ახალი ცხოვრება ახალი წლიდან: როგორ გადავეწყოთ ჩვეულ რეჟიმზე დღესასწაულის შემდეგ

გააზიარე:

ახალი წლის დღეები დაუსრულებელ დღესასწაულს ჰგავს. დეკემბრის პირველივე რიცხვებიდან ქალაქებში საახალწლო განწყობა ისადგურებს, ვიტრინები ირთვება, ტელევიზორსა და რადიოში, რეკლამით დაწყებული, გადაცემებით დამთავრებული, ყველაფერი ახალ წელს უკავშირდება. დეკემბრის დამლევს ეს ყველაფერი კულმინაციას აღწევს. იწყება ხანგრძლივი არდადეგები სკოლებში, სამსახურების უმრავლესობა საშვებულებო რეჟიმზე გადადის... ერთი სიტყვით, თითოეული ჩვენგანი, რა ნეიტრალურადაც უნდა იყოს განწყობილი ამ დღესასწაულის მიმართ, უნებურად მაინც ერთვება საერთო ორომტრიალში. თუმცა ყველაფერს აქვს დასასრული და ძველით ახალი წლის გაცილების შემდეგ დგება ის დღეც, როდესაც ლამის ოჯახის წევრად ქცეული მორთულ-მოკაზმული ნაძვის ხე უნდა დავშალოთ, გირლანდებს და სათამაშოებს ყუთებსა და კარადებში მივუჩინოთ ადგილი და ცხოვრების ადრინდელ რიტმს დავუბრუნდეთ.

სწორედ აქ იჩენს თავს მოვლენა, რომელსაც ფსიქოლოგები დღესასწაულის შემდგომ დეპრესიად მოიხსენებენ. როგორ დავძლიოთ დღესასწაულის დასრულების უსიამოვნო შეგრძნება? როგორ დავუბრუნდეთ ცხოვრების ჩვეულ რეჟიმს ხანგრძლივი ზეიმის შემდეგ?

 

ნაახალწლევს სამსახურში დაბრუნება ძალიან ჰგავს საზაფხულო შვებულების შემდგომ პერიოდს. ორგანიზმს მრავალი მიმართულებით უწევს გადაწყობა. ახალი წლის დღეებში ძილ-ღვიძილისა და კვების რეჟიმი ირღვევა, ფიზიკური აქტივობა და დატვირთვა მცირდება, სამსახურებრივი ვალდებულებები იკლებს, უქმეების დასრულებისთანავე კი ეს ყველაფერი ადრინდელ რიტმს უნდა დაუბრუნდეს, ამიტომ მნიშვნელოვანია, სწორად გადავეწყოთ ადრინდელ რელსებზე და თავი დავაღწიოთ უსიამოვნო მოვლენებს, რომლებიც ამ ყველაფერს თან ახლავს.

 

ნაბიჯი პირველი – სწორი კვება

უპირველეს ყოვლისა, საჭიროა კვების რეჟიმის აღდგენა, რადგან ახალი წლის დღეებში ადამიანს ზომაზე მეტი საკვების მიღება უწევს. ამასთან, საახალწლო სუფრაზე კერძების უმეტესობა ზედმეტად ცხიმიანი, ცხარე, მაღალკალორიულია. ამ ყველაფერს ემატება ალკოჰოლიც, ურომლისოდაც სადღესასწაულო სუფრა, რა თქმა უნდა, წარმოუდგენელია... ამ დღეებში თავს უფრო მეტის უფლებას ვაძლევთ, ვიდრე სხვა დროს, დიეტასა და სწორ კვებას ცოტა ხნით ვივიწყებთ, ეს კი, ცხადია, ორგანიზმისთვის ზედმეტი დატვირთვაა. კუჭს უჭირს მიღებული საკვების მონელება-გადამუშავება, თავს იჩენს ზედმეტი წონაც.

ორგანიზმის ჩვეულ რეჟიმში დასაბრუნებლად გადამწყვეტი მნიშვნელობა აქვს სწორ კვებას. დიახ, სწორ კვებას და არა დიეტას ან, კიდევ უარესი, შიმშილობას, რადგან რადიკალური ზომები: საკვებზე უარის თქმა, მხოლოდ განსაზღვრული პროდუქტით, მაგალითად, წიწიბურათი, ფორმის დაბრუნების მცდელობა და ა.შ. – ორმაგი დარტყმაა ორგანიზმისთვის. ამ მეთოდს დიეტოლოგები მეტაბოლურ სტრესს უწოდებენ და გვაფრთხილებენ, რომ უკიდურესობა – ჯანსაღი საკვებისგან თავის შეკავება – გაცილებით საზიანოა.

საკმარისია, უბრალოდ ამოვიღოთ რაციონიდან ზედმეტად ცხიმიანი, ცხარე, მარილიანი კერძები, დილა დავიწყოთ ბურღულის ფაფით, გავამდიდროთ რაციონი უმი ხილითა და ბოსტნეულით, რძემჟავა ბაქტერიების შემცველი რძის ნაწარმით, მივიღოთ საკმარისი რაოდენობის სითხე. დანარჩენს ორგანიზმი თავად მოაგვარებს და ის უსიამოვნებები, ზემოთ რომ ვახსენეთ, სულ მალე წარსულში დარჩება.

 

ნაბიჯი მეორე – ძილ-ღვიძილის რეჟიმის მოწესრიგება

ადამიანის ჯანმრთელობის საერთო მდგომარეობა მნიშვნელოვანწილადაა დამოკიდებული ძილ-ღვიძილის რეჟიმზეც. წარმოუდგენელია, ახალი წლის დღეებში ერთი ღამის გათენება მაინც არ მოგვიწიოს. ეს, ცხადია, უარყოფითად აისახება ჩვენს ჯანმრთელობაზე, რადგან როდესაც ძილის რეჟიმი დარღვეულია, არც ძვირად ღირებულ მკურნალობას, არც გამაჯანსაღებელ პროცედურებს აზრი არ აქვს. ძილის უკმარისობა სერიოზული დარტყმაა ორგანიზმისთვის.

ხანგრძლივი კვლევის შედეგად სპეციალისტებმა დაადგინეს, რომ ბავშვებისა და მოზარდებისთვის დღე-ღამეში აუცილებელია 9-11-საათიანი ძილი, 20-დან 50 წლამდე ასაკის ადამიანს უნდა ეძინოს არანაკლებ 8 საათისა, ამაზე უფროსი ასაკის პირებისთვის კი 6-7-საათიანი ძილიც ნორმალურია. გაითვალისწინეთ ეს და მოიწესრიგეთ ძილის რეჟიმი, რადგან ძილის დეფიციტი უამრავი დაავადების პროვოცირებას იწვევს.

 

ნაბიჯი მესამე – რეაკლიმატიზაცია

დაბოლოს, გაგიგონიათ რამე რეაკლიმატიზაციის შესახებ? ასე უწოდებენ სპეციალისტები მდგომარეობას, როდესაც ხანგრძლივი შესვენების შემდეგ კვლავ მუშაობის ჩვეულ რიტმს ან ფიზიკურ აქტივობას უნდა დავუბრუნდეთ. სამსახურში დაბრუნება რომ არ გაგიჭირდეთ, ადაპტაციისთვის სამი დღე მაინც გამოყავით. ამ დღეების განმავლობაში ეცადეთ, არ იფიქროთ დაგროვილ საქმეზე და მეტისმეტად არ გადაიტვირთოთ. თუ საახალწლო შვებულება მოგზაურობაში გაატარეთ, ეცადეთ, შვებულების დამთავრებამდე რამდენიმე დღით ადრე დაბრუნდეთ შინ. მით უფრო, რომ მგზავრობის შემდეგ ორგანიზმს დასვენება სჭირდება. ნურც დაგროვილი სამუშაოს ერთ დღეში შესრულებას ეცდებით – საქმე გაანაწილეთ და დატვირთვის ჩვეულ რეჟიმზე ნელ-ნელა გადაეწყვეთ. ასე ადაპტაციის პროცესი გაცილებით უმტკივნეულოდ ჩაივლის.

 

 

გააზიარე: