერთგვარ პრევენციადაც კი შეიძლება მივიჩნიოთ. 

როგორ ვლინდება
არ არსებობს სპეციფიკური ნიშანი, ამ პათოლოგიაზე რომ მიუთითებდეს. ისეთი შემთხვევებიც არის, როდესაც საშვილოსნოს ფიბრომას არაფერი გვაეჭვებინებს. ზოგადი ნიშნები კი უმეტესად ასეთი გახლავთ:
. მენსტრუაციული ციკლის ცვლილებები, მათ შორის – ხანგრძლივი მენსტრუაცია უხვი გამონადენით, ციკლის შემოკლება (ანუ მენსტრუაციის გახშირება), ტკივილი მენსტრუაციის დროს, სისხლდენა მენსტრუაციებს შორის. ძლიერი სისხლდენა, როგორც წესი, ანემიას იწვევს.
. ტკივილი, უმეტესად – მუცლის ქვედა ნაწილში. ტკივილი ყრუც შეიძლება იყოს და ძლიერიც, მეტისმეტად მწვავეც.
ზოგიერთ ქალს ტკივილი არა, მაგრამ მუცლის ქვედა არეში ქაჩვის შეგრძნება აწუხებს.
ფიბრომაზე მეტყველებს სქესობრივი კავშირის დროს აღმოცენებული ტკივილიც.
. კუჭ-ნაწლავის პრობლემები: შეკრულობა, ნაწლავის დაცლის გართულება, ტკივილი სწორი ნაწლავის არეში.
. შარდვასთან დაკავშირებული პრობლემები: გახშირებული შარდვა, შარდვის გაძნელება.
. ღიპის გაჩენა, რასაც დიდი ზომის ფიბროზული კვანძების გამო საშვილოსნოს ზრდა იწვევს.
. უნაყოფობა ან მუცლის მოშლა.

ცხრათვიანი სტრატეგია
როგორ უნდა მოიქცეს ქალი, თუ საშვილოსნოში ფიბროზულ კვანძთან ერთად პაწია არსებამაც დაიდო ბინა? ექიმთა უმრავლესობა გვარწმუნებს, რომ ასეთი ორსულობა უმეტესად მშვიდობიანად ჩაივლის.
საზოგადოდ, დაორსულდება თუ არა ქალი და როგორ დასრულდება ორსულობა, სიმსივნური წარმონაქმნის ზომაზე, მდებარეობასა და რაოდენობაზეა დამოკიდებული.
შესაძლოა, ფიბროზული კვანძი ისეთ ადგილას იყოს ამოზრდილი, რომ ფალოპის (კვერცხსავალი) მილის შესასვლელს ფარავდეს. ამ შემთხვევაში სპერმატოზოიდებს ძალიან გაუჭირდებათ კვერცხუჯრედთან შეხვედრა (“პაემანი” ხომ სწორედ კვერცხსავალ მილშია დანიშნული!). თუ მამაკაცის სასქესო უჯრედმა ივაჟკაცა და განაყოფიერება მაინც მოხდა, განაყოფიერებულ კვერცხუჯრედს საშვილოსნომდე მისაღწევად დიდი დაბრკოლების გადალახვა მოუწევს. მაგრამ ვინაიდან ფალოპის მილი წყვილია, ერთის დახშობის შემთხვევაში მეორის შესასვლელი განაყოფიერებისთვის ღია რჩება.
განაყოფიერებული კვერცხუჯრედის  საშვილოსნოს ღრუში ჩანერგვას შესაძლოა ხელი სუბმუკოზურმა კვანძებმა შეუშალოს. არც ის არის გამორიცხული, ასეთმა წარმონაქმნებმა სპონტანური აბორტი, პლაცენტის აშრევება ან ნაადრევი მშობიარობა გამოიწვიოს. ზოგჯერ ნაყოფის არასწორ (მენჯით წინ) მდებარეობასაც ფიბრომას აბრალებენ.
სიმსივნური ქსოვილი, მიუხედავად კეთილთვისებიანი ბუნებისა, ორსულობისას ზოგჯერ იზრდება. ამას საშვილოსნოში სისხლის ჭარბი მოდენა იწვევს. ექიმები გვანუგეშებენ, რომ ასეთი ცვლილება ყოველთვის არ ხდება, მაგრამ თუ კვანძი მაინც გაიზარდა, მშობიარობის შემდეგ ისევ ადრინდელ ზომას დაიბრუნებს.
ორსულს, როგორც გითხარით, სანერვიულო არაფერი აქვს – სათანადო მონიტორინგის (ექიმის მეთვალყურეობის) შემთხვევაში ფეხმძიმობა ყოველგვარი გართულების გარეშე ჩაივლის. ერთადერთი, რაც ქალს აწუხებს, ტკივილია, რომელიც უმეტესად პირველი ტრიმესტრის დასასრულს და მეორის დასაწყისში იჩენს თავს. ტკივილის მოსახსნელად ექიმი ქალს ტკივილგამაყუჩებელ მედიკამენტს შეურჩევს.
იშვიათად სიმსივნური ქსოვილი სანაყოფე არხის გამოსასვლელს ფარავს და მშობიარობას ართულებს. ასეთ დროს (ვითარების შეფასება კი თანამედროვე დიაგნოსტიკური საშუალებების წყალობით სულაც არ არის ძნელი) ბუნებრივი გზით მშობიარობა სარისკოა და ექიმი ორსულს საკეისრო კვეთას ურჩევს.
თუ ფიბრომის გამო ქალს მუცელი მოეშალა, შესაძლოა, სპეციალისტმა ოპერაციის გაკეთება (სიმსივნური კვანძის ამოკვეთა) აუცილებლად მიიჩნიოს.

როგორ უნდა აღმოვაჩინოთ
ფიბროზულ კვანძს ქალი დამოუკიდებლად ვერაფრით აღმოაჩენს (ეს ხომ კანზე წამოსკუპებული ხალი არ არის!). ზოგჯერ ექიმსაც უჭირს საშვილოსნოს ფიბრომაზე ეჭვის აღება, მაგრამ შესაძლოა, მენჯის ორგანოების გამოკვლევისას შემთხვევით მოჰკრას თვალი. დიაგნოზის დასაზუსტებლად ქალს ურჩევენ:
. ულტრაბგერით გამოკვლევას (ექო), რომელიც შეიძლება ჩატარდეს როგორც მუცლის კედლის ზემოდან, ასევე საშოდან. ამ უკანასკნელს ტრანსვაგინალურ ექისკოპიას უწოდებენ. ის უფრო დეტალური ანალიზის საშუალებას იძლევა.
თუ ექოსკოპია ნაკლებად ინფორმაციული აღმოჩნდა, ექიმმა შესაძლოა სხვა გამოკვლევები გირჩიოთ, მათ შორის – ჰისტეროსონოგრაფია, ჰისტეროსალპინგოგრაფია (მართალია, რთული სახელები აქვთ, მაგრამ ჩათვალეთ, რომ საშვილოსნოსა და მისი დანამატების რენტგენს იღებთ), ჰისტეროსკოპია (სპეციალისტი ტელესკოპის მსგავსი პაწია ხელსაწყოთი საშვილოსნოს კედლებს დაათვალიერებს). ასევე ინიშნება კომპიუტერული ტომოგრაფია, მაგნიტურ-რეზონანსული გამოკვლევა.

საშვილოსნოს ფიბრომა კეთილთვისებიანი დაავადებაა და თითქმის არასოდეს განიცდის ავთვისებიან გარდაქმნას. ათასიდან ერთ ქალს თუ აღმოაჩნდება ავთვისებიანი ფიბროზული კვანძი. ასეთ კვანძებს ლეიომიოსარკომას უწოდებენ. სპეციალისტთა აზრით, ეს კვანძები დამოუკიდებლად წარმოიშვა, მათი წინაპარი კეთილზნიანი ქსოვილი არ ყოფილა. ისიც დამტკიცებულია, რომ საშვილოსნოში არსებული კეთილთვისებიანი ფიბროიდები ოდნავაც არ ზრდის ავთვისებიანი ფორმების წარმოშობის ალბათობას.

რა მოვუხერხოთ ფიბრომას
თუ ქალს ფიბროზული კვანძები აქვს და ძლიერი ტკივილი და სისხლდენა აწუხებს, მდგომარეობის შემსუბუქება აუცილებელია.
თუ ექიმმა საშვილოსნოს ფიბრომა შემთხვევით აღმოაჩინა და წარმონაქმნი არაფრით ამჟღავნებს საკუთარ არსებობას, არ იწვევს სისხლდენას, უნაყოფობას, შესაძლოა ქალს მკურნალობა არც კი დასჭირდეს. ერთადერთი, რასაც სპეციალისტი გირჩევთ, კვანძების პერიოდული კონტროლია იმის გასარკვევად, ხომ არ გაიზარდა ან გამრავლდა.
მკურნალობა ვითარების გათვალისწინებით ინიშნება (იმისა, რამდენად საშიშია კვანძი). ტკივილის შემთხვევაში ანთების საწინააღმდეგო არასტეროიდული მედიკამენტის მიღებაა მიზანშეწონილი. უმეტესად კი ექიმი ჰორმონულ პრეპარატებზე აჩერებს არჩევანს. მათ შორის აღსანიშნავია მედიკამენტი, რომელსაც მედიცინის ენაზე გონადოტროპინის გამომათავისუფლებელი ჰორმონის აგონისტი ეწოდება. ჰორმონული ბალანსის აღსადგენად ჩასახვის საწინააღმდეგო აბების დალევა ან პროგესტერონის ინექციის გაკეთებაც შეიძლება. აპრობირებული საშუალებაა სპირალიც, რომელიც ჰორმონს შეიცავს. ანემიის შემთხვევაში ექიმი რკინის პრეპარატების მიღებას გირჩევთ.
თუ მედიკამენტური თერაპია უშედეგო აღმოჩნდა, პრობლემა ოპერაციის საშუალებით უნდა მოგვარდეს.
ქირურგიული ჩარევის ყველაზე არასასურველი ფორმაა ჰისტერექტომია – საშვილოსნოს ამოკვეთა. შედარებით დამზოგველი გზაა მიომექტომია, რომლის დროსაც მხოლოდ ზედმეტ (ამ შემთხვევაში – ფიბროზულ) ქსოვილს ამოკვეთენ. ეს ოპერაცია რამდენიმენაირად ტარდება: ლაპაროტომიულად, ლაპაროსკოპიულად და ჰისტეროსკოპიულად. მეთოდის შერჩევა კვანძის მდგომარეობის, რაოდენობისა და სხვა მაჩვენებლების მიხედვით ხდება.
საშვილოსნოს ფიბრომასთან გამკლავების სხვა მეთოდებიდან აღსანიშნავია: მიოლიზი (მოწვა, მოყინვა), ენდომეტრიული აბლაცია (სისხლდენის შესაჩერებლად საშვილოსნოს ამომფენი გარსის დესტრუქცია), საშვილოსნოს მკვებავი არტერიის ემბოლიზაცია (სისხლძარღვი იბლოკება და ფიბროზული კვანძების სისხლით მომარაგება წყდება, რაც მათ შეჭმუხვნას იწვევს).


კონტრაცეფცია

ტერმინ “რეპროდუქციას” ბოლო ხანს სულ უფრო ხშირად იყენებენ. ეს არის ცოცხალი ორგანიზმის უნარი, თავისივე მსგავსი წარმოშვას. ადამიანებში რეპროდუქციის ათვლის წერტილი მამრისა და მდედრის სასქესო უჯრედების შეხვედრაა. ეს ფალოპის მილში ხდება, რომელიც აქეთ-იქიდან რქებივით ადგას საშვილოსნოს და რომელშიც ვარდება მომწიფებული კვერცხუჯრედი. თუ ამ უკანასკნელს ამაოდ არ მოუწია კვერცხსავალ მილში გამოცხადება და განაყოფიერება მოხდა, ორსულობა გარდაუვალია. ზოგჯერ, მიზეზთა გამო, კვერცხუჯრედისა და სპერმატოზოიდის პაემნის გადადებაა საჭირო. სწორედ ასეთ დროს მიმართავენ ჩასახვის საწინააღმდეგო საშუალებებს.
ორსულობისგან თავის დაცვას რამდენიმენაირად ახერხებენ:
• ხელს უშლიან სპერმას კვერცხუჯრედამდე მისვლაში;
• “განაიარაღებენ” ანუ აზიანებენ ან კლავენ სპერმატოზოიდებს;
• აფერხებენ კვერცხუჯრედის მომწიფებას;
• საშვილოსნოს ამომფენი გარსის სტრუქტურას იმგვარად ცვლიან, რომ განაყოფიერებულმა კვერცხუჯრედმა მასზე მიმაგრება ვერ შეძლოს;
• საშოს ლორწოს ასქელებენ, სქელი ლორწო კი, თავის მხრივ, სპერმის საშვილოსნოში შეღწევას უშლის ხელს.

ჩასახვის საწინააღმდეგო მეთოდის შერჩევა არცთუ იოლი საქმეა. ორგანიზმისთვის კონტრაცეპტივის მორგება განსაკუთრებით ძნელია ძუძუს წოვებისას, თინეიჯერულ და პერიმენოპაუზურ ასაკში (ამ დროს მენსტრუაციული ციკლი არარეგულარული ხდება).
ჩასახვის საწინააღმდეგო მეთოდები მეტ-ნაკლებად ეფექტურია. საუკეთესო ვარიანტია ორი მეთოდის ერთდროული გამოყენება მათ ნაკლოვანებათა შესავსებად. იდეალურია კომბინირებული ორალური კონტრაცეპტივების (კოკების) გამოყენება ბარიერულ მეთოდთან, მაგალითად, პრეზერვატივთან ერთად. ასე ორსულობისგანაც დაიცავთ თავს და სქესობრივი გზით გადამდები ინფექციებისგანაც.

შექმენი ბარიერი
უფრო სწორად, შეუქმენით ბარიერი ურჩ სპერმატოზოიდებს, რომლებიც კვერცხუჯრედის დასაპყრობად მიილტვიან. ამისთვის ბარიერული მეთოდის გამოყენება და პრეზერვატივის ანუ კონდომის (ქალის ან მამაკაცის), სპეციალური ღრუბლის, დიაფრაგმის, საშოს ჩაჩისა და სპერმიციდის გამოყენება მოგიწევთ. მათ შორის საუკეთესო, ორმაგად სასარგებლო ვარიანტი მაინცკონდომია, რომელიც არა მხოლოდ ორსულობისგან, სგგდი-სგანაც დაგიცავთ.
თუ მამაკაცი პრეზერვატივის გამოყენებაზე უარს ამბობს, ქალს თავად მოუწევს მდედრობითი სქესისთვის განკუთვნილი კონდომის გაკეთება, ოღონდ, მამაკაცური ვარიანტისგან განსხვავებით, მისი მორგება შეგიძლიათ არა უშუალოდ სქესობრივი კონტაქტის დროს, არამედ მანამდეც, დაახლოებით 8 საათით ადრე.
მეტი ეფექტურობისა და საიმედოობისთვის კონდომთან ერთად გირჩევთ სპერმიციდიც გამოიყენოთ. და კიდევ: ორივე სქესის პრეზერვატივის ერთდროული გამოყენება არ შეიძლება – ასე ისინი უთუოდ დაზიანდება.
სპერმიციდები გამოდის სანთლის, ქაფის, ჟელეს, კრემის სახით. ის საშოში სქესობრივი აქტის დაწყებამდე მცირე ხნით ადრე უნდა მოითავსოთ (ოპტიმალური დროის შესარჩევად გულდასმით ჩაიკითხეთ ინსტრუქცია) – ეს ის დროა, რაც სპერმიციდის გალღობას და გააქტიურებას სჭირდება.
მიზანშეწონილია სპერმიციდის გამოყენება სხვა ბარიერულ მეთოდებთან ერთად. გამონაკლისია ღრუბელი, რომელიც ამ ნივთიერებით გაჟღენთილი იყიდება.
გაითვალისწინეთ, რომ სპ

ერმიციდის ხშირი გამოყენება საშოს ნაზ ლორწოვანს აღიზიანებს, რაც მიკროტრავმების გაჩენისა და სგგდი-ს გავრცელების საშიშროებას ზრდის.
საშოს ღრუბელი სპერმას ეფექტურ ბარიერს უქმნის. გასააქტიურებლად ის საშოში მოთავსებამდე წყლით უნდა დაასველოთ. ღრუბელი შეგიძლიათ სქესობრივ აქტამდე რამდენიმე საათით ადრე მოითავსოთ საშოში და სექსის შემდეგ კიდევ 6 საათი დაიტოვოთ, ოღონდ ჯამში 24 საათზე მეტხანს ნუ გაიჩერებთ. ისიც გახსოვდეთ, რომ ერთი ღრუბელი რამდენიმე სქესობრივ აქტზე გეყოფათ.
დიაფრაგმა სქესობრივ აქტამდე დაახლოებით 6 საათით ადრე უნდა მოითავსოთ საშოში და ისევე, როგორც ღრუბლისგან, აქტიდან 6 საათის შემდეგ გათავისუფლდეთ. თუმცა დიაფრაგმის მორგება გაცილებით რთულია, ვიდრე ღრუბლისა. სპერმიციდის გამოყენება ამ შემთხვევაში უფრო სასურველია.
გამოყენების შემდეგ დიაფრაგმა გულდასმით გარეცხეთ საპნიანი წყლით და სუფთა ადგილას დააბინავეთ. პერიოდულად შეათვალიერეთ, რომ ნაპრალები და ნასვრეტები არ გაუჩნდეს. სასურველია, დიაფრაგმა ყოველ  ორ წელიწადში ერთხელ ცვალოთ. იგივე შეიძლება ითქვას საშოს ჩაჩზე.

დაიხმარე ჰორმონები
მათ შორის ყველაზე გავრცელებული მაინც აბებია, თუმცა ორსულობის მოწინააღმდეგე ჰორმონები ორგანიზმში სხვა გზითაც შეიძლება მოხვდეს, მათ შორის – პლასტირის, ვაგინალური რგოლის, ინექციისა და იმპლანტის სახით.
 საზოგადოდ, სასურველია, ჩასახვის საწინააღმდეგო ჰორმონული საშუალებები სპეციალისტმა შეარჩიოს, განსაკუთრებით იმ შემთხვევაში, თუ ქალმა 35 წელს გადააბიჯა ან სიგარეტს ეწევა (მწეველებში ჰორმონების ეფექტურობა იკლებს) ან სულაც ორივე ერთად.
კომბინირებული ორალური კონტრაცეპტივებიესტროგენსა და პროგესტერონს შეიცავს. აბები, რომელთა შემადგენლობაშიც მხოლოდ პროგესტერონი შედის, მინი-პილის სახელით არის ცნობილი და განსაკუთრებულ შემთხვევებში ინიშნება, მათ შორის – ლაქტაციის დროს.
დაიხსომეთ: მოულოდნელი ორსულობის დროს ჩასახვის საწინააღმდეგო ჰორმონული აბების შემთხვევითი მიღება ნაყოფის ჯანმრთელობას არავითარ საფრთხეს არ უქმნის.
გულდასმით წაიკითხეთ ჩასახვის საწინააღმდეგო ჰორმონული აბების ანოტაცია, სადაც გარკვევით იქნება მითითებული აბების სმის დაწყების პერიოდი (წესისამებრ, პირველ ჯერზე ეს მენსტრუაციის დაწყებას ემთხვევა, ხოლო მომდევნო ჯერზე ბოლო აბის დამთავრებიდან ერთი კვირის შემდეგ განახლდება), გვერდითი მოვლენები და ინსტრუქცია იმის თაობაზე, როგორ მოიქცეთ აბის გამოტოვების შემთხვევაში.
კონტრაცეპტივი-პლასტირი კანზე მაგრდება, საიდანაც ჰორმონები შეიწოვება და  სისხლის საშუალებით ორგანიზმში ვრცელდება. პლასტირისთვის საუკეთესო ადგილია დუნდულები, გულმკერდი (ძუძუს გარდა), ზურგის ზედა ნაწილი, მხარი და მუცელი. მას ერთკვირიანი ეფექტი აქვს და შეგიძლიათ, კვირაში ერთხელ ადგილი უცვალოთ.
პლასტირი შეგიძლიათ ზედიზედ სამი კვირის განმავლობაში დაიკრათ. შემდეგ მენსტრუაციის დროც დგება ანუ ერთი კვირა ისვენებთ და კვლავ იწყებთ პლასტირის ტარებას. სასურველია, პირველ კვირას უკეთესი თავდაცვისთვის თქვენმა პარტნიორმა პრეზერვატივი გამოიყენოს.
დაიხსომეთ: პლასტირი ნაკლებად ეფექტურია ჭარბწონიანი ქალებისთვის.
საშოს რგოლი ღრმად, საშვილოსნოს ყელის სიახლოვეს თავსდება და აქ 21 დღე რჩება. შემდეგ რგოლი უნდა გამოიღოთ და ზუსტად ერთი კვირის შემდეგ კვლავ გაიკეთოთ. რგოლის გამოღებიდან 2-3 დღეში მენსტრუაციული სისხლდენა იწყება.
საშოს რგოლის სწორ მოთავსებას უდიდესი მნიშვნელობა აქვს. თუ ის გამოვარდა და ქალი რამდენიმე საათი (3 საათზე მეტხანს) ჰორმონების ზემოქმედების გარეშე დარჩა, უახლოესი დღეების განმავლობაში დამატებითი კონტრაცეფციული მეთოდის (პრეზერვატივის) გამოყენება მოუწევს.
თუ საშოს რგოლი ხშირად ვარდება, ორსულობისგან თავდაცვის ალტერნატიული მეთოდის გამოყენება მოგიწევთ. 
ინექციის გზით შეყვანილი ნივთიერება ქალს სამი თვის განმავლობაში იცავს ფეხმძიმობისგან, თუმცა პირველ კვირას სასურველია კონტრაცეფციის ბარიერული მეთოდის გამოყენებაც.
საზოგადოდ, კონტრაცეპტივის ინექცია უკეთდებათ იმ ქალებს, რომელთაც არ შეუძლიათ, ყოველდღე გამოიყენონ ჩასახვის საწინააღმდეგო საშუალებები ან ატარონ სპირალი. ასევე მათ, ვინც უახლოესი ერთი წლის განმავლობაში არ აპირებს და აი, რატომ: ორგანიზმში მოხვედრილი მედიკამენტის მოქმედების დასრულების შემდეგ ქალს განაყოფიერების უნარი არა მყისვე, არამედ თვეების შემდეგ უბრუნდება. იშვიათად უნაყოფო პერიოდი წლამდეც კი გრძელდება.
სამწუხაროდ, კონტრაცეპტივის ინექციას გვერდითი მოვლენებიც აქვს. მათ შორის – წონის მატება, არარეგულარული მენსტრუაცია და ძვლის სიმკვრივის კლება, თუმცა ყველა ეს პრობლემა ინექციის მოქმედების შეწყვეტის შემდეგ თავისთავად გვარდება.
ჩასახვის საწინააღმდეგო იმპლანტი მხრის კანქვეშ თავსდება. პროცედურა ხანმოკლეა – 5-10-წუთიანი. მას ადგილობრივი ანესთეზიით ატარებენ. ამგვარი იმპლანტის წყალობით ქალი სამი წლის მანძილზეა დაზღვეული არასასურველი ორსულობისგან. რეპროდუქციის უნარი იმპლანტის ამოღებისთანავე აღდგება.
ყველაზე ხშირი გართულება, რომელსაც იმპლანტის ტარება იწვევს, არარეგულარული მენსტრუაციაა. ციკლი იმპლანტის ამოღებისთანავე ან მომდევნო 6-9 თვის განმავლობაში წესრიგდება.
სპირალი ორნაირია: ჰორმონული და სპილენძისა. პროგესტერონის წყალობით საშოს ლორწო საგრძნობლად სქელდება და სპერმას საშვილოსნოში მოხვედრას არ ანებებს. ჰორმონის ზემოქმედებით სქელდება საშვილოსნოს ამომფენი ლორწოვანი გარსიც. როგორც ჰორმონული, ისე სპილენძის სპირალი სპერმატოზოიდების აქტივობას თრგუნავს, კვერცხუჯრედს – განაყოფიერებისგან, ხოლო უკვე განაყოფიერებულ კვერცხუჯრედს საშვილოსნოზე მიმაგრებისგან იცავს.
სპირალის ჩადგმა მცირედ დისკომფორტს იწვევს, რომელიც პროცედურის დასრულებისთანავე ქრება. საშვილოსნოში ჩადებული მცირე ზომის თ-ს მსგავსი მოწყობილობა ქალს არც ფიზიკურ აქტიურობაში, არც სქესობრივ კავშირში არ უშლის ხელს. გართულება – სპირალის გამოვარდნა, საშვილოსნოს კედლის გახვრეტა, ინფექციის შეჭრა – მოსალოდნელია, მაგრამ იშვიათი.
ძალიან იშვიათად შესაძლოა სპირალის მქონე ქალი მაინც დაორსულდეს. ამ შემთხვევაში მუცლის მოშლის საფრთხე იქმნება.

სულ მთლად სტერილური
თუ დაორსულებას ნამდვილად აღარ აპირებთ, შეგიძლიათ, სტერილიზაციის მეთოდსმიმართოთ. ამ შემთხვევაში ადამიანი მცირე ოპერაციული ჩარევის შედეგად სამუდამოდ კარგავს განაყოფიერების უნარს.
არსებობს როგორც ქალთა, ისე მამაკაცთა სტერილიზაცია. ქალებს ოპერაცია ლაპაროსკოპიულად უტარდებათ – ძალიან მცირე განაკვეთიდან ექიმი მუცლის ღრუში შედის და კვერცხსავალ მილებს ბლოკავს (მაგალითად, გადაკვანძავს ან გადაჭრის).
ზოგჯერ ქალი, რომელიც შვილის ყოლას აღარ აპირებს, ტუბალურ სტერილიზაციას უშუალოდ საკეისრო კვეთის დროს იკეთებს.
სტერილიზაცია ზოგადი ანესთეზიით ტარდება. ოპერაციის შემდეგ ქალი მალევე უბრუნდება ცხოვრების ჩვეულ რიტმს. დაბლოკილი ფალოპის მილი მას არც სქესობრივ ცხოვრებაში უშლის ხელს და არც მენსტრუაციული ციკლის არევას იწვევს.
მამაკაცთა სტერილიზაციას ვაზექტომიას უწოდებენ. ამ დროს იბლოკება უწვრილესი მილი, რომლის საშუალებითაც სპერმა სათესლე ჯირკვლებიდან სასქესო ასომდე მიდის.
ქალებისგან განსხვავებით, რომლებიც დაორსულების შესაძლებლობას სტერილიზაციისთანავე კარგავენ, მამაკაცებს განაყოფიერების უნარი კიდევ 2-3 თვე უნარჩუნდებათ. ეს იმიტომ, რომ სპერმის ნარჩენები შესაძლოა მილში იყოს ჩარჩენილი. ამიტომ სტერილიზაციის შემდეგ მამაკაცს მცირე ხანს კვლავ მოუწევს პრეზერვატივის გამოყენება.

სასწრაფო დახმარების აბები
საუკუნეებია, ქალები რა ხერხს აღარ იგონებენ დაუცველი სქესობრივი კონტაქტის შემდეგ ორსულობის თავიდან ასაცილებლად: წყლის სწრაფი ჭავლით გამორეცხვას, შარდში დასველებული ბამბის საშოში მოთავსებას... დაუცველი სექსის შემდეგ თავდაცვაზე ფიქრი ერთგვარად სარისკოა, თუმცა არსებობს მედიკამენტები, რომლებიც ამ რისკს საგრძნობლად ამცირებს და სწორი გამოყენების პირობებში ორსულობას ასიდან 75-89 შემთხვევაში გამორიცხავს. ეს "სასწრაფო დახმარება" ძლიერმოქმედი ჰორმონით გაჯერებული წყვილი ტაბლეტია, რომელიც 12- საათიანი შუალედით უნდა მიიღოთ, თანაც სქესობრივი აქტიდან 72 საათის განმავლობაში. ამის შემდეგ მათ მიღებას აზრი არ აქვს. გაითვალისწინეთ: რაც უფრო ადრე მიიღებთ პირველ აბს, მით უფრო დიდია შანსი, არ დაორსულდეთ.
ეს აბები, რომელსაც სხვაგვარად პოსტკოიტალურ ან მეორე დღის კონტრაცეპტივებსაც უწოდებენ, ჰორმონის საკმაოდ დიდ დოზას შეიცავს, ამიტომ მათი ხშირი მიღება სასურველი არ არის.

თავდაცვა საუკეთესო სტრატეგია

 უკვე მერამდენე ათწლეულია, რაც ჯანმრთელობის მსოფლიო ორგანიზაცია კონტრაცეფციის შესახებ რჩევებს აწვდის მთელ სამყაროს. ჩასახვის საწინააღმდეგო საშუალებათა გამოყენების აუცილებლობა უკვე უდავოა. ისეთი მოდური მოვლენაც კი, როგორიც ოჯახის დაგეგმვაა, კონტრაცეფციის გარეშე, ფაქტობრივად, შეუძლებელია.
კონტრაცეფციის მნიშვნელობის, მისი თანამედროვე მეთოდების შესახებ გვესაუბრება “ავერსის კლინიკის” გინეკოლოგიური სამსახურის უფროსი მარინა მაჩაიძე.

 როგორ ფიქრობთ, რამდენად მნიშვნელოვანია კონტრაცეპტივის გამოყენება?
– ოჯახის დაგეგმვა ჩვენი დროის ერთ-ერთ ყველაზე  აქტუალურ სამედიცინო-სოციალურ პრობლემად ითვლება და მსოფლიოს მრავალი ქვეყნის სახელმწიფო პოლიტიკის, ფედერალური და საერთაშორისო პროგრამების ყურადღების ობიექტია.
ჯანმრთელობის მსოფლიო ორგანიზაციის განმარტებით, ოჯახის დაგეგმვა მოიცავს ღონისძიებითა კომპლექსს, რომლებიც ერთდროულად რამდენიმე ამოცანას გადაჭრისკენ არის მიმართული. ესენია:
• არასასურველი ორსულობის თავიდან აცილება;
• სასურველი რაოდენობის შვილის ყოლა;
• ორსულობათა შორის ინტერვალის რეგულირება;
• ბავშვის დაბადების დროის შერჩევა მშობლების ასაკის გათვალისწინებით.
 ამ ამოცანების პრაქტიკულ გადაჭრაში ერთ-ერთი წამყვანი როლი კონტრაცეფციას ეკისრება. მისი გამოყენება თავიდან აგვაცილებს არასასურველ ორსულობას, რაც საშუალებას მოგვცემს, შევამციროთ ხელოვნური აბორტების რიცხვი და მათ ფონზე თავჩენილი გართულებები.
 კონტრეცეფციის უმთავრესად რომელი მეთოდებია გავრცელებული მსოფლიოში? ყველაზე ხშირად რომელ მათგანს მიმართავენ საქართველოში?
– კონტრაცეფციის ამჟამად არსებული მეთოდები და საშუალებები რამდენიმე ჯგუფად იყოფა:
• ჰორმონული კონტრაცეფცია (კომბინირებული ორალური და საინექციო კონტრაცეფცია.  მინიპილი, პროგესტინული საინექციო კონტრაცეფცია, იმპლანტი, კომბინირებული ტრანსდერმული პლასტირი);
• საშვილოსნოსშიგა კონტრაცეფცია;
• ლაქტაციური ამენორეის მეთოდი;
• ბარიერული მეთოდები;
• სპერმიციდები;
• ბუნებრივი (რიტმული) მეთოდები;
• შეწყვეტილი სქესობრივი აქტის მეთოდი.
საქართველოში, ისევე როგორც მთელ დანარჩენ მსოფლიოში, არასასურველი ორსულობისგან თავის დასაცავად სწორედ ამ მეთოდებს მიმართავენ. არსებობს კიდევ ერთი გზა – ნებაყოფლობითი ქირურგიული სტერილიზაცია, რომელიც კვერცხსავალი მილების გადაკეტვით მიიღწევა და ფართოდ გამოიყენება აფრიკისა და აზიის ქვეყნებში. საქართველოში ქალები უმთავრესად საკეისრო კვეთის დროს ითხოვენ  სტერილიზაციის ჩატარებას. რაც შეეხება მამაკაცის სტერილიზაციას ანუ ვაზექტომიას,  ჩვენთან მისი ჩატარების სურვილი, რამდენადაც ვიცი, ჯერ არავის გასჩენია.
 ხშირად მოგმართავენ ქალები კონტრაცეფციის მეთოდის შესარჩევად და რა საჭიროა, თავდაცვის მეთოდი აუცილებლად სპეციალისტმა შეარჩიოს?
– კონტრაცეფციის მეთოდის შესარჩევად ექიმთან მისულთა რიცხვმა ბოლო ხანს იმატა. ალბათ დამეთანხმებით, რომ ქალისთვის, თუნდაც წყვილისთვის ამის თაობაზე კვალიფიციური რჩევის მიცემა ოჯახის დაგეგმვის აუცილებელი ნაწილია. ის ეხმარება წყვილს:
• სწორად შეაფასოს თავისი რეპროდუქციული შესაძლებლობები;
• შეარჩიოს კონტრაცეფციის მეთოდი, რომლითაც კმაყოფილი დარჩება;
• სწორად და უსაფრთხოდ გამოიყენოს შერჩეული მეთოდი.
 ყოფილა თუ არა შემთხვევები, რომ ქალი იძულებული გამხდარა, კონტრაცეფციის ერთი ვარიანტი მეორით შეეცვალა?
– რა თქმა უნდა, ყოფილა. ასეთ შემთხვევაში ჩასახვის საწინააღმდეგო მეთოდი ექიმის დახმარებით ხელახლა შეირჩევა.
 მოდი, თავდაცვის კონკრეტულ საშუალებებზე ვისაუბროთ. თავდაპირველად ჩვენში ესოდენ გავრცელებულ ჩასახვის საწინააღმდეგო აბებს შევეხოთ. რამდენად უსაფრთხოა ჰორმონების რეგულარული მიღება?
– ჰორმონული კონტრაცეფციისთვის იყენებენ ქალის სასქესო პორმონების – პროგესტერონისა და ესტროგენების სინთეზურ ანალოგებს. სინთეზური ანალოგები თვისებებით ძალიან ჰგავს ნატურალურს, მაგრამ მათზე გაცილებით აქტიურია. რაც შეეხება მათ უვნებლობას, საფრთხე მინიმუმამდეა დაყვანილი. როგორც ამბობენ,  უკვე შექმნილია ბუნებრივი ესტროგენების შემცველი კონტრაცეფციური საშუალებები, რომლებიც, იმედია, საქართველოშიც მალე გამოჩნდება და კომბინირებული ორალური კონტრაცეპტივების გამოყენების სპექტრი კიდევ უფრო გაფართოვდება. რაც შეეხება თანამედროვე კოკებს, მათი ეფექტიანობა საკმაოდ მაღალია – 1000 ქალზე წელიწადში 1-5 ორსულობას შეადგენს.
ჩასახვის საწინააღმდეგო ჰორმონულ საშუალებებს სხვა სარგებლობაც მოაქვს. კერძოდ, მათი მიღებისას:
• მცირდება მცირე მენჯის ორგანოთა ანთებითი დაავადებების განვითარების რისკი;
• მცირდება საკვერცხეებისა და ენდომეტრიუმის კიბოს განვითარების რისკი;
• მცირდება საკვერცხების ფუნქციური კისტების განვითარების რისკი;
• სუსტდება ან ქრება დისმენორეის სიმპტომები.
გარდა ამისა, შესაძლებელია მათი გამოყენება დისფუნქციური სისხლდენების, უშვილობის, ჭართმიანობის სამკურნალოდ.
 ნუთუ ჰორმონულ კონტრაცეპტივებს გამოყენება ნებისმიერ შემთხვევაში შეიძლება?
– ისევე, როგორც ყველა სხვა მედიკამენტს, მათაც აქვთ უკუჩვენება – არსებობს რიგი მდგომარეობა, როდესაც მათი გამოყენება მიზანშეწონილი არ არის. ესენია:
• ძუძუს კიბო უშუალოდ კონტრაცეპტივის შერჩევის მომენტში ან მანამდე, ღვიძლის სიმსივნე, ინსულტი, სისხლის შედედების დარღვევა, გულის იშემიური დაავადება, ნაღლის ბუშტის მწვავე დაავადება, ვირუსული ჰეპატიტი ან ციროზი, არადიაგნოზირებული სისხლდენები.
ასევე არ შეიძლება ჰორმონული კონტრაცეპტივების გამოყენება საეჭვო ან დადგენილი ორსულობისა და ძუძუთი კვების დროს.
ყველა ამ ფაქტორის გათვალისწინებით, ისინი კვალიფიციურმა ექიმმა უნდა დანიშნოს. არამც და არამც არ შეიძლება მათი თვითნებური მიღება.
 რომელი აბებია უფრო ეფექტური: კომბინირებული თუ  
პროგესტერონის შემცველი? როგორ მოქმედებს მინიპილი?
– პროგესტინული აბების, იმავე მინი-პილის ეფექტიანობა ისეთივე მაღალია, როგორიც კომბინირებულისა.  მოქმედების მექანიზმიც თითქმის ანალოგიურია:
• იწვევს ცერვიკალური ლორწოს გასქელებას, რის შედეგადაც ძნელდება საშვილოსნოში სპერმატოზოიდების შეღწევა;
• იწვევს ენდომეტრიუმის ატროფიულ ცვლილებებს;
• აქვეითებს სპერმატოზოიდების მოძრაობის უნარს ზედა სასქესო გზებში (ფალოპის მილებში).
რაც შეეხება ოვულაციაზე ზემოქმედებას, კოკის მიღებისას ოვულაცია თითქმის 100%-ით ითრგუნება, ხოლო  მინი-პილის მიღების შემთხვევაში – მხოლოდ  50-60%-ით. მინი-პილის გამოყენება ძუძუთი კვების დროსაც შეიძლება, კოკის გამოყენებისთვის კი ლაქტაცია უკუჩვენებად ითვლება.
 ჩვენში საკმაოდ პოპულარულია სპირალი. რა ხანგრძლივობით უნდა იცვალოს ის? ბევრი წლობით ატარებს ერთხელ ჩადგმულ სპირალს...
– კონტრაცეფციისთვის გამოსაყენებელი საშვილოსნოსშიგა საშუალებები (სშს) ორნაირია: არამედიკამენტური და მედიკამენტური. არამედიკამენტური ანუ ინერტული სშს მზადდება პოლიეთილენისგან (ლიპესიის მარყუჟი). ამგვარი სშს შეიცავს ბარიუმის სულფატს, რომელიც მას რენტგენოკონტრასტულს ხდის (ანუ ჩანს რენტგენზე). მედიკამენტური სშს საშვილოსნოს ღრუში გამოყოფს სპილენძის იონს ან ჰორმონს (პროგესტერონს, ლევონორგესტერელს). თანამედროვე სშს-ის კონტრაცეფციული მოქმედება გრძელდება 5-12 წელი. სშს მაღალეფექტურია. უკუჩვენებები იგივეა, რაც კოკების შემთხვევაში, მცირედი განსხვავებით: სპირალი არ გამოიყენება მენჯის ღრუს ორგანოთა ანთებითი დაავადებების დროს.
 რას გვეტყვით ჩასახვის საწინააღმდეგო ბუნებრივ მეთოდებზე? მრავალი ქალი წლების მანძილზე მხოლოდ და მხოლოდ ამ გზით იცავს თავს დაფეხმძიმებისგან.
– ჩასახვის საწინააღმდეგო კალენდარული, ბაზალური ტემპერატურის განსაზღვრისა და ლაქტაციური ამენორეის მეთოდები აბსოლუტურად უსაფრთხოა, მაგრამ ნაკლებად ეფექტური. საზოგადოდ, მინდა აღვნიშნო, რომ კონტრაცეფციული მეთოდი ყოველთვის უსაფრთხო და მაღალეფექტურია, თუ შეირჩა ექიმის მიერ, წინასწარ გამოკვლეული პაციენტის ინდივიდუალური სტატუსის გათვალისწინებით და სწორად იქნა გამოყენებული.
 მართლა არსებობს თუ არა სპერმის მიმართ ალერგია? იქმნება თუ არა ამის გამო პრეზერვატივის გამოყენების აუცილებლობა?
– სათესლე სითხე ქალის ორგანიზმისთვის უცხო ცილას შეიცავს, ამდენად, თეორიულად სავსებით შესაძლებელია მისდამი ალერგიული რეაქციის განვითარება. ეს რეაქცია გამოიხატება ტიპური ალერგიული შეშუპებით, შეწითლებით, ქავილით და, თქვენ წარმოიდგინეთ, რიგ შემთხვევაში შესაძლოა, უშვილობის მიზეზადაც კი იქცეს. ამ შემთხვევაში სწორი დიაგნოზის დასასმელად აუცილებელია გამოირიცხოს ბაქტერიული და ვირუსული გენეზის სქესობრივი გზით გადამდები დაავადებები, დისბაქტერიოზი, შარდის ბუშტისა და საშოს ანატომიური თავისებურებები. ლაბორატორიული კვლევების საშუალებით ადგენენ ქალის ორგანიზმში ანტისპერმული ანტისხეულების არსებობას. მათი მაღალი ტიტრის შემთხვევაში 6 თვის განმავლობაში კონდომის გამოყენებაა მიზანშეწონილი. გარდა ამისა, მიმართავენ იმუნოთერაპიას, ადგილობრივ ანტიჰისტამინურ საშუალებებს, ზოგ შემთხვევაში – ჰორმონულ თერაპიასაც. ჩასახვა შესაძლებელია წინასწარ დამუშავებული სპერმით საშვილოსნოსშიგა ინსემინაციის გზით. რიგ შემთხვევაში მიზანშეწონილია ექსტრაკორპორალური განაყოფიერება.

ბუნებრივად დაცული

ბაზალური ტემპერატურის მეთოდი (ბტმ)

ბაზალური ტემპერატურა ის ტემპერატურაა, რომლითაც ვიღვიძებთ. ის სწორ ნაწლავში ისინჯება მენსტრუაციებს შორის, ყოველ დილით, საწოლიდან ადგომამდე. როდესაც მაჩვენებელი აიწევს, თუნდაც უმნიშვნელოდ, ივარაუდეთ, რომ ნაყოფიერი დღეები დაგიდგათ.
ბტმ-ის ეფექტურობა 80%-მდეა. ეს იმას ნიშნავს, რომ ამ მეთოდით მოსარგებლე ყოველი 100 ქალიდან 20 მაინც ორსულდება. ბტმ-ის ეფექტურობა იკლებს ანუ ტემპერატურის სწორად გაზომვა ვერ ხერხდება, როდესაც ქალი ავად არის, ემოციური სტრესის ქვეშ იმყოფება, დარღვეული აქვს  ძილის რიტმი, სვამს და ეწევა, იყენებს ელექტრონულ ლეიბებსა და საბნებს.
გაითვალისწინეთ, რომ სპერმატოზოიდები სამი დღე ცოცხლობენ და, ცხადია, ამდენივე ხანს ინარჩუნებენ განაყოფიერების უნარს. ასე რომ, სავსებით შესაძლებელია, ნაყოფიერი დღეების დაწყებამდე სამი დღით ადრე დაუცველი სქესობრივი აქტი ორსულობით დასრულდეს.
ზუსტად რომ დაადგინოთ, როდის გეწყებათ ნაყოფიერი პერიოდი, სამი თვის განმავლობაში უნდა მიმართოთ ბტმ-ს, თუმცა პროცესის სირთულეს ალბათ თავადაც ხვდებით.

კალენდარული მეთოდი (კმ)
კმ მეტად გავრცელებული მეთოდია, რომლის ეფექტურობაც ზუსტი გამოთვლის პირობებში 87%-ს აღწევს. თითქოს რა სირთულეს უნდა წარმოადგენდეს დღეების თვლა?! რეალურად კი ეს სულაც არ არის მარტივი. ვიდრე ნაყოფიერი და უნაყოფო დღეების ანგარიშს შეუდგებოდეთ, ბოლო რამდენიმე მენსტრუაციული ციკლის ხანგრძლივობა დაიხსომეთ. შემდეგ ყველაზე მოკლე ციკლს 18 გამოაკელით. მაგალითად, თუ ციკლი 26-დღიანია, სხვაობას 8-ს მიიღებთ. ამის შემდეგ ციკლის დაწყების დღიდან 8 დღე გადათვალეთ და კალენდარზე მონიშნეთ. სწორედ ამ დღიდან იწყება თქვენი ნაყოფიერი პერიოდი. მის დასასრულს კი ამგვარად გამოითვლით: ყველაზე ხანგრძლივი მენსტრუაციული ციკლის დღეებს გამოაკელით 11. თუ ციკლი 30-დღიანია, სხვაობა 19 იქნება. ესე იგი მენსტრუაციის დაწყებიდან ზუსტად მე-19 დღეს დასრულდება განაყოფიერებისთვის ხელსაყრელი პერიოდი.

ცერვიკალური ლორწოს მეთოდი (ცლმ)
ცლმ-ის ეფექტიანობაც 87%-ია. მისი გამოყენება მენსტრუაციის დასრულებისთანავე უნდა დაიწყოთ და გულდასმით დააკვირდეთ საშოს ლორწოს კონსისტენციას: ნაყოფიერ დღეებში სეკრეტი გამჭირვალე, თხელი და სრიალაა, ოვულაციის დღეების დასრულების შემდეგ კი უფრო წებოვანი ხდება და მოცულობასაც იკლებს. კიდევ ერთ რამეს დააკვირდით: ოვულაციის პერიოდში საშო თითით შეხებისას უფრო ღია და რბილია, ხოლო მანამდე და მის შემდეგ – ვიწრო და შემკვრივებული.
გაითვალისწინეთ, რომ საშოს ლორწოს პროდუქცია ზოგიერთ ქალს განსხვავებული აქვს და ძნელი შესამჩნევია, როდის იცვალა სეკრეტმა მოცულობა და კონსისტენცია. ამდენად, ცერვიკალური ლორწოს მეთოდი არ გამოადგება მას, ვისაც რეპროდუქციული ტრაქტის ინფექცია აქვს, ინტიმური ჰიგიენის საშუალებებს იყენებს ან შეშუპების საწინააღმდეგო მედიკამენტებს იღებს.

ორდღიანი კონტროლის მეთოდი (ოკმ)
ოკმ ცერვიკალური ლორწოს მეთოდს ჰგავს – დაკვირვება ამ შემთხვევაშიც საშოს გამონადენზე ხდება, თუმცა მხედველობაში მხოლოდ ლორწოს არსებობა მიიღება და არა კონსისტენცია. 
ამ მეთოდის ეფექტიანობა 86%-ია. დაკვირვება ასე ტარდება: შეიმოწმეთ ლორწოს არსებობა (შეგიძლიათ, ტუალეტის ქაღალდი გამოიყენოთ) დღეში ორჯერ: შუადღისას და ძილის წინ. გაიხსენეთ, გქონდათ თუ არა გამონადენი წინა დღეს. თუ ლორწო ორივე შემთხვევაში შეამჩნიეთ, ჩათვალეთ, რომ განაყოფიერება შესაძლებელია და დაუცველი სექსისგან თავის შეკავება მოგიწევთ.

ლაქტაციური ამენორეის მეთოდი (ლამ)
ლაქტაციური ამენორეა მშობიარობის შემდეგ, ძუძუთი კვების პერიოდში, მენსტრუაციის უქონლობას ნიშნავს. ამ პერიოდში დაორსულება არ ხდება და მეთოდი შემთხვევათა 98%-ში ამართლებს.
ლამ ეფექტურია მშობიარობიდან 6 თვის განმავლობაში, მაგრამ მხოლოდ მაშინ, თუ ქალი ჩვილს აქტიურად აწოვებს ძუძუს – დღეში 9-10-ჯერ მაინც და ღამით ერთხელ მაინც, თანაც ორივეს, კვებათა შორის შუალედი კი 6 საათს არ უნდა აღემატებოდეს. რაც მთავარია, ეს მეთოდი მუშაობს მხოლოდ მაშინ, თუ ქალს მენსტრუაციული ციკლი არ დასწყებია.

მედლის მხარეები
ორსულობის დაგეგმვის ბუნებრივ მეთოდს თავისი დადებითი და უარყოფითი მხარეები აქვს. ორივეს გათვალისწინებით ქალს შეუძლია აირჩიოს, აძლევს თუ არა ხელს მისი გამოყენება.
ბუნებრივი მეთოდის დადებითი მხარეები
 არ გააჩნია გვერდითი ეფექტი.
 მისი შეწყვეტა სურვილისამებრ, ნებისმიერ დროს არის შესაძლებელი.
 არ მოითხოვს ფინანსურ დანახარჯს.
უარყოფითი მხარეები:
 ნაკლებად ეფექტურია იმ ქალებისთვის, რომელთაც არარეგულარული მენსტრუაციული ციკლი აქვთ.
 არ იცავს სქესობრივი გზით გადამდები ინფექციებისგან. 


არამენსტრუაციული სისხლდენა

არეულობის მსხვერპლი
მენსტრუაციული ციკლის განმავლობაში ქალის ორგანიზმში ფიზიოლოგიური პროცესების მთელი კასკადი მიმდინარეობს: ორი ქალური ჰორმონი, ესტროგენი და პროგესტერონი, რომლებიც წყვილ საკვერცხეში გამომუშავდება, საშვილოსნოს ამომფენი სისხლძარღვოვანი გარსის წარმოქმნას უწყობს ხელს. სწორედ ამ 
გარსის ქსოვილში უნდა ჩაინერგოს განაყოფიერებული კვერცხუჯრედი. ეს უკანასკნელი, ჯერ კიდევ თავისუფალი და გაუნაყოფიერებელი, მენსტრუაციის დაწყებიდან მე-12-14 დღეს საკვერცხიდან გამოიტყორცნება, ჯერ მუცლის ღრუში ხვდება, შემდეგ კვერცხსავალ (ფალოპის) მილში გადაინაცვლებს და სპერმატოზოიდს ელოდება. თუ პაემანი შედგა, განაყოფიერებული კვერცხუჯრედი ორსულობისთვის საგანგებოდ მომზადებულ, სისხლძარღვებით მდიდარ ენდომეტრიუმში – საშვილოსნოს ამომფენ გარსში ჩაინერგება. თუ განაყოფიერება არ მოხდა, ჰორმონების დონე დაიკლებს, ხოლო საშვილოსნოს ღრუს ამომფენი სისხლძარღვოვანი შრე ნელ-ნელა ჩამოიფცქვნება. ასე იწყება მენსტრუაციული სისხლდენა.
მენსტრუაციული ციკლი იწყება სისხლდენის პირველი დღიდან და მეორე სისხლდენის დაწყებამდე გრძელდება. ქალთა უმრავლესობას 28-დღიანი ციკლი აქვს. ეს იმას ნიშნავს, რომ შესაძლოა, ციკლი უფრო მოკლე ან უფრო ხანგრძლივიც იყოს – პლუს-მინუს 7 დღე ნორმად ითვლება. თავად მენსტრუაციის ხანგრძლივობაც მეტ-ნაკლებად ლიმიტირებულია და უმეტესად ხუთდღიანია.

მენოპრობლემები
ქალის ორგანიზმი ყოველთვის როდი სჯერდება “ლიმიტირებულ” მენსტრუაციულ სისხლდენას – შესაძლოა, გამონადენი მენსტრუაციებს შორისაც გაჩნდეს ან თავად თვიურმა გადალახოს ყოველგვარი ლიმიტი.
სისხლდენა ნორმის ფარგლებს სცდება და, ამდენად, საყურადღებოა, თუ:
. მენსტრუაციებს შორის იჩენს თავს. შესაძლოა, სისხლდენა უხვი არც იყოს და თეთრეულზე მხოლოდ ბაც ვარდისფერ ლაქებს ტოვებდეს.
. ვითარდება სქესობრივი კონტაქტის შემდეგ.
. მენსტრუაციის დროს მეტისმეტად უხვი და ხანგრძლივია. თუ სისხლდენამ, თუნდაც მენსტრუაციულმა, 7 დღეს გადააჭარბა, მას მენორაგიას უწოდებენ. ამ დროს ქალს საათში ერთხელ მაინც უხდება საფენის ან ტამპონის გამოცვლა.
. სისხლდენა მენოპაუზის შემდეგაც გრძელდება.
ქალის სიცოცხლის ზოგიერთ ეტაპზე ციკლის დარღვევა საგანგაშო არ არის, თანაც მალევე უბრუნდება ნორმას. მაგალითად, სქესობრივი მომწიფების ასაკში, პირველი მენსტრუაციიდან – მენარქედან რამდენიმე თვის ან წლის მანძილზე, თვიური შესაძლოა არარეგულარული იყოს, სისხლიანი გამონადენი კი ზომაზე მეტად უხვი ან მცირე. მსგავსი უცნაურობანი შესაძლოა მენოპაუზის პერიოდშიც გაგრძელდეს: ციკლი მოკლდება, არარეგულარული ხდება, სისხლდენა ძლიერდება ან სუსტდება. ამგვარი ცვლილებები, როგორც გითხარით, დროებითია და მკურნალობას არ საჭიროებს.

მენომიზეზები
საშოდან პათოლოგიური (დისფუნქციური) სისხლდენის მიზეზი მრავლად მოიძებნება. ყველაზე ხშირად მას ჰორმონული დისბალანსი იწვევს: ზოგჯერ ესტროგენს მეტისმეტი მოსდის, მისი ზემოქმედებით ენდომეტრიუმი ზომაზე მეტად სქელდება და, შესაბამისად, სისხლდენაც უხვია; ზოგჯერ ჰორმონების არაადეკვატური მოქმედების შედეგად საშვილოსნოს ღრუს ამომფენი სისხლძარღვოვანი გარსი უდროო დროს იწყებს აცლას და სისხლდენაც მენსტრუაციებს შორის იჩენს თავს ან დროზე ადრე იწყება.
პათოლოგიური სისხლდენის განვითარებისთანავე კონსულტაციისთვის გინეკოლოგს ეწვიეთ. მხოლოდ მას შეუძლია გაარკვიოს, რამდენად სახიფათოა ვითარება და რა სახის მკურნალობა გჭირდებათ. ხშირად პრობლემას უბრალო მიზეზი აქვს და იოლი დასაძლევია.
დისფუნქციურ სისხლდენას იწვევს:
. ჩასახვის საწინააღმდეგო საშუალებები, უპირატესად – კომბნირებული ორალური კონტრაცეპტივები (კოკები) და სპირალი;
. საშვილოსნოს, მისი დანამატებისა და საშოს ინფექციური დაავადებები;
. საშვილოსნოს პოლიპები და ფიბროზული წარმონაქმნები;
. საშვილოსნოსა და საშოს ავთვისებიანი წარმონაქმნები;
. ზოგიერთი ქრონიკული დაავადება, უმეტესად – ფარისებრი ჯირკვლის პათოლოგიები და შაქრიანი დიაბეტი;
. ორსულობა, საშვილოსნოსგარე ორსულობა ან სპონტანური აბორტი (მუცლის მოშლა);
. ზოგიერთი მედიკამენტი.

არ გადადოთ ვიზიტი
მართალია, გინეკოლოგიურ გასინჯვას სასიამოვნოს ვერაფრით დავარქმევთ, მაგრამ ჯანმრთელობის დაკარგვას ხანმოკლე დისკომფორტის მოთმენა გიჯობთ. ექიმი ხელით გაგსინჯავთ, სისხლის ანალიზის გაკეთებას გირჩევთ და ჰორმონებზე გამოსაკვლევადაც გაგგზავნით. შესაძლოა, საჭირო გახდეს ულტრაბგერითი კვლევის, ენდომეტრიუმის ბიოფსიის, ჰისტეროგრაფიისა და ჰისტეროსკოპიის ჩატარება.

გამოსავლის ძიებაში
საშოდან პათოლოგიური სისხლდენის სამკურნალო არაერთი მეთოდი არსებობს. მაგალითად, ჰორმონოთერაპია კოკებით. ჩასახვის საწინააღმდეგო ეს აბები ესტროგენსაც შეიცავს და პროგესტერონსაც. თერაპია რამდენიმე თვეს გასტანს. შესაძლოა, თავდაპირველად უხვმა მენსტრუაციულმა გამონადენმა შეგაწუხოთ, მაგრამ დროთა განმავლობაში ციკლი დარეგულირდება. თუ პრობლემა გახანგრძლივდა, უთუოდ აცნობეთ ექიმს.
კოკები უმნიშვნელოდ ზრდის გულ-სისხლძარღვთა დაავადებების რისკს. იშვიათად არტერიულ ჰიპერტენზიასაც იწვევს. ამდენად, თუ მსგავსი პრობლემები მანამდეც გაწუხებდათ, აუცილებლად აცნობეთ ექიმს. სავარაუდოდ, გინეკოლოგი შედარებით დამზოგველ აბებს გამოგიწერთ, რომლებიც მხოლოდ პროგესტერონს შეიცავს. მათ მინი-პილისაც უწოდებენ. მათი მიღების დროს შესაძლოა შეგაწუხოთ მკერდის შემკვრივებამ და უმნიშვნელო ტკივილმა, თავის ტკივილმა, განწყობის ხშირმა ცვალებადობამ.
როგორც კოკის, ისე მინი-პილის მიღების შემთხვევაში შესაძლოა თეთრეულზე სისხლის ბაცი ლაქები შეამჩნიოთ. ასეთი გამონადენი საგანგაშო არ არის, თავისთავად გაქრება, მაგრამ თუ გახანგრძლივდა, ექიმს აცნობეთ.
ჰორმონული თერაპიის კიდევ ერთი გავრცელებული ვარიანტია სპირალის ჩადგმა, რომელიც ჰორმონებს გამოყოფს.
გაითვალისწინეთ: დაანებებთ თუ არა თავს ჰორმონების მიღებას, ჩასახვის უნარი უმალვე აღდგება.
ზოგჯერ სისხლდენის შესაჩერებლად ქირურგიულ ჩარევას მიმართავენ. შესაძლოა, საჭირო გახდეს პოლიპის ან ფიბროზული წარმონაქმნის ამოკვეთა. ამგვარი ოპერაციის ჩატარება ჰისტეროსკოპის მეშვეობითაც არის შესაძლებელი. 
სხვა ქირურგიული მეთოდებიდან აღსანიშნავია ენდომეტრიული აბლაციის მეთოდი, რომლის დროსაც ლაზერით, ელექტროდენით ან მოყინვით არღვევენ ენდომეტრიუმის მთლიანობას, რაც ქალს ქრონიკული სისხლდენისგან ერთხელ და სამუდამოდ ათავისუფლებს. ამ პროცედურის შემდეგ თვიური ქალთა უმრავლესობას უქრება. შესაბამისად, ვეღარც დაორსულებას ახერხებენ.
კიდევ ერთი მეთოდი, რომელსაც უკიდურეს შემთხვევაში მიმართავს ექიმი, ჰისტერექტომია ანუ საშვილოსნოს ამოკვეთაა.

ამოჩემებული ასაკი
ორმოცდაათს მიტანებულ ქალთა უმრავლესობას კლიმაქსთან დაკავშირებული პრობლემები აწუხებს. დისკომფორტის მიზეზი ამჯერადაც ჰორმონული დისბალანსია: მკვეთრად მცირდება საკვერცხეების მიერ ესტროგენისა და პროგესტერონის პროდუქცია და იწყება მენსტრუაციული ციკლის სავსებით კანონზომიერი ცვლილებები, რომლებიც თვიურის გაქრობით სრულდება.
მენსტრუაციული ციკლის ცვლილებები მენოპაუზის დადგომამდე რამდენიმე წლით ადრე იწყება: ციკლი მოკლდება ან ხანგრძლივდება; სისხლდენა უხვი ან მეტისმეტად მწირია; ისიც შეიძლება, მენსტრუაციამ თვე გამოტოვოს... ამგვარი ცვლილებები ნორმალურია და მენოპაუზის დადგომას გვაუწყებს. ამ პერიოდს პერიმენოპაუზა ეწოდება. თვიურის გაქრობისთანავე იწყება მენოპაუზა, ხოლო ციკლის გაქრობიდან ერთი წლის შემდეგ დგება პერიოდი, რომელსაც პოსტმენოპაუზას უწოდებენ.
იმ კანონზომიერ ცვლილებებთან ერთად, რომლებსაც ქალი ასე თუ ისე ეგუება, ჰორმონული დისბალანსი შესაძლოა გაცილებით ძლიერი დისკომფორტის მიზეზადაც იქცეს: იმის გამო, რომ საკვერცხე კვერცხუჯრედს აღარ გამოისვრის, აღარც ჰორმონების დონე მცირდება ყოველთვიურად (ალბათ გახსოვთ: თუ ოვულაციის შემდეგ განაყოფიერება არ განხორციელდა, ჰორმონების დონე დაიკლებს, ხოლო ენდომეტრიუმი აცლას დაიწყებს). შედეგად ესტროგენი კვლავ ჩვეული ოდენობით გამომუშავდება, რაც ენდომეტრიუმის ქსოვილის ჩამოფცქვნის ნაცვლად მის შესქელებას განაპირობებს. ამის გამო შესაძლოა უეცრად დაიწყოს უხვი სისხლდენა ან ქალი საკმაოდ დიდი ხნის განმავლობაში საცვალზე სისხლიან ლაქებს ამჩნევდეს. ამ შემთხვევაში გინეკოლოგთან ვიზიტს ნუ გადადებთ.
გინეკოლოგთან ვიზიტს გირჩევთ მაშინაც, თუ 55 წელს გადააბიჯეთ, მაგრამ მენსტრუაციული სისხლდენა ჯერ კიდევ არ შეგწყვეტიათ.
პოსტმენოპაუზის პერიოდში საშოდან სისხლდენას უმეტესად განაპირობებს:
. ჰორმონული თერაპია;
. საშვილოსნოს ამომფენი გარსის გათხელება – ენდომეტრიუმის ატროფია;
. პოლიპები;
. ენდომეტრიუმის შესქელება, რომელმაც უყურადღებობის შემთხვევაში შესაძლოა ავთვისებიანი სიმსივნის განვითარებას დაუდოს სათავე;
. საშვილოსნოს კიბო.
გაცილებით იშვიათად:
. მცირე მენჯის ღრუს ინფექციები, ფარისებრი ჯირკვლის დაავადებები, ზოგიერთი მედიკამენტი.
მენოპაუზის შემდგომ პერიოდში საშოდან სისხლდენის მიზეზი რვიდან ერთ შემთხვევაში საშვილოსნოს ღრუში არსებული ავთვისებიანი წარმონაქმნია.
საშვილოსნოს კიბოს განვითარების რისკი მომატებულია, თუკი ქალს:
. აქვს ჭარბი წონა;
. ახალგაზრდობისას ჰქონდა არარეგულარული მენსტრუაციული ციკლი;
. მენოპაუზა გვიან დაუდგა;
. აქვს საკვერცხეების პოლიკისტოზი;
. ჰქონდა ენდომეტრიუმის ჰიპერპლაზია, რომელსაც არ უმკურნალა;
. ჰქონდა საკვერცხის, ძუძუს ან სწორი ნაწლავის კიბო;
. საშვილოსნოს კიბო მის წინაპრებსაც ჰქონდათ.
მეცნიერებმა გამოთქვეს მოსაზრება, რომ საშვილოსნოს ღრუს კიბოს განვითარების ყველაზე მძლავრი რისკფაქტორი ესტროგენის შემცველი მედიკამენტის მიღებაა, რომელსაც ოსტეოპოროზის სამკურნალოდ და საპროფილაქტიკოდ, კლიმაქსთან დაკავშირებული დისკომფორტის (მაგალითად, ალების) შესამსუბუქებლად ნიშნავენ ექიმები. კვლევებმა დაადასტურა, რომ გაცილებით უვნებელია კომბინირებული, ესტროგენისა და პროგესტერონის შემცველი ჰორმონოთერაპია. მართალია, ამ შემთხვევაში გამორიცხული არ არის საშოდან სისხლდენა, მაგრამ, წესისამებრ, დისკომფორტი რამდენიმე (უმეტესად 6) თვეში თავისთავად ქრება. ასეა თუ ისე, ჰორმონული თერაპიის დანიშვნა უდიდეს სიფრთხილეს მოითხოვს. პრეპარატი უთუოდ სპეციალისტმა უნდა შეარჩიოს.

საშიში ნიშანი
საშოდან სისხლიანი გამონადენი არცთუ იშვიათია ორსულობის დროს. განსაკუთრებით ხშირია სისხლდენა ფეხმძიმობის პირველი 12 კვირის განმავლობაში. ამას მრავალი მიზეზი აქვს. ნებისმიერ შემთხვევაში გირჩევთ, გინეკოლოგთან ვიზიტს ნუ გადადებთ.
სისხლიანი გამონადენი შესაძლოა სქესობრივი კონტაქტის შემდეგაც გაჩნდეს. უთუოდ აცნობეთ ექიმს ამის შესახებ, რადგან უყურადღებობას შესაძლოა საკმაოდ მძიმე შედეგი – სპონტანური აბორტი მოჰყვეს.
მუცლის მოშლა უნდა იეჭვოთ, თუკი უეცრად დაგეწყოთ უხვი სისხლდენა და მუცლის ქვედა ნაწილის ძლიერი ტკივილი, რომელიც მენსტრუაციულ ტკივილს ჰგავს, მაგრამ მასზე გაცილებით მძაფრია. 
ორსულობის ადრეულ ეტაპზე სისხლდენის კიდევ ერთი მიზეზი საშვილოსნოსგარე ორსულობაა. ის გაცილებით იშვიათია (60-დან ერთი შემთხვევა), ვიდრე სპონტანური აბორტი (ის ორსულთა 15-20%-ს უვითარდება).
საშვილოსნოსგარე ორსულობით გამოწვეული სისხლდენა მეტად საყურადღებო მდგომარეობაა, ვინაიდან ამ დროს კვერცხსავალი მილი ზიანდება და მისი მთლიანობა ირღვევა (საშვილოსნოსგარე ორსულობის დროს განაყოფიერებული კვერცხუჯრედი ფალოპის მილში ინერგება და იქ განაგრძობს ზრდას, ვიდრე მილს არ გახეთქავს).
ორსულობის მეორე ნახევარში სისხლდენის მიზეზი უმეტესად პლაცენტის პათოლოგიაა. შესაძლოა, ვაგინალური სისხლდენა პლაცენტის ნაადრევმა აცლამ ან მისმა წინამდებარეობამ განაპირობოს (ამ დროს პლაცენტის ქსოვილი საშვილოსნოდან გამოსავალ ხვრელს ფარავს). ნებისმიერ შემთხვევაში ორსულობის მიწურულს განვითარებული სისხლდენა სასწრაფო სამედიცინო ჩარევას საჭიროებს. 
და კიდევ: იშვიათად სისხლიანი გამონადენი ახალშობილ გოგონასაც აქვს. ეს ფიზიოლოგიური მოვლენაა, რომელიც თავისთავად გაივლის, მისი მიზეზი კი ისევ და ისევ ჰორმონული დისბალანსია, რომელიც პაწიას დედიკოსგან გამოჰყვა. 


ქალური დაავადებები

რა უნდა ვიცოდეთ “ქალური” დაავადებების შესახებ
ვინ მოთვლის, რამდენი გამოცდა ელის მშვენიერ სქესს ცხოვრების გზაზე. მათ შორის – პათოლოგიების მთელი არსენალი, რომელთაც მარტივად ქალურიდაავადებების სახელით მოვიხსენიებთ.
ბევრი ჯეროვან ყურადღებას არც კი აქცევს საკუთარ ჯანმრთელობას. ჰგონია, ტკივილი, რომელიც მუცლის ქვედა ნაწილში აღმოცენდება, თავისთავად გაივლის. თუმცა ყოველთვის ასე არ ხდება... უყურადღებობის გამო ბანალური ანთების საფუძველზე ისეთი მძიმე გართულება ყალიბდება, როგორიც უნაყოფობაა. ამდენად, ნებისმიერი დისკომფორტი, რომელსაც ქალბატონები განიცდიან, მეტად საყურადღებოა.
მაინც რომელი გინეკოლოგიური დაავადებებია გავრცელებული ყველაზე მეტად? რა პრინციპით მკურნალობენ მათ? ამ და სხვა აქტუალურ საკითხებზე გვესაუბრება მეან-გინეკოლოგი, მედიცინის მეცნიერებათა დოქტორი ბატონი ბესარიონ ტყეშელაშვილი.

. რომელი გინეკოლოგიური დაავადებები გვხვდება ყველაზე ხშირად?
– გინეკოლოგიურ პრობლემებს შორის ყველაზე მეტად გახლავთ გავრცელებული:
. სასქესო ორგანოების  ინფექციური პათოლოგიები;
. მენსტრუაციული ციკლის დარღვევები (მათ შორის – ბავშვებში, რაც მენსტრუაციული ციკლის პათოლოგიების სახით იჩენს თავს); მრავლადაა ჰიპომენსტრუაციული ტიპის დარღვევა: სისხლდენის შემცირება, გაიშვიათება და გ

აქრობა;


. სიმსივნური (ჰიპერპლასტიური) პროცესები, რომლებიც საშვილოსნოს ყელზე, მის ტანსა და შიდა გარსზე ვითარდება. აქვე უნდა ვახსენოთ სარძევე ჯირკვლების პათოლოგიებიც – მოგეხსენებათ, ისინიც ქალის სასქესო ორგანო

თა რიცხვს ეკუთვნის.
გარდა ამ პრობლემებისა, ქალბატონები ხშირად უჩივიან უნაყოფობას და კლიმაქსურ პრობლემებს.
. სქესობრივად გადამდები უმთავრესად რომელი ინფექციებით ავადმყოფობენ ქალბატონები?
– სასქესო სფეროს უპირატესად ე.წ. უჯრედშიდა მიკროორგანიზმები აზიანებენ. ისინი იწვევენ ქლამიდიოზს, ურეაპლაზმოზს, მიკოპლაზმოზს, ტრიქომონიაზს, ჰერპესს, პაპილომავირუსულ ინფექციას, მიკოზს, სხვადასხვა დისბაქტერიულ ცვლილებას.
ინფექციის უტყუარი დიაგნოზის დასასმელად საჭიროა, უნიფიცირებული, რეფერენტული, ზუსტად განსაზღვრული მიდგომა ავირჩიოთ. მაგალითად, სისხლში ქლამიდიის აღმოჩენის იმუნოფერმენტული მეთოდი, რომელიც საქართველოში ფართოდ არის დანერგილი, ზუსტი დიაგნოზის დასმის საშუალებას არ იძლევა. ასევე შეუძლებელია ჩვეულებრივი ნაცხის აღებით პაპილომავირუსის აღმოჩენა. ზუსტი დიაგნოსტირებისთვის უთუოდ PAP-ტესტის გაკეთებაა საჭირო.

. ვიცით, რომ სქესობრივი გზით გადამდები ინფექციების მკურნალობა ორივე სქესობრივმა პარტნიორმა უნდა ჩაიტაროს…
– მკურნალობაც და დიაგნოსტირებაც უთუოდ პარალელურად უნდა წარიმართოს, თუმცა აქვე უნდა ვახსენოთ სქესობრივი გზით გადამდები ინფექციების ერთი თავისებურება: დაავადება შეიძლება იყოს ორგანიზმში, მაგრამ არ გამოვლინდეს, მიუხედავად იმისა, რომ იგივე პათოლოგია აღმოაჩნდება პარტნიორს. ასეთ შემთხვევაში, რომელიმე დაავადება რომ არ გამოგვეპაროს, რამდენიმე კვლევის ჩატარებაა საჭირო.
ამრიგად, ეფექტური მკურნალობის უპირველესი პირობა მართებული დიაგნოზის დასმა გახლავთ. არანაკლებ მნიშვნელოვანია იმის გარკვევა, რომელი პრეპარატებით და რამდენ ხანს მკურნალობდა ქალი. ყოველივე ამის გათვალისწინებით მკურნალობის სწორი ტაქტიკისა და ხანგრძლივობის შერჩევა იოლია.
სამწუხაროდ, ამჟამად გავრცელებულია ტენდენცია, სასქესო ინფექციებისგან ერთდღიანი თერაპიით განკურნონ. თავისთავად ამგვარი ტაქტიკა მისაღებია, მაგრამ მხოლოდ მწვავე შემთხვევების დროს; პრაქტიკაში უმეტესად მაინც ქრონიკულ ინფექციურ პათოლოგიებთან გვაქვს საქმე, რომლებსაც ხანგრძლივი, სულ მცირე, თოთხმეტ-ოცდღიანი თერაპიული კურსი სჭირდება.
. სასქესო ინფექციების ანტიბიოტიკებით მკურნალობა მიღებულია?
– საქართველოში ანტიბიოტიკებს მეტად არარაციონალურად იყენებენ. შედეგად ვიღებთ პრეპარატების მიმართ გამძლე ბაქტერიულ შტამებს, რომლებზეც შემდგომ დანიშნული ანტიბაქტერიული მედიკამენტები აღარ მოქმედებს. ამის გამო თერაპიას სასურველი შედეგი არ მოაქვს. ამდენად, არაადეკვატური მკურნალობა არამც და არამც არ შეიძლება. ყველა ავადმყოფს ინდივიდუალური მიდგომა სჭირდება. რაც მთავარია, საჭიროა სქესობრივი პარტნიორების ე.წ. სარკისებრი მკურნალობა, რაც ორივესთვის ერთი და იმავე მედიკამენტების დანიშვნას გულისხმობს.  
. მეტად გახშირდა მენსტრუაციული ციკლის მოშლილობანი მოზარდ გოგონებს შორის. სახელდობრ, რომელი ტიპის დარღვევებია დამახასიათებელი ამ ასაკისთვის?
– მოზარდ გოგონას შეიძლება მენსტრუაციული ციკლის ნებისმიერი იმ ტიპის 
მოშლილობა აღენიშნებოდეს, რაც ზრდასრულ ქალბატონებს აწუხებს. პრობლემის გაახალგაზრდავებას მრავალი ფაქტორი განაპირობებს, მათ შორის – ძილ-ღვიძილის რიტმის, საზოგადოდ, ბიორიტმების დარღვევა, ფიზიკური აქტივობის შემცირება, უპირატესად ნახშირწყლოვანი საკვებით კვება. თუკი ამას გენეტიკური წინასწარგანწყობაც დაერთო, პრობლემა ადრეულ ასაკში იჩენს თავს.
. მენსტრუაციული ციკლის დარღვევებს ხშირად ჰორმონული პრეპარატებით მკურნალობენ. გამართლებულია თუ არა პრობლემისადმი ამგვარი მიდგომა?
– მენსტრუაციული ციკლის დარღვევებს მართლაც ხშირად მკურნალობენ ჰორმონული კონტრაცეპტივებით, ისე, რომ პათოლოგიის აღმოცენების რეალურ მიზეზს არ შეისწავლიან. ამგვარი უპასუხისმგებლო დამოკიდებულება პათოლოგიას კიდევ უფრო აღრმავებს (ხშირად ანოვულაციასაც კი იწვევს) და საბოლოოდ უნაყოფობას განაპირობებს.
. რა პრინციპით მკურნალობენ მენსტრუაციული ციკლის დარღვევებს?
– ყოველი კონკრეტული შემთხვევა ინდივიდუალურ მიდგომას მოითხოვს. უთუოდ უნდა გავითვალისწინოთ გენეტიკური თავისებურებანი, კვების ხასიათი, ცხოვრების რეჟიმი, სტრესების არსებობა... ყოველივე ამის საფუძველზე ვადგენთ მკურნალობის ინდივიდუალურ გეგმას და, რაც მთავარია, მაქსიმალურად ვერიდებით ჰორმონული პრეპარატების დანიშვნას. 
. ცნობილია, რომ დიდი მნიშვნელობა აქვს სიმსივნური პათოლოგიების ადრეულ დიაგნოსტიკას. როგორ უნდა მოიქცეს ქალი, რომ სასქესო ორგანოების ახალწარმონაქმნებისგან დაზღვეული იყოს?
– სასქესო ორგანოების სიმსივნური პათოლოგიები თავიდან რომ ავიცილოთ, ყოველწლიურად უნდა ჩავიტაროთ პროფილაქტიკური შემოწმება. გაცილებით ხშირი კონტროლი სჭირდება მას, ვისაც რომელიმე გინეკოლოგიური პათოლოგია აღენიშნება. 
. არსებობს თუ არა კლინიკური ნიშანი, რომელიც ქალს სასქესო ორგანოების  სიმსივნური პათოლოგიის არსებობას გვაფიქრებინებს?
– ადრეულ ეტაპზე ეჭვის საფუძველი, ფაქტობრივად, არ არსებობს. ქალები როგორც წესი, სისხლდენის, ტკივილისა და მუცლის ზრდის გამო მოგვმართავენ, ეს სიმპტომები კი უკვე სიმსივნური პროცესის სიძველეზე მეტყველებს. გარდა ამისა, ქალი შეიძლება უჩიოდეს მეზობელი ორგანოების ფუნქციურ დარღვევებს და უნაყოფობას. 
. რომელი ასაკიდან არის მიზანშეწონილი პროფილაქტიკის მიზნით გინეკოლოგთან მისვლა?
– ნებისმიერ ასაკში, როცა კი ქალი ან მოზარდი გოგონა რაიმე საეჭვო ნიშანს შეამჩნევს, უთუოდ უნდა მიმართოს სპეციალისტს. 
ისიც გასათვალისწინებელია, რომ მოზარდ გოგონას ზრდასრული ქალის მსგავსად უნდა ჩაუტარდეს სრულფასოვანი გინეკოლოგიური გამოკვლევა: სასქესო ორგანოების ექოსკოპია, PAP-ტექნოლოგიით გაკეთებული ნაცხის ანალიზი და კოლპოსკოპია.
. უამრავ ქალს აწუხებს საკვერცხეების ანთება. ხშირად საუბრობენ ისეთ პრობლემაზეც, როგორიც კვერცხსავალი მილების შეხორცება და ამით გამოწვეული უნაყოფობაა. მაინც რა იწვევს ამგვარ ცვლილებებს?
– შიგნითა  სასქესო ორგანოების ანთებით დაზიანებას უპირატესად სქესობრივი გზით გადამდები ინფექციები იწვევს. ყველაზე ხშირად – ტრიქომონა, შემდეგ – ურეაპლაზმა, მიკოპლაზმა. ჩირქმბადი მიკროორგანიზმები ორგანიზმში უპირატესად გინეკოლოგიური მანიპულაციების (ხელოვნური აბორტის) და მშობიარობის დროს ხდება.
. სასქესო ორგანოების დაავადებათა ყველაზე არასასურველი, თუმცა ხშირი გართულებაა უნაყოფობა. რამდენად აქტუალურია ეს პრობლემა საქართველოში?
– ზუსტი სტატისტიკა არ არსებობს, თუმცა დაავადებები, რომლებიც უნაყოფობას იწვევს, დღითიდღე ხშირდება. ამის კვალობაზე, უნდა ვივარაუდოთ, რომ უნაყოფობაც მეტად აქტუალურია.
. როგორ მკურნალობენ გინეკოლოგიურ დაავადებებს?
– მკურნალობის ეფექტურობას მრავალი ფაქტორი განაპირობებს, უწინარეს ყოვლისა, სწორი დიაგნოზი, დაავადების განვითარების მექანიზმისა და ხელშემწყობი ფაქტორების გამოვლენა, მათი ლიკვიდაციის რაციონალური ხერხებისა და საშუალებების შერჩევა, ეს ყოველივე კი ექიმის პროფესიონალიზმზე გახლავთ დამოკიდებული. მკურნალობის ზოგადი პრინციპი ასეთია: რაც შეიძლება ნაკლები წამალი ან მათი თანმიმდევრული გამოყენება აუცილებლობის მიხედვით. პრაქტიკაში ძნელია ასეთი მზა ფორმულების მოწოდება. მაგალითად იმავე ჰიპერპროლაქტინემიის მკურნალობას მოვიხმობ. თუ პროლაქტინის დეფიციტი მისი მასინთეზებელი სიმსივნის არსებობით არ არის გამოწვეული, დროგამოშვებითი, ტრანზიტორული ხასიათისაა და ფუნქციური ჰიპერპროლაქტინემიის სახით ვლინდება, უპირატესობას ანიჭებენ არა ქიმიურ, არამედ ფიტოპრეპარატებს.
. დასასრულ, რას ურჩევდით ქალებს? 
– ჯანმრთელობაზე ზრუნვა ადამიანის ჩასახვისთანავე უნდა დავიწყოთ. დიდი მნიშვნელობა აქვს გოგონას აღზრდას, მის გათვითცნობიერებას გინეკოლოგიურ საკითხებში, არანაკლებ მნიშვნელოვანია ვაჟებისთვის ადეკვატური ინფორმაციის მიწოდება. მით უმეტეს, რომ ანდროლოგიური პრობლემები დღეს მრავალ მამაკაცს აწუხებს. 
ყველა ქალბატონმა უნდა გაითავისოს, რომ გინეკოლოგიური პათოლოგიების საუკეთესო მკურნალობა პროფილაქტიკაა. ურიგო არ იქნება, თუ დროდარო ექიმს ეწვევით და ზოგიერთი მეტად საჭირო გამოკვლევა ჩაიტარონ.
გარდა ამისა, გირჩევთ, მეტი ყურადღება გამოიჩინოთ ორალური კონტრაცეპტივებისა და ჩასახვის საწინააღმდეგო საშვილოსნოსშიდა საშუალებების (სპირალის) მიმართ. მათ დანიშვნას და გამოყენებას  წესების მკაცრი დაცვა სჭირდება. ქალს ჩასახვის საწინააღმდეგო საშუალება მხოლოდ და მხოლოდ სპეციალისტმა უნდა შეურჩიოს.
დაბოლოს, მსურს, რჩევა მივცე კლიმაქსური ასაკის ქალბატონებს. მენოპაუზა ქალის ცხოვრების ისეთივე ფიზიოლოგიური პეროდია, როგორიც ბავშვობა, პუბერტატული (გარდატეხის) და რეპროდუქციული ასაკი. ამიტომ თუ ყველაფერი ნორმალურად მიმდინარეობს, ქალს ჰორმონული მედიკამენტებით ზედმეტი მკურნალობა არამც და არამც არ დასჭირდება. სამკურნალო პრეპარატის დანიშვნა მხოლოდ მაშინ გახლავთ გამართლებული, როდესაც ქალბატონს კლიმაქსთან დაკავშირებული რომელიმე პათოლოგიური სინდრომი აღენიშნება. 
---------------------------------


გასაძლისი ტკივილი თუ…
მცირე მენჯის ღრუს არეში ტკივილი რომელ ქალს არ გამოუცდია! დისკომფორტს ან საკვერცხეების ანთებას ვაბრალებთ ხოლმე, ან წინარემენსტრუაციულ სინდრომს. ტკივილი მეტწილად გასაძლისია და ამიტომ თავის ნებაზე გვყავს მიშვებული: ცოტა მეტკინება და გამივლისო.
რისი ბრალიც არ უნდა იყოს მცირე მენჯის ღრუში აღმოცენებული ტკივილი, ყურადღება და გინეკოლოგის კონსულტაცია უთუოდ საჭიროა, მაგრამ სანამ გამოკვლევისთვის სპეციალისტს მიმართავთ, მოდი, თვალი გადავავლოთ იმ პათოლოგიებს, რომლებიც შეიძლება “ქალური” ტკივილის მიზეზად იქცეს.

“უწყინარი” ტკივილი
დისკომფორტს, რომელსაც პერიოდულ ტკივილს უწოდებენ და რომელიც თვეში ერთხელ, თითქმის ერთსა და იმავე დროს (მენსტრუაციული ციკლის შუა პერიოდში) აღმოცენდება, ფიზიოლოგიური ბუნება აქვს. ის  ოვულაციას უკავშირდება, ამიტომ მტკივნეული ოვულაციის სახელითაც იხსენიებენ. ტკივილი შეიძლება რამდენიმე წუთს ან რამდენიმე საათს გაგრძელდეს და შემდეგ უკვალოდ გაქრეს.
მტკივნეული ოვულაცია არ უკავშირდება პათოლოგიურ პროცესს და, ამდენად, ჯანმრთელობას არავითარ საფრთხეს არ უქმნის.

ტკივილი კრიტიკულ დღეებში
მუცლის ქვედა ნაწილში არცთუ იშვიათია ტკივილი და ქაჩვის შეგრძნება უშუალოდ მენსტრუაციის დროს ან რამდენიმე დღით ადრე. წინარემენსტრუაციულ მუცლის ტკივილს, როგორც წესი, თან სდევს სარძევე ჯირკვლების გადიდება, მუცლის შებერვა, უგუნებობა, მადის მომატება და ა.შ. ყველა ეს უსიამოვნება სპეციალისტებმა საერთო სახელწოდებით: წინარემენსტრუაციული სინდრომით – გააერთიანეს. მას განსაკუთრებული მკურნალობა არ სჭირდება, მაგრამ თუკი დისკომფორტი ძლიერია, უმჯობესია, გინეკოლოგს ესტუმროთ და ადეკვატური თერაპიული კურსი ჩაიტაროთ. 

ორგანული ტკივილი
როგორც სახელწოდებაც მიგანიშნებთ, ამ შემთხვევაში ტკივილის მიზეზი მცირე მენჯის ღრუს რომელიმე ორგანოს დაზიანება გახლავთ. მათ შორის ყველაზე გავრცელებული საშვილოსნოს დანამატების ანთებითი ცვლილებებია.
სალპინგოოოფორიტის, იმავე დანამატების ანთების, მთავარი მიზეზი ინფექციაა, უპირატესად – განმეორებითი. ანთებითი პროცესის უყურადღებოდ დატოვება, აქაოდა თავისთავად გაივლისო, არამც და არამც არ შეიძლება. ანთების შედეგად ხშირად შეხორცებითი პროცესი ვითარდება, რაც საბოლოო ჯამში უნაყოფობას განაპირობებს.
“ქალური” ტკივილის კიდევ ერთი ხშირი მიზეზი ენდომეტრიოზია, რომლის დროსაც საშვილოსნოდან აშრევებული სისხლძარღვოვანი ქსოვილის ნაფლეთები (რომლებიც, ჩვეულებრივ, მენსტრუაციის დროს გამოიდევნება ორგანიზმიდან), უადგილო ადგილას, მაგალითად კვერცხსავალ მილებში, საკვერცხეებსა და მუცლის ღრუში გადაიტყორცნება. ტკივილი, როგორც წესი, მენსტრუაციის დროს აღმოცენდება.

ტკივილი ორსულობის დროს
ხშირად მუცლის ქვედა ნაწილში დაჭიმვისა და ქაჩვის შეგრძნება საშვილოსნოს ტონუსის მატებაზე მიუთითებს, თუმცა დიაგნოზის დასმა მხოლოდ ექოსკოპიური კვლევის შედეგად შეიძლება. არცთუ იშვიათად ძლიერი ტკივილის მიზეზი სპონტანური აბორტი (მუცლის მოშლა) გახლავთ. კიდევ ერთი ფაქტორი, რომელიც ორსულობის ადრეულ ეტაპზე მენჯის ღრუს არეში ტკივილს (ამასთანავე – საკმაოდ ძლიერს) განაპირობებს, საშვილოსნოსგარე ორსულობაა, როდესაც კვერცხსავალი მილი სკდება და პერიტონიტის საშიშროება იქმნება. 

იზრუნე საკუთარ ჯანმრთელობაზე
დედობა ქალისთვის უდიდესი მადლია, ამიტომ სავსებით ბუნებრივია, რომ მედიცინის ისეთი დარგი, როგორიც რეპროდუქტოლოგიაა, დღესდღეობით მეტად პრიორიტეტული გახლავთ, მაგრამ ვიდრე სპეციალისტს მიმართავდეს, ქალმა თავადვე უნდა იზრუნოს საკუთარ ჯანმრთელობაზე. ამისთვის რამდენიმე კანონზომიერების გათვალისწინება მოგიწევთ:
. რეპროდუქციულ (შვილოსნობის) ფუნქციაზე ნეგატიურად აისახება მწვავე და ქრონიკული ინფექციური პათოლოგიები, მათ შორის – ქრონიკული ტონზილიტი და გრიპით ხშირი ავადობა.
. მოერიდეთ გადაცივებას, განსაკუთრებით – მენსტრუაციის დროს. აუზში ან ზღვაში ცურვის შემდეგ სველი საცურაო კოსტიუმი მალევე გაიხადეთ, თორემ ადვილი შესაძლებელია, საშვილოსნოს დანამატების ანთებას გამოჰკრათ ხელი.
. მცირე მენჯის ღრუს ორგანოთა ფუნქციებს ვნებს მოჭერილი შარვლები – ისინი აწვება სისხლძარღვებს, რომლებიც ორგანოებს სისხლით ამარაგებს. უპირატესობა ბუნებრივი მასალის თეთრეულს მიანიჭეთ.
. არამც და არამც არ გირჩევთ თვითმკურნალობას, განსაკუთრებით – სათბურის დადებას ან ყურმოკრული მედიკამენტების მიღებას.
-------------------------------------

მეტად საპასუხისმგებლო ვიზიტი

ქალები გინეკოლოგს ორ შემთხვევაში მიმართავენ: ერთხელ – როდესაც ორსულობას ეჭვობენ, ხოლო მეორედ – როცა რომელიმე ქალური დაავადება აწუხებთ. როგორც გინეკოლოგები გვაფრთხილებენ, მრავალი ასეთი პათოლოგია ფარულად მიმდინარეობს და თავს მხოლოდ მაშინ იჩენს, როდესაც განკურნება უკვე მეტისმეტად რთულია. ამიტომ ურიგო არ იქნება, თუ გინეკოლოგთან პროფილაქტიკის მიზნით დროდადრო მაინც შევივლით. სპეციალისტები გვირჩევენ, გინეკოლოგიური პრობლემებისგან თავის დაზღვევის მიზნით 18 წელზე უფროსი ასაკის ყველა ქალი კოსულტაციისთვის წელიწადში ერთხელ მაინც ეწვიოს ექიმს.

არ გადადო 
მაშინაც კი, როცა სიმპტომები თვალსაჩინოა, ბევრი თავს არიდებს გინეკოლოგთან ვიზიტს. ისეთი შემაწუხებელი ნიშნებიც კი, როგორიც არის ძლიერი ტკივილი და დაქაჩვის შეგრძნება მუცლის ქვედა ნაწილში, სხეულის ტემპერატურის მატება,  უხვი, სპეციფიკური სუნის მქონე გამონადენი საშოდან,  გამონაყარი გარეთა სასქესო ორგანოებზე, ქავილისა და წვის შეგრძნება, – უყურადღებოდ რჩება. ზოგჯერ უსიამოვნო შეგრძნებები თავისთავად გაივლის, თუმცა ეს იმას არ ნიშნავს, რომ პრობლემას თავი სამუდამოდ დავაღწიეთ – ვერაგი დაავადება ფარულად განაგრძობს არსებობას და ელის ხელსაყრელ წუთს, რათა ადრინდელზე მეტი აგრესიულობით შეგვახსენოს თავი.
გინეკოლოგთან ვიზიტი არამც და არამც არ გადადო, თუკი:
. გაწუხებს უხვი მძაფრსუნიანი გამონადენი საშოდან, რასაც ერთვის ქავილის შეგრძნება და წვა. დაგერღვა მენსტრუაციული ციკლი: გაქვს უხვი და ხანგრძლივი (7-10 დღეზე მეტი) მენსტრუაციული სისხლდენა; 
. სისხლდენა სხვა დღეებშიც იჩენს თავს ან საცვლებზე პერიოდულად სისხლის ლაქები ჩნდება;
. მენსტრუაციამ “დაიგვიანა” (არ აქვს მნიშვნელობა, გქონდა თუ არა სქესობრივი კავშირი);
. გარეთა სასქესო ორგანოებზე მცირე ზომის წანაზარდები შენიშნე, ლორწოვანი გარსი გაღიზიანებული და შეწითლებულია. 

გაითვალისწინე: მედიკამენტების (უპირატესად – ანტიბიოტიკების) არაადეკვატური მიღება დაავადებას არ სპობს, მაგრამ აქრობს, უჩინარს ხდის სიმპტომებს, რაც მეტად სახიფათოა – დროთა განმავლობაში, თითქოსდა სრულიად უმიზეზოდ, თავს წამოყოფს ისეთი მძიმე გართულება, როგორიც კვერცხსავალი მილების შეხორცებითი გადაგვარება და ამით განპირობებული უნაყოფობაა. 

ქალური გამოცდის წინ
გინეკოლოგთან ვიზიტი ერთგვარი ქალური გამოცდაა. ისევე, როგორც ყველა სხვა გამოცდის წინ, მომზადება არც ამ შემთხვევაში გაწყენდა. ამისთვის რამდენიმე რჩევა გაითვალისწინე:
. ვიზიტი მენსტრუაციის მომდევნო პერიოდისთვის დაგეგმე. კრიტიკულ დღეებში ექიმთან წასვლას არამც და არამც არ გირჩევ
. ზუსტად გაიხსენე უკანასკნელი მენსტრუაციის დაწყების თარიღი. ზოგჯერ ექიმი პირველი მენსტრუაციის დაწყების ასაკითაც ინტერესდება. 
. ექოსკოპიური გამოკვლევისას ზოგჯერ საშარდე ბუშტი დაცლილი უნდა იყოს. ამის თაობაზე სპეციალისტს წინასწარ ჰკითხე.
. ხშირად საჭიროა, ექიმთან პარტნიორთან ერთად მიხვიდე, გამოკვლევები ორივემ ჩაიტაროთ და, შესაბამისად, ორივემ იმკურნალოთ. ეს მაშინ, როცა ქალს სგგი (სქესობრივი გზით გადამდები ინფექცია) აქვს ან უნაყოფობას უჩივის. უკანასკნელ შემთხვევაში დამნაშავე ხშირად მამაკაცია. ამას ხშირად მას შემდეგ ხვდებიან, რაც ქალს ყველა ნაცადი მეთოდით უმკურნალებენ, მაგრამ შედეგს ვერ მიიღებენ. ასე რომ არ მოხდეს, თავიდანვე წყვილის გამოკვლევაა საჭირო.

***
და კიდევ: თუკი არასასურველი ორსულობისგან თავის დაზღვევას გადაწყვეტ, კონტრაცეფციის მეთოდის შესარჩევად უთუოდ გინეკოლოგს მიაკითხე. მხოლოდ სპეციალისტს შეუძლია განსაზღვროს, თავდაცვის რომელი საშუალება შეესატყვისება ყველაზე უკეთ შენ ასაკს.
--------------------

ვარჯიში დაზარალებული ორგანოებისთვის

დამეთანხმებით – გინეკოლოგიური მანიპულაცია ქალის სუსტი ორგანიზმისთვის მეტად დიდი დატვირთვაა, მით უმეტეს, როცა საქმე ქირურგიულ, თუნდაც უმნიშვნელო, ოპერაციას ეხება. არ აქვს მნიშვნელობა, ქირურგიული ჩარევა საკვერცხეებზე მოხდება თუ საშვილოსნოს ყელზე, – გინეკოლოგიური ოპერაციის შემდეგ ორგანიზმს ნებისმიერ შემთხვევაში სჭირდება მოძლიერება, ხოლო მცირე მენჯის ღრუს “დაზარალებულ” ორგანოებს – სისხლით ადეკვატური მომარაგება. ამისთვის საუკეთესო გზა სპეციალური ვარჯიში გახლავთ.
გთავაზობთ ვარჯიშთა კომპლექსს, რომელთა შესრულება მარტივი გინეკოლოგიური ოპერაციიდან სულ რამდენიმე დღის შემდეგ შეიძლება (მძიმე ოპერაციის შემდეგ, სასურველია, რამდენიმე კვირა არ ივარჯიშოთ). ყოველდღიურად ან ორ დღეში ერთხელ სულ რაღაც ოც-ოცდახუთწუთიანი წავარჯიშება საკმარისია, რომ მცირე მენჯის ღრუს ორგანოების სისხლმომარაგება აღდგეს, გულ-სისხლძარღვთა, სასუნთქი და საჭმლის მომნელებელი სისტემების ფუნქციები ნორმას დაუბრუნდეს. ყველა ვარჯიში ზურგზე წოლისას სრულდება.

1.    ფეხები ერთმანეთს მიატყუპეთ და გამართეთ. ხელები სხეულის გასწვრივ დაიწყვეთ. გაჭიმული ხელები ნელა გადაიტანეთ თავს უკან და ცხვირით ღრმად ჩაისუნთქეთ, შემდეგ ნელა დაუშვით სხეულის გასწვრივ და პირით ამოისუნთქეთ. გაიმეორეთ 3-4-ჯერ.
2.    ხელები მოხარეთ და მუშტებად შეკარით. ფეხები გაჭიმეთ, ტერფები წინ მიმართეთ. მუშტები გაშალეთ, პარალელურად ფეხები კოჭ-წვივის სახსარში მოხარეთ და ტერფები თქვენსკენ მიზიდეთ. დაუბრუნდით საწყის მდგომარეობას. ვარჯიში 5-6-ჯერ გაიმეორეთ.
3.    ფეხები გამართეთ, შემდეგ ნელა მოხარეთ მუხლის სახსარში, ისე, რომ ტერფები იატაკს არ ააცილოთ. რამდენიმე წამით ასე გაჩერდით და საწყის მდგომარეობას დაუბრუნდით. ვარჯიში 2-3-ჯერ გაიმეორეთ.
4.    ფეხები მაქსიმალურად მოხარეთ მუხლებში, ისე, რომ ტერფები სხეულთან რაც შეიძლება ახლოს მივიდეს. ხელები ტანის გასწვრივ დაიწყვეთ და მენჯი რამდენიმე სანტიმეტრით მაღლა ასწიეთ. რამდენიმე წამს ასე გაჩერდით და საწყის მდგომარეობას დაუბრუნდით. ვარჯიში ნელა გაიმეორეთ 2-3-ჯერ.
5.    ხელები ბოქლომად შეკარით და თავქვეშ ამოიდეთ, იდაყვები აქეთ-იქით მიმართეთ. ფეხები გამართეთ. ხელების დახმარებით თავი და მხრები ისე წამოსწიეთ, რომ ნიკაპი გულმკერდს შეეხოს. დაუბრუნდით საწყის მდგომარეობას. გაიმეორეთ 3-4-ჯერ.
6.    ხელები სხეულის გასწვრივ დაიწყვეთ. ფეხები ჯერ გამართეთ, შემდეგ მარჯვენა კიდური გვერდზე გასწიეთ, კვლავ საწყის მდებარეობას დაუბრუნეთ (მიატყუპეთ მეორეს) და იგივე მოძრაობა მარცხენა ფეხით შეასრულეთ. ვარჯიში 3-4-ჯერ გაიმეორეთ.

ამ ვარჯიშების შესრულება რეკომენდებული არ არის:
. მაღალი ტემპერატურის;
. საერთო სისუსტის;
. მწვავე ანთებითი პროცესის;
. საშვილოსნოდან სისხლდენის;
. თრომბოფლებიტის;
. ანემიის;
. სისხლის მიმოქცევის მოშლის;
. გულისრევისა და ღებინების შემთხვევაში


კლიმაქსის პრობლემები

ცხოვრება ყოველთვის მშვენიერია
მენოპაუზა, კლიმაქსი – ეს ტერმინები რატომღაც სიბერესთან ასოცირდება და შიშს იწვევს. რეალურად კლიმაქსი ქალის ცხოვრების გარდაუვალი მოვლენაა, რომელიც საკმაოდ დიდხანს გრძელდება: სტატისტიკის მიხედვით, ევროპაში ქალის სიცოცხლის საშუალო ხანგრძლივობა 78 წელია, ამ ხნის 35-40% კი მენოპაუზის წილად მოდის.
მენოპაუზის თავისებურებებზე, კლიმაქსური სინდრომის პრობლემებსა და პროფილაქტიკაზე გვესაუბრება “ავერსის კლინიკის” გინეკოლოგიური სამსახურის უფროსი მარინა მაჩაიძე:
– განსაზღვრული ასაკობრივი ცვლილებები ქალის ორგანიზმში ჯერ კიდევ 35-დან 50 წლამდე ასაკში იჩენს თავს. ეს ის პერიოდია, როდესაც საკვერცხეების ბიოლოგიური სიცოცხლე დასასრულს უახლოვდება, ამის კვალობაზე, მცირდება ჰორმონების გამომუშავება, კვერცხუჯრედის მომწიფება უფრო და უფრო იშვიათდება, რაც არარეგულარული მენსტრუაციული ციკლით ვლინდება და ადრე თუ გვიან დგება დრო, როდესაც საკვერცხეების ფუნქციონირება წ

ყდება. ამით იწყება მენოპაუზა.
სტატისტიკური მონაცემებით, მენოპაუზა საშუალოდ 51 წლის ასაკში დგება, მაგრამ არ არის გამორიცხული, ორგანიზმის ინდივიდუალური თავისებურებების კვალობაზე, უფრო ადრე –  45 წლიდან ან ოდნავ მოგვიანებით – 55 წლისთვის დაიწყოს.
 რამდენად გახშირდა კლიმაქტერიული სინდრომი? გარდა ჩვეული ნიშნებისა, მაგალითად, ალებისა, რით შეიძლება გამოვლინდეს იგი?
– თავის ტვინში მდებარე განსაზღვრული ფუნქციის მქონე ცენტრები, ჰიპოფიზი და ჰიპოთალამუსი, რომლებიც ჰორმონულ პროცესებს არეგულირებენ, დაკავშირებულნი არიან თავის ტვინის სხვა უბნებთან, მათ შორის – ვეგეტატიური ნერვული სისტემის ცენტრებთან, რომლებსაც სისხლის მიმოქცევისა და სხეულის ტემპერატურის რეგულირება აკისრიათ, ასევე – ლიმბურ სისტემასთან, რომელიც “გრძნობათა ცენტრს” წარმოადგენს. ამდენად, ძნელი მისახვედრი არ არის, რომ მენოპაუზით განპირობებული ჰორმონული ცვლილებები შესაძლოა ფსიქოვეგეტატიური დარღვევების მიზეზად იქცეს.
უნდა ითქვას, რომ ეს დარღვევები ყოველთვის არ იჩენს თავს. მენოპაუზის პერიოდში ქალების მხოლოდ მესამედი უჩივის შემაწუხებელ მოვლენებს, მესამედს მხოლოდ მსუბუქი დისკომფორტი აღენიშნება, ხოლო მესამედს 

 

კლიმაქსი ყოველგვარი ცვლილების გარეშე გადააქვს.
ძნელი სათქმელია, რომელ ჯგუფში აღმოჩნდება ესა თუ ის ქალი, რადგან ეს სრულიად არ არის დამოკიდებული პიროვნულ თავისებურებებზე, თუმცა, მერწმუნეთ, უსიამოვნების დაძაბულ მოლოდინს კარგი არაფერი მოაქვს. მით უმეტეს, თუ გავითვალისწინებთ, რომ კლიმაქსთან დაკავშირებული დისკომფორტი დღეს გადაუჭრელ პრობლემას აღარ წარმოადგენს.
საზოგადოდ, როდესაც კლიმაქსურ გარდაქმნებს განვიხილავთ, ორი ტიპის ცვლილებები უნდა გამოვყოთ.

ისეთი ფსიქოვეგეტატიური დარღვევები, როგორიც არის ალები, ოფლიანობა, ძილის დარღვევა, დეპრესიული მდგომარეობა, ადვილად აგზნება, შფოთვა, თავბრუხვევა, გულისცემის აჩქარება, მგრძნობელობის დარღვევა სხეულის სხვადასხვა ადგილას (პარესთეზია), ჰორმონული ცვლილებების ლოგიკურ ასახვას წარმოადგენს. მათ შესაძლოა ჯერ კიდევ მენოპაუზამდე იჩინონ თავი. რა უსიამოვნოც არ უნდა იყოს ეს გამოვლინებები, ჯანმრთელობას სერიოზულ საფრთხეს არ უქადის და კლიმაქსური გარდაქმნების დამთავრების შემდეგ თავისთავად ქრება.


გაცილებით მნიშვნელოვანია ის ცვლილებები, რომლებიც ჰორმონების ხანგრძლივი დეფიციტის შედეგს წარმოადგენს, ნელა მიმდინარეობს და მენოპაუზიდან რამდენიმე წლის შემდეგ ვლინდება. ასეთ დარღვევათა რიცხვს მიაკუთვნებენ გულ-სისხლძარღვთა სისტემის დაავადებებს, ოსტეოპოროზს, შარდის ბუშტის პრობლემებს (შარდის შეუკავებლობა და სხვა). ამგვარი პათოლოგიები, ფსიქოვეგეტატიური დარღვევებისგან განსხვავებით, მეტ-ნაკლებად ყველა ქალში იჩენს თავს.
მეცნიერებმა ერთი საინტერესო მოვლენა შეამჩნიეს: იაპონელ, ჩინელ და სხვა აზიური ქვეყნების მკვიდრ ქალებს კლიმაქსის პერიოდში ნაკლებად აწუხებთ ალები, ძალიან იშვიათია მათ შორის ოსტეოპოროზიც. ამის მიზეზი ყოფილა მათი კვების რაციონი, რომელიც ცხიმის დაბალი შემცველობითა და მცენარეული ესტროგენებით მდიდარი სოიის პროდუქტების სიუხვით გამოირჩევა.
 შესაძლებელია თუ არა, კლიმაქსმა ფსიქიკური აშლილობა გამოიწვიოს?
– სავსებით შესაძლებელია, მენოპაუზის დროს მომხდარმა ცვლილებებმა ფსიქიკური აშლილობის პროვოცირება მოახდინოს. ამ შემთხვევაში აუცილებელია  ფსიქიატრის ან ნევროლოგის კონსულტაცია.
 ხშირად ოსტეოპოროზს კლიმაქსთან ერთად იხსენიებენ. რა არის ოსტეოპოროზი და რატომ იჩენს თავს უპირატესად მენოპაუზის ასაკში?
– ოსტეოპოროზი ძვლების სისტემური დაავადებაა, რომელსაც ძვლოვანი მასის შემცირება, სიმყიფის მატება და მოტეხილობების გახშირება ახასიათებს. მიუხედავად იმისა, რომ ოსტეოპოროზის ცნება სათავეს XVIII საუკუნიდან იღებს, მსოფლიოს მრავალი ქვეყნის მეცნიერები დაავადების საერთო დეფინიციაზე დღემდე ვერ შეთანხმებულან. ეს არც არის გასაკვირი, ვინაიდან წლების განმავლობაში ოსტეოპოროზი რენტგენოლოგიურ ფენომენს წარმოადგენდა. სწორედ კვლევის ამ მეთოდით ხდებოდა მისი ლოკალური, კეროვანი, რეგიონული თუ სისტემური ფორმების იდენტიფიკაცია. თანამედროვე წარმოდგენით, დაავადებაზე ლაპარაკი შესაძლებელია მხოლოდ იმ შემთხვევაში, როდესაც სახეზეა ძვლის მინერალური სიმკვრივის შემცირება თუნდაც არაერთგვაროვანი, მაგრამ ჩონჩხის ყველა ფრაგმენტში არსებული მიკროსტრუქტურული ცვლილებებით. რაც შეეხება მენოპაუზასთან ოსტეოპოროზის კავშირს, საქმე ის არის, რომ ესტროგენები ძვლებში კალციუმის ჩალაგებას ასტიმულირებს, კლიმაქსის შემდეგ კი სისხლში ესტროგენების კონცენტრაცია მცირდება, რასაც ძვლების კალციუმით გაღარიბება და ოსტეოპოროზის განვითარება მოჰყვება.
ოსტეოპოროზს ჩუმ მძარცველს უწოდებენ, ვინაიდან ამ დაავადებისთვის დამახასიათებელია ნელი ტემპით მიმდინარე ძვლების განლევა, რომელიც თავდაპირველად არაფრით ვლინდება და არავითარ უსიამოვნო შეგრძნებას არ იწვევს.
ოსტეოპოროზის პირველი ნიშანი სიმკვრივედაკარგული მალების მიკროდაზიანებებით განპირობებული ტკივილებია. ამის შემდეგ ხერხემალი მოკლდება და დეფორმირდება. ეს ცვლილებები უფრო ხანდაზმული ქალებისთვის არის დამახასიათებელი. მოგვიანებით ვლინდება ოსტეოპოროზის ყველაზე მძიმე ფორმა – ბარძაყის თავის მოტეხილობა. 
 რას მიიჩნევენ ოსტეოპოროზის განვითარების რისკისფაქტორებად?
– ამ დაავადების ჩამოყალიბების ალბათობას ზრდის:
. გენეტიკური განწყობა;
. ნაადრევი მენოპაუზა;
. კალციუმის დეფიციტი;
.  თამბაქოს წევა;
. ალკოჰოლის ჭარბი მიღება (40 მლ-ზე მეტი სუფთა სპირტი დღეში);
. კოფეინის ჭარბი მიღება  (2 ფინჯან ყავაზე მეტი დღეში);
. ზოგიერთი მედიკამენტის მიღება;
. ჰიპოდინამია;
. დამწვრობა;
. ჰიპოტროფია. 
 შესაძლებელია თუა არა, ოსტეოპოროზით დაავადებულმა ტრავმები თავიდან აიცილოს?
– კლიმაქსური სინდრომის სამკურნალოდ ქალს სედაციური, ჰიპოტენზიური და სხვა ჯგუფის პრეპარატების მიღება უხდება, რომლებსაც უნარი შესწევთ, შეცვალონ ფსიქიკა, დააქვეითონ მხედველობა, მგრძნობელობა, დაარღვიონ ქვედა კიდურების ფუნქცია, ამიტომ მაღალია ტრავმის, დაცემის ალბათობა. უსაფრთხოებისთვის აუცილებელია, რისკის ფაქტორები მინიმუმამდე დავიყვანოთ: ოთახიდან მოვაშოროთ საგნები, რომლებიც ადამიანს გადაადგილებაში ხელს უშლის, დავაგოთ რბილი იატაკი, კიბეს გავუკეთოთ მოაჯირი, უზრუნველვყოთ ადეკვატური განათება.
 შესაძლებელია თუ არა, რენტგენოლოგიური კვლევის საშუალებით დროულად შეფასდეს, რამდენად არის შეცვლილი ძვლის სიმკვრივე?
– ძვლის სიმკვრივეზე კვლევის რენტგენოლოგიური მეთოდი არცთუ ისე ზუსტ წარმოდგენას იძლევა. ამ მიზნით უმთავრესად ვიყენებთ ერთფოტონურ და ორფოტონურ აბსორბციომეტრიას, კომპიუტერულ ტომოგრაფიას. ახლახან შემუშავებულ იქნა ორენერგეციკული რენტგენოაბსორბციული მეთოდი (DEXA), რომელიც ძვლოვანი ქსოვილის მოცულობითი ვიზუალიზაციისა და ძვლის სიმკვრივის შესახებ მაქსიმალურ ინფორმაციას გვაწვდის.
 რა პრინციპით მკურნალობენ ოსტეოპოროზს?
– ოსტეოპოროზის მკურნალობა რთული ამოცანაა. თერაპიის მთავარი მიზანია: 
. ძვლოვანი მასის შენარჩუნება ან დანაკარგის შემცირება;
. ტკივილის სინდრომის შესუსტება;
. პაციენტის ზოგადი მდგომარეობის გაუმჯობესება;
. მამოძრავებელი აქტივობის გაზრდა;
. ცხოვრების ხარისხის შეძლებისდაგვარად გაუმჯობესება.
ოსტეოპოროზის სამკურნალო პრეპარატებიდან განსაკუთრებით ეფექტიანია:
. ნივთიერებები, რომლებიც ძვლის რეზორბციის პროცესს თრგუნავს: კალციუმი, D ვიტამინი, ესტროგენები, კალციტონინები, ბისფოსფონატები;
. ნივთიერებები, რომლებიც ძვლის ფორმირების აქტივაციას უწყობს ხელს: ფტორიდები, კალციტროილი, ანდროგენები, ზრდის ჰორმონი, პარათირეოიდული ჰორმონი. 
პირველი ჯგუფის პრეპარატები მაღალი ეფექტურობით  გამოირჩევა და ჯანმრთელობისთვის სრულიად უსაფრთხოა, ამიტომ ფართოდ გამოიყენება ოსტეოპოროზის საპროფილაქტიკოდ და სამკურნალოდ. მეორე ჯგუფის პრეპარატები ჯერ კიდევ შესწავლის პროცესშია და მათი გამოყენება კლინიკურ პრაქტიკაში ჯერჯერობით შეზღუდულია.
 არსებობს თუ არა კლიმაქტერული სინდრომისა და ოსტეოპოროზის პრევენციის საშუალება? აქვს თუ არა მნიშვნელობა ცხოვრების წესს, კვებას, ფიზიკურ დატვირთვას?
– მიჩნეულია, რომ მენოპაუზასთან დაკავშირებული მძიმე დარღვევების თავიდან აცილება სამი ძირითადი მექანიზმით არის შესაძლებელი. ესენია:
. ჰორმონების დეფიციტის შევსება;
. ჯანსაღი, დაბალანსებული კვება;
. საკმარისი ფიზიკური აქტივობა.
სწორედ ჰორმონების დეფიციტის შევსების შემდეგ იზრდება ძვლების სიმკვრივე და თითქმის ნახევრდება გულ-სისხლძარღვთა დაავადებების განვითარების რისკი. შარდის ბუშტისა და საშოს პრობლემების მოგვარება კი ადგილობრივი მკურნალობითაც შესაძლებელია. ამ მიზნით ესტროგენშემცველი კრემები და საშოს სანთლები გამოიყენება.
ჯანსაღი და დაბალანსებული კვება კალციუმითა და ვიტამინებით მდიდარი მცენარეული საკვების მიღებას, ცხოველური ცხიმების და ცომეულის შეზღუდვას გულისხმობს, მაგრამ ისიც უნდა ვიცოდეთ, რომ ესტროგენების დაუხმარებლად კალციუმი ძვლებში ვერ დამაგრდება.
კვების რაციონი სიმსუქნის თავიდან აცილებასაც უნდა ისახავდეს მიზნად, ვინაიდან ცხიმის ყოველი ზედმეტი კილოგრამი, რომელიც მუცლის არეში გროვდება, ზრდის მენჯის ფუძის კუნთებზე დატვირთვას და, შესაბამისად, შარდის ბუშტის ფუნქციის მოშლის ალბათობას.
რეგულარული ფიზიკური ვარჯიში სისხლის მიმოქცევას აუმჯობესებს, რაც ხელს უწყობს ძვლებში კალციუმის ცვლას და მნიშვნელოვანი სასიცოცხლო ფუნქციების მქონე ორგანოთა კვებას. შარდის ბუშტის ფუნქციის მოსაწესრიგებლად მენჯის ფუძის კუნთების მიზანმიმართული ვარჯიშებსაც იყენებენ.
გახსოვდეთ: ოსტეოპოროზის მკურნალობა საკმაოდ რთული და ხანგრძლივი პროცესია. გაცილებით ეფექტურია მისი პროფილაქტიკა. იმისთვის, რომ 70 წლის ასაკში ოსტეოპოროზმა არ შეგაწუხოთ, მის თავიდან ასაცილებლად ზრუნვას ამთავითვე შეუდექით.
 დაბოლოს, რას ურჩევდით ქალბატონებს?
– ადეკვატური ჰორმონოთერაპიის საშუალებით ქალმა 50 წლის შემდეგაც შეიძლება შეინარჩუნოს მიმზიდველობა. გარდა ამისა, ქალს ამ ასაკში უფრო მეტად სცალია საკუთარი თავისთვის, შეუძლია, მეტი დრო დაუთმოს ფიზიკურ აქტივობას და გააკეთოს ყველაფერი ის, რისთვისაც მანამდე ვერ იცლიდა.

რა იწვევს მენსტრუაციული ციკლის დარღვევას

კრიტიკული მდგომარეობა
მენსტრუაციას ხშირად დისკომფორტი ახლავს თან, ზოგჯერ – იმდენად ძლიერი, რომ ქალს გაჩენის დღეს აწყევლინებს. როგორც ჩანს, ამიტომაც შეარქვეს თვის რამდენიმე გაუსაძლის დღეს კრიტიკული. 
კრიტიკული დღეების მოახლოებას ხშირად ოჯახის წევრებიც კი გრძნობენ – ქალს განწყობა რადიკალურად ეცვლება, კაპასობს, ჭირვეულობს, ზოგჯერ კი მენსტრუაცია იმდენად სერიოზულ პრობლემად იქცევა, რომ სპეციალისტსაც კი საგონებელში აგდებს. 
მაინც რა იწვევს მენსტრუაციული ციკლის დარღვევებს? შესაძლებელია თუ არა პრობლემის თავიდან აცილება? ამ და სხვა აქტუალურ საკითხებზე გვესაუბრება “ავერსის კლინიკის” ცენტრალური ფილიალის გინეკოლოგი თეონა სალუქვაძე.

 ქალბატონო თეონა, რამდენად  ხშირია მენსტრუაციული ციკლის დარღვევა?
– მენსტრუაციული ციკლის დარღვევა ყველაზე გავრცელებულ გინეკოლოგიურ  პათოლოგიად ითვლება. სტატისტიკის თანახმად, ის ყოველ მეორე ქალს აქვს. 
 უპირატესად რომელი დარღვევის გამო მოგმართავენ ქალბატონები?
– არსებობს მენსტრუაციული ციკლის დარღვევის სხვადასხვა ტიპი: შემცირებული მენსტრუაცია ანუ  ოლიგომენორეა – ამ დროს მენსტრუაციული ციკლის ხანგრძლივობა 35 დღეზე მეტია; ხშირი მენსტრუაციები – პოლიმენორეა, როდესაც შუალედი 25 დღეზე ნაკლებია; არარეგულარული ციკლი – დისმენორეა; მენსტრუაციის არარსებობა  – ამენორეა; მტკივნეული მენსტრუაცია  – ალგოდისმენორეა; ჭარბი მენსტრუაცია  – ფაქტობრივად სისხლდენა ანუ მენორაგია. მენსტრუაციული ციკლის დარღვევის ზემოთ ჩამოთვლილი ტიპებიდან ყველაზე ხშირია ალგოდისმენორეა.
  შეიძლება თუ არა, ყოველგვარი დარღვევა პათოლოგიად ჩაითვალოს და მკურნალობა დაინიშნოს?
– არარეგულარული მენსტრუაცია მოზარდ გოგონებში პირველი მენსტრუაციიდან (მენარქედან) და კლიმაქსის დადგომამდე ორი წლის განმავლობაში არ 
ითვლება პათოლოგიად, ოღონდ მხოლოდ მაშინ, თუ მენსტრუაციული ციკლის დარღვევა არ არის გამოხატული სისხლდენით. ამ შემთხვევაში მკურნალობა საჭირო არ არის. ყველა სხვა შემთხვევაში საჭიროა გამოკვლევების ჩატარება, მიზეზის დადგენა და დროული სათანადო მკურნალობა. ახალგაზრდა ქალები უყურადღებობამ შესაძლოა უშვილობამდე  მიიყვანოს.  
 რომელი ასაკის ქალებისთვის არის უფრო ჩვეული მენსტრუაციული ციკლის დარღვევა? ხშირია თუ არა ეს პრობლემა მოზარდ გოგონებში?
– მენსტრუაციული ციკლის დარღვევა ყველა ასაკში გვხვდება. ყველაზე  ხშირად, დაახლოებით 35-57%-ში, როგორც უკვე მოგახსენეთ, ალგოდისმენორეა აღინიშნება, ამ პათოლოგიას კი უპირატესად 18-დან 48 წლამდე ასაკის ქალები უჩივიან. 18-45%-ში ალგოდისმენორეა შერწყმულია უშვილობასთან, რაც ხშირად ენდომეტრიოზით არის გამოწვეული. დისფუნქციური ანუ იუვენილური სისხლდენები 12-დან 19 წლამდე ასაკში ასიდან 15 გოგონას აქვს და გამოწვეულია რეპროდუქციული სისტემაში  ჰორმონული ბალანსის დარღვევით, უფრო ზუსტად, ჰიპოფიზურ-თირკმელზედა ჯირკვალ-საკვერცხეების სისტემაში ჩამოუყალიბებელი ჰორმონული ფონით. არანაკლებ მნიშვნელოვანია ხშირი ინფექციური პროცესი, ძლიერი  ფიზიკური და ფსიქიკური დატვირთვა.
რეპროდუქციული ასაკის ქალბატონებში დისფუნქციური სისხლდენა და, საზოგადოდ, მენსტრუაციული ციკლის დარღვევა უფრო ხშირია  – ასიდან დაახლოებით 20 შემთხვევაში გვხვდება. ამ ასაკის ქალებს ხშირად აქვთ პათოლოგიური სისხლდენაც მენსტრუაციის შეფერხებიდან 1,5-6 თვის შემდეგ.  ამის მიზეზი ხშირად  ორგანული პათოლოგიაა, უმეტესად  – ენდომეტრიუმის პოლიპი და`ან  ჰიპერპლაზია, საშვილოსნოს მიომა.
 ალბათ, სხვადასხვა ტიპის დარღვევას სხვადასხვა  მიზეზი და რისკის ფაქტორი აქვს. არის თუ არა ამ კუთხით მნიშვნელოვანი ცხოვრების რიტმი? კვება? კონტრაცეპტივების არასწორი მიღება?
– მენსტრუაციული ციკლის დარღვევის მიზეზი შესაძლოა იყოს ავიტამინოზი, ხშირი დიეტა,  ჰორმონული დარღვევა, ფსიქიკური ტრავმა, ინფექციური დაავადება, გინეკოლოგიური  ჩარევა, ღვიძლის დაავადება, სიმსუქნე.  არანაკლებ როლს ასრულებს გენეტიკური განწყობაც. 
რაც შეეხება ჩასახვის საწინააღმდეგო ჰორმონულ პრეპარატებს, მენსტრუაციებს შორის სისხლდენებს ზოგჯერ მათი მართებული მიღებაც იწვევს. ეს დარღვევა დროებითია და თავისთავად დგება მწყობრში, თუმცა ზოგჯერ საჭიროა ჰორმონების უფრო მაღალი შემცველობის მქონე კონტრაცეპტივზე გადასვლა. დაიხსომეთ: კონტრაცეპტივების არასწორი მიღება და ექიმის რჩევის გარეშე თავის დანებება მენსტრუაციის დარღვევას, ზოგჯერ სისხლდენასაც კი იწვევს.
 რამდენად საშიშია აღნიშნული პრობლემის უყურადღებოდ დატოვება ან თვითმკურნალობა? 
– თუ მენსტრუაციული ციკლის დარღვევა გამოხატულია სისხლდენით, ეს გამოიწვევს ანემიას, ორგანიზმის დასუსტებას, საშვილოსნოს და მისი დანამატების ინფექციურ დაავადებებს, საბოლოოდ კი ჰემორაგიულ შოკს. სხვა სახის დარღვევებმა შესაძლოა უშვილობამდეც მიგვიყვანოს. თვითმკურნალობა,  მეგობრის  რჩევით ჰორმონული პრეპარატების მიღება დაუშვებელია. ამან შესაძლოა მდგომარეობა უფრო დაამძიმოს, არადიაგნოსტირებული დარჩეს ისეთი ორგანული პათოლოგიები, როგორიც არის საშვილოსნოს მიომა, ენდომეტრიუმის პოლიპი, ჰიპერპლაზია, ენდომეტრიოზი, საშვილოსნოს სიმსივნე, რომელიც ოპერაციულ ჩარევას საჭიროებს.
 როგორია მენსტრუაციული ციკლის დარღვევის მკურნალობის თანამედროვე პრინციპები?
– მკურნალობა მენსტრუაციული ციკლის დარღვევის ტიპზეა დამოკიდებული. თავდაპირველად უნდა დადგინდეს მიზეზი, ხშირად არაერთი, განისაზღვროს ჰორმონული სტატუსი (მენსტრუაციული ციკლის პირველ და მეორე ფაზაში), ჩატარდეს ფუნქციონალური ტესტები, ულტრაბგერითი კვლევა (მცირე მენჯის ორგანოების, ფარისებრი ჯირკვლის, თირკმელზედა ჯირკვლის).  ამასთან ერთად ზოგჯერ საჭიროა ოფთალმოლოგის, ნევროლოგის, ენდოკრინოლოგის ჩარევა, თავის ტვინის რენტგენოგრაფია თურქული კეხის აღწერით და  კომპიუტერულ-რეზონანსული  ტომოგრაფია. მხოლოდ და მხოლოდ ამგვარი დეტალური გამოკვლევის შემდეგ უნდა დაინიშნოს მკურნალობა. თერაპია, თავის მხრივ, უნდა იყოს კომპლექსური, პათოგენეტიკური  ფაქტორებიდან  გამომდინარე. ზოგიერთი პათოლოგია ოპერაციულ ჩარევას საჭიროებს, ზოგიერთი კი ჰორმონული პრეპარატებით მკურნალობას. ავიტამინოზით, მასის დეფიციტით (ხანგრძლივი დიეტის შედეგად) გამოწვეულ ამენორეას კვების მოწესრიგებითა და ვიტამინებისა და საჭირო მიკროელემენტების შევსებით  მკურნალობენ.
 რას ურჩევდით ქალბატონებს? 
– ვურჩევდი, მენსტრუაციული ციკლის ნებისმიერი დარღვევის დროს დროულად მიემართათ გინეკოლოგისთვის. ეს თავიდან ააცილებს მრავალ გართულებას, მათ შორის – უშვილობას, ნაადრევ კლიმაქსს, ანემიას, ინფექციურ დაავადებებს, ოპერაციულ ჩარევას და ა.შ.


თავიდან აიცილეთ ძუძუს კიბო

ფაქტია, რომ დიაგნოსტიკისა და მკურნალობის მეთოდები იმდენად სწრაფად იხვეწება, ექიმებმა ლამის ყველა დაავადება ერთბაშად განკურნონ. მაშ, რა ხდება, რატომ იზრდება წლიდან წლამდე ავთვისებიან სიმსივნეთა რიცხვი? რატომ იტანჯება მილიონობით ადამიანი უკურნებელი სენისგან? ამ 
ავადსახსენებელ სენს მედიცინა ჯერ კიდევ ვერაფერს უხერხებს, თუმცა ექსპერტებმა გამოსავალი იპოვეს: მათი თქმით, კიბოსგან თავის დაღწევის საუკეთესო გზა პროფილაქტიკაა.
უდიდესი მნიშვნელობა აქვს პრევენციას ქალებში ყველაზე მეტად გავრცელებული ავთვისებიანი სიმსივნის – ძუძუს კიბოს – თავიდან ასაცილებლად. ჯანმრთელობის მსოფლიო ორგანიზაციის მონაცემებით, სკრინინგში მონაწილეთაგან სარძევე ჯირკვლის კიბოთი 35%-ით ნაკლები ქალი გარდაიცვალა.
ძუძუს კიბოს პროფილაქტიკის მნიშვნელობაზე გვესაუბრება “ავერსის კლინიკის” ცენტრალური ფილიალის გინეკოლოგი ლელა თანდაშვილი:


 ქალბატონო ლელა, რამდენად გახშირდა კიბოთი ავადობა? 
– მსოფლიოში სიკვდილის ათ ყველაზე გავრცელებულ მიზეზს შორის კიბოს ერთ-ერთი პირველი ადგილი უჭირავს. ჯანმრთელობის მსოფლიო ორგანიზაციის მონაცემებით, 2004 წელს  ავთვისებიანი სიმსივნით 7.4 მილიონი ადამიანი

 დაიღუპა. ასე თუ გაგრძელდა, 2015 წლისთვის კიბო 83 მილიონზე მეტ ადამიანს შეიწირავს.
 კონკრეტულად ძუძუს კიბოზე რას გვეტყოდით? იმატა თუ არა ამ დაავადების შემთხვევებმა? 
– ქალის ავთვისებიან სიმსივნეებს შორის გავრცელების მიხედვით პირველი ადგილი ძუძუს კიბოს უჭირავს. ახალგაზრდა ქალების სიკვდილიანობის შემთხვევათა 16% სწორედ მის წილად მოდის.

2005 წლის მონაცემებით, წლის მიწურულს საქართველოში ავთვისებიანი სიმსივნის დიაგნოზით აღრიცხვაზე  29241 ადამიანი იმყოფებოდა, მათ შორის 54,1% ქალი. აქედან ლოკალიზაციის მიხედვით ავთვისებიან სიმსივნეთა ახალი შემთხვევების სტრუქტურაში 34,9%-ს – სარძევე ჯირკვლის, ხოლო  26,2%-ს სასქესო ორგანოთა სიმსივნეები შეადგენს. სამწუხაროდ, დიდია დაავადების უკვე დაგვიანებულ, IV სტადიაში გამოვლენილ შემთხვევათა რიცხვი.
განვითარებულ ქვეყნებში ამ პრობლემას საკმაოდ დიდი ყურადღება ეთმობა. ამის წყალობით ძუძუს კიბოს შემთხვევები წლიდან წლამდე მცირდება. საქართველოში კი ეს პრობლემა ჯერჯერობით საკმაოდ აქტუალურია. სასიხარულოა, რომ თბილისის მუნიციპალიტეტისა და გაეროს მოსახლეობის ფონდის (UNFPA) თანადაფინანსებით 2008 წელს ამოქმედდა ძუძუსა და საშვილოსნოს ყელის კიბოს პრევენციის პროგრამა, რომლის ფარგლებში განსაზღვრული ასაკობრივი ჯგუფის ქალებს უფასოდ ჩაუტარდებათ ძუძუსა და საშვილოსნოს ყელის კიბოს სკრინინგი. საზღვარგარეთ ანალოგიური პროგრამის წყალობით ძუძუსა და საშვილოსნოს კიბოთი ავადობის შემთხვევები საგრძნობლად შემცირდა. ვიმედოვნებთ, ჩვენშიც ასე მოხდება. 
 ცნობილია, რომ ძუძუს კიბოთი ავადობის შესამცირებლად ყველაზე მარტივი გზა თვითგასინჯვაა. რას გვეტყოდით ამის შესახებ? 
– გეთანხმებით. ძუძუს სიმსივნური პათოლოგია დროულად რომ აღმოაჩინოთ, ასე მოიქეცით: 
. ყოველთვიურად აწარმოეთ ძუძუს თვითგასინჯვა მენსტრუაციული ციკლის დამთავრებიდან მე-7-10 დღეს, მენოპაუზის შემთხვევაში – ყოველი თვის ერთსა და იმავე რიცხვში 
. პროფილაქტიკური გასინჯვის მიზნით რეგულარულად ეწვიეთ მამოლოგს: 18-35 წლის ასაკში – სამ წელიწადში ერთხელ,  35 წლის შემდეგ კი ყოველწლიურად.
. რეგულარულად ჩაიტარეთ ინსტრუმენტული გამოკვლევები. 35 წლამდე  ექოსკოპიური კვლევაა რეკომენდებული, 35 წლის შემდეგ – მამოგრაფიული.
. თუ თვითგასინჯვით ძუძუში პათოლოგიური ცვლილება აღმოაჩინეთ, დაუყოვნებლივ მიმართეთ მამოლოგს.
. ერიდეთ რისკის ფაქტორებს, რომლებიც ძუძუს კიბოს განვითარებას უწყობს ხელს
. ყურადღებით მოეკიდეთ ძუძუში პათოლოგიური პროცესების განვითარების სასიგნალო ნიშნებს: ძუძუს ტკივილსა და გაზრდას მენსტრუაციის წინა პერიოდში, გამონადენს (განსაკუთრებით –  სისხლიანს) დვრილიდან, ძუძუს დეფორმაციას და სხვა.
თვითგასინჯვა კი ამგვარად აწარმოეთ:
სარკის წინ
. ხელები ჩამოუშვით.
. შემოირტყით დოინჯი, დაჭიმეთ ხელისა და  მკერდის კუნთები.
. ხელები გაშალეთ.
. ორივე ხელი კეფაზე შემოიჭდეთ.
თითოეულ პოზაში ყურადღებით დაითვალიერეთ მკერდი, დააკვირდით, ხომ არ აღინიშნება სარძევე ჯირკვლების ასიმეტრია, ძუძუს ფორმის,  ზომის, კანის სტრუქტურის ან დვრილის ცვლილება (მაგალითად, ჩაბრუნება). ბოლოს 90-ით დაიხარეთ და კიდევ ერთხელ გულდასმით დაითვალიერეთ ორივე ძუძუ.
შხაპის მიღების დროს:
. დაიდეთ მარცხენა ხელი კეფაზე. მარჯვენა ხელის გასაპნული სამი თითით (საჩვენებელი თითის, შუა თითის და არათითის) წრიული მოძრაობებით გაისინჯეთ მარცხენა ძუძუ პერიფერიიდან დვრილისკენ. თანდათან უფრო ძლიერად დააჭირეთ თითები, რათა ღრმად მდებარე წარმონაქმნები შეუმჩნეველი არ დაგრჩეთ.
იგივე გაიმეორეთ მეორე ძუძუზე.
ჰორიზონტალურ მდგომარეობაში:
დაწექით ზურგზე, ბეჭების ქვეშ მჭიდროდ დახვეული პირსახოცი ამოიდეთ. მარცხენა ხელი თავქვეშ დაიდეთ, ხოლო მარჯვენა ხელის თითების წრიული მოძრაობით მარცხენა ძუძუ გაისინჯეთ პერიფერიიდან დვრილისკენ. თითების მსუბუქი ზეწოლით გაისინჯეთ ზერელე ქსოვილები, ძლიერი ზეწოლით კი – ღრმად მდებარე.
გულდასმით დაითვალიერეთ ძუძუსა და იღლიას შორის არსებული მიდამო და იღლიის ფოსო. 
 კიდევ ერთი პრობლემა, რომელთან გამკლავებასაც თქვენ მიერ ნახსენები უფასო პროგრამა ისახავს მიზნად, საშვილოსნოს ყელის კიბოა. რამდენად არის გავრცელებული ეს პათოლოგია?
– ჯანმრთელობის მსოფლიო ორგანიზაციის მონაცემებით, საშვილოსნოს ყელის კიბოს ქალის ავთვისებიან სიმსივნეებს შორის გავრცელებით მეორე ადგილი უჭირავს. ამერიკის კიბოს ასოციაციის მონაცემებით, საშვილოსნოს ყელის კიბოთი ყოველწლიურად 500 000-მდე ქალი იღუპება, რაც, დამეთანხმებით, საკმაოდ დიდი რიცხვია.
როგორც უკვე მოგახსენეთ, საქართველოში ქალის სასქესო ორგანოთა ავთვისებიან სიმსივნეებს მეორე ადგილი უჭირავს და კიბოთი საერთო ავადობის 26,2%-ს შეადგენს. აქედან 14.5% საშვილოსნოს ყელის კიბოზე მოდის.
 რამდენ ხანში ერთხელ უნდა ჩაიტაროს ქალმა გამოკვლევა, რათა პათოლოგიური პროცესი არ გამოეპაროს?
– პროფილაქტიკური გინეკოლოგიური გასინჯვა წელიწადში ერთხელ არის რეკომენდებული, ვინაიდან საშვილოსნოს ყელის ფონური და კიბოსწინარე დაავადებების მქონე პაციენტები ძირითადად არაფერს უჩივიან. დისკომფორტს ქალი მაშინ შეიგრძნობს, თუ ამ დაავადებებს სასქესო ორგანოების ანთებითი პროცესი დაერთო. სწორედ ამ უკანასკნელის გამო მოგვმართავენ ყველაზე ხშირად.
პროფილაქტიკური გასინჯვები განსაკუთრებით რეკომენდებულია იმ ქალბატონებისთვის, რომლებიც რისკის ჯგუფში შედიან. რისკის ფაქტორებს წარმოადგენს: 
. ნაადრევი (12 წლამდე) მენარქე;
. ნაადრევი სქესობრივი მომწიფება;
. სქესობრივი ცხოვრების ნაადრევი (18 წლამდე) დაწყება;
. მშობიარობა 20 წლამდე ასაკში და 40 წლის შემდეგ;
. ნაადრევი (45 წლამდე) მენოპაუზა;
. ანამნეზში რამდენიმე აბორტი;
. სქესობრივი პარტნიორების ხშირი ცვლა;
. პაპილომავირუსი;
. თამბაქოს წევა;
. დამძიმებული გენეტიკა (საშვილოსნოს ყელის კიბო სისხლით ნათესავებში);
. იმუნოდეფიციტური მდგომარეობა.

 

 საჭიროა თუ არა მოსახლეობის განათლება აღნიშნულ საკითხებთან დაკავშირებით?
–  საშვილოსნოს ყელის კიბოთი სიკვდილი ტრაგედიაა, რადგანაც ის იმ იშვიათ კიბოთაგანია, რომელთა განვითარებაც შეგვიძლია თავიდან ავიცილოთ. ყოველმა ქალმა უნდა იცოდეს, რომ თუ დროულად მიმართა ექიმს, საშვილოსნოს ყელის კიბოს თავიდან აიცილებს. კვლევისა და მკურნალობის თანამედროვე მეთოდები ამის საშუალებას ნამდვილად გვაძლევს.  


ჰორმონული კონტრაცეპტივები – რჩევები მოზარდებს

დღეს ბევრს ლაპარაკობენ ოჯახის დაგეგმვაზე, რომლის ერთ-ერთი მნიშვნელოვანი კომპონენტი ჩასახვის საწინააღმდეგო საშუალებების გამოყენებაა. წლების განმავლობაში მიიჩნეოდა, რომ კონტრაცეპტივები შობადობაზე ახდენდა გავლენას. დაკვირვებამ ნათელყო, რომ ჩასახვის საწინააღმდეგო საშუალებების გამოყენება ქვეყნის დემოგრაფიულ მდგომარეობას არ აუარესებს. სამაგიეროდ, კონტრაცეპტივებზე უარის თქმა ხელოვნური აბორტის რიცხვის მატებას და მისი გართულებების (უნაყოფობის, საშვილოსნოსა და მისი დანამატების ანთებითი დაავადებების, საშვილოსნოს ტრავმული დაზიანების, მენსტრუალური ციკლის დარღვევის, დეპრესიის) გახშირებას  იწვევს. ამიტომ კონტრაცეფციული საშუალებების  სრულყოფა, ფართოდ დანერგვა და, რაც მთავარია, მათ შესახებ მოსახლეობისთვის სათანადო ინფორმაციის მიწოდება მედიკოსთა პრიორიტეტულ ამოცანად იქცა.
განსაკუთრებით აქტუალურია ჩასახვის საწინააღმდეგო საშუალებების შესახებ მართებული ინფორმაციის მიწოდება ახალგაზრდებისთვის, რომლებიც ხშირად საკუთარი შეხედულებისამებრ ან არაკომპეტენტური მეგობრების რჩევით იძენენ კონტრაცეპტივებს.
ამჟამად ჩასახვის საწინააღმდეგო მრავალი საშუალება არსებობს. მათ ერთ-ერთ ყველაზე პოპულარულ სახეობაზე, კომბინირებულ ორალურ კონტრაცეპტივებზე, გვესაუბრება მეან-გინეკოლოგი, მედიცინის დოქტორი თეონა სალუქვაძე:

– კომბინირებული ორალური კონტრაცეპტივები (შემოკლებით – კოკ), რომლებსაც უმეტესად ჰორმონული კონტრაცეპტივების სახელწოდებით იხსენიებენ, ჩასახვის საწინააღმდეგო საშუალებების ოქროს სტანდარტია. თუ ქალი მიღების ყველა წესს დაიცავს, არასასურველი ორსულობის ალბათობა თითქმის ნულის ტოლია. სტატისტიკის თანახმად, კომბინირებული ორალური კონტრაცეპტივების მიღებისას წელიწადში ყოველი 1000 ქალიდან 60-80 ორსულდება. აქედან  მხოლოდ ერთი ორსულობაა გამოწვეული პრეპარატების არასაკმაო კონტრაცეფციული ეფექტით, დანარჩენი კოკ-ის არასწორი მიღების ბრალია. 
კოკ-ის მაღალი ეფექტურობა რეპროდუქციული სისტემის სხვადასხვა რგოლზე ერთდროული ზემოქმედებით არის გამოწვეული. კონტრაცეფციული მოქმედების ძირითადი მექანიზმი  ოვულაციის ინჰიბირება ანუ დათრგუნვაა, რის შედეგადაც ფერხდება საკვერცხეში კვერცხუჯრედის  წარმოქმნა, ხოლო თუ განაყოფიერება მაინც მოხდა, კომბინირებული ორალური კონტრაცეპტივები ხელს უშლის კვერცხუჯრედის საშვილოსნოს კედელში იმპლანტაციას ( ჩანერგვას). 
 კოკ-ის კიდევ ერთი ეფექტი საშვილოსნოს მილების პერისტალტიკის დაქვეითება გახლავთ. ამის გამო კვერცხუჯრედი საშვილოსნოში  დაგვიანებით ხვდება, ხოლო ცერვიკალური არხის ლორწოს წებვადობა იმატებს, რის შედეგადაც სპერმატოზოიდებს საშვილოსნოსკენ სვლაში ხელი ეშლებათ.

 
კოკ-ები, პრაქტიკულად, ლიდერია ჩასახვის საწინააღმდეგო ეფექტურ პრეპარატებს შორის, მაგრამ თუ მიღების წესების დარღვევის გამო ქალი მაინც დაორსულდა, ფეხმძიმობა ყოველგვარი გართულების გარეშე წარიმართება. დაორსულების შემთხვევაში ქალს ვურჩევთ, კონტრაცეპტივის მიღება შეწყვიტოს და ორსულობა შეინარჩუნოს.

პრეპარატის მიღება უნდა დაიწყოთ მენსტრუაციის პირველი-მეხუთე დღიდან ან ორსულობის ხელოვნური შეწყვეტიდან (აბორტიდან) იმავე ხნის შემდეგ. თუ კოკ-ის მიღება პირველივე დღიდან არ დაიწყეთ, მაშინ პირველი ორი კვირის მანძილზე აუცილებელი ხდება დამატებითი კონტრაცეფციის, მაგალითად, კონდომის გამოყენება. ტაბლეტები სასურველია მიიღოთ თანმიმდევრულად, ერთსა და იმავე დროს, 3 კვირის განმავლობაში, 1 აბი დღეში. თუ ბლისტერზე  21 აბია,  მომდევნო 7 დღის მანძილზე შესვენებაა საჭირო, ხოლო თუ 28 აბია – მიღება პაუზის გარეშე უნდა გააგრძელოთ.
ყველაზე ტიპური შეცდომა, რომელსაც უშვებენ ქალები, ტაბლეტის გამოტოვებაა. ასეთ შემთხვევაში რეკომენდებულია, გახსენებისთანავე მივიღოთ გამოტოვებული აბი და 2 კვირის მანძილზე დამატებით კონტრაცეფციას (მაგალითად, თავდაცვის ბარიერულ მეთოდს) მივმართოთ.
ჩასახვის შესაძლებლობა კოკ-ის მიღების შეწყვეტისთანავე აღდგება. ფერტილობა პოპულაციურ მნიშვნელობას (დაორსულების 85%-იანი ალბათობა 1 წლის მანძილზე) კოკ-ის მიღების შეწყვეტიდან დაახლოებით 4-6 თვის შემდეგ აღწევს.
ვინაიდან ფერტილობის აღსადგენად მეტწილად კოკ-ის შეწყვეტიდან 2-3 თვეა საჭირო, უმჯობესია, ამ ხნის მანძილზე ქალმა დაორსულებისგან თავი მაინც შეიკავოს.
პირველი 3-4 თვის მანძილზე, ადაპტაციის პერიოდში, ქალი შესაძლოა შეაწუხოს პერიოდულმა თავის ტკივილმა, გულისრევამ, თავბრუხვევამ, უგუნებობამ, მასტოდინიამ (მკერდის ტკივილმა). ამგვარი დისკომფორტის თავიდან ასაცილებლად უმჯობესია პრეპარატი ძილის წინ მივიღოთ, ხოლო თუ ჩამოთვლილმა სიმპტომებმა უფრო მეტხანს გაგრძელდა, შედარებით მცირედოზიან პრეპარატზე გადავიდეთ ან საერთოდ შევწყვიტოთ მათი მიღება.
კომბინირებული ორალური კონტრაცეპტივების მიღებისას მენსტრუალური ციკლის შუა პერიოდში შესაძლოა გაჩნდეს სისხლიანი გამონადენი. ასეთ შემთხვევაში ტაბლეტის ერთსა და იმავე  დროს მიღებაა რეკომენდებული, თუმცა არ არის გამორიცხული, გამონადენის მიზეზი სქესობრივი გზით გადამდები ინფექცია იყოს ან პრობლემა ესტროგენების უფრო მაღალი დოზის შემცველ კოკ-ზე გადასვლით მოიხსნას. არცთუ იშვიათად სისხლიანი გამონადენის მიზეზია ტაბლეტის გამოტოვება, აგრეთვე – ღებინება ან დიარეა, რის გამოც პრეპარატის შეთვისების პროცესი ირღვევა.
ქალმა უთუოდ უნდა მიმართოს გინეკოლოგს, თუ აწუხებს: მუდმივი და ძლიერი თავის ტკივილი, მხედველობის დარღვევა, ტკივილი მუცლის არეში, მკერდის ძვლის უკან ან ქვედა კიდურებში, სუნთქვის გაძნელება, კანის საფარველის სიყვითლე ან ქავილი, კანზე გამონაყარი, დეპრესია, არტერიული წნევის მუდმივი მომატება.
კოკ-ი ოვულაციის ანუ კვერცხუჯრედის მომწიფების დათრგუნვას იწვევს. შედეგად სისხლში ჰორმონების დონის სტაბილიზაცია მიიღწევა. ამავე დროს ქვეითდება ესტროგენების სტიმულაცია და მათი გავლენა სამიზნე ორგანოებზე, ყოველივე ეს კი პროლიფერაციული პროცესების შეფერხებას განაპირობებს, რაც, თავის მხრივ, ამცირებს საკვერცხისა და საშვილოსნოს კიბოს განვითარების რისკს. ასე, მაგალითად: კოკ-ის მიღების შემთხვევაში, გარდა კიბოსი (საკვერცხეების კიბოს განვითარების ალბათობა – 50%-ით, ხოლო საშვილოსნოს კიბოსი – 60%-ით მცირდება), საგრძნობლად იკლებს ზოგიერთი სხვა პათოლოგიის, კერძოდ: სარძევე ჯირკვლის კეთილთვისებიანი დაავადებების, საშვილოსნოს მიომის, საკვერცხეების კისტის, ოსტეოპოროზის ჩამოყალიბების რისკი. კომბინირებული ორალური კონტრაცეპტივები სამკურნალოდ რეკომენდებულია საშვილოსნოს დისფუნქციური სისხლდენების, საკვერცხეების პოლიკისტოზის, წინარემენსტრუაციული სინდრომის, ენდომეტრიოზული ტკივილის, მტკივნეული მენსტრუაციის, ჰიპერანდროგენული გამოვლინებათა (ცხიმიანი კანის, აკნეს, ჭარბთმიანობის) დროს. გარდა ამისა, კოკ-ი არეგულირებს მენსტრუაციულ ციკლს (ამცირებს მენსტრუაციული სისხლდენის ოდენობას, აწესრიგებს მენსტრუაციის დროს) და პოზიტიურად მოქმედებს რკინადეფიციტურ ანემიაზე.
დაავადებათა განვითარების რისკი კოკ-ის მიღებიდან 3-6 თვეში ვლინდება და ეს ეფექტი მიღების შეწყვეტიდან თითქმის 15 წლის მანძილზე გასტანს.
კოკ-ის მიღება დაუშვებელია აქტიურად მწეველი (15 ღერზე მეტი დღეში) ქალებისთვის, რომელთა ასაკი 35 წელზე მეტია, ასევე მათთვის, ვისაც აწუხებს: არტერიული ჰიპერტენზია, შაქრიანი დიაბეტი, ღვიძლის მწვავე და ქრონიკული  დაავადებები, სარძევე ჯირკვლის კიბო, გულის მანკი, გულის იშემიური დაავადებები, ღრმა ვენების თრომბოზი, შაკიკი, სისტემური წითელი მგლურა, სისტემური სკლეროდერმია ან გადატანილი აქვს ინსულტი, ეპილეფსია.
გართულებებისგან თავის დასაცავად, გირჩევთ, კონტრაცეპტივის გამოყენებამდე გინეკოლოგთან გაიაროთ კონსულტაცია. დაიხსომეთ: ჩასახვის საწინააღმდეგო საშუალებების შერჩევა ქალის ორგანიზმის თავისებურებათა გათვალისწინებით, ინდივიდუალურად უნდა მოხდეს.
გინეკოლოგთან საკონტროლო ვიზიტი კოკ-ის მიღების დაწყებიდან 3 თვის შემდეგ არის აუცილებელი. ამ ვიზიტის დროს გაუსინჯავენ სარძევე ჯირკვალს, მუცლის ღრუს ორგანოებს (მათ შორის – ღვიძლს), გაუზომავენ არტერიულ წნევას, ჩაუტარებენ გინეკოლოგიურ გამოკვლევას, საშვილოსნოს ყელის ნაცხის ციტოლოგიური გამოკვლევას, ხოლო თუ ქალი 35 წელს არის გადაცილებული, სისხლში გლუკოზის, ჰემოსტაზისა და ცხიმოვანი ცვლის მაჩვენებლებსაც გამოიკვლევენ.

რა იწვევს უნაყოფობას


იმედის გადაწურვა არ ღირს – უნაყოფობას, თუ გნებავთ, უშვილობას (ასე უფრო ხშირად იხსენიებენ) თანამედროვე მედიცინა ეფექტურად უმკლავდება. მთავარია, მიზეზი მოიძებნოს. თუმცა მიზეზიც არის და მიზეზიც… გვესაუბრება “ავერსის კლინიკის” მეან-გინეკოლოგი, აკადემიური დოქტორი მედიცინაში თეონა სალუქვაძე:

მარტივად რომ ვთქვათ, უნაყოფობა მომწიფებული  ორგანიზმის ჩასახვის უნარის უქონლობაა. წყვილი უნაყოფოდ ითვლება, თუ ქალი ერთწლიანი რეგულარული, ჩასახვის საწინააღმდეგო საშუალების გამოუყენებლად მიმდინარე სქესობრივი ცხოვრების შემდეგაც კი ვერ დაორსულდა.
უნაყოფობა საკმაოდ გავრცელებული პრობლემაა. ასიდან 15-20 წყვილი უშვილოა.
მრავალი წლის განმავლობაში მიაჩნდათ, რომ უნაყოფო მხოლოდ ქალი შეიძლებოდა ყოფილიყო, რაც სინამდვილეს არამც და არამც არ შეესაბამება. ქალს  უნაყოფობის  დიაგნოზს ვუსვამთ მხოლოდ მას შემდეგ, რაც  მამაკაცის  უნაყოფობა გამოირიცხება.
უნაყოფობის მიზეზი უამრავია, თუმცა ბრალი უმთავრესად ქალის ან მამაკაცის  რეპროდუქციული  სისტემის  ანატომიურ ან ფუნქციურ დარღვევას ედება. ქალის უშვილობის მიზეზი შეიძლება იყოს მუცლის ღრუსა და საშვილოსნოს მილში არსებული შეხორცება, რომელიც ხელს უშლის განაყოფიერებას (მის წილად უნაყოფობის შემთხვევათა 40-50% მოდის), ენდოკრინული დარღვევები (15-30%), ენდომეტრიოზი (20-30%). ასიდან 20-40 შემთხვევაში 
უნაყოფოა მამაკაცი, დანარჩენი 5-10% კი იდიოპათიური ანუ უცნობი მიზეზით განპირობებული შემთხვევების წილად მოდის. ძალიან იშვიათად უნაყოფობის მიზეზია საშვილოსნოს არარსებობა, საშვილოსნოს ღრუში არსებული შეხორცებები, ენდომეტრიუმის (საშვილოსნოს ღრუს ამომფენი ლორწოვანის) ბაზალური შრის ძლიერი დაზიანება. მცირე მენჯის ღრუში უხეში ანატომიური ცვლილებების ჩამოყალიბება ხშირად გენიტალური ტუბერკულოზით არის განპირობებული.
კიდევ ერთი მნიშვნელოვანი ფაქტორი, რომელსაც შეიძლება უნაყოფობა დავაბრალოთ, იმუნოლოგიური ცვლილებები გახლავთ. ამგვარი დარღვევებით განპირობებული უნაყოფობა ასიდან 3 შემთხვევაში გვხვდება.
უნაყოფო ქალთა ნახევარზე მეტს 2-დან 5-მდე  ფაქტორის კომბინაცია აღენიშნება.
უნაყოფობის მიზეზის დასადგენად გამოკვლევათა მთელი წყებაა საჭირო. გამოკვლევები, წესისამებრ, იწყება საერთო სქემით, ხოლო შემდგომი გეგმა წინა გამოკვლევათა შედეგების გათვალისწინებით ისახება.
იმუნოლოგიური ფაქტორი, რომელსაც უნაყოფობამდე მივყავართ, ანტისპერმული ანტისხეულების წარმოქმნაა. ისინი 1945 წელს აღმოაჩინეს და მას შემდეგ არ ქრება ინტერესი რეპროდუქციის პროცესის დარღვევაში ანტისპერმული ანტისხეულების როლის მიმართ. სტატისტიკა კი ასეთი გახლავთ: ანტისპერმული ანტისხეულები უშვილო წყვილთა 9-36%-ს უვლინდება, მაშინ როცა შვილიან წყვილებს შორის ისინი შემთხვევათა მხოლოდ 0,9-4%-ში წარმოიქმნება.
ანტისპერმული ანტისხეულები გახლავთ იმუნოგლობულინები (IgG, IgA, IgM), რომლებიც მიმართულნი არიან სპერმატოზოიდების მემბრანის ანტიგენების წინააღმდეგ. ცნობილია ანტისხეულების მთელი ჯგუფი: YWK II, BE-20, rSMP-B, BS-63, BS-17, HED-2 და 75-kDa. ისინი წარმოიქმნებიან  მამაკაცის და`ან ქალის რეპროდუქციული სისტემის სხვადასხვა უბანში და სპერმატოზოიდის სხვადასხვა ნაწილის წინააღმდეგ არიან მიმართულნი.
თუ ქალს საშვილოსნოს ყელში ანტისპერმული ანტისხეულები აღმოაჩნდა, ეს იმის მანიშნებელია, რომ შესაძლოა, ისინი რეპროდუქციული სისტემის  სხვა უბანშიც – საშვილოსნოს ღრუსა და ფალოპის მილის სანათურშიც – იყოს.
ქალის ორგანიზმში აღმოჩენილი ანტისპერმული ანტისხეულები გავლენას ახდენენ არა მარტო  სპერმატოზოიდების მოძრაობაზე, არამედ   განაყოფიერების პროცესზეც.
ანტისპერმული ანტისხეულები მხოლოდ ქალის ორგანიზმში არ წარმოიქმნება. მათ მამაკაცის ორგანიზმიც გამოიმუშავებს. ამ შემთხვევაში რისკის ფაქტორებია ტრავმა, ვარიკოცელე (სათესლე პარკის წყალმანკი), შარდსასქესო სისტემის ინფექციები, ონკოლოგიური დაავადებები, კრიპტორქიზმი, ქირურგიული ოპერაციები, თესლგამომტანი გზების დახშობა. 
ანტისხეულების გავლენა მრავალმხრივია. სახელდობრ, მათი ზემოქმედების შედეგია:
სპერმატოზოიდების მოძრაობის შეზღუდვა. ამ დროს  ანტისხეულები სპერმატოზოიდის მემბრანას სხვადასხვა ადგილას ემაგრებიან, იწვევენ სპერმატოზოიდების აგლუტინაციას (შეწებებას) და აფერხებენ მათ მოძრაობას. რამდენად შეასუსტებენ ანტისხეულები სპერმატოზოიდების მოძრაობის უნარს, მათ რიცხვსა და ფიქსაციის ადგილზეა დამოკიდებული;
სპერმატოზოიდების მოძრაობის ბლოკადა ცერვიკალურ (საშვილოსნოს ყელის) ლორწოში. ლიტერატურაში აღწერილია ანტისპერმული ანტისხეულებით დაფარული სპერმატოზოიდების ადგილზე მოძრაობა, ეგრეთ წოდებული ციმციმი;
კვერცხუჯრედის მბრწყინავ გარსში სპერმატოზოიდების შეღწევის შეფერხება.
აქვე გეტყვით, რომ ანტისპერმული ანტისხეულები ნაყოფის ზრდა-განვითარებაზეც ახდენენ გავლენას.
ანტისპერმული ანტისხეულების არსებობას ვეჭვობთ, როდესაც:
. არსებობს რისკის ფაქტორები;
.  შეცვლილია სპერმოგრამის მაჩვენებლები;
. პოსტკოიტალური ტესტი ავლენს ცვლილებებს;
. ექსტრაკორპორალური განაყოფიერება უშედეგო აღმოჩნდება;
. შეუძლებელია უნაყოფობის მიზეზის დადგენა.
პოსტკოიტალური ტესტი – ეს გახლავთ სპერმატოზოიდებისა და ცერვიკალური ლორწოს ურთიერთქმედების გამოკვლევა ანუ სპერმატოზოიდების რაოდენობისა და მოძრაობის უნარის შეფასება ცერვიკალურ არხში სქესობრივი აქტიდან რამდენიმე საათის შემდეგ.    
ანტისპერმული ანტისხეულების განსაზღვრის ოქროს სტანდარტი არ არსებობს, ამიტომ მეთოდები, რომლებსაც მათი განსაზღვრისთვის იყენებენ, ერთმანეთის დამატებას წარმოადგენს. ერთ-ერთი მათგანია პოსტკოიტალური ტესტი, რომლის ორი ვარიანტი არსებობს: 
ინ ვივო – ტარდება სქესობრივი აქტის (რომელიც ოვულაციის პერიოდს უნდა დაემთხვეს) შემდეგ 3-12 საათის განმავლობაში. ტესტი უარყოფითად ითვლება, როდესაც სპერმატოზოიდების მოძრაობა ქალის სასქესო ორგანოებში შენელებულია.
ინ ვიტრო – წყვილი გამოსაკვლევად ოვულაციის წინა დღეებში მოდის. მამაკაცი აბარებს სპერმას, ქალის საშვილოსნოს ყელიდან კი იღებენ  ასპირატს (ცერვიკალური ლორწოს წვეთს), რის შემდეგაც მიკროსკოპით აფასებენ სპერმატოზოიდებისა და ცერვიკალური არხის ლორწოვანი გარსის ურთიერთქმედებას. ტესტი უარყოფითად ითვლება, როდესაც საშვილოსნოს ყელის ლორწოვანში სპერმატოზოიდების წინსვლითი მოძრაობა შენელებულია.
პოსტკოიტალური ტესტის უარყოფითი პასუხის მიზეზი უმეტესად სპერმაში ანტისპერმული ანტისხეულების არსებობაა, რაც იმას ნიშნავს, რომ პრობლემა მამაკაცს უკავშირდება. არცთუ იშვიათად პრობლემა კომბინირებულია – ანტისხეულები ორივე პარტნიორს აქვს.
შეიძლება ითქვას, რომ უნაყოფობის სადიაგნოზოდ მიღებული მეთოდებიდან პოსტკოიტალური ტესტი ყველაზე ჭირვეულია, ამიტომ პარალელურად საჭიროა სხვა გამოკვლევების  ჩატარებაც. მათ შორის მნიშვნელოვანია MAR-ტესტი, Immunobead-ტესტი, ლატექს-აგლუტინაციის ტესტი და იმუნოფერმენტული მეთოდი (ELISA).
საზოგადოდ, მამაკაცის გამოკვლევისას ანტისპერმული ანტისხეულები უმჯობესია სპერმაში განისაზღვროს. გამონაკლისია აზოსპერმია – სპერმაში სპერმატოზოიდების არარსებობა. ამ შემთხვევაში ანტისხეულების განსაზღვრა სისხლში ხდება.
ქალის გამოკვლევისას ანტისპერმული ანტისხეულები უნდა განისაზღვროს როგორც  ცერვიკალური სითხის ასპირატში, ისე  სისხლის პლაზმაში.
უნაყოფობის ამ ფორმის დროს მოწოდებულია მკურნალობის მრავალი სქემა, რომელიც ეტაპობრივად ხორციელდება. პირველი ეტაპზე სასურველია ყველა იმ მიზეზის აღმოფხვრა, რომელმაც შეიძლება აღნიშნული პრობლემა გამოიწვიოს. ასეთია უროგენიტალური ინფექციები, ვარიკოცელე, თესლგამომტანი გზების დახშობა და სხვა.
წესისამებრ, მკურნალობას იწყებენ კონტრაცეფციის ბარიერული მეთოდის (კონდომის) მუდმივი გამოყენებით 3-6 თვის განმავლობაში ან ექიმი ურჩევს წყვილს, კონდომის გარეშე სქესობრივი კონტაქტი  მხოლოდ ოვულაციის  დღეებში ჰქონდეთ. როცა სპერმა იშვიათად ხვდება ქალის საშოში, ეს ხელს უწყობს ანტისხეულების ტიტრის შემცირებას, რაც, თავისთავად, ზრდის დაორსულების შანსს. პარალელურად შესაძლოა დაინიშნოს საშვილოსნოს ყელის ლორწოს გამათხელებელი  და ანტისხეულების ტიტრის დამაქვეითებელი, მაგალითად, ჰორმონული თერაპია. კონსერვატიული მკურნალობის უშედეგობის შემთხვევაში კი მოწოდებულია მეუღლის სპერმით ინსემინაციის (სპერმის ხელოვნურად შეყვანა ქალის საშვილოსნოს ღრუში) კურსი ან ინ ვიტრო განაყოფიერება.  


« < 123 > »
ზემოთ